فضلنا ماشين وراها لحدي ما وقفت جنب بيت في نهاية الحي نزلت من الركشه و حاسبت صاحب الركشه ، بعديها وقفت مسافة جنب باب البيت لحدي ما جوها بنتين سلموا عليها و دخلوا سوا ، هنا مخي مشى شمال طوالي و أي زول في مكاني و شاف الشفتو كان حيفكر في البفكر فيهو حاليا مشيت بسرعه وقفت جنب باب البيت قلت اضرب الباب ولا لا اضربو ولا لا احسن اضربو عشان يسمعوا و يفتحوا لي عشان لو في مصيبة حاصله جوا أمنعها تاني قلت لا هسي احتمال أنا فاهمه غلط ، احتمال يكون دا بيت صحبتهم و جوا يزوروها لو "سجود " شافتني هنا حتعرف إني مراقباها ، اعمل شنو طيب ، بس لو كان دا بيت صحبتهم ف ليه خلت الجامعة و جات بيت صحبتها كان ممكن تجيها بعد الجامعة و ليه ما كلمت زول مننا ، لا يا مها انتي فاهمه غلط يمكن صحبتها فجأة كدا حصلت ليها حاجه عشان كدا جات تزورها ، الكلام دا كلو كان في دقيقة بس بيني و بين نفسي ، عشان اقطع الشك باليقين مشيت لبيت من بيوت الحي ضربت الباب طلعت لي مره سلمت عليها و قلت ليها عايزا لي بيت للإيجار في حيكم دا قالت لي ماف والله قلت ليها طيب البيت داك ساكنين فيهو؟ عشان جيت هنا كم مره و دايما بشوفو مقفول و ماف حركه فيهو ، قالت لي اي ساكنين فيهو أخو صاحب البيت ساكن هنا ، قلت ليها ايوا تمام شكرا ليك ، قالت لي العفو ، شكلو ظني طلع في محلو 💔 ناديت كم شافع كدا من أولاد الحي قلت ليهم جدعوا لي البيت داك بالحجار خاصة الباب و بديكم قروش عشان تشتروا بيها شييبس قالوا لي سمح ، فضلوا يضربوا في البيت و الباب لحدي ما طلع ليهم ولد من البيت هرشهم و قال ليهم مالكم بتجدعوا و كان جاي عليهم طوالي جروا منو ، رجع دخل البيت و تاني الشفع رجعوا جدعوا البيت بالحجار خليتهم يكرروا الحركة دي أكتر من مرة ، في المرة الأخيرة الولد غضب و سكا الشفع قرب يمسك واحد منهم بس طلعوا جرايين ، كنت واقفه بعيد و براقب في الحاصل فجأة طلعت سجود و معاها صحباتا الإتنين ، الولد رجع ليهم و لقاهم طالعين اظنو اتناقش معاهم و دخل خلاهم ، هي و صحباتا اتحركوا من جنب البيت ، مشيت للشفع و أديتهم قروش زي ما وعدتهم و قلت ليهم تاني ما تجدعوا البيت بالحجار طيب؟ قالوا لي طيب ، بقيت أفكر اتصرف كيف ؟ يمكن بكرا تاني سجود ترجع للبيت دا ، عمتي ما حتصدقني و ما بقدر أكلم أنس ، امشي اتكلم معاها و أقول ليها إني شفتك دخلتي البيت الفلاني؟ ردة فعلها حتكون شنو؟ شنو لو طلع الموضوع مجرد سوء تفاهم بس ما أكتر أكيد حتكرهني زي أمها و أختها لأنو الموضوع دا حساس شديد
كيف امسيت؟ و يومك و شغلك كان كيف؟
- تمام ....محاضراتك كانت كيف؟
كويسه جدا
-محاضرتك اليوم كانت مع الدكتور القلتي لي بتكرهيه شديد داك ولا واحد غيرو؟
أي ياهو ذاتو دكتور فقر خلاص ، اصلو ما بتفاهم صعب صعب شديد و كريه في نفس الوكت 😹
-كانت محاضرة وحده ولا اتنين؟
اتنين يا أنس انت الليله مالك بتسأل كدا ، ياخ سيبك من الموضوع دا
- طيب تمام
قالها بزهج و غضب كدا
قلت ليهو أنس انت مالك الليله في شنو؟ قال لي ماف شي ، قلت ليهو لا بالجد في شنو الحاصل معاك شنو؟ قال لي بزهج قلت ليك ماف شي اكذب عليك يعنى و اقول ليك في شي ؟ 😤
قلت ليهو أنس الموضوع ما مستاهل الزهج دا كلو ، سألتك سؤال بس ، مفروض تجاوب بالهداوة ، انت ما كنت كدا عمرك ما رفعت صوتك علي 💔
قال لي و انتي عمرك ما كنتي كدا و طلع خلاني واقفه و محتاره عملت شنو انا ؟ زعلان مني في شنو ، قلت معناها زعلان مني من يوم سألني و قال لي سجود مالا و اذا في شي داساهو منو و انا قلت ليهو ماف شي ، شكلو حاسس إنو في شي و هو فعلا في شي
قعدت افكر في طريقه أراضيهو بيها فجأة كدا تلفوني رن لقيت المتصل "وجدان " صديقتي من الطفوله و اقرب انسانه لي 😍رديت عليها بمشتاااااقين والله ، قالت لي لو فعلا مشتاقه كان رفعتي السماعه و اتصلتي علي ، قلت ليها حقك علي والله عارفه نفسي مقصره في حقك بس مضغوطه والله من جهه الجامعة و من جهه شغلي الخاص ، قالت لي عاذراك حبيبه اها طمنيني عنك و اخبارك شنو و .....الخ مرت نص ساعة و انا بتكلم معاها و بنتذكر أيام الثانوي و الأساس قالت لي متذكره لمن كنا بنكتب امنياتنا العايزنها في دفتر واحد و نقول عايزين نحققها ؟؟ يا حليلنا ماف حاجه اتحققت من الكتبناو 😹 قلت ليها على فكرة انا لسه محتفظه بالدفتر داك قالت لي بالجد قلت ليها ايي والله ، طلعتو و بديت اقرا ليها في الكلام الكتبناه لحدي ما وصلت لصفحه كانت كاتباها وجدان ، كاتبه فيها: (أمنيتي اعرس راجل مقرش يسفرني و يسعدني و ما يحوجني حاجه يخلينا اسعد وحده في العالم أي حاجه اطلبها منو ألقاهو نفذها لي ، يوفر لي العيشه البستاهلها و وكت ما نحس اننا زهجانين نسافر برا السودان ما طماعة بس انا عايزا راجل بتمخط بالقروش....الخ ) انا بقرا ليها و هي بتضحك قالت لي هسي همي اعرس بس ان شاء الله بتاع كارو ما عندي مشكلة 😹ضحكت و اتونست معاها شويه و قفلت منها ، حسيت براحه شديده بعد ونستي معاها.....اتذكرت أنس و انو زعلان مني مشيت ليهم بهناك ، عمتي قالت لي الليله وين ما ظاهره يا بتي ان شاء الله طيبه و ما عيانه قلت ليها لا لا كويسه والله بس كنت بتكلم مع صحبتي عاينت ل"أنس " لقيتو بعاين لي بطريقه غريبه ما قدرت افسرها هي شنو بالضبط ، جهزت ليهم الأكل و قعدنا كلنا ناكل سوا ، بعدها عملت ليهم الشاي و قلت لازم امشي اتكلم مع سجود و اجرجرها في الكلام لحدي ما اعرف منها معلومة معلومتين ، شلت كبايتين شاي و مشيت على الغرفه لمن وصلت الباب سمعتها قالت : (ايي بعرفو دا جربناهو و اسمو الإسقاط النجمي ما كنت قايله في حاجات زي دي ، ايي التخاطر دا بعرفو بس الإسقاط النجمي دا حاجه تانيه خالص)
في سري قلت اسقاط نجمي؟ دا شنو كمان؟
🔥🔥
يتبع.....
