وعن القلب إذا غَوَّي "عشقت مخادعة"

بخصوص الجزء التاني..

أولا كدا صلوا على أشرف الخلق ❤️

ثانيا بقا أنتوا وحشتوني أوي أوي 🥺❤️

حابة أني أوضح شوية نقط للناس إللي لسه بتقرأ الرواية أو إللي خلصتها وعايزه جزء تاني..

طبعا وصلني رسايل كتير أوي منها الحلو واللي مش هقول عليه وحش..
الرواية دي خدت مني مجهود كبير أوي علشان أعرف أوصلكم إللي أنا عايزاه ومكنش عندي خبرة في الكتابة تخليني أكتب لغة عربية صح، بس دا ميمنعش أنها معقوله في طريقتها..

أنا وضحت قبل كدا طريقة الأبطال، مش لازم أجيب كل البطلات شكل بعض ولا نفس الشخصيات كدا هيبقي فيه ملل أوي.. حتي الأبطال بالرغم من شغله وهما كلهم ضباط بس شخصياتهم مش شبه بعض خالص..

فمحدش يجي يقولي سيلين معندهاش كرامه والكلام دا.. هل لما الواحد تحافظ على جوزها يبقي معندهاش كرامه.. ماشي هي أتنازلت عن شوية حاجات، بس هل كرم يعني كان بيكهربها، هي حبته فمش هنحكم عليها أنها معندهاش كرامه.. حتي لو مكنش عندها 😂😂

كرم مره واحده لاقها جايه تعيش عنده وبقت مراته المفروض يفرشلها الأرض ورد يعني..؟؟ أكيد لاء، وبعدين هو كان دائما شايفها غلط..

وبالنسبة للسبب اللي كرهها بسببه..
السبب منطقي جدا يا جماعه، مش لازم تكون قتلاله قتيل أو سببتله مشاكل دي كانت طفلة يعني.. وهو كان طفل بردو.. هو لما شاف اللي حصل كان عيل فمكنش فاهم غير اللي أي طفل فاهمه.. يعني مش هيقف ويحلل وهو عارف أن ابن عمها دا وسخ أوي.. الصدمه بتشل العقل وهو كبر على اللي في دماغه وفضل حاطه قدامه...

الرواية مكنتش بس لكرم وسيلين.. الرواية من الأول أنا عارفه أن شخصيتها هتزيد بس حبيبت أبدأ واحده واحده علشان ميحصلش لعبكه ومحدش يتلغبط وتقولوا مش فاهمين حاجه..

فيه فصول أنا مجبتش فيها كرم وسيلين لأن ببساطه عايزه أجيب شخصيات تانيه كان عندهم في الوقت دا أحداث مش هجبلكم نفس المشهد مثلا وهما قاعدين بيتفرجوا على التلفزيون أو بياكلوا وهو قاعد يتغزل فيها ما فيه حاجات أهم طلما طلعت مشاهد رومانسي بينهم كتير..

همس أنا مكنتش عايزه أطلعها البنت اللي في دماغكم.. ولا محمود.. يعني ميكنش هو اللي يروح يطبطب عليها ولا هو اللي يبدأ يعطيها حنان، فيه زيهم مليون في الدنيا، ليه مش هي اللي تقف جنبه؟؟! علشان بنت يعني!!؟ أنا مش بقول لأي بنت تعمل كدا ولو أنا مش هعمل... بس ليه مظهرش شخصيه شبه دي، ليه مطلعش هي بتفكر إزاي وهو بيفكر إزاي..؟؟، ليه ميبقاش فيه ناس مختلفة ولا لازم كلهم يبقوا هادين مغلوبين على أمرهم يعني..!!

أخر نقطه عايزه أتكلم فيها..

الكوميديا مخدمتش الرواية..! بتحطي حاجات سخيفه في مواقف جديه..!!
معلش بس هو أنا وهما بيضربوا بالرصاص طلعت واحد يألش على الموقف..!! أي يعني لما يكونوا متجمعين حد يقول حاجه تضحك..
لاحظوا حياتكم أكيد هيبقي فيه الشخص دا، عيلتكم هتلاقوا فيها شخص وأنتوا قاعدين لازم يقول كلهم تخرجكم عن الموضوع اللي كنتوا بتتكلموا فيه..

إللي مش حابب الرواية الكوميديا ميجيش يذم في الرواية علشان موقف كوميدي.. وأنا شايفه ان المواقف اللي بعضكم شايفها سخيفه هي من عوامل نجاح الرواية..

أنا راضيه جدا جدا عن أي موقف حطيته في الرواية ومبسوطه بطريقتي البسيطه اللي لسه بتعلم علشان أطورها ومبسوطه بيكم وبتعليقاتكم الجميلة❤️

بخصوص الجزء الثاني..
هو أكتر سؤال أنطرح عليا.. وطالما بتسألوا يبقوا حبتوها فأنا حبيتكم🥰

تقريبا مفيش جزء تاني لحد دلوقتي الله أعلم قدام ممكن يحصل إيه.. بس لو طلعت بفكره مختلفه ممكن أعمل جزء تاني يكون مختلف تماما عن أي حاجه قرأتوها...

هي فكره بتلف في دماغي بس مكنتش هعملها لأولادهم هعملها أبطال تانين، فلو لقيت حماس ممكن أنزلكم الفكره وأنتوا تقولوا عايزين ولا لاء..

بس الأكيد دلوقتي أن رواية الصخر خلاص هتنزل أول الشهر فعايزه تركيزي كله يكون عليها، بس ممكن أحرقلكم الفكره لو أنتوا عايزين..🤭😂😂

أتكلمت كتير بس كنت عايزه أوضح النقط دي.. وفي الأخر أنا مش بزعل لأي نقد بس يكون بذوق يا جماعه أنا بشر زي زيكم بالضبط.. وحبيتوا الرواية أو لاء دا شئ يرجعكم ويرجع لذوقكم.. عادي متحبوهاش بس بلاش كومنتات سيئه.. رأيكم بذوق، أو سيبوا الرواية واطلعوا..

أخيرا بقا.. أنا بحبكم أوي أوي وشكرا جدا ليكم وأنكم حقيقي أكتر ناس بتفرحني ودائما تسألوا عليا فشكرا ليكم بجد🥺❤️❤️❤️❤️

كل الحب ❤️🌏

زينب فراج ZEINAB FARAG ❤️🌏