دارت الدنيا لتدق طبول قلبي

39

#دارت الدنيا لتدق طبول قلبي
#جذبني فمك البني ٢

#بارت التاسع والثلاثون..

اوهمتك بأنني لا اهتم وانا احفظ ادق تفاصيلك..

_________

كلنا واكفين بوضعيه ترقب وخايفين من الراح يصير ، دكات كلبنا تقره الف خصوصاً ملاك جانت ترجف كل شويه تريد تروح لأبنها وامنعها ، الصار من وصل ادلم للمسبح كمنا مانشوف شي لازم نصعد نباوع من فوك صعدنا ، بالبدايه ملاك رفضت كالت..

ملاك : اظل قريبه حتى اي شي يصير اطلع واخذ ابني اني ما اتحمل يصير بيه شي ما اكدر اجازف بيه..

سيلين : صبري ملاك قابل ادهم متقصد يأذيه اكيد يروحله اذا تقرب من المي..

ملاك : لا عيني احنا نحجيله كلشي وفضت راحت  مستحيل اجازف بأبني..

سيلين : تتحملين ردة فعله اذا خالفتيه ابسط شي يسويه وياج بعد مايتدخل بشي يخصج ويزعل عليج..

ملاك : شلون لعد كلبي كام يوجعني والله..

سيلين : اصبري خلي نشوف شنو راح يصير..

صعدنا، طفينا الضوه وفتحنا طرف البردة وكمنا نباوع منها تحرك ضيغم بأتجاه ابنه وادلم اخذ لعبته وكعد يم الحافة مال مسبح ، ظليت مركزة ويه حركات ضيغم الجان يتلفت منا ومنا يريد احد ييجي ويشيل ابنه..

فتحت الشباك شويه حتى نسمعهم...

اجانه صوت ادلم يصيح ابه بابا ،بعدين كام يلعب و يشمر بلعبته وكعت بالمي التفت بأتجاه المسبح يريد يجيبها ..

ضيغم كام يسوي حركات سريعه بأيديه و يمشي بحذر يمكن يخاف من رده فعل ابنه اذا شافه متجه عليه ويوكع بالمي لهذا جان يمشي بطيء بس من شافه يريد ياخذ لعبته سرع بالمشي ، كام يسوي صوت بأصابعه وترك العربانه صفك بأيديه حتى ينتبهله ادلم مجرد رفع راسه بأتجاه ابوه ،

رجع يمشي بالعربانه  وصل يمه دنك جسمه و سحبه بسرعة و بسهوله من تيشيرته وحضنه خايف عليه ...

تعالت ضحكات ادلم وخر وجها باوعله تأمله ورجع حضنه بلهفة واتجه بالعربانه للبيت ، نزلنا جوه ، لكينه ادهم توه يدخل للهول وبعده دخل ضيغم اول ماصارت عينه عليه خزرني ، همست لسيلين..

ملاك : هسه يتهمني بالأهمال وشوفي شراح يسوي بيه ..

سيلين : لا هسه ادهم يتدارك الموقف وكولي كالت سيلين..

وفعلا ثواني وحجه ادهم..

ادهم : الأبن طلع اذكى من ابوه ، الحقير لا تقرب للمي ولا صار عنده فضول يسبح انه الادري بيه الطفل يحب يطبش بالمي شو هذا يفتهم..

ملاك : فدوة حبيبي..

ادهم :تدرين  شاف ابوه ظل يوزع ابتسامات ردت اروح اشيله بس ضيغم سبقني وشاله من الكاع شوفيهم شلون حلوين سويه..