آعطـنيـﮯ فرصـ‏‏ةّ ثـآنية.. 🖇❤(متوقفة حاليا)

بارت 10❤☺️..

سلام عليكم..  كيراكم ان شاء الله بخير..  اسمحولي على الروطار.. 
اليوم رح نحطلكم البارت 10 نتمنى يعجبكم ❤ اعطوني رايكم و تفاعلو اذا عجبكم..  في البارت الجايين رح يبانو شخصيات جدد و حقائق كانو مخبيين و اسرار ❤❤☺️

قراءة ممتعة.. 😘

بعدما خدمت هذاك الملف رحت و حطيتو فوق البيرو تاعو و خرجت قبل مايجي.. عينيا كانو حمرين و يحرقو بزااف بسبب قلة النوم وجهي اصفر و مايتفسرس باسكو البارح ليل كامل و انا نخدم على هذاك الملف ماقدرتش نرقد حتى كملتو يعني مع انو ماشي من ضمن خدمتي إلا اني خدمتو و انا ساكتة باسكو مابغيتش مشاكل من اول يوم و خصوصا مع هذاك الرخيس..  لا علينا..  رحت للمكتب تاعي و غلقت الباب ورايا كي العادة حطيت صاكي و الملفات الي كانو عندي فوق الطابلة و قعدت على الكرسي طلقت روحي قاع رتخيت ملي كنت عيانة بزاف حاليا ماعندي لا قوة و لا إرادة باش نخدم كيما نقولو راني كاااو.. فات شوية وقت عينيا ولاو يتبلعو وحدهم ماقدرتش نستحمل أكثر يعني بعد كل شي انا نبقا انسانة كيفي كيفكم.. تثاوبتو بعدها ماقدرتش نحمل اكثر حطيت راسي فوق البيرو.. حاوطتو بيديا.. غلقت عينيا و استسلمت لعالم الأحلام.. بعد مدة معلباليش شحال فات وقت فتحت عينيا حتى نشوف ظل واحد واقف عند الباب تاع المكتب ماقدرتش نفرز شكون باسكو هذاك وين نضت كنت مزال مدوخة و عينيا معمشين و حالتي حالة..  فركت عينيا مليح و طلعت راسي نشوف شكون..  مي السؤالل الي كان يتكرر في راسي هو كيفاش قدر كاش واحد يدخل للمكتب تاعي و انا كنت غلقت الباب و زيد بدون إذن مني.. شفت شكون قعدت ساهية نشوف فيه حتى فطنت بعدما حمحم..  حطيت راسي بين يديا و قعدت نشوف فيه و قلت في نفسي..  علاه هو؟ 
شفت فيه و قلت:
ريا: من الواجب انك تحترم خصوصيتي في مكتبي و تطلب إذن باش تدخل..  رانا في شركة محترمة ماشي في حمام الي جا يدخل..  واقيلا باغي تتعاودلك التربية مرة اخرى؟!
قلت هذا لكلام كلو و هو ساكت و يشوف فيا بعد ماكملت كلامي ضم يديه لصدرو الي كان مخدوووم مليييييييييح 😍..  ضيق عينيه  و قال..
ريان: آنسة قادر.. كلنا نستناو فيك و نتي تستمتعي بنوم هنيء هنا؟واقيلا جينا هنا باش نخدمو ماشي باش نرقدو و اذا راكي تحوسي تشوفي وجهي لاخر مكانش مشكل راني واجد وقتما حبيتي مرحبا..😠😡
بعد ماكمل هدرتو حسيت بلي راه شاعل قلت بلا مانزيد ننارفيه اكثر باسكو علابالي رح نكون انا الخاسرة..
ريا: نظن الي مش من مهامك انك تجي تنوظني و لا حتى اذا حتاجيتني قادر تبعث مساعدتك تجي عندي..وو تاني على حد علمي الي مكانش خدمة تتطلب انو نتسللو لمكتب شخص اخر..
قلت بهدوء و انا نستنا في جوابو..بينما طلع حاجب و هبط لاخر و شاف جيهة الباب.. قعدت متبعة نظراتو نشوف وين راه يشوف و ياريتني ماشفت..
قاعدة نشوف في إكرام و جماعة من الموظفين واقفين عند الباب و كالعادة زهري لمسود يديرها بيا و سمعو الحوار الي دار بيني و بين السيد المدير المحترم..بلاك صح جاو ينوضوني كي كنت راقدة مي ماحسيتلهمش.. اووووف شحال غبية يا انا.. بينة على هاذي جا  حتى لهنا..الباب كان مغلوق و مايقدروش يفتحوه بدون إذن واحد من المسؤولين..غي هو الي يقدر يحلو..عندو المفتاح الإحتياطي..و زيد عندو برامج في تلفونو يقدر بيهم يفتح اي باب..مزال عاقلة على النهار الي فتح فيه الباب تاع بيتي بالبرامج تاعو نهار حصلت قعدت نهار كامل و انا في البيت..فاقدة الوعي..كي كنا في السنة الأولى جامعي صنع برمجية اسمها المغناطيس يتحكم في القفل بمجرد مانحطوه فوق القفل تاع الباب الي لازم يتفتح..  و كان استخدم هاذي البرمجية خطرة وحدة و كانت هذاك النهار..  و اليوم ولات مرتين.. عندو بزاف برامج و برمجيات في تلفونو و الي يستعملها باش يلبي احتياجاتو الخاصة..  و مايسمح حتى لاحد اخر باش يستخدمها لمصالحو و لا حتى يقرب لتلفونو..  صحا على كل دروك لازم نلقالو سبب اخر باش نتهمو و نقدر نثبث نفسي..
ريا: صحا حتى اذا مافتحتش الباب..  كاين اختراع اسمو الهاتف النقال..  هاتف ذكي..  ترسل ميساج برك يولي عندي علم بالإجتماع.. و لا حتى تتصل..  اما انك تقتحم مكتب شخص بدون إذنو الشخصي نضن انو هذا الفعل غير لائق بحضرت المدير.. 
ريان:  قولي و الله..  انسة قادر تقدري تتفقدي تلفونك!
رمشت عينيا و انا نحاول نستوعب وقفت شوية و انا غارقة في افكاري.. ياربي زعما واش يصرا كون نلقا ميساج و لا ابال من عندو ولا من واحد من الموظفين؟! باينة رح نموت بالحشمة.. المهم ديت التلفون من صاكي حليتو و قعدت نطلع و نهبط نطلع و نهبط.. اووه الحمدلله ياربي..  تنهدت تنهة طويلة و شكرت ربي مين مالقيتش ميساج ولا كاش ابال بخصوص الإجتماع.. وريتلو تلفوني..  باينة مراحش يشدني بالجرم المشهود.. اذا راه حاسب روحو ذكي امالا باينة بلي نسا بلي انا اذكى من الكون باسره.. شفت ملامحو ماتغيروش بقاو كيما قبل..  خفت انو يكون شافني و انا نمسح ليميساج و المكالمات الي وصلوني على جال الاجتماع.. يعني بما انو قالي شوفي في تلفونك يعني عيطولي و انا حذفتهم خير مانتبخص صباح ربي.. سييت نقنع روحي بلي مشافنيش باسكو كان بعيد عليا بوحد الربع خطوات و لا المهم بعدما قنعت روحي مليح و تشجعت باش نواجهو المهم مانزيدش نتبهدل كثر نخلي شوية لغدوة.. الكلب نترلي التلفون من يدي..
ريا: سيد عبد الله معليش تردلي تلفوني 😠..
قلتها و انا نزقي من ريتي مسكينة قريب تخرج..
بصح مجاوبنيش متكبر..  حتى نشوفو حل تلفوني 😱.. كيفاه دارها معلباليش.. و اوووبا و يحطها في القول و يرجع سجل الميساجات و المكالمات الي مسحتهم..  اليوووم نهااري.. زمر دايما ننسا بلي هذا الشي من اختصاصو يعني انا ما نقدرلوش.. لازم نلقا شخص يهنيني من التكنولوجيا و من بعد نرجعولو ليه..
ريا: اسمحولي كذبت ..  و دوك معليش تردلي تلفوني؟!.. دقيقتين و نكون في قاعة الإجتماعات..
حط التلفون فوق البيرو تاعي و انا نشتم فيه بمختلف اللغات و اللهجات في مخي..  بعدما تقدمت باش ندي تلفوني و اوووب التلفون راح اداه مرة أخرى.. و عطا الريح لرجليه و للتلفون الي داه معاه.. خرج من البيرو الحمد لله نقد نتنفس.. اوووف..  تنهدت تنهيدة طوييييلة ..  رحت للحمام رشيت الناء على وجهي باش نفطن مليح و نسترخي شوية.. دبعد دقيقتين رحت لقاعة الاجتماع الي كان يستغرق ساعتين باش يكمل.. و طول ذوك الساعتين و هو يشوف فيا بصح هاذي المرة راه يشوف فيا بطريقة حنينة..  و الله تحسب عنده انفصام في الشخصية..  و انا ذوك الساعتين فاتو عليا كي الساعتين تاع المات ورا بعض 🥺.. بعد ماكمل الاجتماع رحنا انا و اكرام باش نفطرو في المطعم الي في الشركة..بعد ماقعدنا في الطابلة..
اكرام: ريا معليش نسقسيك؟..
ريا: وي تفضلي..
اكرام: تعرفي السي ريان عبد الله من قبل ماتجي هنا؟
ريا: لا..  (جاوبت فيسع  و بلا ماتتردد)..
اكرام: راكي سور؟!..
اوماتلها براسي و بديت ناكل قبل ماتعاود تسقسي..
اكرام: نظن بلي السي ريان مهتم بيك بشكل خاص شوية.. 
بعد ماسمعت كلامها فتحت فمي و عينيا وساعو من الشوك الماكلة نسرقتلي و بديت نسعل عطاتني كاس ما و بعد ماريحت شوية قلت..
ريا: واش قصدك؟ جامي..  اول مرة شفتو فيها نهار بدا الخدمة في الشركة كمدير ..
اكرام: مانظنش مي مع الوقت يبان..
ريا:  كيفاش؟. .
اكرام: يعني قاع الوقت و هو يشوف فيك كي كان..
يلقي علينا الخطاب و زيد نظراتو ماتبشرش بالخير....
ريا: اكرام؛!! ياك ماشي اي واحد يشوف فيا دقيقتين نقول عليه يحبني.. ديجا شفتي واش دارلي الصباح بخصني قدام الي يسوا و الي مايسواش..
اكرام: بصح ماتنسايش بلي هو شخصيا جا دعاك باش تحضري الاجتماع.. كون على الاجتماع كون قالي و انا نبلغك مي هو راه يحوس السبايب باش يشوفك ..
هزت كتافها و ضغطت على يدي شوية و قالت..
اكرام: ريا السي ريان عندو ماضي مظلم ننصحك تاخذي حذرك منو و تبعدي عليه على ما تقدي..  بلييز ماتدخليش روحك في المشاكل..
كانت تحذرني و نحس الخوف مسيطر على نبرة صوتها.. مع اني نعرفو و كنت مرتو مي جامي خفت منو كيما هاك مافهمتش الشي الي مخليها خايفة..
ريا: اوك مي قوليلي واش صرا؟  و علاش صوتك راه يرجف و راكي خايفة هكا؟  ..
اكرام:  مااه مكاين والو مي خوذي حذرك انا راني قتلك و نتي ديري واش تحبي مبعد اذا صرات كاش حاجة ماتعجبكش ماتلومينيش و تقولي صحبتي ماقالتش..
ريا: على كل كل واحد فينا عندو ماضي خاص انا عندي ماضي تاعي و انتي تاني و ممكن يكون الماضي تاعو اسود مي مانحكموش على الشخص بلا مانعرفوه ممكن يكونو عندو ظرووف..
اكرام: اييه عندك الحق..  هيا نطلعو كاين اجتماع مع قسم البرمجيات بعد نصف ساعة و بما انك نتي مديرة المشروع يعني نتي الي راح تترأسي الإجتماع.. و انا رح نكون مساعدتك اليوم هذا كان طلب من السي ريان اني نحضر الاجتماع معاك..
ريا: اوك هيا..

"في مكتب ريان"..
ااه يا ريا و كون تعرفي الشي الي فات عليا من نهار تفارقنا لليوم و شحال ندمت على عملتي و ماحسيت بيك و بحبك الا بعد مافارقتك وقتها كان فات الحال..  مي كنت قادر نصلح كلش و نرجعلك و نساندك في اصعب فترة في حياتك و الي كنت انا سبابها..  مي الله غالب ماقدرتش يا ريا ماقدرتش نكون معاك ماقدرتش نكون زوج صالح ماقدرتش نكون اب مليح اسمحولي..  مهما نقول و مهما ندير اكيد ماحش يكون كافي باش تسامحيني مي مع الوقت ان شاء الله رح تعرفي الحقيقة و ممكن وقتها يحن قلبك مي مغاديش نكون معاكم وقتها يكون ربي خذا امانتو.. 
كان ريان قاعد في بيروه و يخمم في هذا لكلام يخمم في حبيبة قلبو ريا و نور حياتو ماريا..  نعم يا سادة ريان يحب ريا و عارف بلي عندو بنت من نهار كانت ريا حامل بيها و هو متبع اخبارهم و عارف كلشي عليهم الصغيرة و الكبيرة..

/في الجزائر/..
سكرتيرة: سيد يوسف راه جا السيد عبد الله..
يوسف(بابات ريا): ايه يا بنتي خليه يدخل..
سكرتيرة: اوك..
سكرتيرة: تفضل سي عبد الله السي يوسف يستنا فيك في مكتبو..
السي عبد الله(بابات ريان): يزيد فضلك بنتي..
يوسف: اووو شكون تفكرنا مرحبا بيك تفضل.. 
السي عبد الله: يزيد فضلك كيف لحوال..
يوسف:  الحمدلله..
السي عبد الله:الحمدلله..  و الله ديما في بالي مي راك تعرف الشغالات و السفر الحمدلله بعد ماسلمت الشركة لريان نقص عليا لحمل شوية مي راك عارف لكبر..
يوسف:اييه معليش ربي يوفق..
عبد الله: امين يارب..
يوسف:  ايه قولي كي راهي بنتي ريا نعرفها شاطرة..
عبد الله: و الله ماعندي مانقول فيها بنت و عليها لكلام نورمالمو تفتخر بيها ساجية و تقدر تعول عليها..
يوسف: ايه الحمدلله..  كيفاه حتى تفكرت عشير عمرك؟!
عبد الله: ههه راك قلتها عشير عمري كيفاه ننساه...   الصراحة جيت نحكي معاك في موضوع ريا و ريان نظن الي جا الوقت باش ريان يعرف بلي عندو بنت و هي تاني من حقها تتعرف على باباها و تحس بالأبوة..
يوسف: عندك الحق مي الشي الي دارو ولدك في بنتي مش قليل و ماحش ننساهولو و نظن من مصلحة ماريا انها ماتعرفش شكون بوها..
عبد الله: معليش وقت ماتكون ريا واجدة هيا تخبرو..
يوسف: ان شاء الله
مراد: السي يوسف وحدو؟.!..
السكرتيرة: السي عبد الله الداخل..
مراد: اوك صحيتي..
طبطب مراد في الباب تاع المكتب و دخل بعد ماخذا الاذن..
مراد: اوو عمي محمد نورتنا..
عبد الله:  الله ينورك ياوليدي.. كيف الحال
مراد:  و الله الحمد آلله ياعمي بخير السوال عليك..
عبد الله: لباس ياولدي..
مراد:  ها بابا جيت نخبرك بلي اليوم رح نسافر لنيويورك ان شاء الله  و ننقل خدمتي و كلش لتم باش نبقا مع ريا و ماريا..
يوسف: احسن ماعملت ياولدي.. وقتاش طيارتك..
مراد: على 10 تاع الليل..
عبد الله و يوسف: ربي يسهل ان شاء الله..
مراد: ان شاء الله ♥

اما ريان في هذا الوقت كان راح لافتتاح معرض كان كل مايحضر لنيويورك يستدعيوه باش يحضر عرض ازياء و يختار عارضة من بين العارضات حتى تكون هيا الوجه الإعلاني للشركة..

اسمحولي البارت كان شوية قصير و غبت عليكم بزاف مي هاني رجعت و ان شاء الله نكملها فيسع
رح يكونو شوية مفاجآت و شوية عفايس ان شاء الله يعجبوكم.. أما السكرتيرة اسمها نادين السي يوسف يعتبرها كي بنتو باسكو هيا يتيمة تربات مع مراد و خاوتو ملي كانت صغيرة.. 
ان شاء الله  يكون عجبكم البارت ماتزعفوش مني ✌🙂🙂
و اذا ماعجبكمش قولولي ☺️