تعابير وشو اتغيرت ، اتحرك و جا علي و رفع يدو و انا طوالي غمضت عيوني خوفا من الكف الجايني ، ما فتحت عيوني إلا لمن سمعتو بضحك ، فتحتهم و انا مستغربه ، قال لي يا خواااافه ، كانت في حشرة في شعرك و انا طلعتها ليك ، معقوله ما حسيتي بيها ؟؟ عرفت لحظتها إنو عايز يشتتنا و ينسينا الموضوع القبل شويه ، قلت ليهو لا ما حسيت بيها ، بعد كلامو دا عمتي "صباح" ما قدرت تقول حاجه تانيه لأنها فهمت إنو أنس ما عايز نقاش في الموضوع دا ، اول ما رجعنا البيت ، قلت لي أنس والله م..... قال لي هسس ماف داعي تبرري لي ، كل العايز اقولو ليك يا "مها" إني واثق فيك بس ما حأكذب عليك و اقول ليك الموضوع ما ضايقني ، بس ما حبيت اتناقش معاك قدام أمي و اخواتي ما عايز زول يظن فيك ظن سيء ، هم ما بعرفوك زيي ، بس يا "مها" خليها تكون اول و أخر مرة ما تنعاد تاني تمام ؟ قلت ليهو انا ما كنت عايزا اركب معاهو بس اختو اصرت علي شديد و قال..... قال لي خلاص قلنا ما تشغلي بالك ......
ما شفتيهو قفل الموضوع دا كيف و عمل نفسو ما سمع حاجه كلو عشان قليلة الأدب دي ، مش قلت ليكم كاتباهو ؟......... يا بت يا "سجود" انا مش بتكلم معاك ؟سجووود طرشه انتي ولا شنو ؟؟
- سامعاك يا أمي ياخ ، عليك الله مشاكلكم دي ما تدخلوني فيها ما عندي بيكم شغله ، يلا انا ماشه انوم بكرا راجياني جامعه .
والله انتي إلا كان ما بتي ، عليك الله هسي دي ولادة تلديها يا "صباح" يا تعبي فيك يا "سجود" خسار السماية و تعب الدايه " تعالي هنا ماشه وين يا بت يا سجود اسمعي كلامي بتكلم معاك انا يا ب....
=خليها يا "امي" سجود دي ياتو يوم وقفت معاك و حسستنا إنها واحده مننا ؟ ما هي يا إما تقيف مع غيرنا يا إما ما تقيف مع أي زول ياهن حالتين ماف ليهم تالت ، الكلام العايزا تقوليهو ، قولي لي انا بسمعك للنهاية بس ما تنتظري حاجه من سجود دي .
- انتي الوحيده البتقيفي معاي يا "سارة" ما زي اخوانك المبدلين ديل "أنس و سجود " التقول انا مرة أبوهم ما أمهم .
= خليهم و قولي لي كنتي بتقولي ل"سجود" في شنو ؟
- كالعادة عن بت الناس القليلة الأدب دي ، بس عايزا اعرف أخوك دا مصنوع من شنو ؟ في زول برضى مرتو تركب ليها عربية مع زول ما بعرفو ؟ هسي كما كاتباهو كان سكت كدا ؟عامله ليهو حاجه و مسكتاهو بيها.
= صح كلامك يا أمي بس انتي عرفتي كيف إنها الصباح ركبت عربية مع غريب ؟
- قالن لي نسوان الحله شافنها قبيل الصباح ، الله لا كسبها خلت كل الناس تتكلم عننا ، كل يوم لافحات تيابن و جايتني عشان يقولن لي مرة ولدك عملت و مرة ولدك فعلت ، أصلي ما برتاح كما طلعت المصيبة دي من بيتي البت دي انا اصلي ما ردتها و اصلي ما بطيقها
= (انا ذاتي بكرها يا أمي ، عمري ما حأنسى إنها السبب و انو احمد خلاني عشانها ، هي الدخلت بيناتنا و قلبت لي حياتي ، المشكلة إنو احمد لحدي الآن ما قادر ينساها لحدي اليوم دا راجي منها حاجه و متأمل فيها 💔 و انا لليوم دا ما قادره انسى اخر مكالمة كانت بيناتنا ) سارة قالت الكلام دا بينها و بين نفسها .
فلاش باك :
- اخيرا رديت علي ! انا من الصباح بتصل عليك ليه ما بترد ؟ليك كم يوم كدا بقيت تتجاهلني و ما بتتصل علي ، انت ما عارف قدر شنو انا كنت مقلقه و خايفه عليك ، احمد انت ليه بقيت ما بتهتم بي زي زمان ، غلطت معاك في شنو انا ؟
= سارة اهدي اهدي انا كويس ، بس كنت مشغول شويه بكم حاجه كدا
- خمس دقايق كتيرة علي من وقتك ؟ كان غالبك ترسل لي رسالة وحده بس ان شاء الله ، ليه بقيت تتصرف معاي كدا انا ما بستاهل المعاملة دي منك ، يعنى خلاص قنعت مني ولا عشان ضامن وجودي ؟
= دقيقه دقيقه ، انتي بتقولي في شنو يا ساره ؟ نحنا مجرد اصحاب و بس ماف داعي للعتاب دا كلو
- شنو اصحاب ؟ اصحاب و انت عارفني بحبك ؟ اصحاب و كنت بتتجاوب معاي و بتاخد و تدي معاي في الكلام ، ما كنا ماشين كويس ، شنو الحصل فجأة و خلاك تتغير علي ؟ 😭💔
= ساره انا متفهم وضعك حاليا ، بس انا ما حصل قلت ليك بحبك و ما حصل لمحت ليك بالحاجه دي ، بصراحة انا بحب وحده تانيه .
- وحده غيري يا احمد ؟ دي نهاية حبي ليك ؟ حسبي الله و نعم الوكيل فيك ، امشي و ان شاء الله ما تتهنى بيها ، و زي ما كسرت قلبي ربنا يكسر قلبك 💔
= ساره اسمع...... الو الو ساااااره
بعد المكالمة دي انا بقيت لا بسمع لا بشوف ، عشت اسوأ فترة في حياتي بعد المكالمة دي ، احمد اتصل علي مرات كتيره بس ما كنت برد عليهو لمن فتر ما اتصل تاني ، مرت 3 شهور على المكالمة دي ، في يوم كان عندي عرس صحبتي ، مشيت العرس لقيت احمد هناك حاول يتكلم معاي و يفهمني بس انا كنت رافضه اتكلم معاهو لأني عارفه كلامو حيوجعني زيادة ، كنت براقبو من بعيد ، لمحتو كم مرة بعاين لبت و ببتسم ،(و البت دي كانت مها ) ناديت إشراقة صحبتي و سألتها البت ديك منو ؟ قالت لي دي مها بت خالة العريس و دي البحبها احمد ، كلامها وقع فيني زي الصاعقة ، ما لقيت نفسي إلا و انا برا الصالة و ببكي ، وصلت البيت و انا ما عارفه وصلت كيف 💔بعد فترة "أنس" اخوي قرر يعرس اتفاجأت لمن عرفت إنو "مها" هي العايزها "أنس" ما بكذب في اللحظة ديك فرحت شديد ربنا أخد لي حقي من احمد و كسرو زي ما كسرني ، بس برضو كنت لسه بحبو ، استغليت الفرصة دي و وقفت مع احمد في محنتو دي و حاولت اتقرب منو ، بس هو للآسف بعد ما عرف إنو مها عرست حياتو و تعاملو مع الناس اتغير 180 درجة ، بقى ما عندو حاجه لزول ما بسأل من زول ، لحدي اللحظة دي هو ما قادر ينساها و الحاجه دي معذباني شديد للدرجه الخلتني أكره مها بسببو ، بكرها شديد البت دي 💔
نرجع .....
اليوم ما كان عندي جامعة قلت احسن اغسل الملابس لأنها اتردمت و بقت كتيره ، جبت ملابسي و ملابس "أنس" و بديت اغسل فيها ، اثناء ما انا بغسل كدا ، جات عمتي "صباح " قالت لي ليه ما بتقولي لي انك قاعده تغسلي ولا عشان ما اقول ليك غسلي ليك معاك، قلت ليها العفو ياخ ما كدا، قالت لي سمح عندي كم توب كدا عايزات ليهن غسيل ، قلت ليها طيب جيبيهم لي اغسلهم ليك ، مشت و جات و هي شايلة معاها كمية من الملابس ، ملابسها هي و ملابس بناتا الإتنين ، قالت لي معليش ياخ ، بس لقيت ديل برضو وسخانات و قلت بما انك شغاله غسيل تغسليهم معاك بالمره ، قلت ليها طيب ما عندك مشكلة ، ختتهم لي و مشت ، غسلت لحدي ما الساعة 10 جات قلت امشي افطر و اجي ، مشيت بيت عمتي لقيتا مافيشه و قافلة البيت كلو حتى المطبخ 💔رجعت بيتي، شلت لي قروش و مشيت اشتريت لي سندوتش و جيت أكلتو، و تاني رجعت للغسيل، برضو ما انتهيت لحدي الظهر، قمت صليت و تاني رجعت للغسيل ، بعد شويه سمعت صوت حركة في البيت التاني ، في البداية خفتا شديد قربت اشيل تلفوني و اتصل على "أنس" اتراجعت و قلت احتمال دي عمتي رجعت أو يمكن سارة أو سجود ، اتوكلت على الله و اتحركت على البيت اول ما وصلت الحووووش ....
يتبع.....
