مَن وراء الفخ ؟

٦ | من القاتل ؟

اتجمدت مكاني لمن سمعت صوت مألوف بيسأل : بتسوي في شنو؟؟؟

الصوت دا انا بعرفو!! رفعت راسي بسرعه وكان زيـاد تاني ، قفل الشباك وقال : عايزه تسرقي؟ دي شنو دخله الحراميه دي؟

وقفت بتوتر ، دا الناقص!! هو بيعمل شنو هنا؟؟ سألتو مخفيه لتوتري : انت البتسوي شنو هنا؟

عاين لي وضحك ضحكه خفيفه ، قعد على كرسي مكتب المديره واتقدم للطربيزه : دا مكتب امي

زيـاد المتخلف ولد مديره الروضه المحترمه دي؟؟ يعني انا حأحتاج مساعدتو مره تانيه؟

عاينت للسقف وانا بدعي الله يحلني من المصيبه دي لانو الغبي دا لو كلم امو اني جيت حأنتهي

وقف قدامي بإبتسامه عبيطه : محتاجه مساعده؟ - اتحولت ابتسامتو لإبتسامه غرور وكمل - اطلبي اطلبي مافي داعي للخجل

اخدت نفس وقلت بإبتسامه مصطنعه : اي محتاجاها ممكن تتكرم وتساعدني؟

عدل وقفتو وقال : الله يخليني يعني ما بقول لا وكريم وطيب وبدي الناس من وقتي

هزيت راسي بتآييد وابتسامه مزيفه : اي ماشاء الله عليك لاحظت الشي دا من اول ما شفتك

ابتسم نفس ابتسامتي : جد؟ وانا لاحظت انك صريحه ومبتجاملي فبقدر اسألك عن سبب وجودك هنا واسمع الحقيقه صح؟

شديت على يدي بقوه بس اخدت نفس تاني وقلت : سبحان الله الليله انا جاملت كتير

كان واضح انو ماسك ضحكتو لمن قال : انتي بت ولا حَله بريستو؟ كل 5 دقايق بتتنفسي كدا لكن الفرق بينك وبين الحَله هو انها بتطلع بشي حلو وانتي بكلام فارغ

ضياع وقت!! دا كل الطلعت بيهو من جيتي لهنا بس اتحول الغيز لخوف لمن سمعنا صوت مقبض الباب بيتحرك ...

_________________

[ في المكان الاتفقو عليه ] ( يـمنى )

اول ما طلعنا من المدرسه البت اختفت !! رسلت ليها اللوكيشن حق الموقع وانا متأمله انها حتشوف الرساله لكن تركيزي الاكبر كان مع خـالد وكريـم البدو يزهجو

كريـم وهو بيلفلف : جـودي حقتك دي ما حتجي؟ حنبيت هنا؟

رديت بهدوء : بتجي اصبر

خـالد عاين لساعتو وقال : اسي الساعه 3 عندك لين الساعه 5 لو جات خلاص لو ما جات انا بمشي

كيف حتجي فالوقت القليل دا؟ مستحيل انا ما قادره اصل ليها اسي حتجي في ساعتين كيف؟

عاينت ليهو : لـ7 عادي؟

وقف وقال : لا انتي ما صاحيه 7 شنو؟ يعني 4 ساعات هنا؟

وقفت ورديت بنفس نبره صوتو : وانت يا رئيس الولايات المتزفته حتخسر شنو لو قعدت هنا؟ وراك شي مهم شديد كدا واوراق عايز توقعها؟

اتكتف واتقدم تجاهي : يعني لازم يكون عندي اوراق عايز اوقعها عشان احافظ عالمتبقي من يومي؟

قاطعنا كريـم وقال : لا 5 لا 7 اخر شي 6 لو جات خلاص لو ما جات انت ترجع لوقتك وانتي تريحينا من تصرفاتك الغريبه

_________________

[ المقر الاتفقو عليه ] ( جـودي )

عاينت لجوالي وكانت الساعه 5:35 معقوله انا قطعت المسافه دي كلها برجولي؟ عاينت للوكيشن واتأكدت انو دا المكان الصحيح وطوالي دقيت الباب وكلها ثواني ويـمنى فتحت لي وابتسمت : اخيراً !! وين كنتي اتأخرتي

كنت بشيل في نفسي وانا بتذكر الحصل : انسي قصه طويله

دخلت ولفتني الديكور ، كان ديكور خشبي وفي شاشه كبيره وسبوره ذكيه وكان في طربيزه كبيره في النص حولها 8 كراسي وكان في لابتوبين في طرابيز جانبيه ، مكان ملفت وفخم بكل معنى الكلمه

قاطعني صوت يـمنى وهي بتقول : اتمنى يكون عجبك لانو حتجي هنا كتير

استغربت وقلت : اجي كتير؟ ليه؟

يادوب انتبه للولدين الواقفين في الجهه التانيه من المكان

يـمنى اشرت على اول واحد : دا عبدالكريـم - اشرت على التاني وكملت - ودا خـالد ولد خالتي واخو آسر الله يرحمو

ابتسمت ابتسامه تسليكيه وعاينت ليـمنى بنظره في شنو وانا بعمل شنو هنا؟

_________________

بعد ما يـمنى حكت الموضوع بكل تفاصيله

وقفت وبدون اي تردد وقلت : ما عايزه

خـالد وقف وراي وقال لكريـم : اختك دي فطرت بشنو؟ مبتكون واعيه

يـمنى وقفت معانا وقالت بإصرار : الحياه مره وحده مالكم خايفين كدا؟ ليه ما نجرب ممكن نصل لشي ولا عايزين حق الطفل المسكين يضيع كدا؟

قعدت وانا بتذكر آسر وحسيت اني بالجد عايزه اعرف القتلو منو : المشكله مافي طرف خيط حتى نقدر نمسكو ونبدا منو

كريـم بتفكير : لازم يكون في شي ناقص

يـمنى عاينت لخـالد الكان متمسك برأيو وقالت : اخوك الصغير انقتل وقاتلو عايش ومستمتع بحياتو وانت لسه معاند ومـُصر انك ما تتدخل؟ خلاص اتفضل امشي!!

كان طالع بهدوء بس وقف لمن سمعني قلت : ممكن اعرف جثه آسر لقيتوها متين؟

رد بحده : يوم السبت 3 ظهر

كملت كلامي بتفكير : ما كان يوم مدرسه يعني؟

يـمنى : اصلا هو وخالتو كانو برا ورجعو ما بين 11 و12

كريـم : كيف قتلوه قدام البيت وما لاحظو زول من الشارع؟ وما اتعرف ميت الا لمن خـالد طلع شافو

خـالد لف وهو مستغرب وجا قعد : دا يعني الجريمه ما حصلت قدام باب البيت

عاينت ليهو : بالظبط!! حصلت في مكان تاني

يـمنى : القاتل ما كان حيقدر ينفذ الجريمه لو ما كان عارف بوقت رجوع خالتو وآسر!!

خـالد وهو ناسي رفضو للموضوع : يبقى اكيد واحد من معارفنا

يـمنى وقفت وختت يدها قدامنا وقالت : حنلقى الخيط كامل بدون الشرطه لو اتعاونا سوا

ختيت يدي فوق يدها وكريـم خت يدو وخـالد لف نظرو مننا واخد نفس : بنشوف اخر القصه دي

• ومن هنا بدينا مشوارنا تحت سؤال مين القاتل؟