هلووو.. اليوم ني حطيتلكم 2 بارت مي التفاعل وااالو انا حسابني كي توحشتو لكرو رح نلقا تفاعل مي 3 برك شافوها و تفاعلو مي بخاطركم.. كل يوم رح نحطلكم بارت ان شاء الله و اذا طولت معناها عندي ظرف خلاني نطول عليكم..
المهم رح نبداو بسم الله..
بعد ماراح ريان للإفتتاح باش يعين الوجه الإعلاني الجديد للشركة تلاقا بمدير وكالة الأزياء الأمريكية "فورد" باش يحضر العرض و بعدها رح يروحو ريان و مدير الشركة في عشاء عمل باش يتفاهمو على الخدمة و قاع.. كان بدا الإجتماع في الشركة مع فريق البرمجيات الي ينفذو التصميم الي عطاتهولهم ريا و يتشاورو عليه وبعد مايوجد يديرولو اعلان الي بسبتو ريان راح باش يختار العارضة.. المهم بعد نقاش طويل و سين و جيم قرروا واش يديرو و نوعية التصميم و كلش و مابقا غير ينفذو..
في هذاك الوقت كان ريان مع مدير وكالة فورد الي طلب انو ريا تكون حاضرة في العرض و هيا الي تختار العارضة باسكو عندها دور كبير في هذا المشروع و من حقها تخير و زيد تشرط واش حبت.. و بعد ماتفاهمو عيط ريان لإكرام..
ريان:مادموزال اكرام معليش تقولي لمدام ريا تحضر لوكالة فورد..
اكرام: وي موسيو دوك نقوللها..
بعد ماكملت اكرام هدرتها كوبا في وجهها.. راحت اكرام عيطت لريا ووخبرتها واش قال ريان..
اكرام: ريا عيط السي ريان و راه يقول بلي لازم تحضري الاجتماع مع وكالة عارضات الأزياء..
ريا: و علاش؟!.
اكرام: باسكو نتي مديرة المشروع و نتي الي تختاري و زيد تحطي الشروط الي حابتهم و لازم توقعي العقد مع العارضة و مع الشركة..
ريا: وي مي انا وكلت السي ريان باش يدير هذا الشي في بلاصتي..
اكرام: صح ريان مدير الشركة تاعنا مي مايقدرش يدير كلش وحدو حتى اذا وكلتيه هاذي خدمتك و الناس يحوسو يشوفوك باسكو الفضل في نجاح المشروع يرجع ليك نتي.. ريا انا معلباليش واش المشكل الي بينك و بين السي ريان و راني سور بلي كاينة حاجة مي وقت الخدمة ماندخلوش حياتنا الخاصة..
ريا: صحا دوك نروح..
اكرام: تعرفي الموقع؟ ولا نقول للشوفور يوصلك؟..
ريا: لالا نروح وحدي.. مي اذا تحبي قولي للشوفور يروح يجيب ماريا من ليكول لهنا و خليها معاك ربي يحفظك..
اكرام: اوك ماتخافيش عليها..
ريا: صحا باي...
اكرام: باي
بعد ماوصلت ريا للوكالة و دخلت وين ماتشوف قدامها تلقا بوبييات و قاع المعري اكثر ملمغطي معرفتش اذا راهي في وكالة أزياء و لا في دار دعارة مكانش وحدة لابسة كي الناس قاع ملوين خرق على رواحهم.. المهم و هيا داخلة تلاقات بالسي ريان و المدير عند المدخل رحب بيها المدير و استقبلها اما ريان فكان غايس فيها و في جمالها رغم الي كان كاين بنات تم مي كان يشوفها وحدها اما هيا فكانت لاهية مع مدير الوكالة و خونا ريان في عالم تاني..
مدير الوكالة: مرحبا بيك مدام ريا.. نورتي الوكالة..
ريا: شكرا..
المدير: شكرا الي قبلتي الدعوة تاعي و حضرتي نتمنى مانكونش سببتلك ازعاج ولا شغلتك على خدمتك مي حبيت تكوني حاضرة معانا في هاذي المناسبة السعيدة الي تعتبر نجاح جديد و ان شاء الله رح نواصلو في مشوار النجاحات..
ريا: ان شاء الله.. و دوك نقدرو نروحو نشوفو العارضات؟!.
المدير: وي تفضلي..
دخل المدير و ريا و ريان و راحو لقاعة كبيرة و فيها منصة كي شغل مسرح و بداو يدخلو العارضات او مطرق الشوا 😁 المهم تسدفو قاع شافتهم ريا و اختارت العارضة الأساسية.. بعد ما كملو راحو لقاعة الاجتماعات باش يوقعو على العقود..
المدير: تفضلو اقعدو..
قعدوا ريا و ريان مقابل بعضاهم و المدير في الكرسي الي على راس الطاولة.. عيط المدير للسكرتيرة بعد ماسقساهم واش يشربو..
المدير: سكرتيرة من فضلك جيبي 2 قهوة و كاس ما..
سكرتيرة: حاضر مسيو..
دخلت العارضة و قعدت حدا ريان و ريا تطلع و تهبط فيها من الفوق للتحت و مش فاهمة علاه راهي تحس هكا كون تقدر كون راهي تنهش فيها مي باي صفة دوك ماهي مرتو ماهي حبيبتو حتى لو نقولو ام بنتو هو مايعرفش بنتو يعني هيا معاه دروك على انها زميلة عمل و بس.. حاولت تتحكم في اعصابها و تكمل خدمتها.. بعد ماوقعو العقد و تفاهمو على الخدمة و حطو النقاط على الحروف كل واحد عرف مهمتو قررو يروحو للعشا هوما الاربعة.. ريا حاولت تعتذر على العشا باش تروح تشوف بنتها مي شدو فيها و ماخلاوهاش تروح .. راحت معاهم لمطعم فاخر مش الي جا يروحلو غي الي عندهم المال و الأملاك الي يعتبو بابو.. راحو للمطعم استقبلهم صاحب المطعم شخصيا و اتهلا فيهم.. وجدلهم قاعة خاصة ليهم و شاف خاص دارلهم لعشا..
بعد ماقعدو جا السارفور يدي الطلبات و ريا و المدير يتناقشو في أمور الخدمة اما ريان فكان قاعد و يشوف في المدير بشوفة ماتبشرش بالخير شوفت غل و غيرة و كره و كلش.. يعني ماتنساوش بلي ريان يحبها لحد الأن يعشقها و قادر يدير كلش على جالها.. اما هاذيك العارضة فكانت قاعدة قدام ريان و تحاول تتقرب منو و اي فرصة تجيها تستغلها و هو حاول يتقرب منها باش يشوف اذا ريا مزالها تحبو و تغير عليه ولالا و هيا دارت نفس الشي اما ولا واحد فيهم بين للاخر حقيقة مشاعرو.. حضر الأكل و بداو ياكلو حتا صونا تلفون ريا..
ريا: اسمحولي نجاوب على المكالمة و نرجع..
المدير: براحتك خذي وقتك..
ريان: معليش تكملي مكالماتك باسكو نظن رانا في عشاء عمل..
ريا: حاضر..
اما العارضة مقالت والو كانت تشوف بركص
خرجت ريا برا القاعة تلاقات بوحدة سارفوز دلتها وين كاين جنينة خرجت لتم و عيطت لمراد الي كان عيطلها كي كانت الداخل..
مراد: وي يا كلبة يا شاموتية هذا وين تتفكري خوك؟
ريا: وي يامكلوب اسمحلي راك عارف الشغالات و الخدمة و علابالكم انا مشهورة و قاع ماعنديش وقت و زيد ماريا.. بصح غي البارح هدرت معاك يا الكذاب..
مراد: امم علابالي.. المهم عيطت باش نقولك بلي رسلتلك صوالح و ملفات مهمين مع الطيارة الي رح توصل على 2 تاع الصباح روحي اديهم نتي و ماتخلي حتى واحد غيرك يديهم ولا يشوفهم..
ريا: اوك مي واش كاين..
مراد: مكاين والو ديري واش قتلك..و دروك بالسلامة.. حقا وين راكي كاين الحس قدامك..
ريا: اوك.. راني في عشاء عمل..
مراد: صحا كي تكملي روحي ديري واش قتلك و كي توصلي للدار عيطيلي ديجا توحشت ماريا..
ريا: اوك.. نحبك يامكلوب..
مراد: مام انا نحبك يامكلوبة..
ريا: علابالي.. و كوبات عليه..
بعد مادارت لقات ريان واقف وراها..
ريا: اووف خلعتني😠😒..
ريان: علاه راكي تشوفي فيا غول؟..
ريا: لا وحش.. المهم واش تسحق من عندي..
ريان: طولتي علابيها جيت نشوفلك مي نتي راكي تتمعشقي..
ريا: وي عندك مشكل؟!..
ريان: لا هيا راهم يستناونا..
ريا: اوك.. روح اسبقني دوك نجي..
ريان: اوك..
راح ريان ورا شجرة و قعد يشوف واش راح تدير زعما..
ريا: الو اكرام..
اكرام: وي الحب.. صفا ولا..
ريا: الحمد لله.. قوليلي كي راهي ماريا ياك مقالت والو؟ مابكات موالو..
اكرام: لا ماتخافيش عليها راهي غاية بصح..
ريا: واش بصحح😰 اهدري..
اكرام: بصح عندك بنوتة عسل تهبل ربي يخليهالك..
ريا: هكا يا الكلبة خلعتيني المهم علابالي بلي عندي بنتي شهدة عسل كي ماماها..
اكرام: صايي بركا ماتطلقي علينا في جياحتك...
ريا: اوك حقا رح نطول اليوم شوية اذا نعستي رقدي و رقدي ماريا ماتخليهاش تسهر..
اكرام: اوك باي..
ريا: باي..
بعد ماسمع ريان الحوار الي دار بين ريا و اكرام راحت داخل للقاعة و هو يتبسم وحدة بعد ماقعد لحقت ريا و قرروا ينوضو باسكو ريا قالتلهم عندها شغل وقتها كانت الساعة 12 تاع الليل.. خرجو المدير و العارضة باسكو عندهم شغل في الوكالة راهم يحضرو لعرض ازياء و يحضرو فيه شخصيات كبار و قاع يعني لازم يكون في القمة عليها راهم يتدربو ليل و نهار.. المهم بعد ماراحو خرجو ريان و ريا من المطعم راحت ريا في لوطوتها و هو في لوطوتو باسكو ماقبلتش يوصلها مي راح وراها متبعها بلا ماتفطن.. طبعا هة تاعها المطار الدولي جون أف كينيدي جنوب غرب مدينة نيويورك الي يبعد عليها حوالي ساعتين يعني بالتقدير مع 2 تاع الليل تكون تم (لبنات انا سرعت شوية باسكو من الجزائر لنيويورك 11 ساعة يعني رحلة مراد تقعد 11 ساعة مي انا رديتها 4 ساعات برك باش نتمشا شوية في لكرو و زيد المطار بعيد شوية معلباليش شحال من ساعة تسما نديرو على زهر ربي مايصرا والو..)
المهم قلعت كلي بصح رايحة نشوف واش راه يستناني و اووب في نص الطريق تحبسلي اللوطو حبست في بلاصة مقطوعة مكان والو تم و زيد بعيدة على لمدينة فيها غير قطاع الطرق و السكايرية و قاع.. عيطت لديباناج باه يجو يدو اللوطو يشوفولها و زيد نشوف كيفاه ندير..
هذا الكل صاري و السي ريان من ورانا يتبع و ريا لاخبر ..
ريان: زعما هاذي علاه تكون وقفت في هاذي لبلاصة واش جات تدير.. و زيد لبلاصة هاذي خطيرة و معمرة برجال المافيا و الي يبيعو المخدرات يادرا واش جيتي تديري يا ريا.. معليش نزيد نستنا شوية و نشوف واش يصرا..
ريا: اووف هاذو علاه طولو هكا راني خايفة يا ربي كون معايا..
هيا عاد ماكملتش هدرتها و تسمع صوت واحد من وراها و كان يبان سكران حيط يديه و حيط يجيبو مي قاوي و غازر قادر يديرلها كاش حاجة..
.........: واش بيبي واش تديري هنا ولا جيتي تشري🤔 ارواحي معايا كاين سلعة فالشباب 😉
ريا: ياربي مين طاح عليا هذا ياربي عاوني😰 وواش من سلعة راه يهدر عليها زعما يكون من المافيا و حاب يقتلني😰😱.. بصح معليش و الله نروح معاه و نشوف مانقدرش نصبر..
ريان: ياا شكون هذاك الي راه يهدر معاها 🤔😒 وين وين راهي رايحة هاذي الي يجي تروح معاه ولا كيفاه.. هذا هذا اليد ليمنى لرئيس عصابة نيتا ياربي باينة كشما رايح يديرلها من الاحسن اني نتبعو.. ديجا هكا مغاديش يعرفني..
.........: هيا معايا..
ريا: اوك😰😢..
راحت ريا و هيا مش عارفة الشي الي راه يستنا فيها..
عند اكرام:
كانو يتفرجو فيلم حتى نطقت ماريا..
ماريا: طاطا ماما علاه مجاتش😢
اكرام: عندها شغل حبيبتي ياك قالتلنا رح تجي روطار هيا نرقدو و غدوة صباح ان شاء الله كي تجي تشوفيها اوك..
ماريا: اوك طاطا اكرام تصبحي بخير ❤
اكرام: و بوستي وين راهي؟!..
ضحكت معاها ماريا و راحت باستها و طلعت لبيتها مي في نص الدروج حبست شافتها اكرام سقساتها..
اكرام: مالكي ماريا؟؟.
ماريا: ماما موالفة تقرالي قصة قبل مانرقد 🥺
اكرام: ههه هذا مكان..
ماريا: واه هذا مكان..
اكرام: ايا معايا نقرا قصة لبنتي الشابة..
ماريا: صحيتي طاطا..
طلعو اكرام و ماريا للبيت رقدتها اكرام في حضنها و قراتلها قصة.. بينما كملتها و هبطت راسها تشوف فيها لقاتها رقدت..
اكرام: هههه ياعمري عسل حر بقلاوة 😍😍ربي يحميك و يخليك لماماك و ليا❤❤
باستها و هودت لتحت وين كانو يتفرجو..
اكرام: اوف يا ريا وين راكي قلتيلي نعطل شوية برك ماشي قاع هكا😔..
عند مراد:
وصل مراد للمطار الدولي و نزل من الطيارة سقد صوالحو و دا باقاجو و قعد يحوس على ريا مكانش يحوس و يحوس واالو.. حسبها ما اهتمتش ولا بقا يعيطلها لقا تلفونها طافي لا حياة لمن تنادي.. و هنا بدا يخاف اكثر قعد يخمم كيفاه يدير حتى تفكر يعيطلها للفيكس..
مراد: الو ريا..
اكرام: الو وي شكون معايا..
مراد: نتي الي شكون ووين راهي ريا انطقي..
اكرام: و الله معلبالي من قبيلا نعيطلها ووالو ماهيش ترد..
مراد: صحا شكون نتي و قوليلي ماريا راهي تم؟!
اكرام: انا اكرام صحبت ريا.. وي ماريا راهي هنا هذا وين رقدتها..
مراد: معلبالكش وين راهي ريا..
اكرام: و الله معلبالي قبيلا كان عندها عشا عمل و بعد ماكملت عيطتلي قاتلي رقدي ماريا رح نطول شوية مي مقاتليش وين راحت..
مراد: اووف باينة كانت رايحة للمطار.. ياربي مايكون صرالها والو..
اكرام: مطار؟.. و علاه؟..
مراد: خلاص والو دوك نحوس عليها و اذا جات عيطيلي خبريني و ماتقولي والو لماريا..
اكرام: اوك مي شكون نتا؟..
مراد: انا خوها و كوبا..
ريا: اطلقني وين راك دايني..
ياربي كاش نهار نموت بسبت الفضول تاعي كون مابغيتش نعرف واش يدير كون ماصراليش هكا..
خبطها بكف و قعد يجرجر فيها من شعرها..
........: بلعي فمك ياك قتلك كاين سلعة فالشباب.. خلينا نستمتعو شوية..
ريا: بعدني يا الكلب مانحب على والو خليني نروح برك..
راكم تقولو وين راه ريان ياك كان لاحقها.. لبلاصة الي راحولها مسركلة بالرجال شغل المقر تاع مافيا نيتا.. يعني كانو بزاااف رجال و هو وحدو مي قدر يتخلص منهم قاع و بما انو هو يعرف الصغيرة و لكبيرة في هذا الخصوص قدر يعرف المداخل و المخارج و قدر يدير خطة محكمة باش يخرجو هو و ريا سالمين و بلا ماتنكشف هويتهم الحقيقية..
واخيرا وصل ريان للرواق الي كانت فيه البيت الي حبسو فيها ريا و هذاك الراجل معاها و كل مايجي يقربلها تصدو بكل قوتها حتى عيات و طاحت مغاشيا في الأرض..
راح هذاك الراجل خرج من هذيك البيت و ريان ميت بالخوف عليها مايقدرش يدخل و هوما مزالو لتم و مايقدرش يخليها في ذيك الحالة..
ريان:..........
زعما واش رح يصرا لريا و ريان؟..
وواش هي مهمة ريان في هذا العالم المظلم؟!..
كيفاش رح تكون علاقة ريا و ريان من بعد اليوم؟
ان شاء الله يعجبكم البارت.. علابالي راكم مخلطين مي مع الوقت تفهمو كلش..
بباي.. تصبحو على خير.. ❤❤❤
أنت تقرأ
آعطـنيـﮯ فرصـةّ ثـآنية.. 🖇❤(متوقفة حاليا)
Short Storyاعطيني فرصة ثانية 🖇❤... باللهجة الجزائرية.. ❤Ⓦⓐⓕⓐⓐ❤
