مغتربه في ظل اليتم

البارت السادس

البارت السادس
بقلم....
  زهراء الشمري
  من بطن امي ما كاعد الحظ وياي
  مدري شطالبتني الدنيا شو متعوب..
   لاطاعن بواحد لا مزعل انسان
  لابايع الصاحب لا مخشن أكلوب..
  ومن كد طيبتي يسموني المغلوب
أبرار... هنا اني نهاريت شفت بيبي بالكاع والكاع تجوي والعالم التمت عليه عفتهه ورحت اركض على الطبيب كتله تعال وياي بيبيتي مدري شبيهه وكعت بالشارع فدوه عمو تعال وياي شوفهه قبل لا توكع بيبي حجة حجايه جنهه حست تريد تموت عطشت وجان اكو حب مال مي شربت منه وكلتلي ابرار يمه كلمن يرجع لهله بالتالي ربني وانه وليد اهلي اجه الطبيب شافهه واني شابكتهه وابجي بيبي كعدي وين عايفتني بيبي المن تخليني راح اضيع اكعدي اكو رجال جان واكف جيران بيت خالي يعرفني جان المكان قريب عليهم اخذني الهم وبيبي  مقبلو يشيلوهه الا تجي الشرطه وره ساعه اخذوهه للمستشفى
بسمه... بقت امي يوم كامل بالمستشفى ماقبلو يسلموهه الا يشرحوهه شرحوهه وطلع عدهه سكته قلبيه بيومهه اجتني اختي ام غفران تصرخ كلتلهه خيه شبيج هديتي حيلي
ام غفران... ولج خيه لحكيلي راحت امنه ولج ماتت بشارع الحجيه فدعه
بسمه... لطمت على وجهي شلعت شعري صرخت صرخت احس جمره بكلبي متنطفي ما جاي استوعب امي ماتت جانت ام ابرار ستوهه سنه مالتهه طالعه بعدهه جمرتهه بكلبي حتى الاسود ما ذابينه رحنه لكربله لكينه جنازة امي بالبيت منتظريني اني وخواتي جانت امي كاتبه بوصيتهه اني اغسلهه رحت وياهه جنت ما ادري بيهه مشرحينهه طبيت اغسلهه شفت صدرهه مفتوح لحد بطنهه تخبلت رأسن فقدت الوعي وطلعوني
علي... فاتحة عمتي تنصب ابيتي اني ابنهه واني اقوم بعزاهه
أبرار... رحنه لبيت خاله بسمه خالاتي ونسوان خوالي كل كرايبنه اجوي ونصبو فاتحه لزلم ٣ ايام بجي ولطم وصريخ اباوع على خالاتي وابجي على بجيتهن يباوعن عليه النسوان يكولن خطيه وين راح تروح راح تتبهذل خلصت الفاتحه رجعت لكربله وي خالتي ام غفران جنت خايفه عايشه بقلق خاف ابوي يجي وياخذني مشت الايام واجت المدرسه صرت بصف الخامس هنا صار حنين ابوي وكام يسأل عليه وكل فتره يودي ناس اريد بنتي
عذيب... ام غفران اني اريد بنتي قبل ساكت وماطالبت بيهه لخاطر الحجيه هسه ما اكدر اخليهه يمج اريدهه واني راح ادللهه
أبرار.... بهذه الفتره ابوي طلع تقاعد وفتح مشروع لان جان عنده فلوس خير من الله اخذني من خالتي لان مابيدهه شي بابا صالح ماقبل ينطيني وابوي تعارك وياه بس بعد مابيده شي كلي عذريني بابا لوبيدي ما انطيج بس ابوج المحكمه وياه
عذيب... تعاي بابا ادللج واونسج واشتريلج ملابس وحلويات
ابرار.... اول ايام جان يموت عليه لان وحيدته ماعنده جهال بس اني يطلعني ويشتريلي وصه مرته تشتريلي واداريني جانت تكرهني بس مجبوره تتحملني جنت وياهم احجي حجي بغداد وهمه حجيهم جنوب جنت اصيحلهه كله باجي ضليت عشر ايام مدللني حتى للمحل وياه ياخذني جان ياخذني لبيت جدي بيت جبير وهوسه جهال وعمامي كلهم وعماتي جان جدي متدين حيل يكعدني بحظنه ويداريني جان رجال جبير بالعمر والجهال تغار مني
عذيب... بابا ابرار حبيبتي انتي ليش تسمين روطه باجي اني ما اقبل تسميهه باجي هي مثل امج وماعدهه جهال بعد سميهه ماما
ابرار... مو اني بكربله متعلمه اكول باجي
عذيب... لا بابا منا وهيج سميهه ماما واني اخليهه ادللج اسويج ملكه ماعدنه غيرج
أبرار... بده الدوام ورحت للمدرسه اريد اداوم كلولي ميصير اداومين ماكو نقل راد بكل صوره ينقلني ماكدر حاول جاب واسطه ماكدر كلوله لو قبل نص السنه جا نقلناها بس وره نص السنه ماكو فاتني هوايه دروس بهذا الوقت صار امام الامر الواقع يرجعني لخالتي علمود المدرسه بس المصيبه بده يتغير مو مثل قبل لهفته وحبه اليه من راد يرجعني ماقبل هو يرجعني دزني بيد واحد من معارفنه الرجال يطلع من الفجر والكراج جان قريب على القضاء هو حتى هاي ما كلف نفسه يكعد علمودي وداني للناس من الليل والناس غربه خايفه وارجف ما اعرفهم ولا شايفتهم دخلوني بغرفه ضلمه نوموني خلصت الليل كله ابجي من الخوف طلعنه الفجر طلعت فرحانه حسيت كلبي يريد يوكف من الفرح لان ما طلع النقل ورجعت لكربله ذكرياتي وشميت ريحت امي وبيبي بيهه وبيتنه تمنيت بعد ما ارجع رجعتلي طفولتي هو عود مسوي فضل انطاني الكروه شافتني خالتي فرحت بيه
ام غفران.... هله خاله هله بنت الغاليه تعاي خل اشبكج ليش خاله وحدج ابوج ميخاف عليج يدزج بيد رجال غريب شلون يأمن وانتي بعدج جاهل عمرج ١٠ سنوات من محافظه لمحافظه شلون امن عليج
أبرار...رجعت للمدرسه جنت حيل فرحانه بس جانت هواي دروس فايتتني واني جنت حيل احب الدراسه وشاطره امي تعبت على دراستي المعلمات يعرفن امي و وضعي اتساهلن وياي كامن يشرحلي الدروس الفاتتني
صالح...سمعت بيهه رجعت حيل فرحت اخذت كوثر ورحت اشتريتلهه ملابس ومستلزمات مدرسيه شافتني شبكتني بوستني فرحت من شافتني
أبرار... جنت فرحانه ادرس وبنت خالتي ادرسني وخالتي مدللتني ماقصرت وياي خلصت السنه ونجحت دز ابوي خبر لخالتي رديلي بنتي اني ما اجيهه انتي اجيبيهه وكل اوراقهه ماعدجن بعد حجه ضجت وبجيت مااريد ارجع سمع بابا صالح ضاج خابر خالتي كلهه جيبيهه لبغداد اطلعهه واونسهه واسويلهه عيد ميلاد اخذتني تونست واخذنه صوره تذكاريه سولي نسخه كلولي كلما تشتاقيلنه تشوفينه جنت اتمنى ما ارجع لان ابوي اتغير عليه ومرته خبيثه تخبث عليه غيرت ابوي رجع مايهتملي مو مثل اول ايام جانت من النوع هواي تطلع متثبت للبيت مثل الدلاله تمنيت ما ارجع بعد الهم ما اريد كلشي بس جنت اتمنى ابقى يم خالتي بكربله اجه اليوم الاسود الي لازم ارجع بي لأبوي ومرت ابوي
أم غفران.... اجيت للمحل لعذيب كتله هاي بنتك سالمه غانمه الامانه رجعتهه الك ولو متستاهلهه
أبرار.... جان واحد من عمامي يمه كله لخالتي اي خل تشبع يم ابوهه لحم بتنه ميته من الجوع على اساس همه سائلين عليه لو معترفين بيه وهمه سؤال ميسئلون
عذيب.... اي وديهه للبيت وديهه لمرتي
ام غفران.... جنت مظطره لخاطر هاي الطفله اخذتهه للبيت جبت الطريق كله ابجي اباوع على هاي اليتيمه وابجي اكول شراح تلعب بيج الدنيا رحت دكيت الباب
روطه.... ياهو ياهو الجاينه ها ام غفران هله هله بيج تفظلي
ام غفران... لا رحمه الله والديج ما ادخل هاي الامانه وهسه انه اخليهه امانه يمج وبركبتج هاي يتيمه احسبيهه مثل بنتج
أبرار... طبيت وريتني متت بهذا اليوم ولا رجعت الهم دخلت للطرمه جان تكلي اسمعي تره مو مثل ذيج جيتج مو حسبالج تسرحين وتمرحين بكيفج كلشي تغير ماكو دلال بعد وابوج اليه وبس🌿🌿🌿يتبع