مَن وراء الفخ ؟

١ | مدرسة جديدة

[ احد الشقق في السودان / الخرطوم ]

في يوم هادئ كعاده ايامهم ، يوم مليئ بالصمت والهدوء ، فجأه بدت اصوات خطواتها تطغى عالهدوء دا وهي متجهه لغرفه اختها ...

فتحت الباب واتكتفت لمن شافتها نايمه ، اخذت نفس بزهج وولعت النور : تلجه قومي المدرسه

غطت وشها بالمخده بإنزعاج من النور وصوت اختها واتجاهلتها زي كل مره لكن حـنان ما سكتت ومشت ليها وسحبت المخده وقالت بنبره حاده وصوت شبه عالي : جــودي !! دا يومك الاول فالمدرسه دي اتفضلي قومي قدامي وخلصينا

جـــودي فتحت عيونها بدون اي تعابير وقامت

حـنان عاينت ليها بتعب وقالت جواها : لمتين حتكوني كدا ؟؟ وصلتي لسنه تانيه ولسه مستمره فالسكات دا انا عجزت اعرف الشي اللي لازم اسويه معاكِ عشان تبقي طبيعيه

قامت وطلعت من غرفه جـودي ..

_________________

[ في المدرسه ] ( جـودي )

شنطتي في ظهري وبمشي في ممر المدرسه بِتجاهل تام للإزعاج وبعاين لخطواتي البطيئه بتفكير وتساؤل ، كيف حتكون حياتي في المدرسه دي؟

قاطع حبل تفكيري اني ضربت راسي بشي بدون ما انتبه ،، رفعت راسي براحه ولقيت وحده قدامي من ملابسها عرفتها استاذه

سألتني بحزم : حايمه مالك؟ دا اول يوم وبتحومي؟ اسمك منو؟

جاوبت بهدوء : جـودي

سألتني تاني بإستغراب : جـودي؟ جديده انتي؟

اكتفيت اني اهز راسي بتآييد وهنا الاستاذه ابتسمت وختت يدها في كتفي : حبيبه مدرستنا دي مبيلفلفو فيها ، سنه كم وفصل منو؟

ليه اسئلتها كتيره كدا؟ جاوبت عليها وكان مللي واضح شديد ، ارشدتني لفصلي وكَررت لي كلامها انو مدرستهم ليها قوانين صارمه لسبب ما قالتو وكويس لاني ما عايزه اعرف  ، كفايه اليوم واضح من بدايتو

_________________

[ احد الفصول ]

اثناء قُعادها فالمقاعد القدام مع صحبتها كانت بتعاين لمكانها ورا وبتقول جواها  : دايماً البيقعدو ورا بيخوفو ياريتني جيت بدري وقعدت مع ناس سماح

فاجأتها روابي وهي بتحضنها بشوق  : يـمنى اشتتقتت ليك واي واي

يـمنى بادلتها الحضن وهي مبسوطه  : روابييي !! مبتلحقيني والله فقدتك شديدد

سماح بطريقه مستفزه عاينت لروابي  : حفارتنا شخصياً جات متأخره؟؟ لالا ما بصدق صحوني صحوني

روابي عاينت ليها بنظره زعل : دا استقبال ليك اسي؟ بري ما بقعد جنبك ماشه مع يـمنى

يـمنى ضحكت من رياكشن روابي وقالت  : السنه ما بدت وانتو بديتو مطاعنه  - عاينت لروابي بشويه ضيقه وكملت كلامها -  تقعدي مع يـمنى ويين انا قاعده فالاخير هنااك

روابي بصدمه : واي الفصل اتملى؟؟؟

سماح اتكتفت : حجزت ليك جنبي

روابي حضنتها : كدا يادوب اشتقت ليك

ضحكو مع بعض وجا وقت رجوع الكل لأماكنهم عشان الحصه الاولى

_________________

[ اخر الصف ] ( يـمنى )

بعاين للبنات وانا بحاول اتذكر الاسامي المكتوبه في اللائحه ،، اتذكر كان في اسم جور..جوري اي جوري هي الحتقعد جنبي بس وينها؟؟

كلها دقايق وجات بت دخلت للصف ودار حوار بينها وبين الاستاذه

الاستاذه : اجي يالمتأخره اول يوم؟!

البت عاينت ليها وقالت بهدوء  : ضعت

الاستغراب عَلا ملامح الاستاذه وقالت  : طيب شوفي المكان الفاضي واقعدي فيه

وقفت وادتنا وشها وبقت بتعاين لينا بدون اي تعابير  !! لمن عاينت للمكان الجنبي قربت اجري اخليه من كميه الحده الفي نظرتها وبخطوات ثابته جات وقعدت جنبي ... اترددت كتير قبل ما امد ليها يدي واقول : انتي جوري صح؟

ما عاينت لي ولا مدت يدها بس اكتفت انها تقول بصوت شبه مسموع  : جـودي

استنيتها تسأل من اسمي لكن اتأكدت انها ما حتسأل فقلت بإبتسامه : شكلك محتسألي لكن انا يـمنى

عاينت لي شويه ورجعت عاينت للاستاذه وياريتني ما كلمتها لان الخوفه الدخلتني من نظرتها محتفارقني تاني