رواية عيونك شوكة في القلب توجعني وأعبرها / للكاتبة اديم الراشد

الفصل24 من رواية { عيونك شوكة في القلب توجعني وأعبرها } بقلم اديم الراشد

..
*. #الفصل_الرابع_والعشرون④②*
..
..
..
عادل : افضل انك تسمعين من فيصل
ام رامي صرخت:وفيصل وينه ما يرد ولا يتكلم
عادل :هذا الموضوع بيد فيصل اذا بتناقشين فيه احد فهو فيصل
ام رامي :طول عمرك ××× مثل ابوك فارق اهو
سكر في وجهها وهي تسب وتلعن سمعت صوت الجرس وصرخت: وينك ي زفت انتي تعالي افتحي الباب
راحت وسن تفتح وهي ضايقه لكن سرعان ما تبدل حالها اول ماشافت فيصل :فيصل
فيصل كان صاد ومنزل راسه :وينها خالتي
وسن:اترك خالتك كلمني انا ليش تسوي فيني كذا ليش مو حرام
فيصل : وسن ابعدي ماني متحملك انتي بعد
ام رامي :مين عند الباب ي زفت
فيصل تقدم ودخل لها : انا ي خاله
ام رامي : شرفت ي استاذ شرفت ي ولد اختي ي عضيدي
جلس فيصل وهو يتنهد : خير ي خاله وش ذا الاسلوب وليش هالعصبيه
ام رامي : تقولها بكل برود تقولها ما تدري وش صار عشان اعصب
فيصل :وش صار
ام رامي : رايح تخطب هال××× وفوق ذا ادري من اغراب كذا هنت عليك
فيصل :ماهنتي ولا شي واصلا للحين ماصار شي وباقي الناس ما ردوا علي اذا اوك او لا و
ام رامي :وليش اصلا تخطبها
فيصل كان بيقولها بس خاف انها تفشي  عليه وتخرب سكت شوي وقال : حبيتها
ام رامي ووسن مع بعض:ايييييش وش قلت
ام رامي :انت انجنيت اكيد انجنيت مستحيل تكون عاقل
فيصل قرر انه يحتفظ بهالسر : لا ما انجنيت وهذا قرار يخصني انا ولي الحق في اني اختار زوجتي
ام رامي : يعني انت جالس تقولي مالك شغل هااه
فيصل : ي خاله انتي على عيني وراسي من فوق لو تبين عيوني لك عيوني واللي تطلبينه امري وتم ولا بخليك لكن مواضيع حساسه زي هاذي اتوقع انها تنتمي لي لحالي
ام رامي صدت وهي حاقده : ما دام كذا ي فيصل لا اني خالتك ولا اعرفك طال ما هي براسك
ام رامي لوت ذراع فيصل بذا الطريقه نزل عينه وهو يحاول يتجاهل كلمتها بس ما قدر وقال : ممكن تسمعيني ولا تعدبيني بقولك هذا
ام رامي :انت قلت انا قلت ومعاد ابي اسمع اكثر ي خساره ي ولد اختي كنت احسب الكل يطلعني من حياته الا انت بس ليتني ماشديت العزم فيك
فيصل :خاله تأكدي ان زواجي من اديم له غايه وبتعجبك وتاكدي اني ماخذلتك
ام رامي ووسن سكتوا وهو يناظرون فيصل تكلمت ام رامي بشك:وش قصدك
فيصل :اللي فهمتيه
قرب وهو يبوس راسها وطلع وسكر الباب بهدوء ام رامي ووسن جلسوا يناظرون مكانه بصدمه :وش قصده
ام رامي:مدري بس اكيد بيوريها الويل واكيد سوا كذا عشان سهام
وسن : تهقين يمه
ام رامي جلست بتفكير: هذا مفهوم كلامه
جلست وسن اللي اطمأنت شوي وبدأت تهدا
٠٠
٠
عند اديم اللي رجعت للبيت وشافت اهلها متجمعين بما فيهم عمها ابو نوره وبناته (اوووووووف كانوا ناقصيني اووف ) :سلام
الكل :وعليكم السلام
راحت تسلم بهدوء وهي تحاول تتحاشى المداخلات
ابو مشاري :تعالي ابوي اجلسي هنا بجنبي
ابو نوره: عاد انت بطل دلع البنت كبرت وبتتزوج وانت كذا تكلمها تخربها على الرجال
ابو مشاري تنهد : بنتي بدلعها لو هي كهله ومعها عيال
سهام بنظرات قويه لابو نوره: اي ي اخوي لا يهمونك العذال
ابو نوره: انتي اسكتي لا تخليني اقوم اسوطرك
سهام:ومين انت عشان تسوطرني
ابو مشاري: بس ي ناس بس احنا مجتمعين ننبسط والا نتهاوش
ام مشاري :تعوذوا من ابليس
ام نوره بكلام موجه لسهام:ابليس بينا ما يحتاج
مشاري :اديم هاه عساك فكرتي
سهام:مشاري لا تستعجل اختك
مشاري : اديم عقلها براسها وتعرف وش تبي
ابو نوره:اصلا وشو له تتزوجون هذاك المستخف المتكبر
ابو مشاري :اذا ربي كتب نصيب بياخذها
مشاري :والله انا وابوي نفضنا الدنيا حوله الكل يمدح فيه ورجال وسيد الرجال مافيه الغلطه والقرار راجع لك
اديم اللي كانت تحس بحراره بجسمها ولاهي قادره ترد
نوره:اديم شكلها ماتبيه
نرجس :اي واضح
اديم رفعت راسها وهي تناظر بسخريه وهي فاهمه مغزاهم وحسا بغيره قالت بدون شعور: فكرت يبه وانا موافقه مادامكم سألتوا الموضوع انتهى
سهام وقفت وهي معصبه:اديييييييم اصحي
ابو مشاري :سهاااااام خلاااص
اديم وقفت ومسكها ابوها:اديم ابوي انتي متأكده لا تخلين احد يضغط عليك
اديم :متاكده يبه توكل على الله
طلعت وهي تحس برجفه بعظامها دخلت الغرفه وقفلت الباب وهي تسمع سهام تركض وراها وتدق الباب :اديييييم افتحي الباب ي مجنونه اديييييييم
مروى: سهام انتظري شوي اديييم افتحي
اديم : سمعتوا ردي مابي احد يناقشني
سهام:اديم ي غبيه انتي اكثر وحده تعرفين وش يصير معي ليه بترمين نفسك كذا ليه لا يكون صدقتي انه يحبك ..
..
اديم كانت تسمع ردهم وهي تغسل وجهها مره واثنين وثلاثه طنشتهم واتجهت لسريرها وهي تتغطى حطت السماعة بأذنها وهي تتجنب اصواتهم وانغمرت بتفكيرها
اما سهام اللي كانت بتتفجر من العصبيه نزلت لابو مشاري : ابو مشاري تعال ابيك
ابو مشاري قام وهو يدري بردها وكلامها بس مايبي يكسر بخاطرها:نعم ي سهام
سهام:ي اخوي دخليك لا تاخذ بكلامها هي انقهرت من نوره ونرجس وقالت كذا والا هي ما تبيه وهي قالت لي عشان قولك
ابو مشاري:سهام لوين بتوصلين قولي لي اديم لو عندها كلام قالته لي وتعرفينها ما تراهن على نفسها
سهام:بس هالمره بتراهن دخليك لا ترميها هالرميه فيصل مو كفو والله بيذبح بنتك والله
ابو مشاري : بطلع لها واكلمها واشوف
طلع ابو مشاري دق باب الغرفه وطولت اديم لين فتحت:اسفه يببه بس كانت السماعه بأذني
ابو مشاري مسح على كتفها: ماعليه تعالي سكري الباب وتعالي
اديم ارتعشت وهي تسكر الباب جلست بهدو وهي تناظر يدها: امر يبه
ابو مشاري: اديم يبه انا جيت ابي اسمع ردك للمره الاخيره بدون اي ضغوط لا تهمك سهام ولا بنات عمك ركزي في نفسك وقولي لي استخرتي وقررتي وش هو قرارك
اديم حست بغصه وهي تقوله هاجمتها دموع خوف من حياتها الجايه مع فيصل : ايه يبه قررت واستخرت وانا موافقه
ابو مشاري :اكيد
اديم :اكيد
وقف ابو مشاري وهو يبتسم ونزل يبوس جبينها:الله يكتب لك الخير ي ابوي وتاكدي اني مستحيل اسلمك اي واحد فيصل رجال وهو قالي واعترف انه شافك بالغلط وحبك تكونين له زوجه وتجاهل اشياء كثيره بينه وبين سهام عشانك
اديم غمضت بقوه وهي تشد على يدها كان نفسها تصدق هالكلام بس للاسف
طلع ابو مشاري وسكر الباب ومن هنا انهارت اديم تبكي
نزل ابو مشاري وهو مبتسم ابتسامة رضا وقف مشاري : هاه يبه
ابو مشاري :عطني جوالي بكلم ابو عادل
مشاري :الحمدلله
دق ابو مشاري على ابو عادل وبلغه بالموافقه وقاله يحدد يوم لشوفه والملكه
الكل كان مبسوط الا ابو نوره وبناته وزوجته
طلعت ام مشاري وهي مبسوطه لاديم صح كلام سهام مو مريحها بس فرحت لبنتها وطلعت معاها مروى وسهام ورويده دخلوا على اديم اللي بالقوه تماسكت وكانت تغسل
ام مشاري وهي تزغرط:مبروك يمه
اديم ابتسمت بذبول وهي تضمها:يبارك فيك
مروى:مبروك اديم والله يختار لك الخير
رويده:مبروك ي روحي وربي فرحت لك
اديم :يبارك فيكم
سهام:يعني طنشتي كل شي وبتتركين نصيحتي
اديم :سهام استخرت وارتحت وابوي يقول رجال ومشاري بعد
سهام : صدقتي انتي كل هذا تزييف اديم بتندمين ي اديم
سكتت اديم وقالت: انا فوضت امري لربي وهو يختار لي الخير
سهام: قصدك تقولين ماهمني رايك
اديم :لا مو كذا بس
سهام طلعت وهي معصبه سحبت جوالها وهي تدق على ابو عادل يجي ياخذها جلست اديم وهي تهز راسها بضيق
رويده:ماعليك اديم ما دامك مرتاحه ماعليك
اديم :بس انا مابيها تزعل
ام مشاري :بترضى لا تخافين وهي اخذه موقف بس وان شاء الله يمه ما تشوفين الا الخير
سكتت اديم وهي تحضن امها بضياع
٠٠
٠
في بيت ابو عادل اللي كان خايف انه يفرح ويكسره فيصل لما يتحقق من نيته السيئه اتجاه البنت بس مع ذلك ما منع انه يفرح دخل فيصل ومعاه نواف جايبه من المدرسه ومنى معاها الغدا
ابو عادل ابتسم لفيصل:تعال تعال مبروك ي عريس مبروك
فيصل لف بقوه وهو ينزل الاغراض وابتسم:وشو على ايش
ابو عادل :وافقوا تو ابو مشاري مقفل
فيصل ضحك برعب وفرحه:من جدك يبه
منى نزلت الاكل وهي تزغرط قربوا كلهم يسلمون على فيصل وهو مرعوب اكثر من انه فرحان نزل عادل على الاصوات :خير وش فيكم
منى:تعال تعال بارك لفيصل وافقت البنت
عادل سكت شوي وبعدها نزل لفيصل وهو يقول :مبروك
فيصل بتحفظ :يبارك فيك
ابو عادل : قالي ابو مشاري حددوا الوقت اللي تبون لشوفه
منى: مالها داعي الشوفه دام فيصل يعرف البنت
ابو عادل :لا لا ضروري الشوفه وش يقولون عنا الناس
فيصل بهدوء : ليش ما نخلي الشوفه والملكه بنفس اليوم
منى : ايه كذا احسن
ابو عادل : مادام كذا خلونا نجتمع عند ابوي ونحدد يوم للملكه
فيصل كان يحاول انه مايناظر بعادل اللي ياكله بعيونه اما عادل اللي كان يبي يتأكد من نية فيصل وللحين ما وضح معاه شي
نواف : الله ي فيصل بيصير عندك مزه
ابو عادل طارت عيونه : نواف وش ذا الحكي
فيصل انفجر ضحك على نواف اللي كان يقلده بالكلام
منى سحبت فيصل من اذنه: وجعععع كله من دروبك انت خربت الولد
فيصل: هههههههه وش اسوي ي عميمه قلبي خضر ..
..
منى: من اليوم ورايح ماعاد فيه قلب خضر خلاص
ضحك فيصل وهو يبوس يدها: من عيوني انا
ابو عادل:نواف اسمعك تقول كذا بغسل شراعك
نواف :ليه يبه
ابو عادل : بس يالله اطلع بدل هدومك وانزل للغدا
فيصل انسحب قبل لا يهاوشونه زياده :انا بعد بطلع ابدل
ابو عادل :خلك هنا ابيك
فيصل ميل فمه بضيق : ابشر
طلع نواف ولف ابو عادل على فيصل: فيصلوه هالحركات تبطلها وتنساها بالمره سامعني ونواف يقلدك بكل شي اضبط امورك
فيصل :ابشر يبه
منى: يلا يلا خلص بدل وتعال لا تطول
فيصل :ابشري
طلع ركض لغرفته وهو يزفر بضيق نزل ثوبه وهو يفكر وش بيسوي بهالمصيبه بس كعادته رمى الذنب عليهم وهو يقول : تعيد غلطة عمتها وتستاهل
٠٠
٠
عند عادل اللي كان مقهور من ريمان اللي ما فكرت حتى تقوله وين الغيبه وين الناس وش صار عليك كان مقهور لدرجة ان قهره واضح بطريقة اكله
ابو عادل :عادل وش فيك
لف عادل بهدوء: ولا شي
ابو عادل: كأنك معصب
عادل :لا
ابو عادل طلع مفتاح من جيبه ومده لعادل : بما انك حددت زواجك هذا مفتاح الجناح االلي فوق بتسكن فيه لك كامل الحريه تغير تعدل تبدل فيه واللي ينقص عليك عندي
اخذ عادل المفتاح : الله يعطيك العافيه يبه
ابو عادل :فيصل انت اذا تملكت وحددت زواجك بعطيك مفتاحك
فيصل :زين يبه
٠٠
٠
ريمان اللي كانت شبه مهتمه لكن ماودها تعطي عادل اهميه ويغلبها كانت كل فتره تدخل تشوف ظهوره وتشوف سنابه بس مختفي تنهدت بضيق وهي تلعن الساعه اللي عرفت عادل فيها
٠٠
٠
العصر في بيت الجد كان ابو عادل وعياله عنده وحددوا يوم الملكه والشوفه اللي هو يوم الخميس يعني بعد اسبوع كان فيصل يحاول يسرع الامور بحجة انه يشتاق لها والكل مستغرب من حبه لاديم اللي كان مزيف
اتصلوا على ابو مشاري وحددوا اليوم واتفقوا ووصل ابو مشاري الخبر لاديم اللي كانت فيها فرحه داخلها غصه
الكل كان مبسوط وفرحان الا سهام اللي بتنجن من حماسهم وحماس فيصل المزيف واديم اللي طلعت الكل برا تفكيرها وركزت على انها تحاول تكسب فيصل
٠٠
٠
عند اديم اللي كانت بغرفتها كانت قبال مرايتها وتناظر نفسها بدقه تبي تحصل طريقه او حل مع فيصل لفت لما حست الباب انفتح بقوه شافت روان واقفه ووجهها احمر نزلت اللي بيدها هي تقول :روان
روان تقدمت بغضب الدنيا :صح اللي سمعته
اديم :وش سمعتي
روان صرخت: لا تستغبين
اديم نزلت راسها : ايه صح
روان مسكتها وهي تهزها :انجنيتي انتي انجنيتي كنت حاسه انه بيوديك في ستين داهيه
اديم :روان انتظري وافهميني ي روان لا تصيرين علي مثلهم
روان: تكلمي وفهميني لاني احتمال انجن الحين
اديم جلست وهي تشرح كل شي بالتفصيل لروان
روان وقفت تحط يدها على راسها : يالله مستحيل مستحيل تكونين عاقله اديم اديم تقدرين تقولين لي وش بيصير فيك اذا عرف انك حنين وش بيصير اصلا اذا كنتي اديم ي بنتي والله والله ليوريك نجوم الظهر اديم تكفين غيري رايك والله خايفه عليك منه تكفين
اديم : ما اقدر ما اقدر حاولت بس ما قدرت والله حبيته والله يمكن من جد حبني يمكن تغير يمكن ايه شي احنا ظالمينه والله مو سيء والله
روان:مو سيء لناس مو سيء لاهله لكن لك بيصير شيطان رجيم  انتي اكثر وحده تعرفين شره وحقده
اديم انهلت دموعها وهي تشد شعرها: مستعده اتحمل كل شي بس عشانه روان انتم ما تعرفونه ي روان
روان :اديم والله والله ما بيلتفت فيك والله بس بيطلع عينك
اديم : خلاص تكفين ي روان خلاص
روان وقفت وهي تبكي على حال اديم : اذا كذا اقولك من الحين صدقيني ما بترتاحين ولا تفرحين
اخذت شنطتها وهي تقول :وعلى فكره ماعاد اعرفك من عرفتي هالزفت وانتي متغيره
طلعت وهي تلبس نقابها نزلت وهي متجاهله نداء مروى اللي وقفت بإستغراب من الحال وهي حاسه ان فيه شي ما تدري عنه
٠٠
٠
كان الاسبوع يركض ركض واديم اللي كانت تجهز وهي مستعده تتحمل كل شي بكل الانواع بس عشان فيصل وبتثبت للكل ان فيصل غير وانه مو سيء