آعطـنيـﮯ فرصـ‏‏ةّ ثـآنية.. 🖇❤(متوقفة حاليا)

.. بارت 8..

مرحبا كيف حالكم؟!..ان شاءالله يعجبكم البارت❤

            قد تجد وجها مثل ملامحي..
                         لكن قلبي لم يخلق منه أربعون..

/\///\///\/♡••♡••♡••♡••♡••♡••♡••\///\///\/

ريان: الحقيني للبيرو تاعي عندي هدرة معاك..
قال بصوت متطلب فكو مشدود بالكاد يتسمع صوت انفاسو الي كانت تداعب رقبتي قبل ما يخرج من القاعة و انا واقفة في وسطها نخمم اذا نروح وراه ولالا..
تنفست بعمق ورحت وراه دقدقت على باب المكتب قبل مايقول ادخلي بعدما اسمحلي اني ندخل دخلت كان واقف يستناني( ياك مانسيتوش هو الي قالي نلحقو)..كان المكتب تاعو كبير بزااف بالمقارنة مع المكتب تاعي.. كان الحيط مصبوغ بلون كريمي يتناسب مع شخصيتو .. و طابلة كبييرة في القنت محطوط فوقها البيسي تاعو و مزهرية فيها ورود شابين.. من غير هذا الشيء كانت كل بلاصة و كل كوانة في داك البيرو فارغة مكان لا فوتاي لا كرسي و لا حتى طاقة مكانش..فيه غير لحيوط جاي مخنوق و مغموم مكانش متنفس يشبهلو قذيفة فارغة مثله..
بفف رح نوقف هنا نهار كامل ولا كيفاه ها انطق.. باينة بلعاني راه مخليني نستنا هنا.. كنت نخمم علاه عيطلي و قعد ساكت مانطقش بحرف قعد يتبسم و هو يشوفني متوترة تبسمتلو ذيك التبسيمة الصفرا و قلت..
ريا: تفضل سي عبد الله.. كيفاش نقدر نساعدك؟! تحتاج كاش حاجة؟!..
شاف فيا رفع حاجب و هبط لاخر و قال..
ريان: يقدروا يلعبو زوج لعبة.. مايقدروش؟! ..
واش راه حاسب زعما هكا رح نتوسل ليه باش يرجعني؟!هههه في منامو يشوفها هاذي..
ريان: آنسة قادر.. عبالكي صح راني فرحان الي رح نخدم معاك هنا تعرفي واش هاذي صح مفاجاة شابة ماكنتش متوقعها و مكانش علابالي الي رح نلقا بعض الترفيه و الإثارة في مكان العمل مي نظن اني كنت غالط..
كان يشوف فيا و يهدر يثني على زهرو و يحوس يستفزني تنارفيت مي مابينتش كنت نشتمو من الداخل بكل اللغات مي اكيد ماحش نبينلو ضعفي ولا اني مهتمة وجودو كيف عدمو..
ريا: واش نقولك يا سي ريان زهري الكلب دارها بيا بصح معليش كلش يفوت و رغم كلش مراحش نبقا مقيدة هنا طول حياتي.. و كيما يقولو الصبر مفتاح الفرج
تبسمت ليه كن القنت للقنت حتى بانت ضرسة لعقل شاف فيا و هو متفاجئ مكانش يستنا مني هذا الجواب كان حاسبني راح ننفجر فيه و نزقي و نعيط و ندير مشاكل مي مش علاجالو نخسر خدمتي موحال تكون ليه.. بعد يشوف فيا حتى في غمضة عين تنفض و تصرف بهدوء.. بانت ذيك الإبتسامة تاع الأشرار على وجهو و هو جاي جيهتي كان يمشي كل خطوة بحذر كي الصياد الي يطارد فريسته و هذا الشي خلاني نخاف منو و قلبي يخبط كل ما يقرب اكثر و اكثر.. وقف اونفاص ليا و انحنى قدامي كان وحد الشبر بيناتنا تخلطت انفاسنا مع بعض من شدة قربو ليا..
ريان: فاتو 4 سنين على آخر مرة شفتك فيها..يادرا كيفاش فوتي ذوك الربع سنين بلا بيا بعد كل شيء كنتي كي الجرو الضايع الي توالف يجري عند رجليا وين نروح نلقاه😉..
همس في وذني.. تنهدت بعمق و تبسمت معاه رغم الي كل كلمة منو كان تطعني في قلبي..
ريا: هههه قلت اني كنت نجري وراك كي الجرو و نحوم حول رجليك و مقيداتك؟! ماتخافش هاذ الشي ماحش يصرا من بعد الأن..
شدني من ذراعي بقوة حاولت نتملص و نبعد يديه عليا مي ماقدرتش كان أقوى مني شاد قبضتو على يدي في حركة دائرية دفعني للحيط و علق يديا فوق راسي قبل ما يزمجر مرة أخرى كيف الحيوان.. ضاقت عيني عليه بينما هو تجرأ و تمادى أكثر.. هاذي المرة مراحش نخليه يهزمني ملازمش نضعف قدامو انا قوية لسوء حظو اني إمرأة لعزيمتها سبع أرواح كلما خذلت إزدادت دافعا للنجاح..
ريان: ماتبدلتيش.. مزالت نفس النظرة في عينيك.. نظرتك الحادة ليا و طباعك و كلش فيك يبين انك ماتبدلتيش كل حاجة فيك تخليني نكرهك اكثر و اكثر..
قرب مني و همس في وذني و هو يمسح بشواربو عليها..
ريا: هههه غالط يا سي ريان.. ممكن نبانلك ضعيفة اما غالط ريا لقديمة راحت مابقاتش اليوم كاين ريا قوية أكثر مما تتصور أنت و غيرك ..
كنت نحكي و انا نجاهد و نحاول نفلت يدي من قبضتو لقوية حاولت ندفعو بعيد مرة أخرى لكن بلا جدوى.. كان كي الصخر.. تغير بزاف في هاذو السنين الي فاتو.. خدم جسمو مليح حتى ولا مرسوم رسم كيما النموذج.. لحية خفيفة على وجهو تظهر نظرة الرجل المثالي.. لكن حتى حد ما يعرف الي تحت هذا الجسم العضلي و العضلات المتحوفة البارزة مخفي رجل عاطفي بلا قلب؟!..
ريان: ههه بلا ماتحاولي تقنعي روحك أنك وليتي قوية احنا لاثنين نعرفو الي هذا الشي مش صحيح انتي كنتي و رح تبقاي طول عمرك لعبتي انا...
ريا: بعمري ماكنت ولا رح نكون لعبت حد.. و دوك تشوفو كلكم و الا ماتندم على كلامك هذا..و دوك تقدر تتحرك و توخر عليا؟! قربك مني مش مريحني ولا بعمرو كان مريحني..
قلت بجرأة رغم اني كنت متوترة و خايفة أما حاولت نستجمع قوتي و نحكي بصوت واثق.. لكن هو لقا طريقة أخرى باش يضعفني دخل يدو تحت تريكو و ضغط على خصري حسيت بنار شعلت داخلي منها حقد و زعاف و كره كنت عايفاتو و متقززة منو سحبت يدو بكل قوتي و دمرتو بعيد عليا بقا يتعثر قريب يطيح اما شد في الطابلة الي كانت تم ووازن خطواتو ووقف بثبات..
ريا: ياويلك و تزيد تتجرأ و تقرب مني و لا تلمسني بيديك لمسخين يا رخيس تفو عليك..
بزقت عليه و رحت جيهت الباب شديت المقبض رح نفتحها حتى جبدني من كتفي و حط شواربو فوق شواربي قعد يبوس و يعض و هو يلهث كيما الحيوان الي انقض على الفريسة تاعو ينهش فيها و انا واقفة جمدت في بلاصتي من الصدمة ماكنتش متوقعة انو يتمادى هكا..قعدت باهته و نشوف فيه و كل شيء يفوت قدامي بحركة بطيئة كيفاش رفد يدو ليسرى و حطها على الجزء الخلفي من راسي و يدو اليمنى الي كانت على شكل قبضة قوية مقيدة يديا الي كانوا موضوعين على صدرو و هو يبوس فيا و يفترس في شواربي بشراسة و كأنو يعاقبني.. حسيت بذوق حاجة مالحة على لساني و تفطنت الي هذا ذوق دموعي الي صارو ويدان على خدودي..طول هاذي السنين كنت بنيت جدار غالقة على روحي و على بنتي مانخلي حد يقرب مني  باش نحمي كرامتي و شرفي اما في ثانية تحطم كل شي بوسة منو خلاتني نضعف و نحطم كل شيء بنيتو في اربع سنين خلال دقيقة برك هو السبب هو نكره روحي نكره ضعفي قدامو كرهتو و كرهت روحي اني ستسلمت ليه..مافصلش القبلة و ما نظنش الي رح يتوقف في وقت قريب..يبان الي كان يستنى في هاذي الفرصة و هاذي اللحظة بفارغ الصبر عض شفتي السفلى  كأنو يطلب مني أني نبادلو اكثر اما أكيد ماحش نمدلو واش يحب رح نحاربو حتى للخر ملازمش نستسلم اكثر من هاك.. فجأة تفتح الباب توجهت نظراتنا لتم حتى شفنا أصلان واقف عند مدخل المكتب و على وجهو نظرات غير مفهومة منها حيرة و منها صدمة و منها استفزاز خبث و ابتسامة  مش مفسرة نظرة مبهمة.. دمرت ريان بعيد عليا و سقدت التريكو تاعي و مسحت شواربي بظهر يدي ..عاود قرب مني مرة أخرى و لف يدو اليسرى على خصري.. سييت اني نفلت من بين يديه اما هو ضغط على لبلاصة الي كان شاد فيها و شاف فيا بنظرة تحذيرية و كأنو يتحلف فيا..شاف فينا أصلان بنظرة تعجب و كأنو مزال مشوكي حتى شفتو و ابتسامة عريضة مرسومة على وجهو كان يبان بهلول 😅
اصلان:واش خو.. نظن الي ماعدتش محتاج للنسا لخرين و خاصة بعد واش صرا مع حبيبتك لقديمة..
وقف في وسط المكتب بعدماقال كلامو و كأنو تفطن لواش قاعد يقول..
اصلان: صحا دبر راسك مكان مادخلني في حياتك الشخصية يا خويا لعزيز..
رفع يديه في لهواء و كأنو يعبر على استسلامو..
ريا : لا أصلان ماشي كيما راك حاسب انت .. اصبر نشرحلك..
حاولت اني نشرحلو اما ريان ضغط مرة اخرى على خصري الشي الي خلاني نتآوه من شدة لوجع..  اكيد رح يخلي علامة حمرا تدل على بصمتو في خصري ..
ريان: اصلان اخرج و ماتدخلش لمكتبي مرة اخرى بلا إذن مني..احترمنا و خلينا شوية خصوصية ..
قال الجزء الأخير من كلامو و هو يشوف فيا و يطرد فيه..تمتم أصلان بشيء مش مفهوم و هو يهدر من تحت نيفو خرج من المكتب قبل مايغلق الباب وراه..
ريان: واش عملتي؟!(بزقت عليه قبل ما يجي أصلان)..
ريان: اما معليش غير استمتعي بهاذي اللحظة و نوعدك الي باش نذوقك الويل.. و ما تقوليش انك ماستمتعتيش بهاذي البوسة باسكو على بالي الي هيا على قلبك أحلى من العسل..
فتحت عينيا على وسعهم و شفت فيه مصدومة كيفاش انسان بعد سنين ماتتبدل فيه حتى حاجة شخصيتو و كلامو تصرفاتو و كلشي فيه مزالو مغرور و متكبر هذا الموقف ذكرني بنفس الموقف الي بسبتو دمرلي حياتي الموقف نفسو صرا قبل سنين وقت كان اول لقاء لينا..
كل ما نتفكر الشي الي كان بيني و بينو نتقزز منو اكثر قداش كنت عمياء و بهلولة.. انا صح نكرهو و اكثر ما يتصور على قد ما كنت متيمة بحبو على قد ماكرهتو و اليوم عطاني سبب وجيه باش نزيد نكرهو أكثر من قبل ..
ريا:  بعملتك هاذي كرهتني فيك اكثر و اكثر نحس و كأني بست عاهر مغتصب حقير رخيس مايسواش مافيهش ريحة الرجولة..
قلت كلامي و خرجت من مكتبو نجري.. غير وصلت للبيرو تاعي لقيت أصلان مسند على الحيط ضام يديه لصدرو و ساهي في السقف غارق في تفكيرو..بعد ما انتبه لي و شاف وجهي الي كان عامر دموع تغيرت تعابير وجهو و بانت عليه ملامح القلق و الخوف..
أصلان: واش الي صرا يا الشابة؟ راكي مليحة؟!
أومأتلو براسي و رحت داخلة لمكتبي دخل ورايا و غلق الباب وراه..
أصلان: اسمحيلي علابالي هذا مش الوقت ولا المكان المناسب باش نسقسيك أما نحب نعرف ماعنديش خيار آخر..تعرفيه من قبل؟
كان يسقسي فيا و حسيت في نبرة صوتو تردد و خوف كان باين عليه.. نحوس نقولو لا منعرفوش اما لا اكيد ماحش يصدقني بعد القعدة الرومنسية الي شافها.. تنهدت بعمق و مسحت على وجهي  و قلت بصوت هادي و كأني نهمس بصوت بالكاد كان مسموع..
ريا: واه نعرفو..
في غمضة عين تبدلت ملامحو و تعابيرو سها شوية اما فطن على روحو فيسع توتر و قبض يديه..
أصلان: صحا انا لازم نروح نتشاوفو من بعد..
خرج من مكتبي و راح رجعت انا نكمل خدمتي فات باقي اليوم بهدوء لمست صوالحس و رفدت صاكي.. كملت وقت المناوبة تاعي و لازم نروح نجيب ماريا من ليكول..و انا خارجة من المكتب تاعي تلاقيت بإكرام و خبرتني الي المتعجرف تاع السي ريان المصون مستنيني في مكتبو..
ريا:افف واش خصو دروك؟!
رحت نتمشى جيهة البيرو تاعو و انا مهبطة راسي كرهت و مليت منو و من كل شي يخصو دخلت للمكتب نتاعو بلا ماندقدق في الباب ولا نستأذن مايستحقش انو يتلقا احترام مني..
ريا:واش تحتاج علاش ناديتني؟  ..
ضميت يديا لصدري و سقسيتو بنبرة هادية.. ماشافش فيا كل مانيش واقفة قدامو شاف ف ليكرون تاع البيسي وقت تجهم وجهو..
ريان: واش هذا؟!
رما دوسي قدامي و شاف فيا..هبطت و رفدت الدةسي من الأرض فتحتو مافهمتش واش في داخلو و السبة الي خلاتو يتنارفا هكا...
ريا: سي ريان  .. انا.. انا مافهمتش واش هذا.. ممكن تفهمني واش هذا؟!..
سقسيت و اكيد ماتجرأتش نسقسي اذا كان هو رئيسي ولالا..وقف فجأة في بلاصتو و اندفع جيهتي كيما السبع..
ريان: شوفي فيا  و اسمعي مليح واش راح نقولك..غدوةالصباح نحوس يكون هذا الملف على طاولتي مخدوم و بدون أخطاء.. ياويلك اذا لقيت خطأ واحد مانضمنلكش الي رح تخرجي منا سالمة و تعرفيني كي نتنارفا..
كنت رح نحتج على الشي للي قالو.. حتى تفتح الباب و دخل طفل صغير رايح يجري جيهتو كان لابس الزي الرسمي لليكول..
....: ني جيت..
كان الطفل الصغير يجري و ينقز في كامل المكتب لكبير.. قعدت ساهية نحقق في ملامحو مش غراب عليا ملامحو مألوفة بالنسبة ليا..كان باين الي هو في سن ماريا و كان لابس نفس الزي الرسمي الي يلبسوه في المدرسة الي تقرا فيها..اما مكان ما دخلني انا..دورت كعبي و خرجت من مكتبو بلا ما نضيع وقت أكثر.. ديت صوالحي و خرجت من المبنى متحمسة اني نروح نجيب ماريا من مدرستها..
••••••••••••••••••••••••••••••••••••••••••••••••••
ريا:قوليلي ماما كيفاش كانت المدرسة اليوم.. قريتي مليح؟!  ..
قلت و انا نحضرلها في وجبة خفيفة باش تتغذا..
ماريا: ايه ماما قريت مليح..
ردت بصوتها الطفولي.. قعدت قدامها على الأريكة و دورت وجهها الشباب الصغير لعندي.. تبسمتلي و رجعت دارت تتفرج في التيلي..
ماريا: اجري.. اجري.. اجررري..
زقات كي قبض توم على جيري خهه برنامجها المفضل..
ريا: ماريا عزيزتي قوليلي ماماتي ياك ماصرا حتى مشكل اليوم مع الطفل هذاك؟! معادش يديرونجي فيك؟!...
هزت راسها بلا..
ماريا: لا ماما.. كان عاقل اليوم حتى اعتذر مني
وولينا أصدقاء..
ضحك وجهها و تنور..
ماريا: تشاركنا لفطور الي وجدتيهولنا و عجبو طبخك..
هههه حكات كل شي في دقيقة كانت تبان فرحانة كي لقات صديق جديد.. الحمدلله ربي استجاب لدعواتي..

يـﮯتبع..
مرحبا.. كيف الحال.. ان شاء الله تكونو بخير..
اعطوني رايكم في البارت بليز.. توقعاتكم..

-واش راح يصرا زعما؟

-كيف رح تكون العلاقة بين ريا و ريان؟!..

-علاش أصلان تبدلت ملامح وجهو و عبس بعد    ماعرف الي ماريا عندها علاقة بريان؟..

شكون الطفل الصغير؟!..وواش علاقتو بريان؟!

تفاعلو مع البارت و مع لكرونيك رايكم يهمني.. 🤷‍♀️

شكرا 🌹❤..
❤I love you all ❤