ميقات

الثالث والاربعون

تكول حامل وطارحه بس هذا الفهمته

صارت ب 5وسمعنه الباب انفتح ونسد اني توني غفيت كعدت والكا محمد عيونه مورمه وهو فات راستن كعد بالكاع وبقه يصرخ يا يمه ليش عفتينه ورحتي. اني اريد اوكف على حيلي ما اكدر بقه يلطم مثل لطم النسوان حتى قميصه شكه

فرفح خطية ساعه كامله هو على هلحال النوب محد عدنه اجيت كعدت اسكته كال حوري امي ماتت عافتنه وراحت امي ما لحكنه عليها بالطريق وماتت سكته قلبية راحت من ادينه  اني بقت دموعي تصب ويا

. طول الساعه الي كاعد بيها محمد تليفونه ما سكت طلعته من جيبة ميقات يتصل شلته واطيته لابرار ما طايقه اسمع صوته اصلا. اجت كالت ميقات بالمستشفى يريد المستمسكات الي دزاك علمودهن. يريد يكمل الاجراءات

محمد نحجي ماكو مو يمنه فاتت ابرار دورت المستمسكات بغرفة عمتي
وخابرت سلوان وابوها
كلتلهم ترة ميقات وحدة بالمستشفى مرو من الباب اخذو المستمسكات وروحولة خطية والله اقل نص ساعه اجوو. من الباب
رادو ياخذوهن وكلتلهم محمد راح يموت نفسة كوة كومو وغسلوله ولبسو غير القميص الشكه  واخذو وراحو

ابرار خابرت خالتها كرايبهم كلها. ردت اصعد ما اكدر احس بثكل كلش

نخيت ابرار تصعد تجيبلي موبايلي من فوك والله صعدت جابته واخذته اول ما  خابرت امي نرعبت كالت شعجب هلوقت مخابرة صاير شي عليج بيج شي  سولفتلها ع الصار كالت هسا راح اكول لبوج ونجي
يمه ترة ما عندي ثوب اسود عريض العندي كلهن ما يفوتن بيه هسا
خوش امر على السوك واجيبلج وياي
بس سديته من امي فاتت مارلين ومزن ونضال وجود جاي تروح تتلكاهن وكلتلها مو هسا لا يصير بالبنيه شي خلي تجر نفس

كوة سانداتها فوتتها مزن لغرفة واجت تركض ابرار ع امها كالتلها خالتي فوزية اجتها سكته قلبيه وماتت بقت تصرخ وتلطم ومارلين درت عياطهن ملة البيت والله ل 9بدت الكرايب تلتم اجن اخوات عمتي ونسوان اخوها واخوانها. بدت الجوارين تتجمع برة والنسوان يجن
راستن نضال واخواتها ومزن ومارلين راحن كالن راح يغسلونها بالمغيسل
شويه واجت امي فتنه على الغرفة شصاير. شلون ماتت المرة يمه بعدين احجيلج السالفه طويلة جبتيلي ثوب اي
هاج هذا ثوب الاء رحت لسوك محد مفتح دنيا الصبح البسي هذا واني اجيبلج من اجي باجر
لبسته وجايبتلي شال وياها اجه عليه فيت مع العلم الاء اطول واسمن بس شلته بطني خلينه وطلعنه من الغرفة

لهناك ونسمع كالو جابو المرحومه سون طريق فوتوها ميقات ومحمد ورجل خالتهم وجود
وكعد محمد يم التابوت
ولج يمه اجيت بتابوت لبيتج
يمه يعني صدك هيج وانتهت بعد ما اشوفج الصبح ولج يمه اكعدي والله راضي شتحجين احجي بس اطلعي من التابوت ما يلوكلج يمه خلافج اضيع ومارلين وميقات يكسرون الخاطر وضعهم ما ينحسدون عليه
مارلين كتلت نفسها حتى فتحت التابوت بقت تلطم على وجهه لحد ما اغمه عليها
اخر شي فات رجل خالتهم يله يابة الي تريد تروح تطلع هم يله ورانه طريق
خالات ميقات و2من نسوان اخوها ومارلين ومزن وميقات ومحمد ونسوان ما اعرفهن من كرايبهم
بس خالهم ما قبل اثنينهم يرحون علمود الناس بقه محمد. اني محد كاسر خاطري غير محمد فعلا ما يستاهل يوم مو زين يستاهل كل خير الله يبرد كلبة ويجبر بخاطرة ويهديهم ع بعض