بقت هاي الحالة من اگعد من النوم انسة شبيه واتفاجئ بالكرسي انقهر كلش بس ماابين الاحد بس خطيبي مكرهته بعيشته😂 يوميه اشكيلة واگول اله اريد امشي شگد صبرني هالرجال شگد خلاني اصير قوية وعندي امل ابد مفد يوم خجل مني واني على الكرسي او استخدم حفاظة او وجهي متشوه واسناني مكسورة ابد محسسني اني غير عن باقي البنات اصلا يومية يگلي كلش صايرة حلوة بعد الحادث زاد جمالج وياخذلي صور او يجيبلي هديه يسوي اي شي بالدنيا يفرحني هو و والدتي من صدگ هم سبب قوتي الى هذا اليوم ..بدت تنفتح الطرق رحنه اول مرة اني واختي الچبيرة وخطيبي و والدتي واخويه جان يسوق السيارة اخذ سيارة صديقة لنص الطريق ورجعونه تقريباً ٣ مرات رحنه لنص الطريق ويرجعونه بس بين روحة وروحة فد اسبوع او اكثر .اخر مرة گالو اهلي اذا هم رجعونه نرجع الدكتورج الي اني مااحبة شگد دعيت ميرجعونه مااريد اشوفه والله هو يمرضني 🤦🏻♀️اخر محاولة سمحو النه نروح للمحافظة الي بيها الدكتور الجديد طبعا الدكتور الجديد معرفة العائلة الچبيرة وعائلتي هم يعرفنه كلش زين وانطانه رقمة الخاص خطيبي خابرة ورتب موعد ويا واول موصلت العيادة دخلوني فحصني بأيدة وشاف شگد زاوية رجلي مع العلم كل الاشعة القديمه والتقارير جايبيهم ويانه شافهم وگال روحي اخذي اشعة جديدة هم شالوني خطيبي واخوية كل واحد شايل ايد ورجل😂يارب وصلتكم الفكرة رحت واخذت اشعة جديدة صاحب الاشعة هم سأل شبيه وحچولة وگال وضعچ كلش زين محچيتلكم اي احد يشوفني ويسأل شبيه اهلي يحچولةالحادث😂فد اضوج يعني مااحب ياهو الي يجي يعرف هالشي المهم رجعت للدكتور بغرفة التداوي فتت ف شاف الاشعة گال عظامج بعدها مو كل ملتئمة بس زينه شو گومي اوكفي طبعاً والدتي يمي واكفة اني و والدتي گلنه لا ميصير گال شنو ميصير اني دكتور دا اگلچ گومي اوكفي لزم ايدي وخلاني اوگف اول موگفت بجيت من الفرحة چان حلمي اوگف وبعلم الطبيب مخايفة يعني گال امشي تعالي راح شوية بعيد يمكن متر معرفت امشي بقيت واكفة عاد راح للغرفه مالتة ديكتب التقرير اني شالوني خلوني ع الكرسي وخلوني يم الباب مال غرفة الطبيب و والدتي واخوية وخطيبي فاتو يم الطبيب گال تعالي گومي فوتي گتلة لا مرتاحة هنا لح انه امشي واروح يمهم بس والله العظيم مجنت اعرف امشي كلش ناسية ف گال الرجل اليمنه بيها تكلسات كلش قوية لهذا السبب مدتنثني اذا عندكم استعداد بعد يومين اسوي عملية اثني رجلها بأيدي اذا انثنت متعتبر جراحية تكلفتها اقل واذا ما انثنت لازم تدخل جراحي وتكلفة اعلى بس نسبه جبيرة متحتاج جراحة وگال كلش زينه انتي ومبقى شي هانت هذا اليوم چان تاريخي فرحتي متنوصف طلعنه من العيادة كلنه نبجي من الفرحة اني بالمذكرة مال تلفوني كاتبة كل التواريخ المميزة مثلا يا تاريخ استخدمت كرسي متحرك يا تاريخ نزلت رجلي اليمنه وياتاريخ بديت علاج طبيعي كلشي كاتبة وكل شهر اكتب التاريخ الي صاير بي انجاز بالنسبه الية يعني رجعنه للبيت الي هو بيت خالتي بشرناهم كلش فرحو مبقة احد بالدنيا مفرحلي گلت الاخوية اريد امشي گال لا اخاف خلي نشتريلج مشاية وكملي عميلتج والله كريم توسلت بي امشي ف گومني حتى امشي تعرفون شنو شايفين الجلي؟اني هيچ رجلي عبالك جلي او ريشة كلش خفيفات ويهتزن هواية كلش شي يخوف حتى اني مردت امشي بعد صح شعور يجنن بس خفت تنكسر رجليناتي يعني كلش خفيفات ميتحملن وزن ..صار ثاني يوم موعد العملية اجتي من الصبح صديقتي وزوجها اخذونه للمستشفى اول مدخلة للمستشفى اكيد عقمونه وكمامات وجفوف گعدت شوية على قنفة اتمددت يعني نص ساعة وصاحت اسمي فد ممرضة اجوي ساعدوني گعدوني على الكرسي مالتي ودوني يمها اخذت دم مني علمود الفحوصات وبقيت انتظر والدتي وخطيبي ضلو يسوون اجرائات المستشفى وهالامور واخوية گعد يمي وصديقتي كلش چانت نفسيتي زينه وضلينه نضحك ونتشاقه واكيد تعرفون اني صايمه ميصير لا اكل ولااشرب شي كلش عطشت هلگد سولفت ومگدرت اشرب مي عاد خلصو الاجرائات ورواحو صديقتي وزوجها و صعدوني بالمصعد للغرفةمالتي وبقيت متمددة ع السدية ضليت ادعي ومتأكدة العملية سهلة وراح تنجح قريت مناجاة(مثل آيه قرآنيه) وغفيت شوية گعدت لگيت اهلي ديتغدون فد جعت واتمنيت اكل شي ضليت اتوسل بيهم عاد والدتي وكلتني شويه واجة ممرض خلة اليه كانيولا ومغذي وبقيت انتظر هواية تقريباً ٩ساعات صارت الدنيا عصر عاد فجأة واجوي جابو سدية مال عمليات واخذوني مااعرف اوصفلكم مشاعري بهذيج اللحظة جسمي يرجف وكلش خفت خطيبي باسني من راسي گال لتخافين انتي قوية و والدتي واخوية هم باسوني ف اخذوني ورحت😔 الطريق كله بس ابچي من الخوف فتت لغرفة العمليات بدو يخلون مغذيات واني انتظر الدكتور يعني اقلها واحد اعرفه بلكت يروح الخوف تقريباً نص ساعة واجة گال شلونج اخبار معنوياتج گتلة خايفة وبجيت گال تنامين تكعدين تلكين كلشي خلصان خلو اليه بنج بالابرة وبدت ايدل تنمل ومشة لجسمي لحد موصل راسي اني بس دا اريد اگلة اني دا احس وممتتخدرة😂ونمت حاول يثنيها بدون تدخل جراحي منثنت ابد ف اتخيلو الوجع بعدين! اضطر يسوي العمليه جراحية فتح رجلي وطلع كمية تكلسات فضيعة وطلع برغي هم چان مأثر وسد رجلي وطلعوني من العمليات غرفة العمليات بالطابق السادس وغرفتي بالطابق الثاني واهلي ينتظروني بغرفتي اني بعدني مو كلش فاكني البنج عيطت عياط واصل الاهلي بالطابق الثاني هرجت المستشفى😂 من الوجع اعيط يعني اني بدون وعي واتوجع واصيح بأسم خطيبي اريد فلان وابجي هو واخوية طلعو من الغرفة ديجون للمصعد اني وصلت للمصعد ف باسني من خدي گال اني يمج غلطت علية گتلة لتبوسني خطيبي ميقبل وبقيت ابجي اريدة😂😂 بعدين گلت اني يم الله وضحكت وگلت اخوية مات😂بعدين گلت اني بالكعبة دا احج اشگال لغيت واهلي يبوسوني ويلزمون راسي اصلا اني مااشوف وطعم البنج بحكلي كلش مطيب وميتة وجع چنت اعيط عليهم بعدين انطوني مسكن قبل ليفكني البنج كلش ونمت اجة الدكتور من نمت گايل الاهلي التيتانيوم صاير على الركبة هو العائق متنثني ومگدرت اشيله لان عظمها مو قوي ميتحمل كم شهر يلا اگدر اشيله ولتگولون الها حتى متتعب نفسيتها.. گعدت بنص الليل لگيت بنت خالي وخطيبي باقين يمي واكيد مثل العمليات القبلها گتلهم فركو قدمي ونمت للصبح بس شنو بس يعوفون قدمي افز واحركة الهم يعني فركو ..صار الصبح اجوي قاسو السكر والضغط وخلو مسكن جديد وجابولي ريوگ اكلت شوية وراها اجةممرض شال الغطة من رجلي اني استغربت ليش يعني طلعت اكو صوندة برجلي يخلوها بعد العملية حتى يطلع الجراحة منه وميسبب التهاب من شالها كلش اتأذيت وهم عقم العملية وحط لزگة على الجرح وراح واجه الدكتور كتب اليه ادوية وگال لتمشين اسبوع وتعاليلي على المشايه مو على الكرسي وعلمني على كم حركة علاج طبيعي يعني وراح...
