مَن وراء الفخ ؟

٤ | ابتسامة

[ صيوان العزاء ] ( يـمنى )

طلعت ولفيت طرحتي وفتشت عن خالـد لحدي ما لمحتو وما اترددت في اني امشي ليهو واسحبو بعيد عن زحمه الناس واصوات بكاهم

عَاين لي بإستغراب من تصرفي وقال : بسم الله مالك؟

سألتو بنبره حاده : آسر مات كيف؟؟ ليه انت وخالتي وعمي ما عايزين تتكلمو؟ ليه ما خليتونا نشوفو؟ ليه عمي سافر وما حضر عزا ولدو؟؟

اتغيرت ملامحو وكان في توتر واضح في عيونو بس رد بنفس حده نبرتي وقال : وقع على راسو ونزف كتير ومات بس

رفعت سبابتي وانا مركزه في تشتت عيونو : كذاب !! انا بت خالتك وبعرفك انت لو صادق ما كنت حشوف التوتر دا في عيونك

لف نظرو مني وقال : طيب عنك ما صدقتي

لف عشان يمشي بس رجعت سحبت يدو بإصرار : خـالد وريني مستحيل اصدق ان موتة آسر كانت طبيعيه انتو داسين شي حتى خالتو مبتبكي بقوه وفي شي حاصل ما بخليك لحـ...

قاطعني بصوت عالي وهو معصب من نقتي : انطعن بسكين في بطنو قدام باب بيتنا وفي جيبو رساله تهديديه اننا لو كلمنا زول حنقتل انا وراه ،، ارتحتي؟؟؟؟ ممكن تفكيني من كلامك الكتير وتخليني امشي؟

_________________

[ في المدرسه ] ( جـودي )

كنت قاعده فالفصل لكن بالي في مكان تاني ،، نفسي ولأول مره من الفاجعه ديك الحصلت لي اني ابكي ، اول مره بعد السنين دي حسيت بالانكسار بالجد وحسيت اني خسرت شي عظيم كان بيشجعني اني اصحى كل يوم بدري عشان اشوف ابتسامتو الكفيله انها تصنع يومي ، عدا اليوم بثقله علي بدون حتى ما افكر بموضوع غياب يـمنى

جا وقت الانصراف ومشيت بخطوات متثاقله لحدي ما طلعت من المدرسه ولمحت زيـاد ، ما اتوقعت اني حأحتاج ليهو في يوم لكن اسوي شنو؟ عندي احساس من ربطي للاحداث الحاصله دي ان يـمنى وآسر في بينهم علاقه ولازم اعرف اذا اعتقادي في محلو ولا لا

مشيت بخطوات ثابته متجهه لزيـاد اللي كان واقف مع 5 بنات وعدد الليله قليل كمان فالعاده بيقيف مع 10 او 15

وقفت قدامو وانا عارفه اني حأندم ندم السنين لاني جيتو بس ما عندي خيار : عادي نتكلم على انفراد؟

كان بيعاين لي بصدمه واستغراب وشويه شويه ارتسمت ضحكه غبيه من ضحكاتو شكلو قايلني جيت عشان سواد عيونو ، لف للبنات وقال : دقايق وبجيكم يا حبيباتي

حبيباتي؟ مقرف البنات ديل واقفين معاه بكامل قواهم العقليه؟ والله النوع دا من الاولاد مستعده اموت وما اشوف خِلقتو

_________________

( زيـاد )

كانت بتمشي بعيد شويتين عن البنات وانا بعاين ليها وبفكر بالسرعه دي حبتني؟ ومركبه قناع انا التقيله البطنش وما حعبرك وشنو وشنو ههه فالنهايه بت ومافي بت بتقدر تقاومني وتقاوم عيوني الحلوه

لفت علي لمن لاحظت اننا بعدنا عن الطلاب شويه وقالت بنبره حاده : اكيد قايلني ميته فيك لكن تحلم !! اتمنى انك تخلي النظرات الغبيه دي وتقول لي عبدالكريـم الليله جا؟

اخدت نفس ونزلت راسي ، بالله انا حتوقع شنو ؟ جايه بكل قوه عين تسأل عن كريـم كمان؟

قلت ليها: ما جا لا هو لا خـالد ابراهيم ولد خالتو

لاحظت الصدمه في ملامحها وهي بتفكر ، عاينت لي بسرعه : خـالد ابراهيم؟ عندو اخو فالروضه الجنبنا دي؟

كنت بحاول اتذكر ، لحظه !! صاح عندو اخو صغير كان بيجي بجهه المدرسه معاه وجابو في اخر ايام سنه تانيه بس كان اسمو.... إلياس؟؟ لا السر؟؟ اتذكرتو كان اسمو آسر

عاينت ليها بتفكير وقلت : ايي عندو آسر ابراهيم اعتقد بس ليه؟

جـودي إعتلت ملامحها نظره غريبه وقالت بصوت شبه مسموع : كنت عارفه انو في علاقه بينهم

قلت ليها بتعجب : علاقه بين منو؟

ابتسمت لي وقالت : شكراً

مشت وخلتني عالق في سحر ابتسامتها ، جـودي دام ابتسامتكِ حلوه كدا ليه بتخفيها؟

_________________

[ غرفه جـودي ] ( جـودي )

يعني آسر هو اخو خـالد ولد خاله يـمنى وهم مختفين عشان وفاتو لكن في شي غلط ، انا ليه حاسه انو موتتو ما عاديه؟ يمكن عشان يـمنى قافله جوالها وما بترد على رسايلي؟

وقفت قدام المرايه ونشفت شعري ، حاجتين حيحددو لي طبيعه موت آسر اول شي سجلو الصحي تاني شي ملفو المدرسي !! اذا ملفو لسه فالمدرسه يبقى اكيد في شي ورا موتو وبالنسبه للسجل الصحي ف لازم يكون عند المدرسه تقرير بحالتو الصحيه

لمحت الحلاوه الكنت مجهزاها ليهو وتلقائي دمعت واتذكرتو واتذكرت امي ، دائماً البيموتو فجأه ويخلونا هم البنكون مستعدين نديهم حياتنا عشان يبقو ، سرعان ما اتذكرت ابوي ومسحت دموعي، اتغيرت ملامحي من الحزن للعصبيه وقلت بصوت مسموع : مبيحصل شي بدون سبب وانا اكتر وحده عارفه الكلام دا

_________________

[ بيت يـمنى ] ( يـمنى )

فتحت باب غرفه كريـم بسرعه وانا لسه ما مستوعبه الكلام القالو لي خـالد

نط من سريرو بهجمه : يا الله خير !! مالك؟ يوم حأموت مهجوم بسببك وانتي الهتتكفلي بصيواني

اتقدمت ليهو بسرعه وخنقتو : ممكن تموت مخنوق كمان صح؟؟ انت ليه ما كلمتني انو آسر انقتل؟

دفرني وكحكح : انتي مجنونه؟ انا حعرف من وين انو آسر...

سكت شويه وعاين لي بصدمه : إنقتل؟!