مَن وراء الفخ ؟

١٨ | تخطي - النهاية

[ بعد ٤ سنين في نفس تاريخ يوم القبض على طلال ]
{ بيت كريـم ويـمنى } ( جـودي )

كنت بضحك على الشكله الشايفاها قدامي ، ماجد ورهف كانو بيلحقو يـمنى لانها شالت اكلهم وضيفتني بيهو ، نطت وراي وقالت : جـوووددييي الولد معاهووو حجر

من كتر ما ضحكت ما قدرت اعلق ، كان شكلو يضحك ياخي ورابط شي في راسو زي السلاحف حقين زمان ديك 😭😭😭 ، واخيرًا جا كريـم وحسم الفوضى دي ، ما حسمها بالدق طبعًا بكل بساطه ماجد ورهف اول ما شافوه عتقو يـمنى وجرو ليهو بـ فرح

كريـم شال رهف وحضن ماجد وكانت نظره الانكسار البتجيه لمن يشوفهم كل مره بتذكرني بتفاصيل اليوم داك ، هزيت راسي بـ خفه عشان ما اقلب الجو نكد وقمت سلمت عليه وقعدنا كلنا نتونس ومعانا خالتو ( ام يـمنى وكريـم ) وموضوعنا عن الحفله الحنسويها الليله لـ ماجد ورهف

_________________

[ في مكان تاني ]

كان واقف قدام قَبرها وهو مبتسم ، قال : الليله عيد ميلاد ماجد الـتاسع ، ورهف بقت في اولى اساس كمان ، اكيد متذكرنك ومشتاقين ليك لكن ما تخافي هم كويسين مع ناس كريـم ، اتطمني واتأكدي انو العملتيه في نفس اليوم دا قبل ٤ سنين ما راح ساي

{ نرجع لـ ورا للحظه الاخيره في بارت ٣٤ }

لما سمعو صوت الرصاصه اتجمد الدم في عروق كل واحد منهم ، زيـاد عاين لـ يـمنى ولقاها سليمه بس لما لف نظرو لـ كريم الكان ساحب نـاديه انصدم لما شافها مرميه وكريـم بيعاين ليها بـ صدمه وطوالي بقى بيحاول يسعفها ، طلال رفع مسدسو تجاه راس كريم بس وقبل ما يطلق سمع صوت حازم بيقول : النااس اتلمو ، خلينا نطلع

بعدها فعلًا الناس كسرو باب المقهى والشرطه جو قبل ما طلال وحازم يطلعو وانحل الموضوع

{ في الواقع }

قاطعت زيـاد رساله كانت من جـودي ، ابتسم لما شاف اسمها وكانت تسجيل صوتي ، فتحو ومضمونه صوت جـودي وهي بتملي ماجد الكلام اليقولو وهو بيقول " يا زيزو ما عايز تجي تحضر حفلتي ؟؟ ، جـودي همست بصوت مسموع : قول ليهو ما حنديك من الكيكه
ماجد رد : هوي دي كيكتي براي ما بديكم
جـودي شهقت بصدمه : الليلا !! انا موش صحبتك ؟ "
زيـاد ضحك عليهم وكتب " في الطريق استنوني "
قفل جوالو وعاين لـ قبر نـاديه مسافه وخت قروش ومويه كان شايلها ومشى لـ سيارته

_________________

جهزو حفله كبيره لـ ماجد عزمو فيها زملاءه وكل الاهالي جو بما فيهم اهالي ابطالنا

زيـاد لمن عاين لكميه الناس قال : كان ناقصنا خـالد بس وبنكون عزمنا السودان كلو

جـودي اتأففت وردت : احفظ معاي الشُفع ٢٥

زيـاد ضحك على كلامها

جـودي عاينت ليهو بـ طرف عينها : عفوًا بتضحك على احزاني ؟

مسك يدها وسحبها معاه لـ باب البيت ، جـودي عاينت للمنظر البرا وانصدمت لما شافت اطفال الحِله كلهم جو ، ضربت راسها بخفه وزيـاد كان ميت ضحك على شكلها ، قال : لسه ما شفتي شي ديل جزء بس من القاعدين في البلكونه

قاطعتهم يـمنى وهي رافعه جوالها وداقه فيديو على خـالد عشان توريه الحفله ، مرت من عندهم وصورتهم وهي بتقول : طبعًا شوف عصافير الحب حتى في الجوطه دي بتلقاهم سوا

خـالد ضِحك وسلمو على بعض وجـودي دفرت يـمنى بخفه عشان تشوف الاطفال الوراها كم 😭

قاطعهم كريـم وهو شايل رهف وبيفتش في ماجد الضاع بالغلط 😂

وكلهم اتونسو مع خـالد وضحكو زي كأنهم قاعدين سوا

_________________

اتلمو كلهم في مكان واحد حول الكيكه وجاهم كريـم جايب كيكه تانيه عشان تكفي الناس 😂 ، طفو الشموع واحتفلو بـ فرح ، ابو جـودي وحنـان جوها بـ شوق لانها كانت صابه كل اهتمامها وجهدها في عيد ميلاد ماجد وما قعدو سوا ، ابوها قال لـ زيـاد : قلت شنو في فكره سكنكم عندي في الفيلا ؟

زيـاد ابتسم : يا عم بتك دي انا بعمل ليها فيلتها براها ما لازم نثقل عليك

جـودي كانت ورا ابوها وبتأشر لزيـاد انو يوافق ويسكت عشان ابوها ما يفصل عليهم 😂

ابو جـودي مسك يدها وقال : لي سنين بعيد منها لازم تسكنو معاي ، وحتثقلو كيف وانا العايزكم ؟

حنـان برطمت وقالت : اي وانا كنت عايشه معاك عشان كدا ما لي حق في الشوق دا

ضحكو وابوهم ضماهم ليهو سوا وزيـاد كان بيعاين لـ جـودي بـ نظره كأنو بيقول ليها " اتصرفي "

جـودي ابتسمت ابتسامه عواره كأنها بتقول ليهو " المره دي يـا استاذ شيل شيلتك بس "

_________________

( يـمنى )

كنت بعاين لـ اصحابي بـفرح لوجودهم معاي ، لفيت بـ نظري لـ كريـم ، صاح انو قبل ٤ سنين حصل جرح كبير ليهو لكن وجود اخوان نـاديه معانا غَير كل شي ، اكيد ما حيطيب جُرحو ولا حيطلع من راسو المنظر داك ، اكيد كلنا ما حننسى لكننا حنعيش لانو دي الحياه ، ولو مافي صبر وتخطي ما كان في زول مشى لـ قدام ، عاينت لـ جـودي وزيـاد وكالعاده الفراشات عبت المكان ♥️🦋 " ، مع اني ما اتوقعت واحد بالميه انو دي تكون النهايه لكن اخيرًا قصه الحب الكنت خاتاها ليهم في راسي اتحققت واتتوجت بالخطوبه وبعد تخريجهم حتكتمل بالزواج زيي انا وخـالد