مَن وراء الفخ ؟

٥ | خطوة جودي

[ غرفه كريم ] ( يـمنى )

قعدت على السرير بيأس وكريـم كان بيلفلف فالغرفه ولف لي راسي معاه فقلت بزهج : اقعد الحكايه ما ناقصاك ! وترتني

عاين لي وضرب راسي بأصبعو : صوتك دا وطيه بعدين اذا دي القصه جايه خانقاني مالك؟ وبتفكري في حل للموضوع دا بدون شرطه كمان؟

وقفت بنرفزه وقلت : خـالد قال في رساله تهديديه نكلم الشرطه كيف؟ - رجعت لحيرتي وكملت - بعدين قصه سفر ابوه دي غريبه ولدو مات كيف قِدر يسافر؟

كريـم ارتمى على سريره بتعب من التفكير وقال : الموضوع دا عايز ليهو زول ذكي وهادي وبيقدر يربط الامور ببعضها ، وانا شخصيـ....

شهقت بفرحه وقاطعتو وقلت : جـودي!!

عقد حواجبو : جـودي؟

بقيت بلف وبدور بحماس : انا كيف ما خطرت في بالي الفكره دي ؟ بقدر اكلمها وهي حتلقى لينا الحل - عاينت ليهو وكملت - بكرا لازم نمشي المدرسه

حك راسو بعدم فهم : جـودي دي منو؟؟؟ ما تدخلي الاغراب في امورنا - رجع ارتمى على سريرو وكمل - بتتكفتي

قلدت طريقه كلامو بإستهزاء وطلعت وانا مبسوطه ، اخيراً لقيت الحل ، جـودي ذكيه وهاديه واكيد حتساعدني

_________________

[ اليوم التاني / شارع المدرسه ] ( جـودي )

طلعنا بدري الليله، كنت عايزه اصل للروضه قبل المديره لكن لمن عاينت للروضه بطرف عيني كانت المديره يادوب دايره تدخل وفي زول واقف معاها !!! زيـاد؟؟

لفيت على حـنان وطلبت منها توقف السياره ورجعت عاينت ليهم ، الولد دا عايز يصل لشنو؟ ليه كل مره بلقاه سابقني بخطوه؟؟؟ كيف بيعرف انا عايزه اعمل شنو وبيمشي يتصرف قبلي؟ كان بيتكلم معاها ويضحك وهي بتضحك دا بيكون قال ليها شنو؟ قاطعتني حـنان وهي بتلوح بيدها قدام وشي : الو من الارض لكوكب زحل هل تسمعني؟ عادي احرك السياره؟

هزيت راسي بتآييد واتحركنا ، كيف كنت حمشي للروضه ودا واقف هناك؟ للاسف شكلي حمشي نهايه اليوم

_________________

[ الفصل ] ( يـمنى )

البنات كانو ملمومين فيني وانا كل انتباهي متوجه على الباب إنتظاراً لجـودي

سماح اتكتفت : شنو يا بنات يـمنى جات من حرب؟ ما تمشو تشوفو ليكم شغله ولا واجب ولا شي

وحده من الطالبات : قال يـمنى دي صحبتكم براكم؟ عامله راسك المدوقس دا

سماح : واو يا سبحان الله بقت صحبتكم هسي؟ يا حبكم للشمارات

يـمنى ضحكت : سماح روقي

روابي سحبت يـمنى : كلامها صاح على فكره البنات ديل منافقات

قاطعنا دخول جـودي ، اتوسعت عيوني والابتسامه وصلت للمريخ وهي كمان فرحت بشوفتي ، قمت وجريت وحضنتها ، اخيراً حتبدا رحلتنا يا جـودي

_________________

[ مدرسه الاولاد ] ( زيـاد )

دخل لينا الاستاذ وقال ان الاستاذ العلينا فالحصه دي غايب فعندنا فراغ ،، كالمتوقع الطلاب مشو لخـالد وكريـم بسبب اشاعه القتل الانتشرت والله اعلم اذا هي اشاعه ولا لا!! لكن الشي الما عارفو هو منو الانقتل؟

مشيت لجهتهم وانا بحاول اتجاهل الكره المتبادل بيناتنا : احسن الله عزاءكم

خـالد وهو بيعاين للخاتم اللابسو بثبات : لله ما اعطى ولله ما اخذ

سألتو وانا عارف انو حيقول مالي علاقه : منو المات؟

عاين لي بنظره حاده : حتستفيد شـ...

قاطعو كريـم وقال : اخوه آسر

آسر؟؟ ساقني التفكير من كراسيهم ورجعني للكرسي حقي ، جـودي كانت بتسأل عن آسر اليوم داك؟

[ في ذاكره زيـاد ]

جـودي عاينت لي بسرعه : خـالد ابراهيم؟ عندو اخو فالروضه الجنبنا دي؟

* كلام جـودي من حوار دار بينهم *

[ في الواقع ]

مسحت راسي ، انا كيف فاتت علي النقطه دي؟ اكيد في حاجه!! وهو كان طالب في روضه امي ليه امي ما اتكلمت لي عنو؟ شكلي حأضطر امشي لمكتبها بعد المدرسه واعرف براي في شنو

ابتسمت تلقائياً وانا بتذكر ابتسامه جـودي اليوم داك

_________________

[ حديقه مدرسه البنات ]

عدت الحصص عليهم بسرعه لحدي ما جا وقت الفسحه وقضوها ونسه لين ما وصلو لموضوع سبب غياب يـمنى اللي جـودي كانت بتتهرب منو لانها عارفاه

يـمنى بحزن : ولد خالتي الصغير مات قبل كم يوم عشان كدا غبت ، غريبه ما سألتي لكني محتاجه مساعدتك

جـودي ابتسمت بشويه إنكسار وهي بتتذكر آسر وقالت جواها : انا عارفه كل شي وحساعدك بدون ما تقولي

يـمنى كملت كلامها : عايزه الاقيك بعد المدرسه عشان اوريك تساعديني في شنو

جـودي عاينت ليها وكسرت حاجز صمتها : انا عندي شي الليله بعد المدرسه فبـ...

يـمنى قاطعتها ومسكت يدها : لازم نتلاقى لانو شي ضروري - كملت جواها وقالت - كلمت خـالد وكريـم واقنعتهم بعد تعب نجتمع وهم ما عارفين السبب لازم توافقي يا جـودي

جـودي هزت راسها بتآييد وهي عارفه انها ما حتجي الليله

_________________

[ بعد المدرسه تحديداً برا الروضه ] ( جـودي )

طليت على الروضه من جوا وكان في طلاب كالعاده مرصوصين وناس التراحيل وجوطه لكن دا الوقت المناسب لدخولي لانو مافي زول حيركز مع الزحمه دي ، اتسللت وقدرت اصل لمكتب المديره بهدوء وسهوله ولحسن حظي ما كان في زول ، قفلت الباب بهدوء وجيت عايزه اعدي لقيت الشباك مفتوح فنزلت وبقيت بحبي بس حسيت بصوت خطوات متجهه لي واتجمدت في مكاني لمن سمعت : بتسوي في شنو؟؟؟