من اني يم الطبيب بديت ابچي وضجت لحد موصلت بيت خالتي وگعدو والدتي وخطيبي يقنعوني ويشرحولي طبعا اكو فد نقطه بخطيبي كلش احبها وحلوه هوايه ذكي يعني بكلشي يخص حالتي يعرفه ويشرحلي عنه لدرجه اني اقتنع وتعرفون صعب اقتنع لان احس محد يحس بيه وبحالتي😂 بس هوه يعرف يشرحه بطريقه يخليني اقتنع واوافق من كل گلبي اكيد ميعرف مثل الدكاتره هو بس مقصد كلامي حلو ذكائه يتطلع على كلشي يحب يثقف نفسه ويطورها وعنده طريقه بالاقناع.. يي نرجع للسالفه اني اقتنعت صار ثاني يوم خابر الدكتور هوه گال اله اقتنعت البنيه وباچر تريد تسوي العمليه ف گال الطبيب اوكي ماكو اي مشكله بس تعالو للعياده انسوي تحاليل العمليه ونجهز الورقه وكلشي مال دخول المستشفى ورا مسدينه الخط بس اكلنه ونزلنه اني ويا وحدنه رحنه للطبيب وسويت تحاليل وحضرت كلشي ورجعنه للبيت خابرت صديقتي گتلها خلي نطلع كلنه مااريد ابقه بلبيت احب تتغير نفسيتي لان باچر عمليتي هذا الحچي العصر گالت ساعه ونجي اني وزوجي ف اني واخويه وخطيبي لبسنه لبس حلو وحضرنه نفسنه انه ناخذ صور ونتونس كلمنه كلشي واجوي عليه نزلنه الهم وطلعنه اخويه گعد ليگدام واني وخطيبي وصديقتي ليوره وضلينه نفتر بالسياره وبعدين رحنه مكان أثري واخذنه صور وبالنهايه ختمناها بمطعم رجعنه بلليل للبيت واني صمت لان الصبح عمليتي ميصير اشرب ولا اكل فتت غسلت وحضرت هدومي وتقاريري وكلشي اني قبل كل عمليه واعيه اني بيها ماانام ابد كلش اضل قلقه مااعرف شلون غفيت يمكن ساعه وصار الصبح همه يتريگون واني اباوع على حلگهم☺️واحسسهم بالذنب همَ ياكلون واني مااكل صار موعد طلعتنه من البيت راح اخويه وخطيبي جابو تكسي للباب وصعدنه اني وهمه و والدتي ورحنه للمستشفى والله الصراحة مااتذكر اجتي صديقتي وزوجها للمستشفى لولا😂 دخلنه كالعاده تعقيم وانتظرنه السره اخذو مني دم وانتظرت والدتي وخطيبي دفعو فلوس التأمينات چانت مبلغ معقول ..نرجع شويه ليوره من چنه يم الدكتور گال تحتاج تقريباً علبتين عظام وممكن ثالثه بس احتمال قليل وگال تكلفه العلبه شگد الصراحة چان مبلغ هوايه😅بقو يحچون ويا عبالك ابو محل مو دكتور☺️واني بالي مو وياهم صفنت دافكر شلون شكل العظم يعني مثل عظم الكنتاكي لو مثل عظم توم وجيري يعني عظمايه چبيره وشلون حيلزگو بعدين رجعت انتبهت وياهم سمعته گال اني اتنازل عن حقي بهاي العمليه وگال الكلفه مال عمليتي بدون العظام وبدون دخولي للمستشفى طبعا المستشفى جديده واهليه وكلش حلوه تسوي واهس للمرض😂😂..ي ارجع اكمل الكم وره مدفعو التأمينات وكملت تحاليلي وسوو اليه طبله اجه ممرض اخذنه لغرفتي بس شگد حلو رحت وياهم واني امشي وحدي دخلنه للغرفه وكالعاده اجوي الممرضين وجابو اليه هدوم العمليه وفد مشد لبسو اليه برجلي اليمنه يعني مااعرف شنو فائدته الصراحة😅خلو اليه كانيولا ومغذي وابر مااعرف مال شنو وفحص سكر ومقياس درجه حراره وقياس الضغط وبقو كل ساعه تقريباً يجون عليه يغيرون مغذي ويگولون راح يجي سراج واكيد مثل متعرفون بقيت انتظر عشرة ساعات☺️ومناك قبلها اكثر من عشرة ساعات مماكله حسيت حموت اذا مااكل رغم المغذي الي خالي حتى مااحس بعطش وجوع بس اني احب الاكل واتخيل شكل الاكلات وگتلهم بس اطلع من العمليه جيبو اليه لفه همبركر والدتي گالت والله تدللين كلشي تريدين اجيبلچ اني بهاي المده الطويله مرحت للتواليت ابد ماعندي شي يعني همه اجوي ياخذوني للصاله مال عمليات صعدت ع السديه ونزلت گتلهم بس اروح حمام ونزلت للحمام وطلعت ودعت اهلي وكالعاده خطيبي واخويه اجوي ويايه للمصعد بس صعدوني بالمصعد بچيت لان راحو ولان خايفه كلش شكد سويت عمليات بس بعدني اخاف من العمليه ومن البنج كلش دخلوني الى صاله العمليات اجه المسؤول عن البنج گال اليه تريدين نصفي لو عام؟اني ابد مااعرف اقرر گتله بكيفك گال لاطبعاً قرارچ هذا وبهاي الاثناء اجه الدكتور مالتي گال شتريدين نصفي لو عام گلت والله مااعرف الي تشوفه زين اليه اني اوافق عاد شرحلي شنو الفرق بين البنج النصفي والعام وشنو الايجابيات والسلبيات فكرت گلت اريد نصفي بس عبالي ابره بالكانيولا🥺 الغرفه چانت مجمده لدرجه حرفياً چنت مااگدر اثبت جسمي ينهز بهاي الاثناء الي حسيت بالبرد بنفس الثانيه اجه طبيب التخدير رفع تيشيرت مال عمليه الي لبسته من الظهر مااحچيلكم صدمتي گتله ليش گال راح اضربچ ابره بالحبل الشوكي بنهايته يعني ليجوه گتله بس حموت برد مااگدر اثبت جسمي صاح ممرضه اجتي لزمت ايدي وممرض لزم چتفي والطبيب عقم المكان و دخل الابره مو كلش تأذيت مثل اي ابره مو كلش تاذي بس چنت گاطعه النفس لان اخاف اتحرك لا اتضرر خلص الابره وعقم المكان وحط وره ما حط البلاستر گال اتمددي على ظهرچ هسه راح يبدي يخدر الجزء السفلي واجه ممرض بده يخلي مغذيات وخلو ايدي ثابتات بمكان عبالك ديعذبوني😂 وجابو شي مثل الستاره ثبتوا گدامي يعني يم بطني حتى مااشوفهم وعالي تقريباً اني كل هذا دا انتظر شوكت يخدر جسمي وصدگ بده يمشي بالحبل الشوكي ونزل للحوض وبعدها للافخاذ من وصل للركبه محسيت بي بعد وهم انشغلت افكر گلت شلون اتواصل ويا اهلي؟اريد اگول الهم اني بنج نصفي ..تدرون احلى عمليه بحياتي هاي من صدك بعد هالعمليه صرت قويه لدرجه كلش چبيره ..ي ارجع احجيلكم على العمليه الوحيده الي جنت گاعده بيها😂 خلو اليه مثل الصونده مال مفرغات التي تتخله فوگ الطباخ يعني صونده چبيره بالفتحة مال تيشيريت العمليه وجابو جهاز تدفئه وشغلو كلش هوايه دفيت الحمدلله .طبعاً بعدين عرفت استخدمو لجوه ظهري مثل المخده او خشبه مااعرف شنو ولركبتي اليسره هم يعني چانوا يشتغلون وهيه مثنيه جواها شي والرجل الخ گلت الكم بيها مشد لحد هسه محد بادي بالشغل ديتناقشون بغير لغة(لغةكورديه) اني داحاول اهز رجلي لان بيه هاي الطبيعه مدا احس حاولت احرك اصابع قدمي هم احس داحركهم بس هيه اكيد ثابته گلت خلي اجرب احرك حوضي واكيد هم حسيت دا احركه بس هو ثابت عبالكم نسيت؟😂 لنهايه العمليه احاول احرك قدمي المهم قبل مااحجيلكم ع العمليه الغرفه مال عمليات على الجانب الايمن سيراميك اسود ساده تقريباً مترين في مترين يعني هوه ديكور فقط وفوگ راسي ساعه باوعت عليها اول ما بدو يشتغلون برجلي وعرفت الساعه شگد بعدها كلهم راحو من يم راسي بدو يشتغلون برجلي مااعرف شلون بالصدفه انداريت لليمنه گلت خلي انام بس شفت انعكاسهم بالسيراميك واضحين كلش شلون لازمين مشرط او سچينه😂مااعرف اسمه شفت بعيني شلون شگو الجلد تقريباً مسافه شبر ونص وبقو يشگون لما وصلو للركبه مااحچيلكم شگد دم طلع من رجلي يعني سبحان الله حرفياً (لايكلف الله نفساً إلا وسعها)چنت هوايه قويه لدرجة اشوف شنو ديصير برجلي ومخايفه ابد ولا ذرة خوف بداخلي بقيت اباوع عليهم بعدين مگمت اشوف لان صارو ستة اشخاص واكفين سدو الرؤيه عني😂 وبهذا الاثناء اجه الممرض غير المغذي طبعاً اني چنت احس بكل مره يغيره (چنت لابسه حفاظه)عبالك اعرف راح يخلون اليه مغذي هوايه عاد گمت افكر اخاف اتدرر بدون مااحس وافشل😅 كلهم شباب كل الي داحچي الكم عباره عن ثواني ف وخر هذا الممرض الي سد الشاشه عني بس هم مشفت صايره هوسه واني هم بعد مااعندي خلگ اباوع مليت حسيت اريد انام چان يشغلون فد جهاز يمكن دريل😅مااعرف شنو الجهاز وشنو يسوي ف گلت الكم حطو اليه تدفئه غفيت تقريباًربع ساعه گعدت گلت للمرض شگد وتخلص العمليه گال مبقى شي وغير بطل المغذي ورجعت نمت گعدت بعد نص ساعه باوعت من شاشة التسريب مالتي😂باوعت للحايط شفت الدكتور ديحط فتات عظم بالعظم الفارغ وهم سألت شگد واخلص؟گال الممرض مبقى شي هالمره منمت بقيت اقره ادعيه واتذكر والدتي و وجهة صدك ارتاحيت فكرت شلون راح احچي الهم اني كلشي داشوف چنت كلش متحمسه اخلص العمليه دا اگول الهم اني بنج نصفي مو عام ضليت افكر بأخطائي وبشخصيتي وفكرت شلون راح ارتب بيتي من اتزوج واختاريت ديكور للبيت واتخيلت نفسي بالبدله وبالعرس وفكرت بخواتي عاد بچيت بس صدگ مااعرف ليش وهسه من داكتب هم بچيت هم مااعرف ليش باوعت للساعه عدت ثلاث ساعات ونص رجعت سألت شوكت اطلع؟گال مبقى شي طبعاًهم اني زعجته بسؤالي التافه وهم هوه ناصب عليه من يگول مبقى شي😂 اخر شي گام ميجي يمي بس ع گد المغذي ويسوي نفسه مشغول ويروح انوبه كلهم يحچون بغير لغه بقيت احچي بالاشارات☺️شو بعد مرور٤ساعات ونص صوت الدكتور اختفى باوعت على الشاشه السريه لگيت واحد ديخيط برجلي🥺 والله چنت اباوع شلون يخيط بيها و مچنت اعرف بعده ممكمل خياط صحت اله گلت بديت احس بالخياط اني گال مبقى شي حخلص وكمل الخياط وفعلاً چنت احس بس مو كلش متأذيه اجه طبيب التخدير گلت اله دا احس اني گال كلش زين انتهى البنج وانتهى الشغل وخرو الشي الي جوه ظهري مااعرف حوضي وجوه ركبتي اليسره وجابو السديه دا اطلع مگلت الكم اكو جرجف جوه السديه مال عمليه علمود يشيلون المريض من عنده حتى ميحركون بي ويتأذه تقريباً ربع ساعه يلا شالوني وطلعوني بديت احس بس بدون وجع يعني شلون من واحد رجله تخدر ويفكها الخدر اني هيچ احس سحبو السديه لفد غرفه يخلون الي طالعين من العمليه بيها تقريباًبقيت نص ساعه من صدگ مليت خليت ايدي جوه راسي وبديت احرك رجلي اجه طبيب التخدير گال وخري ايدچ ميصير گلت شعليه؟شنو هذا التدخل راح من يمي يدور على مسند الرجلي عاد رجعت خليت ايدي جوه راسي عناد بي اجه ممرض بعد كم دقيقه گال وخري ايدچ گلت شنو هاي اسلوبهم من اطلع اشتكي عليهم اني بفلوسي جايه هنا عاد جابو المسند الي هوه عباره عن شي ينشد على الرجل شلون حزام الظهر اني على رجلي على متتحرك وهذا المسند بي حدايد كلش قوي صدك متتحرك رجلي ابد..
