فِي سجُودي الأخير ؛ أخبرتُ الله بكل شيء ، حتّى إستقرّ جزعُ نفسي ، وقلق خاطرِي ، كان إحتواءً لم يكن دعاءً ، كان حُضنًا لم تكن سجدة "وحدكَ يا الله كنتَ ترى الوجع في قلب يعقوب حين قال : "إِنَّمَا أَشْكُو بَثِّي وَحُزْنِي إِلَى اللَّهِ" اللّهم إنَّ شيئاً في القلب كهذا ،، فَـ برحمتك قُلْ لفرحة يعقوب بـ يوسف أن تمُرَّ بنا"🌹♥️.
احمد خش و نحنا اتقدمنا ليهو ، دخل المظله و قال ل أنس السلام عليكم ، أنس أول ما شاف أحمد ملامح وشو اتغيرت و اضايق شديد ، شد حيلو و قام من السرير و جا علي أحمد و قال ليهو الجابك شنو و حاول يضربو بس أحمد مسك يدو و قال ليهو عايز اتكلم معاك ضروري و أوضح ليك سوء التفاهم الحصل ، أنس قال ليهو سوء تفاهم !! مسمي العملتو مع ... سكت و ما قال اسمها ، قال لي ماف حاجه اسمها سوء تفاهم و احسن ليك تتفضل و تطلع من بيتي و إلا قسما بالله ما حيحصل خير ، رد عليهو أحمد : الخير ما حيحصل لو طلعت منك من دون ما أوضح ليك ، أنس مسك أحمد من قميصو و قال ليهو بغضب ما بتفهم انت ؟! قلت ليك اتخارج من هنا و تاني ما توريني خلقتك دي و انا ما عايز اعرف أي حاجه ، جر أحمد معاهو ل برا عشان يطلعو من البيت و اثناء ما هو جاريهو كدا ، احمد قال ليهو ما حتسمعني حتى لو قلت ليك مها لسه بتحبك و هي ما غلطت في حقك أبدا ؟! أنس ما رد عليهو و كان ساحبو من قميصو ، احمد وقف أنس و اتفك منو و قال ليهو بضيق ، جيت عشان اقول ليك مها بكرا حتسافر برا السودان و ما حتجي تاني ابدا ....حصلت لحظات صمت ،، و أنس بقى واقف و بعاين لأحمد بعد لحظات من الصمت قال ليهو ما بهمني و يلا اطلع لي من بيتي ، أحمد ما سكت و واصل كلامو طوالي ، انت ظلمتها يا أنس و هي م....أنس ضربو و قال ليهو بإنفعال اطلع ياخ ما عايز اسمع حرف واحد منك و جراااهو بكل قوتو و طلعو برا البيت و قفل الباب و قال لأمو و اختو ممنوع تاني تدخلو زول ساي ...
لمن اتحركت بعيد من بيت أنس جاتني مكالمة من "ساره" بسرعه رديت عليها ، قلت ليها ساره حاولي اقنعي اخوك يمشي و يمنع مها من السفر ، صدقيني هي لو سافرت تاني ما حترجع ، انا عارف و انتي عارفه قدر شنو هم بحبو بعض ، لحدي اللحظه انا ما عارف هو طلقها لشنو ، معقوله عشان شافني معاها بس ؟! والله يا ساره مها دي مظلومه و حأحكي ليك كانت بتعمل في شنو ببساطه .......الخ، قالت لي بإستغراب بالجد ؟! قلت ليها ايوه دي الحقيقه والله ، سكتت مسااااافه و قالت لي عايزا اعترف ليك بالحصل كلو. .......الخ ، ببساطه يا أحمد انا و أمي السبب في الحصل دا 💔سكت مسااااافه و انا بحاول استوعب في الحصل مع مها بالجد الإتحملتو كتير و دا إن دل فدل على حبها ل"أنس" عشان كدا كانت ساكته و صابره ،، قلت ل"ساره" طيب حاولي اقنعي اخوك و قفلت منها . في البدايه كنت عايز اوضح ل"أنس"سوء التفاهم و اعرف منو زعلان منها في شنو بالضبط عشان احاول احلو و أرجعهم لبعض ، بس بعد ما ساره حكت لي ، ما عارف بس حسيت اني ح اتراجع ، واضح انو اهل أنس ما بحبوا مها ، و لو رجعت ليهم حترجع تاني للمشاكل و للجحيم الطلعت منو ، بس عشان ابريئ ذمتي قلت ليها أقنعي اخوك ، بعد دا الأمر متروك ل"مها " هي الحتقرر الأحسن ليها شنو ،، اتصلت على مها و قلت ليها عايزك ضروري ، ممكن نتقابل في () قالت لي ليييه في شنو ؟ قلت ليها تعالي و حتعرفي ، و فعلا لاقيتها ، قالت لي خير في شنو يا أحمد ؟!! قلت ليها انا اليوم مشيت و زرت أنس ، قالت لي بإستغراب شنو ؟! و ليه مشيت ليهو ؟! قلت ليها مها أنس وضعو سيئ خالص ، من يوم ما افترقتو و هو حالتو ماشه من سيئ للأسو ، دا بدل على مدى حبو ليكم و اظن انتي ذاتك بتحبيهو ، طيب ليه بتكابروا ، ارجعو لبعض يا مها ، انتوا الإتنين ما بتقدروا من غير بع....قاطعتني و قالت لي : نحنا إطلقنا يا احمد أو خليني اقول هو الطلقني في غفله مني هو الإتخلى عني ، برضو ما ح اعاتب و احملو مسؤولية الحصل و اقول هو السبب ، عارفه انو انا الوصلتو للمرحله دي و هو عاقبني بالطريقه البتناسبو ، و انا رضيت بالعقاب دا ، و ما عندي نيه أرجع ليهو تاني ، ما بنكر ، انا لسه بحبو بس الحب براهو ما بكفى ، الثقة بيناتنا انعدمت و دي أهم من الحب نفسو ، انا ما عندي طاقه عشان اقدر اصبر بيها أكتر ، علاقتي ب"أنس" استهلكتني ، الفيني كملت يا أحمد ، قلت ليها بس أنس ، قاطعتني و قالت لي المسأله مسألة وكت بس ، بكرا حيرجع زي زمان ، انا ما بقدر أرجع تاني ، كيف ح اعاين لوشوشهم بعد الحصل لسجود بسببي ؟ كيف حنقدر نتعايش كلنا سوا ؟ كيف ح اقعد معاهم حول صينيه واحده و آكل معاهم عادي ؟!! ، الموضوع أصعب مما بتتخيل يا أحمد و زي ما قلت ليك الحب ما كل شي و براهو ما بكفى ، ما بنقدر نغض النظر عن الحصل و نرجع لبعض تحت مسمى الحب .
بعد كلامها دا عرفت إنو هي خلاص اتخذت قرارها و ماف مجال للتراجع و ما حبيت اضغط عليها أكتر في النهايه هي الكانت متضرره ، قلت ليها طيب على راحتك ....سكت و تاني قلت ليها بكرا طيارتك حتقوم الساعه كم ؟! قالت لي 8 م ، قلت ليها تصلي بالسلامة .....💔
في اليوم التالي :
بعد ما اتكلمت مع أحمد و حكيت ليهو الحصل كلو من يوم ما مها دخلت بيتنا ولحدي اليوم الطلقها فيهو أنس ، و إنو انا و أمي السبب ، قررت احكي ل"أنس" ، قلت لأمي انا ح اكلم أنس بالعملاناه
قالت لي اياك تعملي كدا ، بتدوري بيها شنو بعد العملتو في اختك ؟! قلت ليها يمه ما نكذب على بعض الحصل لسجود انا و انتي عارف إنو مها ما كانت السبب ولو هي مفروض تتحمل المسؤولية فأنا و انتي كمان مفروض نتحملها لأنو برضو كان لينا يد في الحصل ، قالت لي يد ؟! يعنى نحنا كنا عارفين بالعملتو سجود ؟! قلت ليها يا أمي انا متأكده انو مها حكت ليك لأنها ما بتكذب فيك و انا عارفه انك نكرتي عشان ما بتحبيها و أما انا فاليوم داك سمعت صوت مها و هي بتتكلم مع سجود جوه غرفتنا ، كنت راقده في السرير و قربت ألتفت عليهم و اشوفهم عايزين يقولوا شنو ، بس لمن مها قالت لسجود الموضوع دا حيكون بيناتنا بس ، عملت نفسي نايمه ، مها قالت لسجود انا شفتك لمن دخلت البيت داك و ......الخ ، بس سجود يا أمي ما جابت ليها أي سيره عن المخدرات ، قالت انها بتحب واحد و إنها هي و صحباتا كانوا بجربوا حاجه اسمها التخاطر و حاجه اسمها "الإسقاط النجمي " و هي فعلا كانت بتعمل كدا بس دا جزء بسيطه من الحقيقه ، مها حذرتها و قالت ليها تاني ما تعملي كدا و إلا حأوصل الكلام دا ل"أنس" و سجود وعدتها إنها تاني ما ح تكررها و على كدا انتهت القصة ، أي زول سمع الكلام دا حيقول الموضوع بسيط جدا و ما ح يظن إنو ليهو ابعاد تانيه ، انا السمعت الكلام دا ما اديتو أهميه كبيره ، شنو العرفنا إنو سجود بتكذب علينا و الموضوع أخطر من كدا ، يمكن كرهي ل"مها" عاماني و ما خلاني اقول الحقيقه ل"أنس" و اوضح ليهو الكلام بالبساطه القالتها سجود ،، كنت عارفاك بتكذبي في مها عشان بتكرهيها ، انتي أمي و ما بقدر أفضحك بالطريقه دي ، عشان كدا حأقول ل"أنس" اني السبب و اني كنت عارفه انو مها بتشتغل عشان توفر المبلغ و شغلها دا ما فيهو أي كلام و ما حصل نزلت أو طلعت مع زول و بطريقتي الخاصه ح اخترع ليهو قصة تطلعك انتي و مها بريئاتي من الموضوع دا ، لأني ما بقدر اسكت اكتر من كدا يا أمي ، البحصل ل"أنس" دا كلو بسببنا ، ماشه احكي ليهو...
يعنى خلاص مها حتسافر ؟! بالسهوله و البساطه دي قدرت تتجاوزني و تنسى الكان بيناتنا ؟! في الوكت الأنا بتعذب فيهو و بموت في الدقيقه ألف موته هي ولا على بالها و مظبطه أمورها و عايزا تسافر ، يعنى الطلاق دا ما كان إلا فرصه ليها ، دا الكانت عايزاهو هي ، عشان كدا كانت بتتقصد انها تخبي اصغر حاجه عني عشان تضايقني و تضغط علي لحدي ما توصلني للطلاق و ياهو حصل العايزاو ، هي حتسافر من هنا و انا وراها ح اتعذب في جحيم ذكرياتي معاها ،،، بس مستحيل دا يحصل مستحيل ارضى بالخساره و زي ما هي اختارت تكمل حياتها عادي انا كمان ح اعمل كدا و اليوم اتخذت قرار كان لازم اتخذو من زمان ......💔
- معقوله يا أحمد تخليها تسافر بالبساطه دي ؟!! مش كنت بتحبها ، فكيف تسمح ليها تسافر و تخليك ، دي مها يا أحمد الكنت ميت عليها ما تضيعها من يدك ....قلت الكلام دا بيني و بين نفسي ، فعلا انا بحبها و مستحيل أخليها تضيق مني تاني ، لازم امشي ليها في المطار و امنعها من السفر ، قدامي ساعه بس ....
" لن نلتقي يوماً و ذلك البعيد الذى يفصلنا سيبقى غريبا لا عنوان له"
تتوقعوا الحيصل شنو ؟
يتبع........
