هديتي من السماء

البارت الخامس والعشرون

بـعــدك لا حـلــه المشرق ولاطــاب
وخــزن جــرح دلالـــي ولاطــاب
دونــك لانـشــد احــد ولاطــاب
عليـه وشـاف شـنـهـو الـصـآر بـيـه

ـــــــــــــــــــــــــــــــــــــــــــــــــــــــــــــــ

طلعنه الدنيا مگلوبه وهوسه رهف مااعرف وين اخذوها مموجوده والناس اقارب بابا كلهم بالباب مال اهل رنا حتى الشيخ مالتنه واگف والوجوه ماتتفسر

اجانه سالم گال تعالو بسرعه تقسمنه بالسيارات اني وبيبي وحنان وعمه ام سالم صعدنه وي سالم وصلنه للبيت والكل ويانه

دخلنه للبيت والزلم راحو بالاستقبال اني گبل صعدت للغرفه بدلت وگعدت ابچي من كل گلبي

شلون اذا صدگ صارت يعني تنعاد معاناتي من جديد اني ماصدگت ارتاحيت فتره

لا لا مااقبل اني احاچي جدو هوه اكيد محيجبرني

بقيت على گعدتي لليل وبس ابچي

اجتي ايمان گعدت گبالي

ايمان:ول حبيبتي عليش تبچين كافي اسكتي واستهدي بالرحمن هيه من حچت عليچ ضرت نفسها ماضرتچ

وتين:شلون مضرتني واني راح اتزوج مجبوره بسببها وسلطان شنو ذنبه ينفرض عليه زوج غصب للمره الثانيه

ايمان:يولي اي غصب غير هوه الگاع مو شايلتو مو مصدگ رغم الهوسه والكونه الصارت والفضيحه السوتها الو رهف وهوه مو گادر يضم فرحتو

وتين:بس اني مااريد اتزوج الله يخليچ حاچيهم

ايمان:وتين السالفه بيها شرف وچبيره مو هينه واحنه هينه ناس معروفين والنه سمعتنا مو سهل ينطعن بشرفچ وتنجاب سيرتچ وانت عرضنه والكلام الگالتو جدتي هوه السد السالفه وحتى لو مو گايله هلشكل هم چانو راح يزوجوچ من سلطان لان السالفه طاشه بالديره وهاي العگربه على گولت سلطان وين ماتروح تحچي بشرفچ هيه وامها الغبيه ماضنت راح نسمع وتتكربس السالفه براسها بس هوه من حفره حفرتاً لاخيه وقع فيها

وتين:ايمان فهميني الله يخليچ صعب اتقبل اتزوج مره ثانيه اني الشفته اول مره كرهني بشي اسمه زواج

ايمان:يولي مو كل اصابيعچ سوه وسلطان يعشگچ ومايأذيچ

وتين:احمد هم يحبني وعمره مأذاني قبل لااتزوجه بس من تزوجته شفت المر منه

ايمان:والله ماادري شأگلچ انت بعده جرحچ مو طايب وماتقتنعين لو احچي للصبح

وتين: لعد حاچي جدو خل يشوف حل للموضوع واني اروح اعيش ببغداد ببيت بابا وهيچ بعد محد يحچي

ايمان:يولي الموضوع مو بهلسهوله السالفه چبيره فهمي عاد احنه هنا ناس كلها عشاير والشرف مو هين زلمنه عدهم الشرف اغلى من ارگابهم