قمت من مكاني و ماشه على ناس عمتي ، لقيت أنس داخل قلت ليهو أنس في حاجه عايزا أقول ليك ، ما اشتغل بكلامي و طوالي دخل جو رقد و اتغطى ، رجعت ليهو و قلت ليهو مش كنت عايز تعرف انا داسه منك شنو؟ قال لي ما تزعجيني انا عايز أنوم قلت ليهو بس....قبل ما اتم كلامي اتحرك على الدولاب شال ليهو غير و مشى دخل الحمام ، قلت احسن اكلم عمتي ، بس هي اساسا من البدايه ما حتتفاهم معاي احسن اواجه سجود عديل و اتكلم معاها مشيت ليها في الغرفة لقيت سارة هناك بس كانت نايمه قعدت جنبها في السرير و قلت ليها عايزا أتكلم معاك و يا ريت تجاوبيني ما اشتغلت بي يعنى كأنها ما سامعاني ما أبدت أي ردة فعل ، قلت ليها معناها حأقول ليك من الآخر كنتي بتعملي في شنو في ()قبيل الصباح و ليه دخلتي البيت داك و ما مشيتي الجامعه ، اتخلعت و جدعت التلفون من يدها قالت لي ب توتر شن شنو بيت شنو مجنونه انتي؟ قلت ليها حتقولي لي ولا أنادي أنس؟ قالت لي يعنى بتهدديني؟ عايزاني اقول ليك حاجه ما حصلت عويره انتي ولا بتتعاوري؟ قلت ليها بس انا شفتك بعيوني و صورتك بتلفوني ، قالت لي عايزا تهددي منو جيبي تلفونك خليني أشوف ، قلت ليها معناها بتعترفي انك مشيتي البيت داك؟ قالت لي لا بس عايزا أشوف نهاية كذبك دا شنو ما هو مستحيل تكوني صورتي حاجه ما حصلت ، قلت ليها كويس حأجيب تلفوني لكن حأجيب أنس معاي و بخليهو هو اليتفاهم معاك ، اتحركت من جنبها كدا قالت لي اقيفي ، وقفت و عاينت ليها قالت لي عايزا تعرفي شنو ، قعدت جنبها و قلت ليها مشيتي البيت داك ليه؟ قالت لي مشيت عشان أزور صحبتي ، قلت ليها كذابة ، قالت لي و ليه اكذب و بعدين انتي من وين عرفتي اني مشيت هناك؟ بتراقبيني يعنى؟ قلت ليها مشيتي لصحبتك؟ طيب ليه من البداية ما قلتي لي كدا؟ سجود بطلي كذب البيت المشيتي ليهو كان ساكن فيهو ولد واحد بس و انا شفتكم لمن كنتوا واقفين معاهو ، بدون أي كذب كنتوا بتعملوا شنو هناك ، حسيتا خافت و غلبها ترد اكتفت بالبكا بس ، قلت ليها هس عشان ماف زول يسمعك ما تخافي ما حأحكي لزول بس انتي خليك واثقه فيني و احكي لي ، قالت لي و هي بتتنهد الولد الشفتيهو معانا دا حبيبي و نحنا بنحب بعض من زمان و قبيل كان عيان عشان كدا مشيت ليهو مع صحباتي بس والله ما عملنا شي غلط ، قلت ليها بس كدا ؟ ماف شي تاني؟ قالت لي تاني زي شنو؟ قلت ليها زي الإسقاط النجمي مثلا رفعت راسها و قالت لي شنو دا دا شنو كمان ؟ قلت ليها سجود بطلي كذب انا قلت ليك احكي لي القصه كلها معناها تحكيها كلها بالفاصلة و النقطة انا سمعتك لمن كنتي بتتكلمي عن الإسقاط النجمي ، كل العايزا أقولو ليك انو هو حاجه ما كويسه و خطيره شديد حيقودك للجنون انا ما عارفه شنو الخلاك تفكري في حاجات زي دي اصلا من وين عرفتو الحاجات دي؟ قالت لي ما عارفه الإسقاط النجمي دا شنو ، قلت ليهو انا سمعتك لمن كنتي بتتكلمي مع صحبتك و قلت ليها جربنا التخاطر و الإسقاط النجمي بطلي كذب و إياك من اللف و الدوران و إلا أنس حيكون بيناتنا بعد شويه ، قالت لي لا ما تدخلي أنس القصه و ما فيها إنو صحبتي قالت لي بتعرفي التخاطر قلت ليها لا فشرحتو لي فعملتو عشان أقدر اتواصل مع "مجاهد " قلت ليها مجاهد منو؟ قالت لي الولد الكان واقف معانا و واصلت كلامها ب اما الإسقاط النجمي دا فأنا ما عندي عنو معلومات كتيره بس جربتو من باب الفضول و ما حصلت حاجه و خليتو بس دي القصه كلها ، قلت ليها طيب حصل خير بس عايزاك توعديني انك تبعدي عن الحاجات دي و عن مجاهد لأنو لو فعلا هو عايزك كان جاك بالباب ، ما عايزا اشوفك تاني معاهو و ما عايزا اسمعك تاني بتتكلمي عن الإسقاط النجمي دا كلو لمصلحتك يا سجود لأنك بتهميني شديد و الموضوع دا حندفنوا في مكانو دا لا زول سمع لا زول عرف بس اعمل حسابك طيب؟ قالت لي حاضر قلت ليها خلاص بعد دا انا ماشه قبل ما اطلع قالت لي "مها " قلت ليها نعم قالت لي عليك الله امسحي الصور الصورتيها و لو عندك فيديو كمان احذفيهو، قلت ليها اطمني اساسا ما صورت حاجه بس كذبت عليك عشان تحكي لي قالت لي بالجد ما يكون كذب كمان قلت ليها والله ما صورت شي قالت لي طيب ، طلعت منها و انا حاسه براحه شديده كأنو صخره و انزاحت مني اخيرا حأقدر أنوم براااحه أكتر ❤️
كالبرق ، كالرعد ، كالنار كان ذلك هو الهدوء الذى يسبق العاصفة 🔥
يتبع......
