و تبدِو مِثلَ ملاكٍ مُتعبة ، قضت حياتها تخلِق حلولاً لِأحزان الآخرين ، ولم تجد أيَّ حلٍّ لِحُزنها 🖤🥀
دخلت وسط نظرات كلها احتقار ، قلت ل عمتي آسفه على الكلام القالتو ليك أمي ، أعذريها كانت زعلانه شديد ، عاينت لي من فوق لتحت و قالت لي تزعل من شنو ؟ نحنا جبنا شي من عندنا ولا قلنا كلام ما فيك ؟ ا"لعود الما فيهو شق ما بقول طق " و انتي كما عملتي كدا ما كان شكينا فيك و قلنا عنك الكلام دا ، عاينت ل"أنس" و قالت ليهو عاجبك الكلام القالتو أمها عني و عن بناتي ؟! رضيت أمك تتهان في نص بيتا و ما فتحت خشمك ؟! عشان منو ؟ عشان الخاينه دي ؟ أنس يا ولدي ما تتغشى ببراءتها دي ياما تحت السواهي دواهي ، البت دي انا كنت بعاملها زي بناتي و واحد ما حصل فرزت بيناتن لكن هي لا احترمتني ولا احترمتك و ما حصل مرة اعتبرتني في مقام أمها ، قدامك كانت بتتعامل معانا كويس لكن من وراك غير الكلام الفارغ ما بتسمعنا شي و مع ذلك ساكتين كلو عشان ما نخرب بينك و بينها ، كنت متحملاها و متحمله كلامها و ما حصل جيت شكيت ليك منها يا ولدي لأني عارفه المزعلها شنو و المخليها تعاملنا كدا شنو ، ياما عذرتها و ياما قلت ما مشكله بكرا بتتغير ، سكت و سكت و استحملت لحدي ما ظهرت لينا قصة اختك سجود ، مرتك يا ولدي كانت عارفه و ما ورتنا لأنها ما بتتمنى الخير لبناتي ، كانت عارفه انو البتعملو سجود خطر و غلط و مع ذلك ما اتكلمت ، أي سجود غلطانه و سلكت ليها دربا غير دمرها ما قدم ليها شي ، لكن مرتك ليه ما كلمتنا ؟! لأنها عايزا تتخلص مننا وحده ورا التانيه ، قعادنا في بيت واحد و مطبخ واحد مضايقها ، القروش البتدينا ليها انت بتضايقها و بتحرقها ، يا ولدي انا ما بقدر اتحمل اكتر من كدا ، كما قضيت بتي دي كان سافرنا من زمان و خلينا ليها البيت ، قاطعتها و قلت ليها و انا ببكي ، ليه بتقولي كدا يا عمتي 😭 قصة سجود دي انا كلمتك بيها ، و انا مستحيل أكرهكم والله ، و ما مضايقه من قعادي معاكم ، ما تقولي كدا يا عمتي ....قالت لي بتكضبي فيني ؟ خافي الله يا مها ، متين جيتي و قلتي لي سجود حاصل معاها كدا و كدا ؟ قلت ليها بتكوني نسيتي بس انا حكيت ليك والله ، قالت لي مستحيل انسى حاجه زي دي ، لو كان قلتي لي فعلا هل كنت ح اسكت و اشوف حياة بتي بتتدمر ؟ عاينت ل"أنس" و قالت ليهو ، بس طلع لي بتي من السجن و تاني ما دايره منك حاجه و وشوشنا دي تاني ما حتشوفوها ....قالت كلامها دا و مشت دخلت جوا ، ساره طوالي مشت ورا أمها ، فضلنا انا و أنس ، كان واقف و بعاين لي و عيونو زي الشرار ، قربت منو و قلت ليهو أنس انا م.....أشر لي عشان اسكت ، قال لي ما عايز اسمع منك ولا كلمه ، قلت ليهو ب.....قال لي اسكتي قلت ليك لمن اديتك فرصه عشان تتكلمي و تحكي لي ما اتكلمتي ، طيب هسي عايزا تقولي شنو ؟مها بالجد انا مصدوم فيك ، بالجد انتي انسانه غريبه عجيبه .....الببكيك شنو هسي ، منو المفروض يبكي انا ولا انت ؟ سكت مساااافه و تاني قال لي القروش القالتها أمي جبتيها منو وين ؟ ولا زي ما قالت أمي !! سكت و ما رديت ، قال لي أديتيها كم عشان أرجعها ليك ، انا ما عايز ولا قرش واحد منك.... شوفي الحصل هسي و الحيحصل لقدام كلو حيكون بسببك ، ختي الكلام دا في بالك ، قال كلامو و اتحرك من جنبي و خلاني غرقانه في دموعي ....في صباح اليوم التالي كنت ماشه الجامعه و منها للشغل أنس شكلو تعبان و ما ماشي الشغل ، أول ما جيت طالعه عمتي قالت لي غيتو انا ما شفت لي زول ما عندو كرامه زيك ، يهينوك و يذلوا فيك و لسه قاعده معانا يا بت الناس أفهمي ماف زول عايزك تقعدي في البيت دا و طول ما انا حيه والله يومين ما تتميهم هنا اصبري و شوفي ، عاينت ليها و طلعت خليتا ، انا ما ما بقدر اكون بعيده عن أنس ، بحبو و ما بقدر اعيش دقيقه وحده من غيرو ، حتى لو بطل يحبني و ما طايق يشوف وشي انا ح أفضل احبو ، و يومي ما بكتمل اذا ما شفتو قدامي ، شوفتو براها بتخليني اكمل باقي اليوم و اتناسى الحاصل .
