لا إله إلا الله وحده لا شريك له له الملك وله الحمد وهو على كل شيء قدير
التصنيف: رعب - فكاهي
*تنبيه*
القصة مكتوبة كاملة باللهجة السودانية
××××××××××××××
حصل كنت مسافر بعربية أو بص او أي وسيلة سفر والشمس غابت عليكم قبل تصلو وجهتكم؟ وقتها ما حيكون حوليكم أي شي غير الضلام، شارع ظلط أسود طويل منور بنور العربية بس والباقي كلو ضلام.
وبسبب طبيعة بلدنا أغلب الحوليك بيكون عبارة عن صحراء، يلا اتخيل معاي وانت قاعد في العربية والساعة ١١:٤٥ نص الليل، النعاس متعبك لكن مستحمل وقررت تعاين بالشباك، للأسف مافي مناظر حلوة الخلاء مضلم والسماء ما فيها نجوم والقمرة ورا السحب، مافي شي يستحق الذكر لكن فجاة تلمح ليك خيال لزول ماشي بعيد وبسبب سرعة العربية اختفى من مجال نظرك!
ده منو البيمشي نصل الليل وسط الخلاء وبراهو؟
سألت نفسك السؤال ده وحاولت تجاوب عليه. للحظة جاتك فكرة، يمكن ما يكون إنسان يمكن يكون حيوان حمار ولا ماعز لكن.. هل الحيوانات بتمشي على اتنين؟ واتذكر انو الكنغر ما بيعيش في السودان!!
وعشان الطين يزيد بله المنطقة دي ما فيها أي قرية قريبة، أقرب قرية على بعد تلاته ساعات!!!
وبينما انت متحير كنت أنا ماشي في الخلاء داك، ما تخاف أنا زول طبيعي زيك لكن لظروف قاهرة لقيت نفسي براي في الخلاء ده وعلى بعد تلاته ساعات من قريتي، وللأسف ما عندي وسيلة ارجع بيها غير رجليني الخلقهم الله ديل.
وعلى عكسك أنت البتمر سريع بالخلاء بعربيتك أنا مضطر اني أمشي في نصو وشايف حاجات انت ما بتشوفا.
وسع خيالك كويس عشان تقدر تتخيل الحاجات الأنا شايفها حوليني.
مش الحته مضلمة ويدك ما بتقدر تشوفها لو ختيتا قدام عيونك؟ كدة إنت طبيعي وما فيك عوجة ما زي البيمرو من بعيد ديك. كل فترة قصيرة بتجي قافلة تمر من بعيد، موكب كبير فيهو جِمال وأحصنه وحمير، رجال ونساء وأطفال، ومع انو الموكب كبير ومليان ناس وحيوانات لكن ما طالع منهم ولا صوت كأنهم كلهم صم وبكم.
لكن دي ما الحاجة الغريبة، الغريب انهم كلهم منورين كأنو اي واحد منهم مركب لمبة في جبهتو. وكل البيعملوهو انهم بيلتفتو علي، يرفعو يدينهم بالسلام وبعد ما ارد السلام يتابعو طريقهم بنفس السلاسة.. وبعد فترة تتكرر القصة تاني!
الحمدلله انهم ما بيعملو حاجة أكتر من كدة، ناس طيبين... أيوة ديل ناس وما تحاول تقنعني بإنهم اي حاجة تانية غير انهم ناس.. قلبي الصغير ما بيتحمل.
الناس المنورين ديل ألطف شي، بعد ما يمشو والضلام يرجع تاني بيجي معاهو شي غير. بتعرف الغول؟ لازم تكون بتعرفو لكن هل حصل سمعت صوتو؟
