لقد رأيت الثقب الأسود في سفينتك منذ اليوم الأول للرحلة
ولكنني قررت الإبحار معك ظناً بأن الحب يصنع المعجزات ..♥️
أول ما إلتفت على مصدر الصوت ، لمحت زول ما غريب علي شويه شويه بديت اتذكرو بعد ما قرب مننا ، قال لي مها كيفك مدا يدو و سلم علي ، قلت ليهو بإستغراب أحمد !! قال لي ايي احمد مالك مستغربه كدا ؟ و ضحك ضحكه خفيفه كدا ، قلت ليهو يا زول وين كنت مختفى الفتره دي كلها ؟ قال لي كنت مسافر والله و من رجعت لي شهر ، قاطعتنا مرام لمن قالت لينا انتوا بتعرفوا بعض ؟ احمد قال ليها ايي بنعرف بعض من زمان ،، قالت ليهو ايوا ، طيب عن اذنكم وراي شغل ،، بعد ما اتحركت من جنبنا ، احمد سألني عن احاولنا و عن ناس البيت قلت ليهو كويسين الحمدلله ، قلت ليهو بتعمل شنو هنا ، انت معلم هنا ؟ قال لي لا بس جيت لأمي ، قلت ليهو أمك ؟ قال لي ايي مديرة المدرسه دي أمي ، قلت ليهو ما شاء الله ، يعنى أ/ رشيده طلعت أمك في النهايه ! قال لي انتي ما بتعرفي أمي ؟ قلت ليهو ايي لأني ما حصل شفتها ، قال لي تعالي دقيقه طيب ، قلت ليهو وين ؟ قال لي انتي بس ألحقيني ، مشيت وراهو لحدي ما وصلنا مكتب المديرة ، ضرب الباب و خشى على أمو ، اول ما شافتو قالت ليهو نسيت حاجه يا أحمد ؟ قال ليها لا بس عايزا أعرفك على زول ، قالت ليهو منو ؟ قال لي تعالي يا مها ، أمو قالت ليهو بإستغراب بعرفا دي المعلمة الجديده !! قال ليها غير كدا ، كدي عايني ليها بتشبه منو ؟ عاينت لي مسافه لمن انا ذاتي اتعقدت و قربت اطلع من المكتب ، بعد مساااافه قالت ليهو دي بت روضة فضل الله ؟ بت حولي الزاكي ؟ قال ليها آيي ياها ذاتي ، جات علي و سلمت علي سلام معرفه و سألتني عن أمي و ابوي ، قالت لي طبعا ما عرفتك في البدايه عشان ما حصل شفتك إلا زمان لمن عمرك كان 6 سنوات ، قلت ليها انا ذاتي ما عرفتك لو ما أحمد القال لي كدا ، قالت لي البركه في أحمد الجابك لي ، اتونست معاها مساااافه ، طلعت زولة ظريفه شديد و متواضعه و بتدخل القلب ♥️ حتى الكلام معاها مريح شديد 🌹🍁
طبعا احمد دا بعرفو من زمان ، و اهلو بعرفو أهلي بس ما كنا متواصلين معاهم شديد بس معرفه من بعيد ، اصلا هم ببقوا لناس جيرانا الزمان لمن كنا ساكنين في أمدرمان ، لمن كبرت كنت بلاقى أحمد دا في حفلات و أعراس الناس البعرفهم لأنو هو ذاتم بعرف نص الناس الأنا بعرفهم ، عشان كدا ما بعرف أمو ولا أبوهو .
-آلو سارة كيفك
يا هلا بخير الحمدلله انتي كيف و وينك ما ظاهره الفتره دي
- والله مضغوطه بس في الشغل ، اسمعيني عندي شمار عايزا اقولو ليك
شمار شنو ؟ اها قولي سامعاك
-.........
في نهاية الدوام طلعت من المدرسة و فكرت امشي ازور سجود في السجن ، مشيت ليها بس ما خلوني أدخل ليها و قالوا لي اليوم ممنوع الزيارة ، قلت ما مشكلة حأجيها المرة الجايه مع أنس ، رجعت البيت ، استحميت و اتوضيت و صليت الضهر و مشيت لبيت عمتي بهناك ، اول ما شافتني لوت لي خشمها و قالت لي الليله الجابك بدري شنو انتي ؟ قلت ليها كان عندنا محاضره واحده بس ، دخلت المطبخ و بديت اعمل في الفطور مع إنو زمنو فات بس ماف زول حيعملو غيري ،، جهزتو و قعدت أفطر مع عمتي ، في كل مره أرفع راسي ألقاها بتحمر لي ، كرهها لي دا واجعني شديد و مخليني متوتره و خايفه بوجودها بس نفسي ما قادره أتنفس قدامها ، بحاول قدر الإمكان اني ما اعمل حاجه غلط عشان ما تشاكلني بكون حريصه كل الحرص لتفادى أي تقصير ممكن يحصل من طرفي ، حتى في الأكل دا بكون خايفه الملح يكون كتير أو الملاح يكون مسيخ بكون عامله ألف حساب في اصغر التفاصيل ،، ما قدرت أقعد اكتر من كدا معاها قمت على حيلي مشيتي بيتي و ما رجعت إلا لمن اتأكدت انها خلاص انتهت من الفطور ، لملمت حاجات العده و غسلتهم ، قبل ما أرجع بيتي سمعت صوت الباب ، مشيت فتحتو كانوا 4 نسوان سلموا علي و فضلتهم ، عمتي جات سلمت عليهم و دخلتهم المظلة ، رجعت المطبخ شلت مويه و جبتها ليهم ، عمتي قالت لي اعملي لينا الجبنه قلت ليها حاضر ، دخلت المطبخ و بديت اعمل في الجبنه ، بعد شويه سمعت واحده من النسوان ديل بتقول لعمتي دي مرة ولدك ؟ قالت ليها بضيق آيي ، ردت وحده تانيه و قالت ليها الظاهر عليها طيبانه شديد ، عمتي قالت ليهم المظاهر خداعه و بعدين حنستفيد من طيبتها شنو و هي ما قادره تجيب ولد لولدي ؟ التالته قالت ليهم صاح كلام صباح مرة زي دي يسوا بيها شنو عليك الله ، عمتي قالت ليها انا لو علي أطلقها منو هسي و أعرس ليهو هسي ، بس ولدي التقول كاتباهو ما برضى فيها حتى ولو كلمة ، الرابعه قالت ليها طبعا حتكون كاتباهو لأنو ماف راجل بقعد و بكتفى ليهو بمره عاقر ، الرجال ديل دايرين شنو غير يشوفوا وليداتهم قدامم و يجربوا احساس الأبوه ، عمتي قالت ليها تقولي شنو بس ، غيتو أنا أنس دا حيرني معاهو
سمعت الكلام دا كلو و حاولت أكون طبيعيه لمن جيت أقدم ليهم الجبنه إبتسمت غصبا عني و انا من جواي مقهوره و مكسوره 💔
لكن ألوم منو ؟ ماف زول ليهو دخل في الحاجه دي ، لكن انا ظالمه أنس معاي ، كلامهن كلو صاح ، مستفيد مني شنو ؟ قدمت ليهو شنو ؟ ولا شي طبعا ، يعنى ليها انا كنت أنانيه للدرجه دي و ما فكرت في أنس ، اذا المشكلة فيني أنا فهو ذنبو شنو ؟ مش من حقو يحس بإحساس الأبوه زيو و زي أي زول ، العمر ماشي و ما بستنى زول هو ذنبو شنو عشان يقضى باقي عمرو دا كدا ؟
المسا لمن أنس جا راجع ، عاينت ليهو شديد و عاينت لتعابير وشو الكلها تعب و إرهاق ، هو ما بستاهل دا كلو ، ما لقيت نفسي إلا و انا حاضناهو ، كأني بعتذر منو على الحصل ليهو و الحاصل ليهو دا كلو ، ما أبدا أي ردة فعل و ما قال أي كلمة كأنو صنم ، ما تميت دقيقتين إلا و لقيتو ببعدني عنو ، انتفض مني بطريقه جارحه شديد ، و كالعاده طلع من الغرفه و مشى البيت التاني ، قعدت في السرير و فضلت أبكي ، بكيت لمن قلت بس ، اصلا حأعمل شنو غير البكى !!
في اليوم التاني صحيت بدري عشان امشي اداوم في المدرسه حتى قبل أنس ،، عملت ليهم الشاي و جيت بيتي راجعه عشان اشيل شنطتي ، عاينت ل أنس لقيتو لسه نايم ، بقيت واقفه و بتأمل في ملامحو ما اتخيلت يجي يوم و يحصل الجفا دا كلو بيناتنا ، قطع تفكيري صوت تلفوني و هو برن ، عاينت للرقم لقيتو رقم قريب ، رديت عليهو و قلت ليهو آلو منو معاي ؟ قال لي مها أنا احمد ؟ قلت ليهو ايوااا احمد كيفك ؟ قال ليها الحمدلله انتي كيف ؟ قلت ليهو كويسه الحمدلله ، قال لي اسمعيني أمي عيانه اليوم ما حتجي المدرسة فقالت عايزاك تجيها في البيت قبل ما تمشي المدرسه ، عايزاك ضروري ، قلت ليهو سلامتها ألف سلامة ، حاضر حأجيها في البيت ، بس انا ما عارفه بيتكم وين ، قال لي العنوان ()قلت ليهو تمام حأجي عليها ، قال لي طيب مع السلامة.....🌹
قفلت التلفون و دخلتو في الشنطه و طلعت ، كالعاده وقفت مسااافه للمواصلات و بعد مرمطه و وقف طويله اخيرا ركبت و نزلت في الموقف و منها ركبت ركشه لبيت ناس أحمد .
يتبع..........
