صباح اليوم التالي صحيت بدري عاينت ل"أنس" لقيتو نايم ابتسمت ابتسامه خفيفه كدا و نزلت من السرير ، قمت سرعه جهزت ليهو ملابس الشغل و مشيت بهناك عملت ليهم الشاي ، عمتي قالت لي أمشي نادي أنس ، اتذكرت إنو أمبارح كان مساهر معاي و ما نام قلت مفروض اليوم ما يمشي الشغل ، قلت ليها أنس شكلو تعبان عشان كدا ما حبيت أصحيهو ، عاينت لي من فوق لتحت و رجعت تشرب الشاي بتاعها ، دخلت المطبخ و عملت الفطور بالمرة ، رجعت جهزت نفسي للجامعه و أنس لسه نايم ، كتبت ليهو رسالة محتواها :( شكلك تعبان من سهر أمبارح فما حبيت أصحيك ، ارتاح اليوم و ما تمشي الشغل ، صحتك بتهمني شديد ، بحبك ♥️) لمن طلعت من البيت سجود كانت برضو طالعه قلت ليها خلينا نمشي سوا و بعدين أي وحده لجامعتها قالت لي تمام ، وقفنا في الموقف منتظرين المواصلات ،،، قلت ليها سجود بخصوص المواضيع الفات ان شاء الله ما رجعت ليها تاني ، قالت لي لا لا اطمئني ما رجعت ليها ، قلت ليها طيب الولد القلتي بتحبيهو ع....قاطعتني و قالت لي : قلت ليهو لو عايزني تعالني بالباب عديل و قال حيجهز أمورو و حيجي لأنس ، قلت ليها كويس شديد ربنا يتم ليك على خير....🌹
اثناء ما نحنا واقفين كدا جات مره و بدت تصرخ ، بتي وين ، بتي ضاعت مني يا ناس ، انا ما لاقيه بتي ألحقوني يا ناس ،، قعدت في الواطه و بدت تبكي الناس كلها اتجمهرت حوليها و حاولوا يساعدوها ، قالوا ليها بتك عمرها كم ؟لابسه شنو ؟ضاعت منك وين ؟قالت ليهم مواصفات بتها فتشوها و ما لقوها في النهاية ساقوها لأقرب قسم شرطة ، حالتها كانت بتحنن الكافر ، في الفترة دي شايفه عمليات الخطف بقت كتيره شديد ، الناس بقت تطلع من البيت و هي ما حاسه بالآمان احساس الخوف بكون مرافقهم لحدي ما رجلهم في باب البيت ،،، رجع بي الزمن 13سنة لورا و اتذكرت هيفاء بت جيرانا ، كنا بنلعب سوا ، بنمشي المدرسة سوا ، بنرجع سوا ، في يوم طلعنا كلنا من المدرسة على البيت بس هيفاء ما كانت معانا وقفنا ليها جنب باب المدرسة قلنا احتمال هي لسه جوا المدرسة ، لمن اتأخرت و المدرسه بقت فاضيه من الطلاب دخلنا جوا و بدينا نفتش عليها ،، فتشنا المدرسة دي حته حته بس ما لقيناها ، و نحنا بفتش كدا جاتنا أستاذه خديجة قالت لينا انتوا لسه ما مشيتوا بيوتكم ؟بتعملوا في شنو لحدي الآن ؟ قلنا ليها كنا بنفتش في هيفاء بس ما لقيناها ، قالت لينا بتكون مشت قبليكم ، يلا اتحركوا على البيت و ما تلعبوا في الشارع المدرسة حتقفل بعد دا ، قلنا احتمال مشت خلتنا زعلنا منها شديد و قلنا حنحاربها، هيفاء ما حتكون صحبتنا تاني ، رجعت البيت و كالعاده ما قلعت لبس المدرسه سرعة أكلت و طلعت الشارع و قعدنا نلعب ، بعد شويه شفنا أم هيفاء طالعه من بيت ناس خالتو مريم و هي بتبكي لمن شافتنا جات علينا و قالت لينا بحس مقطوع هيفاء بتي وين؟ ما جات معاكم ؟قلنا ليه لا ما جات معانا ، عاينت لي و قالت لي كيف يعنى ما جات معاكم يا مها مش كنتوا بتمشوا سوا و بتجوا سوا ، قلت ليها ايي لكن هي براها مشت و خلتنا طلعت قبلينا ، بدت تصرخ و تقول بتي وين ، بتي وين يا ناس هيفاء مشت وين ، ناس الحله كلهم طلعوا ، النسوان بدوا يصبروا فيها و الرجال كلهم مشوا يفتشوا على هيفاء ، كنا صغار و ما فاهمين و ما عارفين حاجه بس العارفنو إنو هيفاء ما جات بيتهم قلنا الليله أمها حتشاكلها و حنضحك عليها ، تستاهل لأنها مشت و خلتنا ، عدوا يومين و لسه ماف أي خبر عن هيفاء ، كنا بنمشي المدرسه و نجي على أمل نلقى هيفاء رجعت ، انا و بنات جيرانا كنا مفتكرنها مدسيه مننا و ما عارفين جدية و خطورة الموضوع ، في اليوم التالت كنا راجعين من المدرسة ، شفنا ناس و عربات كتيره جنب بيت ناس هيفاء ، قلنا معناها هيفاء رجعت و عايزين يجلدوها ، جرينا جري على بيتم عشان نحضر الجلده و نضحك عليها ، أول ما دخلنا البيت لقينا الناس ديل كلهم أي زول ببكي على اتجاه و ناس الحله كلهم اجتمعوا في بيت ناس هيفاء و بدوا البكى ،، ما كنا فاهمين حاجه ، الحاصل شنو ؟هيفاء وين ، سمعت مرة جيرانا بتبكي و بتقول حيييي انا يا ربي حيييي انا يا هيفاء حيييي انا من الحصل معاك ، اغتصبوها اغتصوبوا شافعه و كتلوها ، حسبي الله و نعم الوكيل فيهم الله ينتقم منهم ،، حقيقه ما كنت فاهمه الكلمات دي معناها شنو ، من بعيد لمحت أمي قاعده و بتبكي مشيت عليها و قلت ليها يمه في شنو ؟هيفاء مش جات ؟ضمتني عليها و اكتفت بالبكى ، بكت لمن بكتني معاها و انا م فاهمه حاجه .
بعد كبرت عرفت الحصل مع هيفاء شنو ،، هيفاء مسخت علينا الحي الحي كلو ،، مع إنو ناس حينا كلهم ماف زول قريب زول بس البشوفنا كلنا بقول علينا أهل ، بعد الحصل ل هيفاء عم الظلام على حلتنا و بقت لا تطاق ، في كل حته بنشوف هيفاء ، في المدرسة و في الفصل ، جنبنا في مقعدها ، في الحله جنب دكان عوض ، في الميدان بتخطف من الأولاد الكورة و بتجري بيها ،، هيفاء ماتت بس لسه طيفها موجود في حلتنا بعد أسبوع قررنا نرحل من الحله دي و سكنا الكلاكلة رحلنا بعيد شديد من أمدرمان للكلاكلة 💔
بعد الحصل لي هيفاء كنت بقول لأمي لمن أكبر عايزا ابقى محققه أو شرطة ، عايزا اقبض على المجرمين يا أمي ، عشان تاني ما يخطفوا طفل من أمو 💔
طق طق ،،، سرحانه وين انتي يا مها ؟من قبيل بنده عليك المواصلات جات يلاااا أرح نركب .
بعد المحاضره الأولى اتصل علي أنس اول ما رديت عليهو قال لي ليه ما صحيتيني ؟
قلت ليهو أولا صباح الخير و ثانيا انت ما قريت الرسالة الكتبتها ليك ؟ ، قال لي مها ما عايز الحركه دي تنعاد تاني و كان حيقفل ، قلت ليهو أنس مشكلتك شنو ؟ امبارح كن....قاطعني و قال لي لو أي زول كان مكانك كنت عملت ليهو كدا ،، كوني اعمل ليك مكمدات دا ما بيعني إني سامحتك و إنو خلاص الموضوع اتحلى ،، قلت ليهو دا العايزا أعرف انت زعلان مني في شنو للدرجة البتخليك ما ترد علي لمن اتصل عليك ،،، امبارح اتصلت عليك كتير عشان اقول ليك ماشه بيت أهلي تعال أغشاني بس ما رديت 💔قال لي ببساطة لأني ما عايز أسمع كذبك و تأليفك ، شنو البأكد لي انك كنتي في بيت أهلك و ما كنتي في حته تانيه ؟
كلامو صدمني شديد ، بعد مسافه حتى قدرت أرد عليهو ،، قلت ليهو أنس انت شاكي فيني ؟ قفل الخط من غير ما يرد علي 💔شفت أقرب بنش و قعدت فيهو ما كان عندي نفس أخش المحاضره التانيه ، ما اتوقعت إنو يجي يوم و أنس يشك فيني ،، بعد المكالمه دي علاقتي مع أنس بقت متوتره شديد بقى قاعد لي على الهبشه بس و عمتي كمان ما مقصره كل يوم عامله لي مشكله و كل يوم أنس بشاكل فيني ،، يومنا مستحيل يعدي من غير نقاش و لحدي اللحظة دي ما قادره أفهم هو شاكي فيني ليه ؟شاف مني شنو خلاهو يشك فيني ؟
في يوم كنت بعمل في الأكل ، انتهيت منو و مشيت أصلي المغرب ، اثناء ما أنا قاعده في المصلايه سمعت أنس بتناقش مع إمو و صوتو عالي ، قال ليها وطت لينا راسنا يا أمي و عايزاني أهدى ؟ اعمل شنو انا بس أعمل شنو ؟ كرهتوني حياتي و كرهتوني اليوم الجيت فيهو على الدنيا دي ،، كان بقول الكلام دا بضيق و بنبره كلها غضب و زهج ،، قمت من المصلايه ،،و قلت اللهم أجعله خير ،، أول مرة أنس يجي زهجان و يكورك من الباب بالصوره دي ..
يتبع.....
