آلو ايوا معاك يا مرافى ، آيي جربتها أمبارح و طوالي اتصل علي ، كلامك طلع صح والله ، بقيت كل يوم بجرب الطريقه دي ، حاجه تانيه؟ زي شنو؟ دا شنو كمان أول مرة اسمع بيهو طيب طريقتو كيف ؟ ما مشكلة بكرا لمن ألاقيك اتكلمي لي عنو ، تمام يلا بااااي
بسم الله ، خلعتيني والله قايلاك حرامي ، جيتي متين؟
- جيت هسي ، أمي مشت وين؟ و ليه البيت كلو مقفل كدا ؟
قلت ليها ما عارفه والله يمكن طلعت على الجيران ، قالت لي خلاص حأتصل عليها ، طلعت تلفونها و اتصلت على عمتي ، ردت عليها و قالت ليها انا جايه في الطريق .
في الفترة دي عايشه في توتر و ضغوطات و كره عمتي لي كل يوم ماشي في زياده و كل يوم عامله لي مشكلة مع "أنس" و مطلعاني انا الغلطانه ، مع ذلك أنس بتجاوز الحاجات دي كلها و دايما بقيف معاي
الحاجه الغربيه اللاحظت ليها الفترة دي هي إنو سجود تصرفاتها بقت غريبه ، أغلب وقتها بتكون قاعده براها في الغرفة و نومها كتر الفترة دي ، أي صح هي من زمان منعزلة و ما بتقعد مع الناس بس حاليا بقينا ما بنشوفها كتير رغم إنها معانا في نفس البيت حتى لمن نجي نفطر أو نتغدا ما بتجي تقعد معانا و بتقول لينا باكل بعدين هسي شبعانه ، ما عارفه اذا عمتي لاحظت للحاجه دي ولا لا ، مرة قلت ليها يا عمتي سجود دي مالا الفترة دي ما ملاحظه ليها بقت منعزله تماما عن الناس و ما بتتكلم مع زول و ما بتقعد مع زول و الحاجه دي ما كويسه و مؤشر خطير ، قالت لي اسمعيني هنا بناتي ديل ما عندك معاهن قضية تقعد مع الناس ولا تقعد مع الجن الأحمر ذاتو انتي ما عندك بيها شغله ، يعنى خلاص مواضيعك جت عليها كملت عشان تجي و تراقبي بناتي؟ امهن انا ولا انتي؟ قلت ليها لا ما قصدي حاجه يا عمتي قلت يمكن عيانه أو حاصله ليها مشكلة و ما قادره تقولا لينا ، قالت لي بتعرفي بتي اكتر مني؟ قلت ليها لا ب....قاطعتني و قالت لي يلا ما اسمعك تاني تناضمي في الموضوع دا ، افكار كتيره بقت تجيني بخصوص الموضوع دا ، ألف قصة و قصة جاتني في مخيلتي ، قلت أكلم أنس بس تاني اتراجعت و قلت أحسن اتكلم مع سجود ذاتا و بهداوه اعرف منها الحاصل شنو ، يوم بعد رجعت من الجامعه مشيت عملت ليها اكل و معاهو عصير شلتو و وديتو ليها، قعدت معاها بس ما كانت منتبه معاي ، كانت بتعاين في تلفونها ، قلت ليها سجود ; ما ردت علي واصلت كلامي و قلت ليها حاساك الفتره دي ما كويسه ، يعنى اذا حاصله معاك مشكلة ممكن تعتبريني زي اختك و تحكي لي؟! بوعدك إني لو ما قدرت أحل ليك المشكله بتاعتك دي حتفضل سر بيني و بينك و الكلام ما حيطلع من الأوضه دي ، برضو ما ردت علي ، حاولت كتير معاها بس بدون فايده 💔
الليله ماف أكل ولا شنو؟ مها ...مها انا بتكلم معاك ما سامعاني؟ مهااااا
ياداب انتبهت إنو "أنس" بتكلم معاي ، قلت ليهو ما كنت منتبها قلت شنو؟ قال لي انتي مالك الفترة دي ملاحظ ليك بقيتي تسرحي كتير ، انتي داسه مني حاجه؟ قلت ليهو لا ماف حاجه بس مضغوطه مع الجامعه ، حسيتو اضايق شديد ، قال ما عارف انتي معتبراني شنو ولا شايفاني شنو قدامك ، ليه دايما بتفضلي انك تدسي مني؟ ، للدرجة دي انتي متأكده من إني فاشل و ما بقدر أحل ليك مشكله؟ قلت ليهو والله ما كدا يا "أنس" و زي ما قلت ليك ماف حاجه ولو في كان كلمتك ، سكت و ما رد علي كل العملو انو مشى بيت أمو بهناك ، انا ما بقدر اكلمو ، لأني ما عارفه سجود مالا اقول ليهو شنو يعنى ؟ يمكن سجود بتحب ليها واحد و يمكن غاشيها ويمكن و يمكن و يمكن احتمالات كتيره وارده يمكن صح و يمكن غلط، انا اقول ليهو شنو اصلا و انا ما متأكده ، ما بقدر اتناقش معاهو في موضوع انا ما عارفه مدى صحتو و حتى لو ظني طلع في محلو و دا الحاصل مستحيل اقول ليهو اختك عملت و اختك فعلت ماف أخ بقبل بالحاجه دي و عادي ممكن يقتلها ، هسي انا لازم اعرف الحاصل و اعالج الموضوع دا بطريقتي قبل ما يصل ل"أنس".
في صباح اليوم التالي واقفه في المطبخ و بفكر فجأة جا أنس داخل من غير ما يعاين لي أو يتكلم معاي بدا يعمل ليهو في شاي مع إني واقفه و بعمل فيهو كان عادي ينتظرني اخلص و اكب ليهو ، شكلو زعلان من أمبارح ، قلت ليهو خليهو انا بعملو ليك ، ما رد علي ،شال كبايتو و طلع برا ، جهزت الشاي و كبيتو للباقين ، وديتو ليهم في المظله لقيت "أنس" لسه قاعد ، ختيت ليهم الشاي و قلت ليهم ماشه انادي سجود ، عمتي قالت لي خليها يا بتي لأنها مصدعه ، قلت ليها عندي حبوب للصداع حأوديهم ليها ، قالت لي هسي بلعت ليها حبه ، قلت ليها طيب ماشه أشوفا و اجي ، قالت لي خليها لأنها قالت ما عايزا زول يزعجها و هسي بتكون نامت ، كان واضح إنو عمتي ما عايزاني اقرب من بتها بأي طريقه 💔
رجعت بيتي عشان اجهز و امشي الجامعه ، لبست و كنت حأطلع بس "أنس" جا داخل ، قلت ليهو يعنى انت لسه ما مشيت شغلك؟ سكت و فضل يعاين لي ، قلت ليهو أنس انا بتكلم معاك ياخ ، يعنى انت لسه زعلان مني من أمبارح؟ هو ماف حاجه يعنى أكذب عليك و اقول ليك في حاجه ؟؟ قال لي سجود مالا ؟ قلت ليهو مالا ؟ دا سؤال شنو ، هسي ما سمعت عمتي قالت لينا انها مصدعه؟ قال لي ايي سمعتها بس انتي ليه كنت مصره تمشي ليها و ليه كان ظاهر عليك متوتره؟ في شنو و داسه مني شنو؟ قلت ليهو اها تاني رجعنا لنقطة البداية انا امبارح قلت ليك شنو ماف حاجه يا أنس ياخ ماف حاجه ، كان باين عليهو الغضب و الضيق قال لي بنبره حاده: قلتي كدا؟ كويس بس اليوم البعرف فيهو انو في حاجه كان لازم تحكيها لي و ما حكيتيها ما تلومي إلا نفسك و ما حيحصل خير في اليوم داك ، اتذكري كلامي دا كويس .
طلع و خلاني تايها و محتاره في أمري اعمل شنو انا هسي ؟ لازم اليوم و بأي طريقه اعرف سجود بتعمل في شنو ، قررت اني أتابع سجود اليوم و أراقبها ما حأمشي الجامعه اليوم ، طلعت من البيت على أساس اني ماشه الجامعه وقفت بعيد من البيت و كنت منتظره سجود تطلع ، و اخيرا طلعت ، ركبت ليها ركشه و انا طوالي ركبت اقرب ركشه و بقيت ماشه وراها و زي ما اتوقعت هي ما ماشه الجامعه ، طيب ماشه وين؟ 💔
يتبع.....
