مَن وراء الفخ ؟

١٦ | مشاعر غريبة

[ اليوم التالي / المقر ] ( يـمنى )

احسن انجاز لي في حياتي اني قدرت اقنع كريـم وخـالد بـ وجودي انا و جـودي واننا حننسحب من القصه دي لما تنجح فكرتها حقت زيـاد ،، كنت قاعده اعاين ليهم ، كلهم غريبين ، جـودي وخـالد شاحبين ومنفسنين وبالهم في مكان تاني ، زيـاد بيعاين لجـودي بشويه زعل وكريـم بيعاين لزيـاد بعصبيه والصمت سيد الجلسه ، ضربت الطربيزه بقوه وقلت : ايوا يلا عاينو خلاص بديتو تتراجعو وتجنو في الوقت المفروض تكونو فيهو بكامل وعيكم ؟؟ انتو نسيتو انو في اليومين ديل لازم يكونو القتلو آسر منفيين برا السودان ؟

زيـاد رد وقال : النفي برا السودان دا عقاب ؟

حتى في وضع جدي زي دا بينكت ؟ قبل ما ارد عليهو خـالد قال بهدوء : كلكم اطلعو من الموضوع لانو دا اخوي انا وانا البعرف اجيب حقو !

اعتلت الصدمه ملامحنا كلنا ! ، بعد العملناه دا كلو والتضحيات القدمناها يقول كدا ؟؟؟

_________________

( خـالد )

انصدمو زي ما كنت متوقع لكن صدمه احسن من وجع موت واحد فيهم

جـودي ردت علي وقالت : واذا اخوك طيب ؟

كريـم بـ شهامه : اخوك اخوي وبجيب حقو معاك !

ما بلومهم ديل ما عارفين الورطه الهم فيها ، رديت بشويه حده : انا قلت اخوي ما تتدخلو !

يـمنى دفرت الكرسي الانا قاعد فيه بـ رجولها وقالت بصوت عالي : بعد كل السويناه وتفكيرنا وحلولنا وتضحياتنا تجي تقول كدا ؟؟ جـودي قربت تموت بسبب القصه دي وانت كدا اناني ؟؟ متين حتخلي حركات الاطفال دي ؟؟؟؟

قمت وقلت بنفس نبره صوتها : اناني ؟ انتي عارفه الناس ديل منو اساسًا ؟

بدون وعي مني لقيت نفسي حكيت ليهم كل شي عرفتو امس
_________________

( جـودي )

لا اراديًا ابتسمت بعد السمعتو مع انهم كلهم خافو وانصدمو

اولهم زيـاد القام طوالي وقال : لا الحكايه لو كدا يبقى متشكرين على الاستضافه الحلوه

كريـم قام كمان وقال : حبيبنا تهريب واسلحه وممنوعات ؟ ونحن شفع الثانوي حنمسكهم بأي منطق ؟

وانا برأيي كدا الموضوع بقى اسهل اننا نقنع الشرطه يتدخلو ويجيبو اقوى من عندهم عشان الناس ديل يتقبضو

يـمنى لاحظت ابتسامتي وقالت بنبره فيها رجفه : جـودي مبسوطه مالك ؟ نحن حنموت !

_________________

جـودي ردت على كلام يـمنى وقالت موجهه ردها للكل : يا اذكياء فكرو فيها ! اذا هم مُهربين اسلحه اكيد بيكونو مطلوبين ، على الاقل لمن نكلم الشرطه اننا لقيناهم ما حيكونو قايلننا مجانين

خـالد رد : طيب خلينا من الشرطه وكل شي ليه الاستعجال ! ، افرضي فكرتك حقت زيـاد ما مشت زي ما انتي متوقعاها ؟

جـودي ردت : اسوء شي ممكن يحصل هو انو نـاديه ما تحكي شي - عاينت لـ زيـاد وكملت - الباقي معتمد عليك انت !

الكل عاين لـ زيـاد مستنين رده

زيـاد رد بـ غروره المعتاد : ودي حكايه ؟ قدامكم اكبر حناك في تاريخ سودانكم البايظ دا

كريـم رد بهدوء : ما حناك كلب سُره

زيـاد وقف وابتسم وعاين لـ خـالد بعدين وجه نظرو لـ عبد الكريـم : ما مشكله بنمشيها ليك يا دفعه عشان مشاكلك العائليه كتيره

كلهم عاينو ليهو بـ استغراب وانزعاج من وقاحتو بس هو مشى وبيصفر كمان بكل تفاهه وطلع متجه لبيته وهو بيغني

كريـم ضرب الطربيزه بقوه وقال وهو معصب : بعد ما نخلص الموضوع دا تزحو لي من الزول دا وتزحو مني فاهمين !

_________________

[ في اليوم التالي / كوفي شوب ]

زيـاد كان قاعد مع نـاديه وبيتونسو وجوالو جنبو بيسجل ونستهم وناس جـودي قاعدين يعاينو ليهم من كاميرا مراقبه الكوفي بعد اتفاقهم مع صاحبه الكوفي اللي بتعرف حنـان

كريـم كان بيعاين بحقد : مبسوط وبيتونس ، استعدو لـ مشكله الديه حقتو

خـالد رد عليه : دي مجرمه حمار انت تحبها ؟

كريـم : دا وش اجرام اسي ؟

يـمنى اتدخلت في حديثهم وردت : من متين الاجرام ليهو وش معين كمان يا كافي البلا !

لفت لـ جـودي وقالت : بالله شوفي الغبي الحيوقعنا في مشكله دا

جـودي كانت سرحانه في شاشه المراقبه وبتقول بينها وبين نفسها : يتونسو ولا يتحرقو انا مالي اتضايق ؟ بيقدر يتونس مع كل البنات بنفس الطريقه وانا الطيره عشان قال لي كم كلمه طوالي وقعت في فخو زيهم ؟

_________________

( يـمنى )

جـودي ما ردت علي وكان واضح انها سرحانه ، بشرت قدامها وفزت وعاينت لي ، ياربي عرفت شنو ولا ما بتشرد كدا ساي بدون سبب ، سألتها : وينك يالاخت ؟ بكلمك من الصباح

لفت وقالت قبل ما تمرق من غرفه المراقبه : مافي شي عايزه ارجع البيت انتو اخلصو وكلميني

مشت قبل ما تسمع ردي لكن ما غريبه منها ، دايمًا بتخليني اتكلم وتمشي يلا اهم شي تنجح خطتنا