دارت الدنيا لتدق طبول قلبي

38

#دارت الدنيا لتدق طبول قلبي..
#جذبني فمك البني ٢

#بارت الثامن والثلاثون..

ملاك

المسألة أكبر من كونها تراكُمات نفسية ، إنها حرب تحدث في الداخل .

ضيغم
‏"لكنكِ ارتضيتِ لي الأذى، وأنا الذي كنتُ أحسبكِ أرقُّ على قلبي مني."

ملاك

‏"تظن أنك تقاوم.. لكنك في الواقع تنطفئ."

ضيغم
‏"أتمنى دائمًا أن يُلهمني الله القدرة على إفلات كُل شيء يؤذيني مهما بلغ تعلقي به."

_____________

ملاك : يعني بس تخيلي ضيغم يحجي واذا سمعني معناها راح نتعاتب ويمكن يسمحلي اساعده واحتمال يخليني ارجع انام يمه حتى لو ما الزمه بس المهم اكون قريبه واراقبه ،،

وافز من يفز واذا احتاج مني شي اركض اجيبه اله يعني تخيلي بعد ما نحتاج اياد ولا كل شويه اتصل عليج لان هو يطلبج بالأسم ، يعني راح يخلي عينه بعيني ولج والله مشتاقه يباوعلي ليش يخليني بحسرته ياسيلين ليش..

تحجي وتشهك الكلمات تطلع بخنكه منها متت قهر عليها شنو بيدي اسويه واساعدها نزلت دمعتي ويه دمعتها ، سحبتها من ايديها الترجف واخذتها للسنك غسلت وجها وهي مبتسمه وعيونها تدمع ، ردت امازحها حتى اغيرلها نفسيتها لان كلش تعبت واحس راح نخسرها هي هم..

سيلين : ولج ملوكة عندج غمازات من تضحكين وسنونج بياضها يخبل سمارج بارزهن والله انتِ حلوة ..

ابتسمت بقهر وكالت..

ملاك : شنو فايده الجمال بدون حظ ، اني سامعة حظ الزركة كاعد بس ليش اني حظي ماكعد بيوم كلما اكول هذا هو مشت ويايه عدل وراح ارتاح ترجع الدنيا تعوج ويايه..

سيلين : ملاك كلنا مثلج تره كل انسان بينا عنده قصة تدرين اني قصتي ويه ادهم شكد مرينا بتناقضات ونزاعات يله وصلنا لهذا الحال وشويه هدأت حياتنا ، مرات قبل لا ننام نتذكر الاحداث اني وياه ،
تصدكين احداث تبجينه ونرجع نضحك على مواقف ثانيه ، يعني انتِ هم  حسبيها عثرة  وصارت بحياتكم صح قويه بس تعدي وتذكري كلامي بس يرادلج صبر وظلي ادعي يبرد كلبه ويشافيه..

ملاك : متلهفة اسولف وياه واحجيله كلشي الصار ويايه واشوفه شلون عانيت وتعذبت تره مو صوجي اذا حبيت ولا ذنبت،،
القلب متقلب المشاعر مو بالأيد ياسيلين وبعدها انتزعت صعب من كلبي مثل الطفل من ينتزع نفسه من رحم امه وينولد من جديد يظل يتعثر ويتعلم الى ان يمشي صح ويتعدل ، بس اني ماجنت اتصور عثرتي مال موت وهلكد راح تخسرنا...

سيلين : الاقدار مكتوبه والموت مكتوب بس لكلشي سبب ، يعني احتمال اذا ماسامعج جان صار الحادث بس بطريقة ثانية ، يعني هذا امر الله بس السبب سبق هذا الشي ..