سينجح أحدكما في النسيان و التجاوز ، و أما الآخر فستكلفه الحياة بأن يروي لنفسه ما حدث في كل يوم ليتأكد من أنها النهاية 💔🥀
ما لقيت نفسي إلا و انا واقعه على الأرض ، من ذهول الصدمة و الموقف ما قدرت انطق بحرف ، بقيت ابكي بصوت و ما قادره اسكت نفسي ، على الأصوات دي جات ساره طالعه و ما تمت دقيقه إلا و الجيران كلهم متجمهرين في البيت ، سارة أول ما شافتني واقعه على الأرض جات سرعه و قومتني و قالت لأنس في شنو ليه ضربتها ،، ما رد عليها و بقى يعاين لي انا بس و نظراتو كلها كره لي مسكني من يدي و قال لي بنبره عاليه ساكته لي ردي ، مش قلت انك بريئة ؟ طيب اثبتي لي ،، ضغط على يدي شديد و انا ما قادره اتفكى منو و ما قادره اتكلم ، ادخلوا الجيران و حاولوا يفكوني منهم ، قال ليهم بصوت عالي ماف زول يدخل و ما عايز زول هنا أي زول يرجع بيتو ، سكتوا و قعدوا يعاينوا ليهو ، قال ليهم طرش انتوا سرعه أي زول على بيتو ما عايز أشوف خلقة زول هنا ، اتحركوا كلهم و طلعوا و جرت ساره وراهم و قفلت الباب ، و جات راجعه قالت ليهو أنس وطي صوت ما تعملنا فرجه للناس ، حلوا مشاكلكم بيناتكم ماف داعي الناس كلها تعرف ....أشر ليها عشان تسكت و ما حول نظرو عني ، قرب مني و مسكني من يدي و ساقني لحدي المظله أمو و اختو كانو جاريين ورانا وقفهم و قال ليهم ماف وحده فيكن تلحقني أو تفتح خشمها ، كان جاريني شديد و ما قادره أفك يدي منو ، قبضتو دي واجعاني شديد ، دخلنا المظله ، قال لي قدامك دقيقه عشان تحكي لي ، في شنو تاني عاملاهو و داساهو مني ، معقوله طلعتي قذره للدرجه دي ، و كل الناس عارفه عمايلك إلا أنا حتى أمي ، ياخ انتي مصنوعه من شنو عايز أفهم ...اتكلمي ليه ساكته ...اوعك أوعك تتظاهري لي بالبراءة.....بس عايز أعرف بتبكي عشان شنو ؟! اهاااا بتبكي عشان ما كنت متخيله إني حأكشفك ولا بتبكي على الكف الأخدتيهو ؟! صدقي اني ندمان على اليوم العرفتك فيهو و اليوم العرستك فيهو ! فكي خشمك دا ما تسكتي ، انا بتكلم معاك ...،،،، ما كنت قادره أرد بكلمة واحده ، بس كنت ببكي و بتنهد ،، بعد مساااافه حتى قلت ليهو أ أ أنا ما عملتي شي 😭 والله ما خنتك يا أنس و الكلام القالتو عمتي ما صح والله ،، قال لي طيب الصح شنو ؟ قلت ليهو م م ما حأقول ليك هسي ، ضرب الطربيزه الجنبو و قال لي بنبره حاده ، تااااني ؟ ما بتملي من الكذب و اللف و الدوران يا انسانه ؟ أي حاجه صغيره كانت أو كبيره بتحبي تكذبي فيها و تدسيها ، ليه بتحبي تلفي التهم و الشكوك حوليك ، ياخ انتي انسانه غريبه و ما مفهومه ، لحدي اللحظه كنت منتظر منك كلام يقنعني انك بريئة ، تصدقي رغم الشفتو و السمعتو لسه في صوت جواي بقول لي ما تظلمها ؟! انا ما عايز أخسرك بس تصرفاتك كلها بتقول لي أخسرني ، مها أنا ما بقدر استمر مع إنسانه حياتها كلها عباره عن كذب و نفاق ما بقدر أعيش مع انسانه ما مفهومه و بتحب اللف و الدوران ، حقيقة علاقتي بيك استنذفتني شديد ، خلتني دايم التفكير ، خلتني اخش في دوامه للآن ما قادر أطلع منها ، انا تعبت يا مها والله تعبت ما بقدر اتحمل أكتر من كدا خلاص صبري نفد و وصلت معاك لنهاية طريق مسدود ، انا ما بقدر اكمل مع وحده خبيثه و منافقه زيك ، انا تعبت والله تعبت و حاسي قلبي حينفطر من عمايلك دي ، ما كان ودي تكون نهايتنا كدا بس انتي السبب
وقفت لحظات و انا بعاين فيها ل"أنس" بحاول استوعب الكلام القالو ، قطع صمتنا الحاصل صوت مره بتقول شنو ؟ منافقه؟ إلتفتنا على مصدر الصوت و المره دي كانت أمي ، وصلتنا و هي لسه بتعاين لأنس ، قالت ليهو بصدمه خبيثه ؟! ليه عملت شنو؟ و حولت نظرها لي ، و لقت حالتي حاله ، قالت لي مالك يا مها ، قربت مني عشان تمسح دموعي ختت يدها في وشي و شافت أثار الكف ، عاينتي لي بذهول و نزلت يدها على جسمي و اتفحصتني بعيونها ، انتبهت للإحمرار في يدي ، كانت محمره شديد ، قالت لي قلبي كان مآكلني شديد و حاسه إنو حاصل معاك حاجه من قبيل مقلقه و القعاد غلبني ، جيتك و احساسي بقول لي انك ما كويسه يا بتي ، الضربك منو يا مها ؟! منو العمل فيك كدا ؟! عاينت ل"أنس" و قالت ليهو أنت الضربتها ولا أمك ؟! عملت شنو عشان تعمل فيها كدا ، أنس سكت و ما رد عليها بس كان بعاين لي و أنا كنت منزله راسي و ما قادره أعاين لأي زول ، جاها صوت بقول : بتك قليلة أدب و بتاعة رجال ، الصوت ما غريب علينا و من غير ما أرفع راسي عرفت إنو دي عمتي 💔 أمي قالت ليها بتاعة رجال و قليلة أدب ؟ بتي أنا ؟! قالت ليها أي بتك هدي قدامك اسأليها أنس ضربك ليه ، اسأليها خليها توريك عمايلها السوده ، أمي قالت ليها من غير ما اسئلها بقول ليك بتي ما غلطانه و انا ما ربيتا كدا و أوعك تقولي عنها قليلة أدب ، عمتي قالت ليها بصوت عالي ايي قليلة أدب و ما مربيه ، كل يوم مع راجل و كل يوم لافه من بيت لبيت لا و كمان بكل عين قويه خامه القروش بتاعة عمايلها السوده و جايباها لينا ، قلتها لبتك و بقولا تاني قروووش حرام ما لازماني و....أمي قاطعتها و ملامحها اتغيرت حتى نبرة صوتها بقت حاده و قالت ليها ، انتي شفتيها مع زول ، شفتيها طالعه من بيت زول على أي اساس بتتهميها اتهام زي دا ؟ اوعك تتكلمي عن شرف بتي بالباطل ، يعنى سبحان الله بتتكلم عن بنات الناس و ما شايفه بناتك ؟ نسيتي بتك سجود الفي السجن ؟ متهمه بتهمة النصب و تجارة المخدرات و الله أعلم كانت بتعمل شنو غير ديل ، لمن تجي تتكلمي عن بتي اتذكري بناتك ، ما عايز اتكلم كتير و اكشف المستور ، عمتي قالت ليها كيف تتكلمي معاي كدا و انتي في نص بيتي و عاينت ل"أنس " عشان يتكلم ، بس ما قال أي شي ، أمي قالت ليها احمدي الله إني سكت على كدا و إلا ما غالبني اقول عمايلك و عمايل بناتك ، خلتها و جات ل"أنس " و قالت ليهو ، بالجد خساره فيك و في أمك ، و بتي دقيقه وحده ما بتقعدها هنا ، و جرتني من يدي و قالت لي ما ح أخليك هنا تاني ، قلت ليها أمي دقيقه اسمعيني ، قالت لي بلا أمي بلا زفت لمتين حتتحمل الذل و الإهانه دي ، ليه مرخصه نفسك للدرجه دي يا بتي ، ليه محمله نفسك فوق طاقتها و ساكته ، جرتني معاها لحدي ما وصلنا باب الشارع ، بالجلاله فكيت نفسي منها و قلت ليها أنا ما ماشه معاك ، قالت لي بصوت عالي جنيتي انتي يا بتي ؟! البقعدك شنو تاني مع ناس زي ديل ، راجياهم يقتلوك و يجدعوا لحمك للكلاب ؟ قلت ليها امي المشكله دي بيني و بين أنس و ح نحلها برانا ما عايزا أي زول يدخل ، جرتني غصب عني لحدي ما طلعنا برا و الجيران تاني اتلموا ، امي سايقاني معاها و انا بحاول اتفك منها ، ادخلت وحده من الجيران و قالت ليها ما تخربي بيت بتك ، فكيها و خليها ترجع بيتا ، ما ردت على زول و هي لسه جاراني وراها ، جمعت قوتي و اتفكيت منها ، قلت ليها انا ما ماشه معاك ياخ ، مشاكلي حأحلها براي يا أمي ، انتي هسي ارجعي البيت قلت كلامي دا و انا ببكي ،، عاينت لي مساااافه و جوا عيوني ، بعدت عني خطوتين و قالت لي براك بتجيب المهانه لنفسك ، و دا طرفي منك ، تاني لو شفتهم شنقوك عديل ما ح أفتح خشمي ، طيري و خشي للجحيم ، الكنت حأطلعك منها ، طيري و تاني ما توريني وشك دا ، قلت ليها و انا ماشه ناحيتها أم.....قالت لي هس ولا كلمه و اتحركت من جنبي ، عاينت ليها لحدي ما اختفت عن عيوني ، رجعت البيت و أول ما دخلت ، كلهم عاينوا لي بنظرات بتوحي لي بحقد و كراهيه كبيره .
بس انا واثقه من اني ح أحل المشكله دي و أنهي سوء التفاهم دا ، و بكرا النظرات دي كلها حتتغير ، علاقتي ب أنس مستحيل ينهيها سوء تفاهم ، مستحيل أتخلى عنو بالسهوله دي و اقول خلاص انتهينا ، انا السبب الشكوك و الظنون دي كلها و أنا الح أنهيها كلها ....
اتمنى دائما أن يلهمني الله القدرة على افلات كل شيء يؤذيني مهما بلغ تعلقي به 🌹🥀
في الفترة الآخيره بقيت ما براجع الحلقات ، فلو في أخطاء املائيه اتجاوزوها لأني ما بقدر أكتب و اراجع 😴😴
يتبع......
