مغتربه في ظل اليتم

البارت الثامن والعشرون

هلو مساء العسل على عيون بنوتاتي الحلوات
خواتي وصديقاتي ومتابعاتي الحبيبات
مساء الورد على عيونكم الحلوات احبتي❤️🌹😘
ونبدي البارت بسم الله ولاتنسون تعليقاتكم الحلوه لان رقيه وابرار موجودات وياكم

البارت الثامن والعشرون
بقلمي...
زهراء الشمري 🌿

#انا بيه حزن يترس فطور الكاع
ونواعير العيون تصير من #تدمع
وبيه بالكلب شوف شكثر ونات
يذوب الصخر كونه بونتي #يسمع
وانه فوك المتون محمل هموم
الجبل لو شالها من الكاع اظن #يقلع
لاتغرك ضحكتي من اضحك وياك
الجمر محروك وكبالك يظل #يلمع
خلص عمري بغرب يم اليكرهون
ومااظن #العمر لو راح هم #يرجع💔 ـ🥀

............... ................
رقيه....حسيت گلبي يريد يوگف حلگي يبس گمت اتلعثم بالكلام ابوي شك عندي شي
اخذ التلفون بالقوه مني اني خايفه متوتره على اي ثانيه يتصل صادق
التلفون بيد ابوي ودگ اني يبست بمكاني
علي ابو رقيه.... هاي مكتوبه عليهه تكيه منين هاي
رقيه... وجهي گام ينطي الوان صرت صفره ماعرفت اجاوب صديقتي من الحله انطيني خل اجاوبهه
علي... جاوبيهه يمي اريد التلفون وبسرعه مو تظلين تسولفين
رقيه... حسيت بگلبي يريد يطلع من مكانه فتحت خط وحاولت ابينله اكو احد يمي
الو تكيه شلونج بلكي يفهم اكو احد يمي
الو
الو
علي..... ها شو بس الو
رقيه.... يمكن ماكو شبكه الخط مفتوح بس صادق ما حجه افتهم وسمع صوت ابوي
علي.... ارجعي خابريهه
رقيه... ابوي حسيته شك بشيء الخوف والتوتر يقره
الف جسمي كله يرجف بگلبي ادعي يارب مايفتح
خط والله يذبحوني اتصلت انفتح خط واني حيلي نهد
الو
تبارك.... الو هلو حبي شلونج
رقيه... حياتي الحمد الله اسأل عليج اتفاجأت تبارك ردت على تلفون صادق سديت المايك وظليت احجي وياهه ابوي اطمئن انو هاي صديقتي
تبارك... حبي اگدر احجي براحتي
رقيه... اي حبي گولي
تبارك... من اتصل صادق افتهم من كلتيله الو تكيه
افتهم احد يمج گلي انتي جاوبي
وهسه حيل قلق عليج
صاير شي وياج
رقيه... هواي اشياء بس الله كريم
جنت ما أگدر احجي لان كلهه يمي سديت التلفون
ورجع اخذ التلفون مني ابوي اتصل بي جان ماعنده
رصيد
حيل خفت وتوترت اصعب موقف مر عليه
اني عند اهلي ما أگدر اتصل بي بقيت اسبوع ما سامعه صوته الليل كله ابجي تعودت علي تعلقت بي مثل الطفل من يتعلق بأمه ملك كل جوارحي
احس الهوى مگطوع عني مو صوته ظلينه بس بالرسايل
بس الرسايل متكفي
مر شهر الثاني من العطله وبيوم ظهريه دزلي رساله
صادق.... حبي باوعيلي من الشباك الفوگ اني
أگبال بيتكم مو مشتاقه تشوفيني
رقيه... عزه هذا صدگ يحجي مخبل عاقل بهل الظهريه شجابه من الحله الكربله
صعدت بالطابق الثاني رفعت البرده جان الشباك
الجام مالته مظلل اني اشوفه بس هو ميشوفني
شفته حسيت گلبي يريد يطلع من مكانه من الفرحه
أبدي اروح اركض علي واشم ريحة عطره
يالله شگد مشتاقتله دزيتله رساله
حبيبي فدوه اروح لطولك سمنان حبيبي
صادق... شمام گلبي اي انتي تشوفيني واني باقي بحسرت شوفتج
راح اروح ازور وارجع للحله
رقيه.... احساس ممزوج فرحه على اشتياق على ظوجه على حنين كلهن نجمعن لشوفة صادق
ليش لهل درجه تعلقت بي وليش بعد ما اشوف غيره
صادق.... رحت زرت وصليت بحظرة الأمام الحسين وأول مره اطلب من الأمام بنيه صافيه واول مره دمعتي تنزل
دعيت الله يجمعني بيهه بالحلال لان حبي الهه نضيف
رقيه... دزيتله رساله بالي يمه والحمد الله وصل للحله
علي ابو رقيه.... بسمه تدرين ابو الاسواق شگلي
بسمه.... خير شگلك
علي.... يگول جاي ولد شاب علي للأسواق وسائل علينه وعلى سمعتنه
رقيه.... صار عندي ردت فعل لان اليوم صادق موجود بالمنطقه معقوله هو سئل على اهلي
مر اسبوع العطله بقالهه اسبوعين ونداوم مرحله جديده وصادق ما فاتح موظوع الزواج وي اهله
علي ابو رقيه... بابا رقيه تعاي عندي وياج موظوع
رقيه... اي بابا گول؟
علي... بابا اكو ولد شاب معلم وياي تعين جديد يدور على مره وسمع عندي بنيه ويريد يتقدملج
رقيه... لا بابا فدوه اني مو گلتلك اريد اكمل دراسه
ما مفكره بزواج بعد وكت
علي.... والله يابويه تخسرين حرامات شاب مرتب وابن عائله وبيت وحدج ومتعين الولد جا البنيه شتريد احسن من هيج قسمه وانتي مابقالج هسه راح تبلشين ثالث
رقيه.... عفيه ما اريد ولا مفكره ولا راح افكر
ظل ابوي يلح عليه لان ولد عمتي رفظتهم وكلما احد يتقدملي ارفض ابوي حيل ضاج
بده موظوع الزواج يظايقني وصادق بالشهر مره بس اسلم علي واسده ما اگدر اخابره وافهمه
جنت ادزله رسايل
هو قلقل عليه
خلصت العطله وباجر اول يوم دوام مرحله جديده
فرحانه راح اشوف صادق صار ٣اشهر ما ملتقين
داومت وصلت للجامعه خابرته واگفلي اباب الكراج مال الجامعه
لمحت طوله من شباك السياره ابدي اذب نفسي
من السياره واوصله
جان تفتيش والخطوط كلمن سراه وسيارتنه اخر سياره
گلبي يدگ سريع احس بدگات گلبي كلما تقصر المسافه بيني وبينه يجيني احساس وشعور غريب
بطني دگوم توجعني الاشتياق يزيد لهفتي لشوفته تكبر نزلت من الخط رحت امشي سريع
وصلت يمه
افيييييييش ياريحة عطره هسه رجعت روحي لجسمي مشتاقتلك بگد الدنيا
صادق... شميم گلبي اروحلج فدوه والعباس ابو فاظل مشتاقلج گد رحمة الله وهاي ال٣اشهر عبالك
٣اسنين مرن عليه
رقيه.... رحنه نمشي ونسولف وصلنه للكليه سلمت على صديقاتي مشتاقتلهن حيل رشا ودعاء
بدينه ندخل محاظرات وبده شلعان الگلب كل يوميه كوز
وبيوم من الايام دز على صادق مقرر القسم
الاستاذ... اسمعني بابا صادق انته من الطلاب المميزين والخلوقين واظوج من اسمع واحد يشكي منك
وكذلك الطالبه رقيه هم من الطالبات المميزات والخلوقات واكو استاذ قدم شكوه عليك
صادق.... ليش استاذ اني شمسوي
الاستاذ... يگول بمحاظرته متحترمه وبس تسولف وياهه
صادق... ستاذ قسم بالله هذا الكلام مو صحيح اصلآ هو اول ميدخل للقاعه يفرقنه يغير مكاناتنه واني عرفت منو الاستاذ لان بس هو يظوج مني
استاذ الله يشهد على كلامي علاقتي برقيه مو علاقه عابره علاقتي بيهه زواج اني مو صغير مواليد ٨٩تره
وعيب عليه اظحك على بنات العالم ومستحيل اسيء الأدب بمحاظره من محاظرات الكليه
الاستاذ.... بارك الله بيك بابا انته كل الاساتذه اشادو بأخلاقك بس لازم انطيكم انذار
رقيه.... رجع صادق للقاعه ظايج مخنوگ عيونه
يجدحن نار ياربي شبي
حبيبي شراد منك مقرر القسم
صادق.... هيج شغله بسيطه علمود الملازم ما اريد اگللهه لان بس تعرف تنقهر وتبجي
ظليت افكر اني لازم احرك نفسي وافتح الموظوع وي اهلي
رقيه.... اذا ماكو شي شبيك مخلصهه صفنات راح تخلص الاستراحه واحنه ما ماكلين لگمه تره اني بلا ريوگ
صادق.... ماظل وقت راح اني اجيب لفات وعصاير ونتريگ بالقاعه
رقيه... استغربت وظعه مو طبيعي من رجع من الاستاذ لهسه اخذ احمد وراحو للكافتريا
احمد.... شبيك صادق شو من رجعت من مقرر القسم وانته مو على بعظك
صادق... والله ياخويه طالعه الدنيا من عيني
الاساتذه بدو يحجون بعلاقتي وي رقيه وانه والحسين احبهه صدگ مو لعبه
والطلاب هم كلهه تدري بعلاقتنه لان دائماً سويه
وما اريد احد يحجي عليهه وما اريد احد يجيب سمعتهه بسببي
احمد.... زين اخطبهه ومن تتخرجون ازوجو
صادق... هي هاي المشكله حاجيت اهلي بدون ماتدري رقيه وميقبلون يگلولي وين نعرفهه منين
ولازم يزوجون اخوي جعفر الجبير وكل ساع يطلعولي
سبب
وانه حاير وهي جاي يتقدمولهه هواي وخاف ابوهه يزوجهه
رقيه.... جاب صادق لفات وعصاير تريكنه دخلنه محاظره كملنه وبقت عدنه ساعه رحنه گعدنه بالنادي الطلابي
وفتحت ويا موظوع الزواج
حبيبي احنه بقت النه بعد بس سنه ونخلص يمته تخطي خطوه
صادق... اني هذا الموظوع مدوخني وحاير شسوي اهلي الا يزوجون جعفر يالله مايقبلون
رقيه.... واني شلون ابوي دا يظغط عليه بموظوع الزواج وهل مره اذا عمتي فتحت موظوع ابوي بدون نقاش يوافق واني خايفه
بدن دموعي ينزلن بجيت
گلبي انقبض اختنگت صادق اني ما أگدر اعيش بدونك مستحيل والنبي اموت نفسي
٣سنوات تعرف شنو يعني ٣سنوات
صادق... بس لا تبجين وتمردين گلبي فدوه اروحلج
اليوم احجي وي اهلي وارجع افتح موظوع من جديد
راح اتصل على تبارك خل تجي بلكي من تسمعين حجيهه تهدين
رقيه... هو يسولف واني اباوع علي وابجي الخوف سيطر عليه خاف اخسره
من جهه ابوي ومن جهه اهله رافظين موظوع زواجنه
شويه واجت تبارك
تبارك.... ها يعمري شبيج ليش تبجين
صادق... فدوه سكتيهه تره والحسين گلبي خلص فوگ الظيم وراسي ماظل بي عقل من التفكير
وهي تبجي گدامي دمرتني بزايد
تبارك... اي غير اعرف شبيهه متعاركين صاير شي
رقيه.... ابجي مخنوكه تكيه اني بدون صادق والله ما اعيش اموت اهلج ليش رافضين يعني جعفر ما ازوج شلون
تبارك.... حقج والله شنسوي والله العطله كله هو يحجي وياهم وميفيد قافلين على الموظوع تره صادق هم متأذي مثلج
واليوم اني وياه نگعد وي امي بلكي الله يهديهه
خلصنه دوام ورجعنه للبيت وصادق هموم الدنيا كلهه شايلهه
ما أگدر اشوف اخوي هيج يتعذب واسكت
ماعندي غيرهم بس هو وجعفر رحت لأمي وصحت صادق
يمه صادق يحبهه لرقيه فدوه بس نخطبهه البنيه متقدملهه ابن عمتهه وخايفه خاف ابوهه ينطيهه
ام صادق... خل ينطيهه اني گايلتلهه حبي ابني
بيمن ازوجه بگملاته بعده طالب منين يصرف عليهه
رقيه.... گلبي نار لزمت ختمة قرأن گلولي تقرين سورة محمد وتخلين بيهه مبلغ من المال وتنذرين اذا عبرت السنه وصار من نصيبج فلان تذبين بموسى ابن جعفر مبلغ من مهرج الخاص واني نذرت اذب ٢٥الف بس الله يجمعني بصادق ظليت كل جمعه اقره سورة محمد
منتظره على نار يارب اهله يقبلون حتى لو بس خطوبه
من التوتر خابرت ابرار ادري بيهه ملتهيه بفاتحة السيد بس محتاجتهه
الو
ابرار... الو بصوت خافت تعبان مقهوره هلو رقيه
رقيه... شلونج حبي بالي يمج شو تعبانه
أبرار... والله مقهوره حيل على السيد الله يرحمه ومقهوره على منقذ حيل متأثر صديقه المقرب
انتي طمنيني اخبارج
رقيه... اني هم تعبانه ومهمومه وخايفه
رقيه... سوده عليه ياخيه هو هذا الحب بس شلعان گلب الحب النظيف مايجي بساهل خلي عينج بعين الله
سديت التلفون منهه واني احس بيهه شتحس لان مريت بهاي الفتره واحس واعرف
ظليت قلقه واني منا نفسيتي تعبانه ظايجه على العلويه ظلت بلا معين وبعدهه صغيره
مرن٣ ايام على الفاتحه عبالك واحد من اهلنه
حلكنه مر الزاد ماطب بمعدتنه والماي من نشربه
حنضل نستحي نخلي اللكمه بحلگنه والعلويه مفجوعه
نباوع عله بيتهم اضلم ومسدود گلوبنه تنمرد عليهم
هذا البيت اليظوي وصوت السيد الجان تارس الشارع يمر الليل علينه مانكدر أنام
السيد جان بمثابة اخ واكثر من اخ
منقذ... أبرار ليش الزين والانسان الطيب والخلوق يروح تدرين شجان يسوي السيد من نرجع من
لمدرسة الطلاب الي بالهور خطيه كلهم يرجعون مشي لهلهم وهو جان ينقهر عليهم مسافه بعيده يترس السيارة مالته طلاب ويوصلهم كل واحد لباب بيت أهلهم و احنه المعلمين نبقه نحجي عليه
انكله إذا وكع واحد بيهم لو صار بي شي شيخلصك
لناس لهناك عشاير صعبين اذا طخيت واحد يگاوموك
طلايب يعني حته إذا انته مسويلهم زين وفضل إذا صار اببنه شي يسوون بيك فلك يكلولك من گلك صعده بالسياره احنه كايليك...
السيد الله يرحمه جان مايسمع من عدنه يرد
يكول خطيه يمشون هاي المسافة كلهه بحدود الخمسة كيلو خطيه الشمس تسگعهم وانه عندي سياره ليش ما اكسب ثواب بيهم. هذا موقف من
مواقفه جان انسان ماينوصف

منقذ حزن عليه حزن مو طبيعي لبس حتى اسود علي
الأسود مانزعه لحيته ابد مازينهه شطولهه صارت
يكلك اخو الميت مو صديقه
وهو صدك اخو دنيه جان ما مخلينه بحاجة شي
شايل همنه وسر بيتنه عنده
واني حالي مو احسن منه وره الفاتحه بفتره
رجعت العلويه لبيتهه بس شنو حاله يصعب عله
الكافر ترملت بعز شبابهه وعافلهه ولد وبنيه مسؤليه عمهه وعمتهه ماعافوهه كعدو وياهه
صار الأربعين والمعلمين اخذو سيارات مو بس مدرسة السيد لمدارس لقريبه عليهه كلهن الناس كلهه تحبه وتمدح بأخلاقه
وراح منقذ وياهم لابس اسود حزين مكسور
رجع منتهي يكول ماجنت اصور اروحله لكبره وازوره
اني مافاركت العلويه ابد كل يوميه يمهه وامرلهه..
خاف تحتاج شي علمود البيت مايخله عليهه اواسيهه اخذ منهه الجهال اخليهم يمي
مرن عله وفاة السيد ٣اشهر
ابني الصغير كيان صار عمره ٥اشهر
استمرت حياتنه بين البيت ومسؤولية الجهال
وارضع ابني احسن من عباس بقه عله صدري يرضع ماعاف صدري..
وضعي هوه هوه ماتغير العيال نفسهم ماتغيرو
لايجوني ولايطبون عليه يحقدون عليه عبالك عدوتهم مو جنتهم وبنت اخوهم
وبيت جدي وابوي نفس الشي ما اعرف اخبارهم
لايسألون ولا يگولون عدنه بنيه ماتت عاشت محتاجه مذلوله ابد
واني هم مافكر بيهم بعد عدي خالاتي مامقصرات وياي ما عايفاتني دائماً يخابرن ويسئلن عليه
وعلى جهالي وبين فتره وفتره تجيني خالتي ام غفران ابد ماعافتني صارت هي ابدال امي وبيبيتي
تجيني خطيه محمله تحمل محتاره شجيب وحتى مصرف ادزلي
خالتي بسمه هم جانت ادزلي بيدهه وكوثر وصالح
يدزون احتياجاتي ومصرف اليه ولجهالي ماعافوني ولا نسوني ما خلوني معتازه لأحد
واني ورقيه دائنآ على اتصال صدگ الأخت الماجابتهه امي تبجي على بجيتي وانه ازعل على زعلهه
احس الحليب الشربته وياهه مملوح ومغزر بينه اثنينه بسمه صارت امي وامهه
دائمآ بالي يمه وبيوم اتصلت عليهه تحجي وياي وتشهگ وتبجي
الو
رقيه... بصوت حزين مقهور مخنوگ أبرار والله اموت
ما أگدر اعيش بدونه شلون اكمل حياتي بلياه
ابرار.... على كيفج فهميني شبيج شصاير
رقيه... ولج ابرار صادق صادق ياربي..... يتبع🌿🌿🌿