( جـودي )
خف الالم شويه وفتحت عيوني ولقيتهم كلهم حوليني ، ارتحت راحه عظيمه !! الحمدلله انهم كلهم كويسين ومافي زول اتأذى ، سرعان ما كلهم ابتسمو على ابتسامتي ، حسيت بيد ماسكه يدي فلفيت بنظري لإتجاهها وكانت يد زيـاد وقبل ما ابدي اي رده فعل زيـاد قال : انتي كويسه؟
هزيت راسي بتآييد وانحراج من الموقف
يـمنى اتنفست براحه وختت يدينها في راسي ، قالت : وايي اخيراً قمتي اشتقت ليك
خـالد ابتسم وقال : الحمدلله على السلامه
كانو كلهم فرحانين وانا ما اقل فرح منهم لاني معاهم ، كنت بفتش بأنظراي عن كريـم بس لمحت نـاديه متدسيه !! كانت انظارها على يديننا انا وزيـاد ، سحبت يدي من يدو بسرعه وقعدت بشكل مفاجئ وانا بعاين ليها وهي بتعاين لي ، يـمنى حاوطت كتفي بيدينها وقالت بتفاجؤ : مالك بسم الله
اشرت ليهم على المكان الكانت نـاديه واقفه فيه بس هي اختفت !!
زيـاد عاين للمكان الاشرت ليهو : مافي شي هناك شفتي شنو؟
خـالد قال بثبات وصوت شبه مسموع : شفتي نـاديه صح؟
عاينت ليهو بتفاجؤ ، يعني هي كانت هنا بالجد؟ هزيت راسي بتآييد وفي مليون سؤال في راسي بس واخيراً كريـم جا وابتسم لمن شافني وقال بهظار : اميرتنا النايمه اتكرمت علينا وصحت
ضحكو وانا ابتسمت وقلت : اميره نايمه واي شي ، بالمناسبه نـاديه بتسوي شنو هنا؟
يـمنى اتلفتت : صحي وينها؟ كانت خايفه عليك شديد على فكره
_________________
( خـالد )
بعد رده فعل جـودي دي انا متأكد انو في شي بيتعلق بنـاديه هي عارفاه
سألت جـودي وقلت : ليه حاسيك ما مرتاحه ليها؟
جـودي عاينت للمكان الكانت واقفه فيه وجاوبت بهدوء : صاح
كلهم انصدمو وانا ما قلت صدمتي عنهم لانو جـودي دايماً شكوكها صاح ، زيـاد قال بتفكير : انا كمان ما مرتاح ليها ، متذكر انها كانت بتطلع مع معـاذ
يـمنى ردت على كلامو بـ : سألتها وطلعو بيمشو مع نفس الترحيل
قلت بصوت واطي شويه : ممكن يكونو بيمشو لنفس الوجهه كمان ما تستبعديها
كريـم قال بنفي لتوقعاتنا : انتو اغبياء؟ نـاديه ما عندها علاقه بالاسمو معـاذ !!
ضربتو في راسو وقلت : شكلها غسلت ليك مخك !! - عاينت لجـودي وكملت موجه الكلام ليها - بتعرفي شنو؟ وليه معـاذ سوا كدا؟
زيـاد عاين ليها وقال : صاح انتي كيف عرفتي انو ناوي يضربني؟
جـودي قالت : لحظه وقبل اجاوبكم اسي يا خـالد عرفت امك كانت ماشه لوين اليوم داك؟
كلهم عاينو لي وانا كنت بحاول اتذكر الاسم القالتو لي ، قلت : وحده اسمها فاطمه الازهري ساكنه ..- سكتت شويه وانا بتذكر موضوع السكينه والمدرسه وكملت برجفه في صوتي - ساكنه جنب مدارسنا !!!
_________________
[ الحوش ] ( نـاديه )
كنت قاعده فالحوش بقهر وبعاين للتراب الجايه ، زيـاد ليه كان ماسك يد جـودي؟؟؟ هسي البت دي بتتحب؟ دمها تقيل وما معبراه اصلاً غبي هو؟ لا وجانا شايلها كمان روميو وجولييت ما شاء الله !! انا حبيتو قبلها وانا البستاهلو ما هي وعاد ياريتها سمحه السماحه الزي سماحتي ، مستحيل اسمح ليها تشيلو مني تشيلها الكتاحه دي بركه الله وهي لحدي هسي شايفه نـاديه الطيبه لكن انـ....
ازعجتني التراب وهي بتجي بقوه كبيره خلتني اطشش واحاول القى مكان الباب
_________________
كلهم انصدمو والخوف وضح على ملامحهم الا جـودي وزيـاد ، زيـاد كان ما فاهمنا بنتكلم عن شنو بس جـودي ابتسمت وقالت : حلو طيب
يـمنى سألتها بخوف : دي شنو الابتسامه دي؟
جـودي ردت بسؤال موجه لزيـاد : زيـاد تتذكر لمن لقيتكم في مدرستنا انت ومعـاذ؟ قول لي الشي الكنت حتقول انو معـاذ بيخاف منو؟
زيـاد سكت شويه وهو بيحاول يتذكر ، بعد صمت دام لثواني معدوده قال : هو انا ساكن جنب مدرستنا فـ شفتو بيدور برا المدرسه بالليل زي الساعه 1 عشان كدا قلت ليهو كيف بيخاف من مدرسه بنات وهو بيحوم فالساعه دي
يـمنى عقدت حواجبها وقالت : ما فهمت دا شنو وشن جاب دا لي دا على قوله امي؟!
زيـاد قال : دقيقه عايزه تصلي لإن نـاديه ومعـاذ ليهم علاقه ببعض فالحـ..
_________________
( جـودي )
قبل ما زيـاد يكمل كلامو انا شفت نـاديه واقفه عند الباب وقاطعتو بسرعه وقلت : اي بيحبو بعض !!
اعتلت الصدمه ملامح الكل بما فيهم نـاديه اللي طوالي اتدخلت وقالت : انا ومنو؟؟؟؟؟ معـاذ؟؟
هنا اتأكدت انها سمعت كلام زيـاد وقدرت اخفي توتري واتجاهل تعابير الاستغراب والصدمه في وشوش اصحابي وقلت : اي زيـاد عايز يربط معاك فسأل اذا كنتي مرتبطه ولا لا لكنك مرتبطه بالبتمشي معاه كل يوم للمـ...
قاطعتني وقالت بفرحه وتفاجؤ ظاهرين فيها : لالالا دا كلام شنو؟! انا ما مرتبطه
زيـاد كان بيعاين لي بصدمه وناوي يرد بس خـالد اشر ليهو يسكت وكأنو بدا يفهمني ، دي الحركه الاخيره الحتكشف لينا المجرمين ديل والمره دي مهارات زيـاد فالتشبيك هي سلاحنا الحنصل بيهو لهدفنا
أنت تقرأ
مَن وراء الفخ ؟
Mystery / Thriller" من وراء الفـخ " هي روايه سودانيه مميزه كُتبت بقلم جيـني وتم نشرها سابقًا في الانستقرام واليوم يعاد نشرها هنا ، تدور احداث قصتها حول جريمه قتل مروعه تحدث في محيط ثانويتين وتورط في ثنايا غموضها ٤ طلاب تربطهم علاقه بالضحيه بشكل من الاشكال ، ليكتشفو ل...
