بعد يوم دراسي طويل وممتع كل وحده رجعت بيتها كالمعتاد جاهلين للي حيحصل وحيغير حياتهم كلها ...
_________________
[ اليوم التاني / المدرسه ] ( جـودي )
جيت داخله للفصل وانا متوقعه ان يـمنى حتكون زي كل مره جايه قبلي وبتعاين لي بزهج من تأخري الدائم بس استغربت لمن شفت ان كرسيها فاضي ولأول مره من عرفتها تغيب !!
بقيت بتنقل بأنظاري وانا بفتش على روابي وسماح واخيراً لقيتهم وما اترددت في اني اسألهم
جـودي : يـمنى حتتأخر الليله؟
سماح لفت وعاينت لمكانها : غريبه ما حصل اتأخرت فحياتها
روابي بخوف : ما شفت سياره كريـم الليله دايما بيجي بدري ياربي مالهم؟
جـودي بتساؤل : كريـم؟
روابي بتفكير : عبدالكريـم اخو يـمنى بيقرا فالثانويه القدامنا دي
هزيت راسي بِفهم ولفيت متجهه لمكاني وانا شاعره بخوف ليه الاخوان الاتنين ما جو؟
عدا اليوم الدراسي ببطء شديد لين ما اخيراً قدرت اطلع من المدرسه وانا بالي مشغول بيـمنى
_________________
( زيـاد )
طلعت من المدرسه وانا بفكر بالحصل مع الطالبين كريـم وخـالد والكلام الطالع عن حادثه القتل ديك ولمحت جـودي اللي كانت متغيره ،، كانت متوتره وخايفه شديد ودا جديد عليها وعلى وشها البارد ، مشيت ليها ووقفت قدامها وكغير العاده ما لاحظتني ولا اخذت نَفَس الزهج حقها ولا مشت ف بشرت بيدي قدامها قامت اتهجمت
عاينت لي بهجمه وقالت : انت تاني؟ المره دي عليك الله زح مني
عاينت لعيونها وانا بفكر اذا لازم اقول ولا لا لكني اتشجعت وقلت : اخو يـمنى صحبتك معاي فالفصل وغايب والسبب وفاه وسمعت كم طالب قالو انو في زول انقتل ليهم بتعرفي شي عن الموضوع دا؟
ملامحها فجأه اتغيرت وعيونها وسعت بصدمه وقالت برجفه : قتل؟ منو؟
هزيت يديني بنفي وقلت : متكوني قايلاها يـمنى !! لو اتوفت اكيد كانو سحبو اسمها اهدي
عاينت لي بتوتر : طيب منو؟
كنت بفكر وما عارف اقول ليها شنو عشان تهدا فقلت : ا انا حعرف من وين؟
قاطع حديثنا صوت سياره البت البتجي تسوقها والهي عالاغلب اختها وقبل ما تمشي قالت بتهديد : الكلام القلتو لي دا لو كذب حتندم
مشيت وانا مستغرب هي كيف عندها القوه والتماسك دا؟ كيف بتقدر تتكلم بالطريقه دي بدون ما تخاف من رده فعل الطرف التاني؟
_________________
[ بيت جـودي ] ( حـنان )
غريبه جـودي الليله مالها بالها مشغول كدا؟ اكيد في شي حاصل من جات ما اكلت وبكلمها وبترد بسرعه ودا شي جديد عليها فالعاده بتكتفي بالسكات وهز الراس المره دي مالها؟
طفيت الانوار وارتميت على سريري وغطيت بنوم عميق بعد تفكير
_________________
مرو يومين على اختفاء يـمنى واخوها والمدرسه قدرو يتواصلو معاهم وطلع فعلاً في وفاه ، بس جـودي كانت ملاحظه غياب شخصيه تانيه
_________________
[ قدام روضه/ مكان جديد ] ( جـودي)
نزلت كالعاده من سياره حـنان عند مكان الروضه وهي متمنيه انها تشوفو الليله لكن برضو كان غايب ،، مشت وسألت مسؤوله الروضه تحت انظار حـنان الكانت بتناديها عشان تطلع ويمشو للمدرسه سريع لانهم متأخرين
جـودي دخلت بخطوات ثابته وسألت اول معلمه شافتها : اهلين حابه اسأل عن الطالب آسر ؟ ليهو يومين غايب وما شفتو
- المعلمه بألم وانكسار واضح عليها : قصدك آسر ابراهيم؟ مات الله يرحمو ويجعلو طير من طيور الجنه - دمعت شويه لمن شافت صدمه جـودي وطبطبت عليها - كيف ما عارفه انتي؟ الله يصبركم
جـودي من قوه صدمتها ما ابدت اي رده فعل على كلام المعلمه ولا اتحركت من مكانها
حـنان سحبتها بسرعه ولفتها عليها وقالت بصوت عالي : تلجه ؟؟
اتلفتت ووعت انها في مكان عام ووطت صوتها : عندك مدرسه اتحركي !! الولد داك بيكون دخل فصلو اتأخرنا الليله
_________________
[ نرجع بالزمن لأول يوم دراسي لجـودي ]
كانت في سياره حـنان وبتعاين للشباك ، لمحت ليها طفل قاعد برا روضتو وبيبكي فطلبت من حـنان توقف السياره ونزلت مشت ليهو
عاينت ليهو بإستغراب : ليه بتبكي كدا؟ انت كويس؟
حـنان كانت بتعاين ليها بفرح : حقو نغير ليك اسم تلجه دا
الطفل رفع راسو وعاين لجـودي ودموعو مغطيه على نظرو : حلوياتي وقعت فالخور واخوي ابا يجيب لي تاني
جـودي ابتسمت على براءتو وطلعت ليهو كم حلاوه كانت جايباها ليها : خلاص هاك
عاين ليهم بفرح وشالهم بعدين فكر شويه وقال : وانتي حتاكلي شنو؟
جـودي ابتسمت : انا بشتري لنفسي من المدرسه ما مشكله
ابتسم ومسح دموعو وفرحتو فرحتها : شكككرا انا بحب الحلاوه دي
جـودي : خلاص كل يوم بجيبها ليك
مد يدو بفرح وتأمُر : دا اتفاق يابت
ضحكت ومسكت يدو : خلاص اتفقنا يا ولد
ومن اليوم داك وجـودي بتنزل عند الروضه قبل ما تمشي لمدرستها وتديه حلاوه وهو بيستناها برا
_________________
[ الوقت الحاضر / بيت يـمنى ] ( يـمنى )
صحيت وقمت من سريري بصعوبه وانا بمسح عيوني الاتورمت من كتر ما بكيت ، آسر مات او انقتل وهو ما كمل حتى ال 7 سنين ، آسر مشى بس صوتو لسه ما مشى ولسه بيلاحقني زي ظلي
جاتني امي بصوت متألم وقالت : يـمنى بكرا تمشي المدرسه عشان ما تفوتك دروس كتيره يابتي
اخدت نفس وقررت اني الليله لازم اعرف السبب الحقيقي ورا موت آسر قبل ما ارجع لحياتي الطبيعيه
أنت تقرأ
مَن وراء الفخ ؟
Mystery / Thriller" من وراء الفـخ " هي روايه سودانيه مميزه كُتبت بقلم جيـني وتم نشرها سابقًا في الانستقرام واليوم يعاد نشرها هنا ، تدور احداث قصتها حول جريمه قتل مروعه تحدث في محيط ثانويتين وتورط في ثنايا غموضها ٤ طلاب تربطهم علاقه بالضحيه بشكل من الاشكال ، ليكتشفو ل...
