سلام عليكم لبنات.. كيراكم ان شاء الله كامل تكونو بخير.. انا مانيش مليحة مي الحمدلله على كل حال.. بغيت نقوللكم حاجة و الله راني نكتب و نبكي اليوم خالتي ماتت بالكورونا ربي يرحمها ويغفرلها 🥺 ماقدرناش مامبا نشوفوها و لا ندفنوها و لانديرولها عزاء.. و الله بناتها يبكو لحجر الحيط الي كانو متكيين عليه و ماماهم و تاج راسهم ماتت و خلاتهم وحدهم لا أب و لا أم مكانش الي راح عندهم وواساهم و جبر بخاطرهم و الله يقطعو القلب و الله توصل اختك و لاخالتك ولا حد قريب ليك يموت و ماتقدري تديري والو حاجة صعيبة بزاف بزاف هي صح الأجل تاعها بصح و الله توجع بزاف بناتها صغار مزال جايين للدنيا و يتامى مكان حتى واحد يحن فيهم كيما ماماهم ربي يرحمها.. مالقاوش حتى شكون يدفنها.. ياك إكرام الميت دفنه حتى ليبومبيي مابغاوش يدفنوها 😔 مسكينة كانت فرحانة بعرس بنتها الي كان راح يكون السمانة الجاية الحمدلله ربي حبها و مابغاش يعذبها ماتت بلا ما تتعذب و تعذب ولادها..
المهم لبنات اسمحولي علابالي وجعتلكم راسكم مي الله غالب و الله ماقدرت بغيت نطلب منكم تدعولها بالرحمة و المغفرة و ان شاء الله ربي يجعلها من أهل الجنة و تطلبوا الصبر لولادها مساكن و الله راهم هابلين مكان حتى كتف يسندز عليه غير بعضاهم..
ربي يرحمها ان شاء الله و يجعل مثواها الجنة يارب 🤲 ..
و الله مراني قادرة ندير والو عييت و سورتو مين شفت حالة ولادها تهدوا مساكن ماليهم لا حول و لا قوة الا بالله.. ادعولها ربي يحفظكم و يخليلكم لعزاز عليكم و يبعد عليكم كل شر و يرفد عليكم هذا الداء و الوباء.. رح نكتبلكم بارت باش نفوت شوية وقت و نلهي روحي شوية..
بسم الله ❤..
♡بعد عام ♡الماضي ♡
فات عام ملي ولينا أصدقاء كانت علاقتنا مليحة نوعا ما تعدات حدود الصداقة أما حتى واحد فينا ما قدم بخطوة للقدام و صرح بمشاعرو..مش متأكدة من مشاعرو جيهتي مي عندي إحساس أنو يبادلني نفس المشاعر.. قبل عام من هذا الوقت كون جا كاش واحد و خبرني اني رح نحبو في المستقبل ماكنتش رح نامن.. كنت رح نضحك عليه.. جامي خممت فيه على هذا الأساس كنت نكرهو صح و نكره الطريق الي يمشي عليها اما في هذا الوقت تبدل كلش مكانش مجال للشك و لا باش نكذب على روحي انا نحبو.. ايه انا وليت نحب الشخص الي كنت نكرهو.. بعد ماتقربت منو و عرفتو مليح تبدلت نظرتي ليه و كرهي تبدل وولا حب.. على قد ماكنت كارهاتو وليت حاباتو.. هي صح كيما يقولو لا تحكم على الكتاب من غلافه.. شحال من الناس الي ظلمناهم بسبب حكم مسبق قبل مانعرفوهم حتى.. انك يكون عندك حكم مسبق على شحص او نظرة عليه رح تخلق حاجز كبير بينك و بينو.. صحيح الحكم على الآخرين خطأ لا يحتمل الصواب..
مرات كان يلعب دور حارسي الشخصي يروح معايا وين نروح و يحميني من كلش حتى في الجامعة حتى واحد مكان يتجرأ أنو يتقرب مني بسبتو باسكو يخافو منو.. بسبتو مزالني لحد الآن سيليباتار.. بصح هو تاني من الوقت الي تعرفت عليه فيه مدار حتى علاقة لحد الآن.. معظم الأوقات كنت نديرونجيه و نسقسيه علاش مادخلش في علاقة مع حتى وحدة مدام لبنات متلايمين عليه و كل وحدة تتمنى يكون ليها.. اما قال الي هو معادش مهتم بالمواعيد الغرامية و الي معندوش وقت للخرافات هاذي.. بلاك راه يستنا يلقى الحب الحقيقي..
زعما يبادلني نفس المشاعر!؟! مزال لحد الآن ماقدرتش نتأكد من مشاعرو من جيهتي.. بلاك راهو حاطني في مقام صديقة عادية يحبها كيما أختو.. بفف حرت تاع الصح بصح معليش كلشي في وقتو زين.. هبطت راسي و كملت نقرا في كتابي.. في ذاك الوقت كنت في المكتبة قاعدة نستنى فيه كان وعدني الي راح يفهمني دروس في المات باسكو غدوة عندنا امتحان.. قعدت و انا نقلب في الصفحات وحدة ورا لخرى نسيي نفهم شوية بينما يجي هو و نعرف واش راني فاهمة وواش مانيش فاهمة.. لكن مع الأسف ماقدرت نفهم والو حتى سطر واحد.. عقلي الأن راهو يحوس منعرف وين.. العقل هو عبارة عن مجموعة من القوى الإدراكية الي تتضمن الوعي.. المعرفة.. التفكير.. الحكم.. و غيرو..
اما انا فعقلي عبارة عن قشرة بيضاء فارغة ديما هايم و كي يكون الامر يتعلق بالمات يفرفر بعيد مع الأسف.. بادئ ذي بدء.. شكون الي لقا هاذي الرياضيات؟! باينة رح يكون واحد من ذزك القتلة المتسلسلين الي يقتلوك بالبارد اكيد ما هو جابها باش يخلق مشكلة عقلية للطلاب الأغبياء كيفي.. 🥺
كيفاش الرياضيات تجلب مشكلة عقلية للبنادم؟! معلباليش عليكم مي انا عندي تاريخ معاها.. مسكينة يا أنا😭..
مليت.. لميت شعري بقلم الرصاص الي كنت نلعب بيه شفت في ساعتي و بداو الأفكار الشيطانية يحومو حولي 😈..
علاش مجاش؟ ...
زعما صراتلو كاش حاجة؟!..
كره مني؟!
ولا دارها زكارة باش مانخدمش مليح في الإمتحان.؟!..
زدت قدت شوية نستنا كي كرهت و فثدت الأمل بلي راح يجي جبدت شعري و جيت نايضة حتى نسمع شخص يناديلي.. تلفت ورايا ناحية الصوت نشوف شكون.. لقيتها نيهاد صحبتي..
نيهاد: ريا! يا ريا اصبري!!
وصلت وين كنت وقفت قدامي و هي تلهث بصعوبة تسيي ترد النفس.. و انا نشوف فيها طلعت حاجب و هبطت لاخر و قلت...
ريا: نيهاد.. واش كاين؟ واش صرا؟..
نيهاد: ريا.. جيت نقولك حاجة. ريان😔..
قالت الي جات تهدر معايا على ريان و بعدها هبطت راسها و خرجت منها تنهيدة طويييلة..
ريا: اهدري! واش صرالو ريان؟!..
هزيت كتافها و انا نطلب فيها تهدر تنهدت مرة اخرى و شافت فيا.. في ثانية ولاو يديا يعرقو و حسيت بدوخة تجيب و تدي فيا.. مانيش متحملة صدمة اخرى..
نيهاد: ريا صرات ديڨا كبيرة بين ريان و نوح و ريان نصاب بجروح خطيرة و دخلوه للسبيطار.. من بعد ماداوه ماعندي تليه حتى خبر...
بلعت ريقي و انا نسمع في هدرتها و الخوف كلما يزيد.. مرة اخرى هذا الشي صرا بسبتي انا!.. كي عرف ريان بلي كاين وحدين راهم يتنمرو عليا و من بيناتهم نوح راح و هددهم باش يبعدو عليا و بسبتي تدابز معاهم و دوك راهو في السبيطار انا السبة ملي عرفني و هو يخلط في المشاكل..
ريا: وين داوه؟ وينا سبيطار؟
نيهاد: سبيطار ***
قلت و صوتي يرجف فيه بحت خوف و غصة بكا..بعد ماقالتلي اسم السبيطار تنفست مليح و تفكرت الي هذا السبيطار بعيد على الجامعة بشي نص ساعة.. خرجت من المكتبة نجري رحت للبارك تاع الجامعة ديت الموطو تاعي و رحت فيسع..
بعد مرور ساعة..
وصلت للسبيطار و دخلت رحت عند موظف الاستقبال سقسيتو على ريان و رقم الغرفة.. بعد ماعرفت الغرفة الي راه فيها طلعت وين كان شفت الغرفة و في الكولوار كانو دايرين كي شغل كراسى رحت قعدت تم و انا مترددة نخمم اذا ندخل ولالا.. فات شوية وقت حاولت نشجع روحي نضت رحت جيهة الباب ووحطيت يدي على المقبض جيت رح نروح من بعد قلت يعني هذا كلو صرا بسبتو على الاقل لازم نتطمان عليه يعني هو دار هكا باش يحميني.. ماعرفتش كيفاش رح تكون ردة فعلو مين يشوفني ممكن ندخلو في مشكل أكبر من هذا (شوية و تعرفو علاه مشكل اكبر من هذا😂) المهم حاولت نخبي أثر الضربة الي كانت حمرا و كان خدي يحرقني من شدة الوجع الي بزاف وين صفعني وراسي يوجع رح يطرطق.. اخيرا فتحت الباب و يديا يرجفو دخلت للغرفة شفت فيه وقتها خرجت شهقة من فمي بلا مانفطن تجمعو الدموع على خدودي .. كانو لافين ضمادة على كرشو معمرة بالدم و عينو اليمنى مضروبة كانت موف و في حاجبو شحطة صغيرة و فيها دم.. غير شافني استرخى و تبسم معايا.. كان يسيي ينوض مي ماقدرش رحت عندو و عاونتو باش يتقعد و يقعد على السرير..
ريان: الحمد لله الي راكي بخير.. فرحت كي شفتك..
ريا: راني مليحة ريان.. ماتخافش عليا.. و نتا راك مليح؟!
ريان: ايه الحمد لله..
قرب مني و حط يدو على خدي و قعد يتلمس في بشرتي.. جفلت و تراجعت للور.. طلع حواجبو و قال ..
ريان: ريا واش صرا؟!..
ريا: اا ماصرا والو ريان..
قلت و تبسمت ذيك التبسيمة الي من فوق القلب يعني باش مانتسببش في مشكل اخر..
ريان: ريا أحسنلك تقوليلي واش صرا..
زڨا عليا و هو يصر على سنيه بلعت ريقي و حاولت نبعد عينيا عليه وليت نشوف في كل بلاصة الا عينيه.. معنديش حل اخر لازم نخبروا رح يعرف بطريقة او بالأخرى حتى حاجة ماتتخبا.. وقف فجأة من بلاصتو لكن كان يتوجع..
ريا: ريان هدي روحك.. دوك نخبرك.. ربي يحفظك اقعد راك مزال مريض..
كنت نهدر و انا نبكي..
ريان: إذا دارلك كاش حاجة مغاديش يفلت من يدي هاذي المرة..
زقا في وجهي و هو يتحلف فيه و انا غير نبكي و نسيي نهدن فيه..
ريا: ريان هدي روحك ربي يحفظك ياريان..
دفنت راسي في وجهو و قعدت نبكي في حضنو.. ربت على كتفي بيدو و قال..
ريان: صحا ريا.. متخافيش عليا راني نسمع فيك مي ماتكذبيش عليا.. تنهدت تنهيدة تهد جبال و بديت نشرحلو واش صرا في الجامعة كي هودت ندي الموطو تاعي من ااباركينغ و لقيت نوح قاعد يخرب في اللوطو تاع ريان سييت ندفعو بعيد مي ماقدرتلوش و صفعني.. قعدت متخبية في حضنو نبكي و نشهق و هو ضامني ليه و ساكت كان هادي و هذا الهدوء الي يسموه هدوء ماقبل العاصفة و هذا الشي مايبشرش بالخير.. كان يتمتم بشي من تحت نيفو.. شفت في عينيه الزروقا و هو يمسح دموعي بيديه..
ريان: راه يوجع فيك بزاف؟!
سقساني و هو مقلق هزيت راسي بلا..
ريا: لا راني مليحة ريان ماتخافش مراهش يوجع..
كذبت عليه باش ماتزيدش تكبر اكثر و نطمنو.. هز راسو.. معلباليش اذا نخبر والديه بالحادث و لالا.. الشي لي نعرفو عليه انو ماعندوش علاقة قوية مع والديه و جامي شفتو يهدر معاهم.. قتل الي عندو اخت كبيرة عليه و قريبة منو بزااف و يحبها اكثر من اي شخص اخر.. من غير هذا جامي سمعتو يهدر على عايلتو..
ريان: ربي يخليك اقعدي معايا.
غير جيت راح ننوض من عندو قالي باش نقعد معاه تبسمت معاه و قلت..
ريا: سواء قتلي ولا لا رح نقعد معاك مانخليكش وحدك.. تنور وجهو و شاف فيا و تبسم معايا في ضربة راح لقلق قاع.. قعدت معاه طول الليل.. حطيت راسي على صدرو و عنقتو لف يدو على خصري و جبدني لعندو باش مانروحش.. قعدت نسمع في نبضات قلبو و هو يخبط حتى داني النوم.. على غدوة بعد مانضنت و ودعتو رحت للجامعة غير دخلت تلاقيت بنوح حتى شفتو جاي عندي.. شهقت شهقة خوف بلا مانفطن.. كان يخلع.. كلما كان يقرب مني خطوة للقدام انا نتراجع خطوة للور كان يبان عليه الندم و الخوف و القلق و الوجع و كلش ماشي مليح حسيت الي كان مجبور يدير هكاك.. بصح علاش؟.. بعدها وقفت تما باسكو كنت عارفة راه جاي عندي.. وصل عندي و ركع قدامي و شبك يديه مع بعض و ضغط عليهم.. و همس..
نوح: اسمحيلي ريا.. عاونيني و سلكيني منو اكيد راح يقتلني يا ريا عاونيني..
تاع الصح كان معمر جروح بالغة في وجهو و يديه و كامل جسمو.. حتى شفت ريان جاي عندنا و شاد في يدو مضرب كريكيت و وين كان شادو كان مغطي بخرقة حمراء.. حطيت فمي على يدي مشوكية.. يا ربي؛! زعما يكون ضربو بهذا؟!؟!.. شدو من كتفو و خبطو ببوكس للوجه.. طاح نوح في الأرض و هو يئن و يتلوى من الوجع..
ريان: المرة الي فاتت مابغيتش نقتلك باسكو وعدتها بلي مغاديش نرد عليك حتى اني خليتك تضربني كيما تحب..
ريان: باسكو حسابني رح تحشم على عرضك و تخليها في حالها بصح نتا مابغيتش تفهم.. تجرأت و لمستها و زيد مالفوق صفعتها يا كلب ياك هكا؟؛ قال وهو يشوف فيه من بعد طاح عليه و بقا يضرب فيه حتى تغاشى..
ريا: ريان لااا..
تقدمت بخطوة للقدام و كنت رايحة ليه حتى شفتو كيفاش شاف فيا وقفت في بلاصتي..
ريان: تعرف واش؟ انتا درت خطوة غالطة كي تجرأت و لمست فتاتي و دوك رح نعطيك مكافأة.. قرب منو و شد فكو بين يديه و زير عليه.. نوح تآوه من الوجع.. بعدها لاحظت الي كاينة بقعة دم حمرا في تريكو ريان كان ينزف يعني الجرح تفتح!!...
ريا: صايي ريان. .
رحت نجري عندو و شديتو من يدو.. حط يدو على كتفي سندتو مليح حتى حسيتو رتخف و ثقلو كلو عليا...تجمعو الطلاب حولنا مي حتى واحد ماقدر يقرب و يفرق بيناتهم كلهم يخافو منو كان كي الأسد الي يدافع على اللبؤة تاعو..
ريان: اسمعوني مليح قاع بيكم.. لو يتجرأ واحد فيكم و يقرب ناحيتها و لا يمس خصلة من شعرها راح يكون حسابو معايا انا و مغاديش نرحمكم..
شاف في نوح و قال..
ريان: هاذي المرة التالية الي نسمحلك فيها تروح.. ياويلك و تزيد تقرب منها انسا انك تخرج من هنا بخير و سلامة.. نقتلك يا رخيس..
كرشو كانت توجع فيه شدني من خصري بشدة و سند عليا..
ريا: راك تنزف.. هيا نروحو للسبيطار!
شديتو من يدو و ديتو عند اللوطو.. في الحقيقة كنت خايفة عليه و منو في ذيك اللحظة.. ركبتو في اللوطو و رحنا..
يتبع..
سلام.. هذا البارت كنت كاتبة نصو و زدت كملتو دروك.. شوفوه و ادعو لخالتي و لجميع موتى المسلمين بالرحمة و المغفرة و ادعو ربي يرزقنا و يرزق ولادها الصبر والسلوان يارب.. ربي يرفد علينا هذا الوباء ان شاء الله و يصلح الحال اللهم آمين يارب ❤
أنت تقرأ
آعطـنيـﮯ فرصـةّ ثـآنية.. 🖇❤(متوقفة حاليا)
Cerita Pendekاعطيني فرصة ثانية 🖇❤... باللهجة الجزائرية.. ❤Ⓦⓐⓕⓐⓐ❤
