دخلت البيت ب باب ناس عمتي لقيتهم كلهم قاعدين في الحوش أول ما شافوني عاينوا لي بنظرات كلها لوم ، كلها حقد ، كلها كراهيه نظراتهم دي ما جديده علي بس أنس !! أنس كان بعاين لي بنفس النظرات دي ،، وصلتهم و قلت ليهم السلام عليكم ، ماف زول رد علي السلام غير عمتي قالت لي و عليكم السلام يا بتي ، أنس قال لي كنتي وين؟ قبل ما أرد عليهو قال لي و أدوية امي وين و قبل ما أرد عليهو قال لي انتي مهمله كدا ليه ممكن أعرف قال الكلام دا كلو بنبرة حاده شديد ، قلت ليهو ما فاهمه يا أنس أدوية شنو؟ قال لي على الأقل قول نسيت أو شوفي ليك أي عذر تاني بس ما تعملي نفسك ما فاهمه حاجه ، قلت ليهو بالجد انا ما فاهمه ادوية شنو لأني كنت في بيت أهلي ، عمتي قالت ليهو ما مشكلة يا ولدي بكون نست ، قال ليها بصوت عالي غالبها تعترف و تقول لي نسيت؟ بتكذب ليه ؟ عاين لي و قال لي عارفه أمي كانت حالتها كيف بسببك يا مدام؟ قلت ليهو أنس براحه براحه انا مشيت بيت أهلي بس ما عارفه قصة الأدوية دي شنو ، قال لي يعنى أمي ما اتصلت عليك و قالت ليك جيبي لي معاك الأدويه لأنها خلصت؟
زي ما اتوقعت عمتي هي الألفت القصه دي كلها عايزا أنس يكرهني بأي طريقه ، حصلت لحظة من الصمت ما عرفت أقول ليهو شنو ، اقول ليهو امك ما اتصلت علي و انا الإتصلت عليها عشان بس اقول ليها ماشه لأهلي ؟ اقول ليهو أمك بتكذب عليك و ما جابت لي سيرة الأدويه و دي ما أول مرة تكذب عليك ؟ مستحيل اقول ليهو كدا أنس ما برضى حاجه في أمو و بعدين مستحيل يصدقني عمتي حتألف ليهو قصة تانيه و تطلعني كذابه و متأكده إنو حيصدقها لأنو ما حصل شافها بتشاكلني ما عندو أي خلفية عن علاقتي أنا و امو و ما بلومو لأنو هي قدام أنس بتعاملني معامله كويسه عشان كدا هو مفتكر إنها بتحبني و هي عكس دا تماما ، فأنا ما حأغير حاجه لو قلت ليهو كدا بالعكس حأزيد الطين بله و حأكبر الفجوه بيني و بين أنس عشان كدا قررت أكون في السليم .
قلت ليهو ايوااااا ياداب اتذكرت صح اتصلت علي بس ما سمعتها كويس ، قال لي ما سمعتيها كويس؟ كان غالبك تقول ليها عيدي لي الكلام ، قلت ليهو لا ما كدا يا أن...قاطعني و قال لي ما عايز اسمع كذبك دا أكتر من كدا و طلع من البيت .
دخلت الغرفه و قعدت أبكي ، ليه بحصل معاي كدا؟ انا عملت شنو عشان جزاي يكون كدا؟ في الوكت الأنا بحاول فيهو منع أي خلاف ممكن يحصل بين أنس و امو بسببي هي بتستغل كل الفرص عشان تعمل خلاف بيناتنا و مع ذلك بقول ما مشكلة هي أمو و انا عارفه مشكلتها شنو و هي عايزا شنو و ليه بتعمل كدا.
مسحت دموعي صليت المغرب و مشيت بهناك عشان اعمل الغدا لقيت عمتي في المطبخ بتعمل في شاي عاينت لي لحدي ما جيت جنبها شكلها قايلاني ح اتناقش معاها و اقول ليها ليه عملتي كدا و ليه كذبتي فيني بس ما حأقول ولا حرف هي عارفه و انا عارفه ليه عملت كدا و حتى لو اتناقشت معاها ما حأستفيد حاجه و هي حتفضل تكرهني 💔
اثناء ما أنا واقفه و بعمل في الأكل في ملعقة جنبي وقعت دنقرت عشان أشيلها ما حسيت إلا بمويه سخنه شديد اندفقت في يدي اتنفضت بسرعه و صرخت شديد عاينت في الأرض ما كانت مويه كان شاي ، عمتي قالت لي معليش ياخ الشاي ادفق فيك من غير قصد ، اكتفيت بإني ابكي و بس مشيت على التلاجة عشان أطلع لي تلج لقيتا مقفوله قلت ل عمتي المفتاح وين؟ قالت لي ما عارفاهو شوفيهو فوق راس التلاجة فتشت بس ما لقيتو و انا يدي واجعاني شديد لدرجة دموعي ما قادره تقيف ،، جريت للحفاظه برا لقيت فيها شوية مويه بارده كبيتا في يدي بس برضو الألم ما خف 💔 اتذكرت انو عندي مرهم في دولابي بسرعه مشيت البيت بهناك ، فتحت الدولاب و فتشتو كلو من فوق لتحت بس ما لقيتو ، قعدت في السرير و مسكت يدي و فضلت أبكي بحرقه لسببين الأول انو يدي واجعاني شديد و التاني إنو عمتي هي السبب متأكده إنها عملت كدا قاصده 💔 اثناء ما أنا ببكي و ماسه يدي جا أنس داخل عاين لي مسافه و قال لي بضيق مالك بتبكي ؟ رديت عليهو بعد مسافه و قلت ليهو الشاي اندفع لي في يدي ، اتحرك من جنبي و مشى على التربيزه الجنب الدولاب شال المرهم و جا قعد جنبي قال لي جيبي يدك ، بدا يمسح لي عليها و انا دموعي حالفه كان تقيف ، قال لي بضيق حرقتي نفسك كيف ؟ سكت عشان افكر لي في كذبه اقولا ليهو ، عاين لي و قال لي ما سامعاني؟ قبل ما ارد عليهو بشي جات عمتي قالت لي لسه حارقاك؟ اعفي لي يا بتي والله دفقت فيك الشاي بالغلط و هسي مشيت افتش ليك في مرهم بس ما لقيت ، قلت ليها ما مشكلة حصل خير ، أنس قال ليها يعنى انتي الدفقتي فيها الشاي يا أمي ؟ قالت ليهو بالغلط يا ولدي بالغلط و قعدت تبكي مشى ليها و قال ليها حصل خير يا أمي عارفك ما قاصده ، قالت ليهو قلت الليله اساعدها في المطبخ لأنها بتتعب شديد بس يا ريتني ما دخلت معاها و سببت ليها الحرقه دي ، قال ليها خلاص ما تلومي نفسك يا أمي انتي ما قاصده.
بعد ما عمتي طلعت اتذكرت إني ما كملت باقي شغلي فضل اجهز الأكل و اعمل الشاي و اضاير المطيخ و أغسل العده ، لبست توبي و كنت طالعه أنس قال لي بزهج ماشه وين؟ قلت ليهو كيف يعنى ماشه وين ؟ماشه اكمل باقي الشغل ، قال لي ما بتتوبي انتي؟ ايي أمشي عشان تحرقي يدك تاني ، قلت ليهو بسخريه حتشتغل بدلي انت ؟ وقف على حيلو و طلع برا ، افتكرتو طالع الشارع بس مشى المطبخ عشان يشتغل بدلي عمتي لمن شافتو واقف في المطبخ قالت ليهو معقوله تشتغل انت و البيت دا كلو مليان نسوان ؟قال ليها اسوي شنو اذا بناتك ما بعرفن حاجه غير النوم ؟ قالت ليهو سمح خليني انا بجهز ليكم الأكل قال ليها لا يا أمي امشي و انا بكملو ،، اصرت عليهو شديد لحدي ما وافق و عملتو هي ، دخلت المطبخ لقيتا بتعمل في الأكل و أنس واقف بساعدها قلت ليها ليه متعبه نفسك كدا كان تخليني انا بجي اسويهو ، عاينت لي بطرف عينها و قالت لي كفايه اني حرقت ليك يدك قبل شويه 💔 قلت ليهم طيب انا حأساعدكم و اعمل الشاي أنس قال لي لا باقي الشغل حيعملوا سارة و سجود .
بتقلب يمين و شمال حاسه نفسي نعسانه بس ما قادره أنوم ، حاسه نفسي كأني راقده جوا قزازة ، مسخنه شديد مع إنو الجو معتدل على حركتي الكتيره صحي أنس و ولع اللمبة و جا جنبي قال لي مالك حاسه بشنو؟ ما رديت عليهو لأني حاسه لساني تقيل و ما قادره اقول ولا كلمة ، خت يدو على جبهتي و قال لي حرارتك مرتفعه شديد طلع و رجع تاني معاهو مكمدات ، فضل يعملهم لي لحدي ما حسيت بالنعاس قبل ما أنوم على الآخر قلت ليهو أنس انت زعلان مني؟ انا عملت ليك شنو طيب؟ قال لي دا ما وكتو قلت ليهو و بالنسبة لموضوع الأدويه ..قاطعني و قال لي الصباح رباح حاولي نومي هسي تمام؟ هزيت ليهو راسي ،، بعد كلامو دا حسيت بالراحه ،، و بعد تصرفو دا اتأكدت إنو لسه بهتم بي و لسه بهمو أمري و لسه بعني ليهو شي ♥️افتكرت إنو الخلاف انتهى و خلاص حنرجع زي ما كنا لكن هيهات هيهات دي ما كانت إلا بداية النهاية 💔
يتبع......
