مَن وراء الفخ ؟

١١ | فخ - تضحية

[ حديقه المدرسه ] ( جـودي )

اللعبه بالجد شبه انكشفت وكلها ايام وحنعرف قتله آسر لكن عشان يحصل الشي دا ، عاينت لزيـاد وكملت في تفكيري الداخلي والطلعت بيهو اني لازم اتكلم معاه فالانصراف و اصل للي بيعرفو  ، معـاذ قاطع تفكيري وقال  :  زيـاد خلينا نطلع قبل ما نتقبض

زيـاد ضحك وقال  : شنو هسي جاك الخوف لكن امبارح بالليل لمن كنـ....

معـاذ قاطعو بخوف وتوتر واضحين في عيونو وقال بسرعه  : لاا خلاص خلينا نتمشى هنا

امبارح بالليل حصل شنو  !!! ليه خاف كدا وليه اتوتر وغير الموضوع؟؟ انا متأكده ان الحصل امبارح بالليل دا هو الشي الانا محتاجه اعرفو عشان تتحل القصه دي كلها وارجع لحياتي العاديه الهاديه ، قمت من الارض وانا اخيراً حاسه اني قربت من الحقيقيه  ، قلت لزيـاد : كلامو صاح اطلعو من هنا

مشيت بسرعه بدون ما اسمع ردو وانا مبسوطه ، اخيراً حتخلص القصه دي

_________________

[ مكتب داكن وشبه مظلم ] ( حازم )

مشغل اغنيه وماسك قهوتي احتفالاً بنجاح خطتي لقتل الولد الشاف معـاذ قبل ما تبدا بس قاطع هدوئي وفرحتي اشعار جاني من معـاذ وكانت رساله نصيه محتواها  : " زيـاد لازم يموت قبل ما يطلع من المدرسه "

وسعت عيوني  !!! كيف حنقتلو في المدرسه؟ حصل شنو؟ رفعت جوالي واتصلت على معـاذ كتير لكنو كان بيقفل الخط كأنو بيقول لي انو مبيقدر يرد هسي  ،، فلقت كاسه القهوه ومن الروقان داك انتقلت لحاله عصبيه غريبه  !!! ارجع اخت خطه تانيه واكنسل الاولى  !! الاستجد شنو !! اسئله كتيره محتاجه لمعـاذ لانو الوحيد العارف اجوبتها ، اخذت نفس وعاينت لرقم استاذ طلال لكن بعد تفكير لثواني معدوده لقيت احسن اني اغير الخطه وما اكلمو عشان ما يجي يدفني وانا حي ..

_________________

[ مدرسه الاولاد / بعد ساعه ] ( معـاذ )

وصلنا لمدرستنا من نص ساعه تقريباً واتوجهت للفصل بصمت  ، زيـاد لو طلع من المبنى دا عايش حيدمر كل شي ، عاينت ليهو وكان مبتسم وما عارف انها من اخر ابتساماتو ، رفعت جوالي ورسلت لحازم رساله تانيه بعد الرسلتها ديك وكتبت  : " خطتك الجديده لازم تشملني لاني حكون مقابلو فالفصل وشايف انو احسن تهَرِبو لي سلاح وبخليه معاي لين ما يطلعو الطلبه واقتلو" رسلت الرساله وانا عارف اني لو فشلت استاذ طلال حيقتلني بدون تردد  ، دخلت جوالي في جيبي وعاينت لخـالد وكريـم وابتسمت ابتسامه خفيفه وانا بفكر بالحصل في حياتهم وبالطفل داك  !! ولسه سؤالي الوحيد ما لقيت ليهو جواب لا من حازم لا غيرو وهو ليه الطفل دا انقتل؟

_________________

[ المستشفى ] ( حـنان )

فاليوم الواحد دا جونا مرضى كتار شديد ياربي الحاصل شنو فالبلد دي يارب الطف علينا  ، مسكت اوراق احد المرضى وفي طريقي للمختبر وقفتني سلوى ( صحبه حـنان وبتشتغل ممرضه ) :  حـنان سمعتي بالحيحصل الليله؟

عاينت ليها بإنهاك  : اها اصدميني

سلوى سحبت الاوراق من يدي وقالت  : حنقعد فالشغل لحدي 8 بالليل الليله لانو المرضى كتار شديد وانا من حظي الكعب حقعد معاك افف

عاينت ليها بصدمه : 8!!

نزلت راسي بتعب وقلت  : يعني لازم اطلع جـودي بدري الليله

سلوى  : عشان كدا جيت قلت ليك امشي طلعيها وانا بتصرف مع الاوراق دي

هزيت راسي بموافقه وقلعت معطفي وطلعت

_________________

[ مدرسه البنات ] ( جـودي )

يـمنى الله يهديها اتحمست في ونستها وضربتني في وشي وقطعت تفكيري المعتاد وقالت  : واي المهم دا الحصل وكريـم علقني في المروحه بالجد اليوم داك

ضحكت على تعابيرها وكلامها واتخيلت شكلها بس سرعان ما قطعنا ونستنا بدخول احد المرشدات وقالت  : جـودي عبد العزيز هنا؟

رفعت يدي بإستغراب والكل كان مستغرب اول مره يستعدوني  !!

قالت المرشده  : اختك برا شيلي حاجاتك وتعالي

شلت حاجاتي بهدوء وانا بتمنى ان حـنان تكون كويسه  ، طلعت ومشيت ليها وبعد الاجراءات طلعنا من المدرسه  ، بس لاحظت ونحن طالعين سياره سوداء واقفه على جنبه مدرسه الاولاد ولمن رفعت راسي شويه وامعنت في النظر انصدمت من الشفتو  !!

_________________

[ وقت الانصراف / الفصل ] ( زيـاد )

الساعه 3:45 سخانه ومافي مويه ودا فوق الصداع الكان عندي  ، ضربت الطربيزه بيدي وقلت  : حبيبنا حتتكلم في موضوعك دا ولا اتخارج؟!

معـاذ رد وهو مركز انظارو على باب المدرسه الكان واقفين فيهو طالبين  : اصبر دقيقه بس

اتكتفت بزهج وقعدت افتش عن اي حاجه انشغل بيها فبديت ارتب فالفصل !! انا لمن ازهج بعمل حاجات غريبه زي البيجيني لاق في مخي  ، بعد دقايق معدوده شبه طويله سمعت صوت كرسي معـاذ بيتحرك بهدوء لكن ما اهتميت يعني حيسوي شنو دامو ما فتح خشمو بكلمه ، قلت ليهو وانا مركز فالحاجه البرتبها  : اخيراً حاتفك اسري وتتكلم !!

بدون مقدمات سمعت صوت جـودي بتقول بصراخ : زيـاد وراك  !!
وفجأه صوت طلقه رصاصه عالي .....

_________________

الشرطه اقتحمو الفصل بسرعه وانصدمو من اللي شافوه قدامهم  !!!