هديتي من السماء

البارت الثامن عشر

يتشابهن بالضوگ ملحك وملحي

بس انه الك بالزاد وانت على جرحي

ــــــــــــــــــــــــــــــــــــــــــــــــــــــــــــــ

طبعاً كلهم حچو وگالو مشتاقيلچ بس هوه نظرته كانت تختلف لذلك خجلت كلش احس وجهي صار نار

دنگت وضليت آكل وكل ماارفع عيني الگا يباوعلي
حتى معرفت آكل بعدين گمت اول وحده رحت سويت چاي وحضرته من جابن البنات المواعين اخذت الصينيه والقوري ورحت گعدت يم بيبي اصب يمهم چاي همه غسلو واجوي دخل سلطان صار گبالي وهم كل مااباوعله الگا يباوع عليه

گمت اريد اقدم الهم الچاي زيد مقبل هوه گام قدم

قحطان: رضوان كملتو كلشي للعرس

رضوان:اي يابه كلشي جاهز ماضل بس العروس تجي

قحطان:ان شاء الله تجي ماضل شي

بقو يتناقشون بأمور الزواج
وبعدها اتفقو على كلشي

اني تذكرت ماما تريد تحول فلوس الي

وتين: فهد ماما تريد تحول فلوس الي عادي تحولهن على اسمك

سلطان:عليش محولتلچ فلوس عجل احنه وين صرنه انت محتاجه فلوس؟

وتين: لا لا والله ممحتاجه بس انتو مو تعرفون بابا الله يرحمه شريك ويه خالو ساهر بالشغل فهوه ينطيني كل شهر الوارد من حصت بابا ومن اجيت لحد هسه يخليهن يم ماما وتجمعن مال ٧ اشهر وهيه گالت احولهن الچ وبعد كل كم شهر تجمعهن سوه وتحولهن

سلطان: يولي حسبالي محتاجه فلوس اذا هلشكل مالي دخل

فهد:خل تحولهن عادي انه اروح اجيبهن لچه

سلطان:انتن يبنوات اتفقن على يوم تاآخذچن اربعتچن للسوگ تشترن ملابس للعرس وللحنه

حنان:عجل اليوم قربانك ضايجين والله ووتين من جت لهلحزه ماطلعت باب البيت

سلطان:عجل تهيرو بالخمسه نتوكل

صعدنه للغرف اني نمت گعدتني حنان بالاربعه رحت سبحت ورجعت لبست بينصل فانيله لون بيج وحذاء عالي بيج ولبست الصايه الزيتوني الجابها سلطان وشال بيج كانت فد شي باللبس كلش حلوه لان عريضه وفصالها رجالي كانت راقيه وحبيتها الشال هم لبسته بطريقه نازكه بدون هوسه وقراصه جوا مو كلش كبيره رتبته اخذت جنطه صغيره تنلزم بالايد نزلت البنات مكملات

حنان:يولي شهلجمال لبستي عدسات؟

وتين:لا والله بس اني من البس لون من تدرجات الخضر يضرب على عيوني ويبينن خضر

حنان:شحلوووو تعالي تعالي تاتشوفچ جده

رحنه دخلنه للصاله

ام قحطان:ماشاء الله عين النبي عليچه جده طالعه شيخه يولي

سلطان بس شافني اجه وگف گبالي گال عليش العدسات يابه هيه عيونچ ناگصها حلاة