#قرارات_مُهمشه⏳
حلقه 25
"احمد..اسسس اسس شنو نفسخ كنك انتي راه نقرت فاتحتنا خلاص
دارين تبكي وتحكي بصوت عالي..كان نقرت يعني نقعد ساكته خلاص لعند امتى انت هكي امتى بتحس بس
حسين جاء يجري..كنكم شن في كنكم
احمد يقرب منها..دارين مش قصدي
حسين عقد حواجبه..شن ملبز انت
دارين تبكي..ترا خطاني ديما مش قصدك ديما هك انت بس خلاص حتى يوم فاتحتنا يوم الي قعدت حلالك
احمد تنهد وقعد يمسح بيديه علي شعره
عصام خش..كنكم شن في ليش صوتكم عالي كنك يادارين
دارين برمت تمسح في دموعها
احمد بحت فيها..احكي هيا قولي بنفسخ قولي هي
عصام عقد حواجبه وفنص..شنو بتفسخ كنك انتي توا خطرلك معش تبيه بعد قرينا فاتحه وعرس خلاص شن في عطيني سبب مقنع
حسين..شن لبزت انت
احمد قعد يحكي
"قبل دقايق بعد خشت عليه دارين بعد خشت
احمد يحكي ويضحك..منور ياغالي تسلم والله
لا سلامتك الله يبارك فيك يا سي لا ولا يهمك مع سلامه
صكر وبرم بحت في دارين
دارين رافعه حاجبها..كنك ماكملت مكالمتك اصلاً انا مش قاعده ماتشوفش فيا
احمد..لانقنك زعاله يادارين راجل يحكي عاد نصكر عليه
دارين..اه لا عيب كيف عاد الكلبه تراجي مافيش مشكله اصلاً تحمل ماتحكيش شي هيا مش هكي
احمد فنص وحط صوابعه علي حواجبه يمشي فيهن بيش ماترقلش..حبيبي تعالي قربي اليوم فاتحتنا الف مبروك
دارين خنقتها العبره..هذا وين خطرلك تعبرني مقريه راه من ساعه 4 وشوف توا ساعه 10
احمد صبى بعصبيه..ازف مافضتيش بكل شباب متعرمين عليا مالقيتش وقت بعدين فاتحتك بروحك هيا ولا شنو حتى انا فاتحتي كان رنيتي شن بيصيرلك
دارين دموعها ينزلن..تمام باه
برمت فتحت الباب وطلعت احمد مسكها من مرفقها بعصبيه وضاغط علي سنونه..نحكي معاك فكيني من الجو ازف خلينا رايقين
دارين تبكي..لا صاح اصلي نكد عليك يااحمد حول ايدك وسيبني في حالي معش نبيك
احمد..شنو لعبه هيا لعبه عندك
دارين فكت ايدها وطلعت لجنان تجري...."
"عصام بعصبيه..شنو القطاف الي تعاركو عليه انتم انقنكم فروخ وانا الغلطان الي توسطت بيش يطلع عرسكم
وانتي ياانسه لعب هوا توا خطرلك احمد مش مناسب لكي وبتفسخي ولا شنو
دارين تبحت في جيها لأخرى وتهز في كراعها
عصام بعصبيه..نحكي معاك انا ولا نقولك حاجه كذا انتلفي معش توريني وجك ماهوش لعب الجواز ترا طلعو عرسكم وقتها نحرقو انتم الاثنين تكملو ولا طلقو
حسين ماسك عصام..خلاص ياراجل هي اطلع
احمد يفنص فيه..باهي خلاص فهمنا
عصام برم هوا وحسين طلعو
احمد يبحت فيها
دارين وهيا خانقتها العبره..خطاني انت لأخرى
وجت بتمشي احمد كر ايدها بقوه لين خبطت فيه ولف ايديه عليها وهيا تبكي
احمد يمشي بيها لجيها ثانيه..اششش خلاص اسف متزعليش
دارين تبكي وحاطه وجها في صدره
احمد مبتسم ويبحت فيها..خلاص معقوله هكي يوم فاتحتنا تبكي خلاص اسف ياعمري
دارين بنفس وضع مزالت احمد طبس علي راسها وباسها وهيا بدت تهدا وخر بيها عند ماده زرع وقمعز بيها وهيا قعدت تمسح في خشمها وعيونها
