عدا اليوم الدراسي بدون اي احداث مهمه لين ما جا وقت الانصراف والكل طلعو
_________________
[ برا بوابه المدرسه ] ( جـودي )
ازعاج مُبالغ فيه لكن استنفر الوضع ليه دام ثانويتهم مُجاوِره لثانويه اولاد؟ وجهت نظري لساعتي وانا متجاهله نظرات البعض ومستنيه حـنان اللي لو نقلنا للمريخ محتجيني بدري ،، قاطع هدوء انتظاري واحد وقف قدامي بكل ثقه وقال : جديده ؟ ما حصل شفتك
عاينت ليهو وانا بفكر معقوله حفظ بنات المدرسه كلهم؟ اكتفيت بإني اتجاهلو وارجع اوجه نظري للطريق ، إبتسم مع ضحكه اشبه بِضحكه غرور وقال : انتي عارفه كل بت في مدرستك دي بتتمنى اقيف قدامها كدا ؟!
لمحت سياره حـنان وشديت على شنطتي وقلت ببرودي المُعتاد : غريبه !! انا بتمنى انك ما تقيف قدامي تاني
مشيت بدون ما اسمع ردو وانا حاسه بالفخر اني كسرت غرورو العلى الفاضي ، فتحت باب السياره وركبت وطوالي حـنان سألت السؤال الكنت متوقعاه : اهلين ، الولد دا ضايقك؟
ربطت الحزام ورديت : لو جيتي بدري ما بتعرض لمضايقات
لاحظت القلق في نظراتها واخدت نفس بإدراك للي قلتو ومسكت يدها بإبتسامه مصطنعه : اسفه طيب؟ لو ضايقني زول بوريك
كان الذهول واضح عليها وقالت بكل فرح وهي بتعاين ليدي : زول يقرصني الحاصل دا جد؟ الانسه تلجه مبتسمه وبتتكلم زي الناس؟؟
_________________
عدا اليوم على خير وبدا اليوم التاني اللي كانت بدايته حلوه بسبب روقان جـودي ، وصلت للفصل ولقت يـمنى وصحباتها متجمعين في مكانها وقالت جواها : ديل كيف افهمهم اني ما بعرف اتونس وبحب اقعد براي
مشت وقعدت وفجأه روابي مسكت يدها بحماس : امس شفناك واقفه مع زيـاد وااايييي بختتتك
جـودي بنظرات استغراب ما بين البنات ويد روابي الماسكه يدها كأنهم صحبات : زيـاد؟
روابي ضمت يدينها : زيـاد ايي احلى ولد فيك يا سودان انا لو مكانك بموت عليك الله بتعرفيه من وين؟
سماح بحماس لا يقل عن حماس روابي : قال ليك شنو؟؟ ميكون اخوك؟ واي لو اخوك بصاحبك اسي دي
جـودي عاينت ليـمنى اللي هزت ليها كتفها بجهل وقالت : اصرو انهم يجوك ما تعايني لي كدا
جودي وهي بتتذكر كلامو قالت جواها : عشان كدا راسو كبير ومصدق نفسو - عاينت لروابي وسماح وكملت - ما بلومو
لفت وطلعت كتابها : بتقدرو ترجعو لأماكنكم
روابي عاينت ليها بزعل : عان بتطردنا
سماح سحبت روابي وعاينت لجـودي : الله يصبرك على قاتله الحماس دي يا يـمنى
كلامهم ضايق جـودي بس اكتفت بالسكات وقبل اضافه اي احاديث بينهم دخلت الاستاذه وبدت درسها ، يـمنى ختت راسها عالطربيزه بِملل
_________________
[ حديقه المدرسه ] ( جـودي )
جَرت الحصص بسرعه ما لاحظت ليها وفي لمح البصر لقيت نفسي قاعده وقدامي يــمنى بتتونس مع انو صحباتها بيعاينو ليها من بعيد بغيز بس اتجاهلتهم ، اما انا فكل الشاغل تفكيري هو كيف اسلوبي ما إستفزاها وزحاها مني زي بقيه الناس!!
_________________
( يـمنى )
من نظراتها كان واضح انها مستغربه مني ومعتاده على نفور الناس والونسه شي جديد عليها لكن فيها شي مميز ، بتخلي الواحد يكون عايز يعرف السبب ورا سكوتها المميت دا وورا قله كلامها وفظاظتها مع البتصدافهم بس من سوء حظها انها اثارت فضولي تجاهها وما بخليها الا اعرف مشكلتها شنو
_________________
[ في وقت الانصراف ]
كانت واقفه كالعاده في إنتظار حـنان وجاتها يـمنى ووقفت جنبها وسألتها : بتنتظري ابوك ؟
جـودي عاينت ليها مُحاوِله إخفاء المها : ابوي ميت ، بنتظر اختي
يـمنى بأسى ونبره حزينه قالت : اوه اسفه الله يرحمو ، انا ابوي جندي لي سنين ما شفتو ف المنا واحد
قاطعهم زيـاد وهو بيقيف قدامهم وبيعاين لجـودي وهي بتعاين ليهو ، وجه نظرو ليـمنى ، مد يدو وابتسم : يـمنى صح؟
يـمنى عاينت ليدو ولجـودي وسلمت عليه : اي يـمنى وانت زيـاد !! - عاينت لجـودي وكملت - ودي جـودي
هز راسو بتآييد ومد يدو لجـودي وهو متيقن انها غصب حتسلم عليه بس صدمتو لمن اتجاهلتو وسحبت يـمنى بدون اي كلام ومشت
_________________
( زيـاد )
جـودي، اول مره بت ترفض تسلم علي وتتخاطب معاي كدا ، الا يجي يوم وتبكي عشان اعاين ليها ساي ، وكلام امس دا بخليها تقول عكسو لاني زيـاد !! زيـاد يعني مافي بت بتقدر تعاملني كدا وتتجاهلني ومافي بت بتشوف نفسها علي!! - ابتسم بإستهتار وكمل كلامو - شكلها حتكون سنه حلوه ومميزه وفيها موضوع
خت يدينو في جيوبو ومشى
_________________
[ بعد مرور اسبوع / المدرسه ] ( جـودي )
كل البعرفهم في حياتي من طبعهم التأخير؟ اتلفتت للمره الاخيره وانا قاعده في مكاننا المعتاد وكويس اني لمحتها
جات وقعدت قدامي ومدت لي الاكل وهي بتشيل في نفسها : واي دي شنو الزحمه دي؟
عاينت للاكل وعاينت ليها : يـمنى ماكان في داعي تجيبي انا ما باكل فالمدرسه وانتي عارفه
وقفت بحماسها المعتاد بس بنظرات تحدي وفاجأتني وهي بتمسكني غصب وبتدخل الاكل في خشمي : اقيف الفتره دي كلها ورجولي تنمل عشان تقولي ما باكل؟ والله تاكلي غصب عنك فاهمه؟
باكل وبضحك قربت اتخنق من تصرفها الطفولي ، فالفتره البسيطه دي انا ويـمنى بقينا صحبات وبصراحه كان اسبوع حلو لاني واخيراً قدرت اصاحب
أنت تقرأ
مَن وراء الفخ ؟
Gizem / Gerilim" من وراء الفـخ " هي روايه سودانيه مميزه كُتبت بقلم جيـني وتم نشرها سابقًا في الانستقرام واليوم يعاد نشرها هنا ، تدور احداث قصتها حول جريمه قتل مروعه تحدث في محيط ثانويتين وتورط في ثنايا غموضها ٤ طلاب تربطهم علاقه بالضحيه بشكل من الاشكال ، ليكتشفو ل...
