من انصدمت سيارتنه بسيارتهم طگ الاير باگ بوجهنه وشي طبيعي هذا فقدنه الوعي بنفس اللحظة مااعرف بعد مرور كم دقيقه فتحت عيني وجانت كلش مغوشه مدا اشوف زين رجعت غمضت وفتحت عيني وراسي جان على جهة اليمين شفت فد تله عاليه وهدوء قاتل بحيث دا اسمع صوت الهوه ولو جنت مااسمع اي شي بس اتخيل اسمع صوت هوه كلت اني وين؟؟؟ ردت اگوم مگدرت ف نزلت راسي شفت ايدي وجتفي مكسورات ولهذا مگدرت احركهم وعظم الترقوه طالع من ايدي ويجري دم يعني مزروفه بس زرف صغير على حجم العظمه ف چان ينزف باستمرار نسيت اكتب شنو چنت لابسه چنت لابسه تراكسود رصاصي وعبايه سوده وشال اسود والتراكسود صار ماروني من كمية الدم كلت زين بس جتفي وايدي هسه انزل دا اخلص من هذا الصار واروح اسوي ايدي اجبرها يعني ف دا انزل باوعت على رجلي شفت الدشبول راجع كلش عليها حاولت اجرها مگدرت ابد كلش ثكيلة جانت لدرجة مگدرت احركها!! ف كل الكتبته بثواني صار و درت وجهي دا اشوف ابويه شصاير بي ملگيته يمي گبل بجيت خفت صاير بي شي زين خاف عافني وزين وزين الف فكره اجتني بثانيه وحده بس ردت اشوفه الوالدي دا اطمئن لان كلش خايفه الموقف هوايه صعب صح هسة دا اكتبه يمكن تحسون بي بنسبه كلش قليلة بس الواقع شي هواية مختلف نرجع للموضوع ف شفت الباب مالته مفتوحه مگدرت حتى احچي ولا اي كلمه واغمى عليه بوكتها واحد بالشرطه شايفنه ومتبرع بالمساعده بعد ما والدي رايح يبجي الهم ويگول بس انقذوا بنتي حتموت طبعاً هذا الكلام سمعته من ابويه وره فترة طويله يعني بوكتها لاجنت اعرف شديصير ولا اسمع ولا اشوف غير الي ذكرته ي نرجع للسالفه ولا سياره وگفت النه ولا احد يقبل يساعد احد مسوي حادث لان يبتلي وهو الطريق تقريبا صحراوي ومابي هوايه عالم والشمس بدت تنزل وچانت السيارة دتحترگ حاولو يطفوها وكلش بصعوبه طفت بس هم چانت على ثواني وتحترگ بيه اني كل هذا الي ديسوي الولد چنت فاقده الوعي بعدين فتحت عيني لگيت هوه و ولد ويا يحاولون يفتحون الباب مالتي بس للأسف جانت متنفتح ابد فتحو الباب من جهة الوالد كلش فرحت لان لگيت احد يساعدني بس ذكرت الكم حتى مااكدر احجي واني عباره عن دم بدو يجروني ويحجون ومخبصوين بس اني مااسمعهم ف بدو يجروني منين؟ من ايدي الي مكسوره اساساً ونسيت اشرح الكم ايدي انكسرت لان انضربت بالتكمه😅 مااعرف اسمها هم هيچ يسموها انكسرت لان مرابطه حزام الامان ف راسي ضارب سقف السياره وراجعه وايدي مضروبه بيها المهم بقو يجرون بيه لحد ما طلعوني من السياره وخلوني بالگاع ع الحصو والرمل راسي عدل وبس سماء گدامي مااعرف اوصفلكم من شفت السماء بس كلش حسيت بشعور حلو وغريب وطبعاً الدم يجري مني بدون اي توقف ومن وجهي هم مثل مذكرت الكم هالشي زين خلي احجيلكم على وجهي من طگ الاير باگ واني وملابسه حزام الامان انحك بوجهي وكل وجهي مشخط بس شنو شخوط عميقه لدرجه من بين الشخوط طالع اللحم مال وجهي ومكسوره ثلاث اسنان ومن الصدمه عاضه لساني وهم مشگوك ارجع احچي الكم التكمله مال انقاذي
