دارت الدنيا لتدق طبول قلبي

26

#دارت_الدنيا_لتدق_طبول_قلبي
#جذبني_بني_البني_ج٢

#البارت_السادس_والعشرون                                   
#بقلم_عبير_ادريس
                                        

ياكفاها

                     

مثل ظلها جنت ماشي من وراها ..

                     

ياكفاها شسوه بيه من مشت وراوتني كفاها..

                     

ياحلاها سنيني مرت بالعشك وياك ياحلاها..

                     

ومن وراها ضاعت سنين عمري وظلت امي تصيح يارحمن الطف ابني مات من وراها..

                     

بقلمي عبير ادريس..
شجعوني حتى اذا مو حلو😚

                    
_____________
                    
كعدت الصبح على صوته وهو يطلع من البيت ظليت متمدده بمكاني ، اذا كعدت شنو اسوي ؟ ملل بملل ، هففف ...
                    

جريت نفس وحمدت ربي وشكرته على النعمة الأني بيها واهمها تمام الصحة ..
                    

نزلت رجلي لبست الشبشب الشتائي ابو الارنب جنت منسقته ويه بجامتي هم بيها صورة ارنب ،الغرفة جانت ظلمة لأن الجو غائم علكت الضوة صارت كبالي المرايا باوعت شعري مهوس مال نوم ، رحت للحمام غسلت وبللت شعري رجعت للغرفة مشطته ، طلعت للهول ظليت باهته بمكاني واتسائل هذا قبل لا اجي شلون جان عايش ، فوضوي بشكل مو طبيعي وعجوزي هم ..
                    
قبل لا اتريك كمت الملم مخلفات السهرة مالته ، قناني كولا على بطالة مي كلاص و حافظة مال قطع الثلج ، نفاضة باكيت الجكاير الخلصان ، جداحات ثنين ،
                     
عدا قشور الكرزات قسم على الطبلة وقسم بالكاع ملابسه نازعهن على القنفه و شامرهن بشكل عشوائي واللحاف نصه بالكاع ونصه على القنفه بس المخدة بمكانها ،
                     
صفطت اللحاف والمخده رجعتهن للغرفة ورجعت شلت المواعين والكلاصات  وديتهن للمطبخ وجبت سله المهملات خليتها يمي كمت اشيل واخلي بيها الأوساخ ، بعدين كنست الهول ونظفته ، رجعت للمطبخ وانصدم بالطباخ واكع عليه جاي يابس ، على السنك كشور بيض ..
                     
تسألت هاي ليش اليوم مزودها هو صح فوضوي بس مو وصخ حسيته اليوم متقصد هيج يسوي نظفت المطبخ وغسلت المواعين مالته ، سويت ريوك وجاي جديد  بعد ما كملت كل شغلي ، اخذت الصينيه ورحت بالبالكون جريت كرسي وخليت الاكل على الطبله وكعدت اكل..
                  
شنو هالحياة هاي اني ليش عايشة شنو فائدتي بالدنيا مرات احس نفسي زايدة ..                   

زارني تفكير سلبي بحت ماعرف لان نمت على مغثة وكعدت على هيج مناظر ظليت ضايجة..