Zhu Yan（Mirror. Zhu Yan) Novel Myanmar Translation

Mirror。Zhu Yan : အပိုင်း(၅)

  ~~~~~အပိုင်း《 ၅》~~~~~

      ပထမဆုံး ဆုံစည်းမှု

Uni Ver:

အတိတ်ကိုခြေ‌ရာကောက်ကြည့်လိုက်သောအခါ သူမအသက်ရှစ်နှစ်မျှသာရှိသေးသောအချိန်၌ ရှစ်ယင်နှင့်စတင် ဆုံစည်းခဲ့ရသည်ပင်။

ချိမျိုးနွယ်စု၏ တစ်ဦးတည်းသော မင်းသမီးအနေဖြင့် သူမသည်ပထမဆုံးအကြိမ် အနောက်နယ်မြေမှ ထွက်ခွာလာကာ ခမည်းတော်နှင့်အတူ ကျိုယီတောင်နတ်ဘုရားဗိမာန်သို့ သွားစဉ်အခါကဖြစ်သည်။----မတိုင်ခင်အချိန်တုန်းက သူမသည် ကြောက်မက်ဖွယ်ရာ ဝက်သက်ရောဂါကြောင့်  သေရေးရှင်ရေးလွန်ဆွဲနေရပြီး ကံကောင်းထောက်မစွာ အသက်ဘေးမှသီသီလေးလွတ်လာခဲ့ခြင်းဖြစ်သည်။မျိုးနွယ်စု၏ နတ်ဆရာကြီးက ခမည်းတော်အား နတ်ဘုရားများ၏ရှေ့မှောက်တွင် သူမအတွက် အလေးအနက်ဖြင့်တောင်းဆုပြုပြီး ရောဂါသက်သာလာလျှင် သူမနှင့်ခမည်းတော်တို့သည် နတ်ဘုရားများ၏ကောင်းချီမင်္ဂလာပေးမှုအား ကျေးဇူးတင်သောအားဖြင့် ကျိုယီတောင်နတ်ဘုရားဗိမာန်သို့သွားရောက်ရမည်ဟုပြောလေသည်။

အပြင်သို့အလည်သွားရမည်ဟုကြားသည့်အခါ ကလေးသဘာဝ ပျော်ရွှင်မြူးတူးခုန်ပေါက်မိသော်လည်း လပေါင်းများစွာသွားပြီးမှ ကျိုယီတောင်သို့ရောက်လိမ့်မည်ဟု သူမ ထင်မထားခဲ့။

ထိုအထွတ်အမြတ်နေရာမှာ ယွင်ဟွမ်းကုန်းမြေအားဖန်တီးပေးခဲ့သည့် အမြွှာနတ်ဘုရားနှစ်ပါး၏ ဘုံဗိမာန်ဖြစ်ပြီး ခမ်းနားထည်ဝါလှသော တားမြစ်နေရာကြီးဖြစ်ပေသည်။မိန်းကလေးလည်းတစ်ယောက်မှမရှိ။ ရှိ‌‌နေသောသူအားလုံးမှာလည်း အနယ်နယ်အရပ်ရပ်မှလာရောက် ကျင့်ကြံ‌နေသည့် အမတသခင်များနှင့် အစေခံများသာ။ တစ်ဦးတစ်ယောက်ချင်းစီ၏ မျက်နှာထားများမှာ တည်ကြည်ကာ ဣန္ဒြေသမ္ပတ္တိအပြည့်ဖြင့် တိတ်တိတ်ဆိတ်ဆိတ်သာ နေကြလေသည်။

နှစ်ရက်တိတိနေပြီးနောက် သူမသည် အင်မတန်ပျင်းရိလာရသဖြင့် နေ့လည်နေ့ခင်းခမည်းတော် တရေးအိပ်နေသည့်အချိန်၌ တစ်ယောက်တည်းခိုးထွက်ကာ ကျိုယီတောင်အနှံ့ လျှောက်သွားကြည့်လေသည်။  အထိမ်းအမှတ်ကျောက်တိုင်ထက်ရှိ ပုံရိပ်ယောင်များနှင့် ဆန်းဝူချောက်ကမ်းပါးမှ နောက်ပြန်စီးဆင်းနေသည့် မြေအောက်လောကရေတံခွန်တို့ကို တွေ့မြင်ခဲ့ပြီးနောက် ထိုရဲတင်းလွန်းလှသောကလေးမ‌လေးသည်နတ်ဘုရားဗိမာန်၏ အနောက်ဘက်ရှိ တားမြစ်နယ်မြေဖြစ်သော ဧကရာဇ်ချိုင့်ဝှမ်းထဲသို့ပါ ခိုးဝင်သွားလေတော့သည်။