خلي نرجع ليورة ..أكو تفاصيل بالمستشفى حبيت اذكرها الكم مذكرتها بالاجزاء السابقه اني بقيت بالمستشفى تقريباً شهر بخلال هذا الشهر مثل مذكرت سابقاً اني مبچيت أبد مو بأرداتي يعني مو اني مختاره ماابچي چنت مجردة من كل مشاعر مرت فد ليله هيه ببدايه الحادث يعني چنت كل شويه ارفع راسي وافتح عيوني كلها وارجع انام اهلي هواية قلقوا من هذا الشي ف سألو الطبيب وگال الهم هاي دتتذكر الحادث ماكو أي شي عدا...
اني اكثر الوكت چنت اصفن او أنام 😅 من سويت ثاني عملية چان اكو ببطني الم غريب وكلش قوي و أون هوايه من الألم اهلي چانو يبچون عليه بس اني اصلا چنت مو بعالمهم وچنت احس عندي ولاده بهاي الاثناء طلعت خطيبي من الغرفة گتله اطلع دا اولد كنز(اسم بنتنه) الكل اتأثر وبچة چانو يتمنون الي دا احچي هذا هو الحقيقة وميكون شي خيالي .. الالم الي عشته مااگدر اوصفه الكم بس احس الله رحمني من چنت مو بوعيي ولاچانت عندي ذاكره لان الالم چان ميتحمل رغم چانو ينطوني اقوى انواع المسكنات اتذكر كل شويه يجي احد من اهلي او صديقاتي يذكرني بموقف او تفصيله صارت قبل الحادث اتضحك حتى يخف المي ويحسوني طبيعيه ..طبعاً فضحت كل اصدقائي وصديقاتي وعلاقاتهم السرية😂 وگلت المن يحبون والكل يضحك بس اني بلا شعور ولا أي ابتسامه الغريب بالموضوع الكل چان يعيش شعور متناقض ياكلون ويشربون وينامون بس روحهم ميته وشعورهم كلش مؤذي كمية الناس الي اجوي عليه كلش جبيرة حتى ناس اعرفهم من سنين وممتواصله وياهم كلهم اجوي علمودي وعلمود يوكفون الى والدتي ..والدتي ماكو بشر ممسويه خير الة واگفه للكل وتحب الكل كل شخص اجه زارني والدتي مسوية موقف حلو ويا وأصلا الله رجعني الها بسبب اعمالها وطيبتها ..
اول ضحكة ضحكتها لأختي الچبيرة الي چانت مسافرة من سألتي شنو معنى الوشم الي بأيدچ رفعت چف ايدي وگتلها مكتوب قاومي وابتسمت واني فعلاً قاومت مريت بمواقف ولحظات مچنت ابد اتخيل راح تصير ولا اتخيل راح اتحمل هيچ شي بيوم من الايام بس الحمدلله الله انطاني الصبر والقوة وفعلا (لايكلف الله نفساً إلا وسعها) ..ومثل مبچيتكم خلي اضحكم على سوالف صارت ويايه مرة چنت نايمه وخطيبي گاعد يمي حرگت رجلي رغم چانت كلش صعبة احركها يعني على اساس دا انزل من السديه ف سألني شتريدين تسوين؟ گلت اگوم اسوي الك غدة لان جاي من الشغل وتعبان ف ضحك😂 ومرة گاعدين يسولفون وياية ونضحك وخطيبي بينهم گاعد ديسولف مواقف مضحكة صايرة بيناتنه قبل وفجأه انداريت على اخويه گلت اله شسم خطيبي😅ومرة اختي الچبيرة راحت من گدام عيني ف اني سألت اختي الاصغر منها وين اختي الچبيرة شو ماأجتي عليه الحد هسه وخطية هيه شهر كامل يمي بالمستشفى😂😂 وموقف ثاني صورو فيديو واني وياهم علساس يدزو للبشير شو وكلهم ملتمين يمي مع انه الطبيب منع هذا الشي چان يگول ميصير بس شخص واحد مرافق الها لان
چنت احتاج هواء نقي لان كثرة الاشخاص يأثرون عليه ويقل الاوكسجين ف ميوصل الدماغي اوكسجين وهذا الشي هو سبب رئيسي بفقدان ذاكرتي ..قبل مااطلع من المستشفى بأسبوعين بديت اشرب سوائل وبعدها كمت احقق احلامي بكل الاكلات الي احبها يجيبوها اليه .. ييي نرجع من رجعت البيتنه هم انطاني الطبيب مسكنات قوية كلش وبديت اخذ ابرة تحت الجلد الي هيه تمنع تخثر الدم وكلش مؤذيه يعني الله يساعد الي عنده سكر ياخذ انسولين.. من رجعنه للبيت واني بعدني ذاكرتي كلش موزينة وبس انام اختي الچبيرة سوت ورقة بيها اسم الادويه وموعدها وعلگتها يم راسي حتى محد ينسه اخاف هيه مو يمي بس والله معافتني ولا لحظة هيه وبنت خالي مااتذكر يا يوم بالضبط بس كمت اشوف اهلي وخطيبي واهله وكلهم مااعرفهم والله يعني شفكرت اني هسه احچيلكم فكرت اني لاگيني بشارع وجايبيني يمهم يعني مو اهلي☹️
بنفس الفترة الي چنت كلشي مااتذكر بيها چان يجي خطيبي عليه يوميه ويجيبلي حليب ويگعد يمي ويلزم ايدي واني فرحانه اكو رجال يلزم ايدي ويحبني وكل هاي الاشخاص بالبيت الي همه متبنيني ميدخلون بهذا الشي وعايفي يگعد يمي
مرة من المرات راد يروح اني لزمت ايده قوي كتله اني كلش انعجبت بيك ابتسم گال اني هم وراح واني بقيت فرحانه وانتظره يجي چانت بنت خالي گاعدة يمي من راح گالت شنو اسويلچ عشه اني اختاريت اكلتي المفضله الي هيه فنگر سوتلي لفه اكلتها وانطتني الدوه وغيرت حفاظتي وبعدها صار وكت النوم خلو اليه فلم على التليفزيون بعيد عندي كم متر واني اشوف كلش مغوش نص الفلم كتلهم مدا اشوف اني والصوت بده يأذي راسي طفو عاد طفو وچانت بس اختي وبنت خالي ينامون يمي بالغرفة علمود مااحتاج شي رغم ميصيرلازم بس وحدة منهم ..ضربتني ابره تحت الجلد اختي وانطتني الدوة ومن قوه الدوة نمت وگعدتني الصبح مسويتلي ريوگ صحي واخذت الدوة طبعا هذا الي دا احچي الادويه والاكل والحفاظات والابر كله استمرت سته شهور بهذا اليوم الي الوحيد اتذكرتة😅 اجه خطيبي اول مشفتة كتله اني معجبة بيك انت كلش حلو عدت اله نفس الحچي الي كل يوم اعيده لان انسه المهم گتله انت تحبني گال ي اكيد كتله ليش متخطبني من اهلي لعد گال ان شاءالله وبقة يجي يشوفني كل يوم ويجيب اليه حليب وتجي والدته هم كل يوم وگلت الكم مااعرف اهلي بعد مرور شهر يلا عرفتهم وعرفت خطيبي بيوم الي عرفتهم منو حضنتهم بأيد وحده لان الخ مااگدر احركها والدتي مچانت تجي هواية يمي لان متتحمل بس تشوفني تبچي اكثر بشر بالدنيا تعب نفسياً بهذا الحادث هيه والى الان هيه كلش تتأذه بس تشوفني ..بيوم من الايام گلت الهم بعد مااريد السديه غيرولي مكاني ..
اكمل الكم؟؟؟
