ماما عبالكي اليوم وحد الولد اسمو كاران قلعلي المساك الي كنت شابكة بيه شعري أهئ أهئ و سرقلي القابسة تاع الغذاء تاعي.. أهئ.. بدات ماريا تحكيلي واش صرالها اليوم في اول نعار ليها في ليكول و هي تبكي.. بنتي مسكينة حقرها قاوري🙄.. - شوفي ماماتي اذا كان يحوس غذاك شاركيه معاه.. و ماما رح تولي كل يوم توجدلك وجبة اضافية وحدة ليك ووحدة لكاران.. تفاهمنا؟! .. مسحت دموعها بيدي و حاولت نسكتها.. زمت شفافها و هزت راسها.. -لا ماما انا مانبغيهش..هو قال الي انا قبيحة.. عارضت ماريا كلامي بينما انسلت دمعة اخرى على خدها.. بنتي الشابة..انتي ملايكة..و اذا هو قالك نتي قبيحة فهذا مايعنيش الي نتي صح قبيحة..شحال من خطرة خصني نفكرك بلي نتي أميرتي الصغيرة؟!.. قرصتها من خدها .. بصح مع كل لكلام الي قلتو قعدت مشنفة😓..ضمت ذراعتيها لصدرها و قعدت تشوف في لرض عينيها ولاو روطب مرة اخرى كلي رح تبكي (شغل هكا🥺) شديت يدها الصغيرة و رفدتها قعدتها على حجري و قعدت نلعبلها بشعرها لصفر الشباب.. -صحا ماما ماتزعفيش.. دوك نهدر مع المعلمة تاعك..صحا؟!!. هزتلي راسها بمعنى واه و من بعد حطت راسها على صدري و عنقتني.. -هيا نروحو نتعشاو.. قلت و انا نحطها على الارض.. -ماما بي ناكل بيتزا😁☺️.. رحت طلبت بيتزا في تلفون برك... بعد ثلاثين دقيقة وصلت البيتزا رحنا للكوزينة وقعدنا ناكلو.. -يااميي وشحال بنينة. قالت و هي تمضغ😅.. ني فرحانة بزاف باسكو ببيتزا قدرت ننسيها بكاها و ننحيلها زعافها.. كون غير تقعد دايما هكا حتى كي تولي كبيرة و عندها مشاكل تقدر تتخطاهم بسهولة..مانيش باغياتها تواجه اي مشكلة في مدرستها.. هيا كيفي.. يعني انها تورط روحها في المشاكل ماشي حاجة جديدة بالنسبة ليها رغم صغر سنها.. بصح قلياطة☺️..ني خايفة تدابز مع هذا الولد و تدير مشاكل لروحها من السمانة الاولى..مانيش باغية تعيش واش عشت انا و لا يصرالها كيما صرالي..مانيش باغية التاريخ يعيد نفسو و تنخدع كيفي.. متمنية تكون حياتها مثالية كيما اي طفل في عمرها..نهار زادت وعدت روحي الي ماحش نخليها تعاني كيما عانيت انا و لا نخليها تنخدع و لا تتأذى و تنجرح.. وعدت روحي الي ماحش نربيها على انها تكون نية للي يجي يطيحها كيما كنت زمان..دروك وليت كبيرة و واعية و نعرف نفرق بين الحب الحقيقي و المزيف و اكيد مغاديش نخلي بنتي ترمي روحها للهاوية.. -ماما.. صايي كملت.. كنت ساهية و نخمم حتى فيقني صوت ماريا و خرجني من بحر افكاري.. كملت رفدتها و ديتها دوشتلها لبستها.. قريتلها قصة باه ترقد ههه غير كملت القصة درت ليها لقيتها راقدة كي الملايكة..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
