دارت الدنيا لتدق طبول قلبي

بارت 16

#دارت_الدنيا_لتدق_طبول_قلبي
#جذبني_فمك_البني٢
#البارت_السادس_عشر
#بقلم_عبير_ادريس

حرت من وادعتني اتشاهد اشتاك...

_________

صفنت بوجها ماتصورت راح انسأل هذا السؤال وعلى صعب بالذات ماتوقعتها شلون عرف اكيد شاف البلاغ من اجه او احتمال دزوله صوره  ..

انتبهلي فرد جسمه برخاوة وعبر من يمي للجهه الثانية كعد على الكرسي واشرلي بأيديه اكعد وكال..

ضيغم : كعدي سالفتنا مطولة احداث مال سنة اريدج تلخصيها من المهم للأهم ...

مشيت اخذت الكرسي كعدت على جهته اليمنى ماكدرت اكعد كباله واحجي وياه وجه لوجه لان راح ارتبك ويبين عليه كل شي...

غضب حاجبه وماعلق ، حسيته مهموم وبكلبه هواي عتب ومبين ناويلي نيه مو طيبة.

استمريت بنفس السكوت ، التفتلي وصوته قطع الصمت البينا ...

ضيغم : تصرفاتج بيها هواي اختلافات وغريبة..

ملاك : شلون يعني مافهمت؟

ضيغم : ما اعرف احس اكو بيج اختلاف من ناحية التفكير والعقلية ، يعني عقلج جبير ومبينه واعيه بس تفكيرج ابد مو منطقي تصرفاتج طفولية ودائماً مندفعة اريد افهم شنو سبب التقلبات المزاجية بحياتج ، وليش تخلين الناس تتدخل بحياتنا الخاصة احنا مو اتفقنا على كل شي وسدينا كل المواضيع ؟

هزيت راسي ب اي..

ضيغم : اذا اي ليش تصرفتي من راسج بدون ما ترجعيلي وتخلين نفسج بهيج موقف افرضي انه انسان عصبي ومتسرع وتفكيري محدود ماجان ايدت اهلي وثبتت التهمة عليج كردة فعل للسويتيه بيه ،احجيلي لاتظلين بس صافنة بوجهي..

ابتسمت بضعف وعلى الاغلب خوف ، اخذت نفس عميق وهمست.

ملاك : هذا الشي بالذات ما مستعدة احجيه هسه وخصوصاً الك..

لوى فمه وعض شفته السفلى وكال ..

ضيغم : لحد الان اريد الكالج مبرر للسويتيه بيه ، اريد اتذكر فعل سيء واحد سويته بحقج حتى استحق ردة فعلج القوية ، يعني شنو من حقد بكلبج بحيث ما ناسيتلي الافعال السويتها بدايه زواجنا وانتِ اصلا بوقتها ماقصرتي بس بعدها استعدلت وياج وسافرت الامور طيبة بينا ليش هيج سويتي..

ملاك : الحسيته شي بعيد عنك والعشته انت ما الك ايد بيه صح اخر فتره اذيتني والسبب اني لان رفعت عليك دعوه وتأذيت منها بس انسى الصار وشنو السبب الدفعني لهذا الشي ..

ضيغم : انسى ؟ وما اسأل ؟

ملاك : ياريت لان الراح شي مايخصك و جنا منفصلين..

ابحر بتفاصيلي بحيث وين ما اودي وجهي احسه يلاحكني بنظراته ..

ضيغم :  ياست الصارلج من صميم شؤوني لان جنتي على ذمتي اذكرج اذا ناسيه؟