رواية عيونك شوكة في القلب توجعني وأعبرها / للكاتبة اديم الراشد

الفصل الثامن

..
*. #الفصل_الثامن 8️⃣*
..
..
..
ابو عادل: اللي صار صار بس انه اذا عرف بالخطبه الجايه بيسوي كارثه
منى: يخسي والله لكسر رجوله خلني اشوفه
ابو عادل :لا لا ي منى لا تفكرين تقولين له وقتها بيولع نار ويخليها عليه وعلى اعداءه وانتي تعرفين فيصل
الجد : وشو بتسوي
ابو عادل :مدري
ابو محمد : زين زين اتركوه علي انا اصرفه المهم الموضوع بينكم ولا يطلع لاحد وانا ادبركم
منى: ابي اعرف وشوله يسوي زي كذا
ابو عادل تنهد بضيق : تعرفون انه متعلق بأمه حيل وتدرون وش صار فيه لما ماتت والحاله النفسيه اللي وصل لها وبالقوه قدر يطلع منها عشان كذا كان خايف يجي احد ياخذ مكان امه ويحمي كل شي لها بالبيت ويسوي كل اللي يسويه عشان ما احد ياخذ مكانها ومن دافع ثاني كان يحاول مايفقدني مثل امه
الكل سكت وتأثر من الكلام بس محد بيحس فيه كثر فيصل
ابو محمد : انتم تمموا خطبتكم بينكم واذا ردوا بالايجاب صرفت لكم فيصل وضبطته واذا رفضوا على الله كل شي
منى: ايه
الجد:وش قلت ي طلال
ابو عادل :اللي تشوفونه
منى: اليوم اليوم كلموا ابو مشاري وحددوا موعد
سعيد: انت ليش مستعجله
منى: ابيه يستقر بسرعه
ابو عادل : كلمهم يبه
الجد : تعال تعال اعطيني الرقم
قربت منى وهي متحمسه واعطت ابوها الرقم واتصل
ابو مشاري : ي مرحبا ي ابو طلال
الجد :هلابك ي ابو مشاري كيفك وش علومك
ابو مشاري:الحمدلله انتم كيفكم
الجد : على احسن حال كيف عيالك
ابو مشاري : الحمدلله
الجد : والله ي ابو مشاري انا باغيك في موضوع هو المفروض نزورك ببيتك لكن قلنا اكيد مانك بموجود وانت رجال مشغول
ابو مشاري : افا عليك ي ابو طلال مابينا ذا الامور
ابو طلال: الله يرفع قدرك بصراحه انا ناصيك بطلب منك الكريمه اختك لابو عادل وانت تعرف ابو عادل مايحتاج معلم
ابو مشاري تفاجئ : والله ي ابو طلال انت فاجأتني ونعم النسب والله وابو عادل اتشرف به وبنسبه لكن انت تدري ان الشور شور البنت خلني اشوف الاهل واخذ رايهم ونقول خير
ابو طلال: الله يرفع قدرك هذا شي ضروري وحقكم اخذوا راحتكم ومهما كان الرد ترا الصحبه وحده
ابو مشاري : اكيد اكيد مافيها كلام
ابو طلال : اجل انا مابشغلك وانت خذ راحتك
ابو مشاري :في امان الله
سكر ابو مشاري اللي كان مستغرب الطلب بس انها فرصه يأمن على اخته

اما ابو عادل كان عادي عنده ان رفضوا وان قبلوا ومنى اللي بتموت من الفرحه وهالمره نفسها حيل سهام تصير من نصيب ابو عادل
٠٠
٠
عند فيصل جوه كان مش ولا بد ولا له مزاج طلع لغرفته وابتداء يحوس بأدراجه وحصل ذكريات كثيره كثيره وقف واتجه لغرفة ابوه راح لدولاب امه اللي كان على حطة يدها ماتغير فيه شي الا انه يتنظف كل جمعه فتحه وهبت عليه ريحة امه اللي اصلا عالقه في باله قرب وهو يضم جلالها دارت به الذكريات ولفت ودارت لكن رجع للواقع على صوت ابوه :فيصل
لف فيصل :هلا يبه
ابو عادل قرب :وش فيك ليش هنا
فيصل وعيونه تلمع: ولا شي يبه اشتقت اشم ريحة امي وجيت
ابوعادل كان يحاول يسهى وينسى بس فيصل ما نسى وكل فتره يرجع يذكرهم فيها ماعرف وش يرد غير انه تقدم لفيصل وهو يضمه : لله يرحمها
فيصل : امين
طلع فيصل وترك لابوه لخبطت الشعور اتجه لغرفته وهو فيه شي بداخله مايدري وش هو احساس صعب سكر الباب واتجهه لسماعات وشغلها وعلى الصوت للاخر عشان محد يسمع بكاه وقتها انفجر وهو ما يدري ليش ضايق لكن اللي يعرفه انه ضايق
٠٠
٠
عند ابو مشاري رجع البيت وهو مبسوط بالخبريه واتجهه لسهام اللي كانت بغرفتها ودق الباب :سهام
سهام ركضت :هلا ابو مشاري
ابو مشاري : تعالي تعالي ابيك بموضوع
دخل وجلس وهو يقول :تعالي اجلسي
سهام جلست وهي متوتره ابو مشاري : سهام انا ي اختي كبرت والعمر يمضي وانا ابي اطمن عليك وامن قبل ربي ياخذ امانته وجلوسك كذا ما ينفع اخاف عليك من دورات الليالي بعدي وانتي تعرفين وش اقصد ي سهام انا جاني اليوم طلاب لك وشاريك والشهاده لله الرجال طيب اصل وسمعه وكريم وانتي تعرفينهم اللي طالبك مني ابو عادل اللي امس جاء لنا باالشاليه ولا تحسبينه كبير لا هو اكبر منك ب ٦ سنين
سهام : بس انا يا اخوي مابي الزواج
ابو مشاري :انتي لا تجاوبين بسرعه فكري وتمهلي والله يكتب اللي فيه الخير وتأكدي اني ما ارميك على اي احد
وقف ابو مشاري وطلع وسهام اللي كان الخبر بالنسبه لها نوعا ما مرعب جلست وهي ما تدري وش تسوي لكن قررت تروح لاديم وتاخذ رايها ٠٠
..
عند اديم اللي كانت جالسه على مسلسلها المعتاد وفزت لما فتح الباب : سهااام اشبك فجعتيني
سهام سكرت الباب : اديم احتاج مساعدتك
اديم : وش فيك
سهام: جالي خاطب
اديم رجعت انسدحت : وش الجديد
سهام : وجع قومي اسمعيني
اديم : نفس السالفه تحوسين وبعدين ترفضين
سهام : انتي ما تعرفين مين
اديم :مين يعني
سهام: ابو عادل اللي امس جاء اللي زوجته متوفيه وعنده عيال
اديم صكتها فجعه مو طبيعيه صرخت وهي تقول :ايييش
سهام :اشبك فجعتيني
اديم :مين عيدي
سهام : ابو عادل
اديم لطمت خدها لما تذكرت فيصل وحست برجفه بعظامها
سهام : اديم وش فيك
اديم :هااه ولا شي بس ارفضيه
سهام :ليش
اديم : بس ارفضيه صاحيه تاخذين واحد شايب وعنده عيال
سهام: بس مو شايب هو اكبر مني ب ٦ سنين
اديم طق عقلها: حتى ولو عياله كل واحد بشنب
سهام: شدخلني في عياله
اديم : انتي سمعتي عمتهم كيف قالت شقيين
سهام :وانا وش ابي فيهم ما بربيهم وبعدين الحلو انهم كبار لا بيأذوني ولا بأذيهم
اديم :الا بيأذونك سهام ارفضيه
سهام : انتي انهبلتي وش فيك عرقتي تراني فتحت السالفه
اديم مسحت وجهها وهي تقول في نفسها ( عشانك ماتعرفين وش المصيبه اللي بنطيح فيها كلنا ) : انفجعت
سهام: مدري بقوم استخير واشوف
اديم سحبتها: من دون استخاره ارفضيه
سهام : اووف اديم وش فيك عادي بستخير وبعدين وش مخوفك لذا الدرجه
اديم :ولا شي عشانك
طلعت سهام وتركت اديم غرقانه بخوفها ورعبتها وهي تفكر وش ممكن يسوي فيصل بسهام والاهم كيف بتكون علاقتهم
٠
٠
مرت يومين لكن مو اي يومين كانت لها فارق التفكير من جميع النواحي فيصل اللي كان فيه ضيقه ولكن مايدري ليش ضايق وصار له يومين طايح بفراشه ولا له خلق احد وحنينه لامه زايد بشكل فضيع ولا يدري وش السبب لكن خمن انه من طول المده اللي هي بعيده عنه او بالاصح يحس بالغربه من فقدها ويحس انه لحاله رغم وجود ابوه واخوانه وهالاحساس ما تجسد الا هالفتره
اديم اللي كانت ملاحظه غياب فيصل ومع ذلك خايفه من ارتباط سهام بأبو عادل اللي مو بس بيسبب حزازيات احتمال كبير تصير كوارث وهي اكثر وحده سمعت من فيصل نفسه عن اللي سواه ومستعد يسويه عشان محد ياخذ مكانها وقلبها معورها حيل من احتمال بعد فيصل وتغيير نفسيته كانت نفسها تفركش هالزواج او تقول لفيصل يفركشه بس ما قدرت ما جتها الجرأه وتكلمت ولا بتقدر وخافت من غيابه اللي يحط احتمال انه عرف عن الخطبه
٠٠٠٠!
عادل كان شاغل تفكيره قصة ريمان ومصر الا يتزوجها ولو كلفه الامر اشياء كثير وينتظر ابوه يعطيه رد
٠٠
٠
سهام اللي كانت طول الفتره تستخير واخيرا قررت وتوجهت لابو مشاري وهي تعطيه الرد اللي كان مرضي وجميل بالنسبه لهم
٠