مَن وراء الفخ ؟

١٧ | هم وراء الفخ

( زيـاد )

اتونسنا لمن وصلنا لموضوعها مع معـاذ ، قلت : بخصوص نقلتك والصدفه اللمتنا كنت بشوفك مع معـاذ كتير و...

قاطعتني وقالت بشويه خجل : كنت بتراقبني يعني ؟

ابتسمت ومسكت يدها : طبعًا ! يبقى حب من اول نظره كيف ؟

شدت على يدي وقالت : ما تخاف معـاذ دا اصلو مشارك معاي في ... - سكتت ، اتذكرت انها مفروض ما تقول -

اول ما شفتها سكتت قلت : لو ما بتثقي فيني وما بتحبيني شديد زي ما انا بحبك فـ خلاص انسي

بعد تردد وسكات دام لـ دقايق اخيرًا اتكلمت وقالت : ...

_________________

[ مكتب طلال ]

حازم دخل ليهو مكتبو بدون سابق انذار

طلال عاين ليهو بـ استغراب وعصبيه في نفس الوقت وقال : دا بيتك ؟؟ - رفع مسدسو -

حازم وهو بيلتقط انفاسو قال : الوللدد الشاف معـاذ اليوم داك الكنا عايزين نقتلو لـ...

طلال قاطعو وقال : انا قلت ليك ابعد من الموضوع دا !! - صوب المسدس تجاه راس حازم وكمل - والله دفن ما بدفنك !

حازم قال بسرعه : لقيت الولد قاعد مع نـاديه في كوفي فيه كاميرات مراقبه - سكت شويه وكمل - والسكين طلعت مع اصحابو كمان لقيناها في الحته البيمشو ليها دايمًا ديك

طلال من الصدمه الانصدمها نزل المسدس وختاه في الطربيزه

_________________

( جـودي )

كنت بمشي وانا بفكر بكل شي عشتو في الفتره دي ، جريمه وجوطه ولقيت اصحاب بعد سنين الوحده ديك ، ابوي جا بعد فوق الـ ٨ سنين غياب ، تاني شنو ؟! شنو الشي الما حصل لي ؟ اتذكرت ! انا ما مُت بس ..
ضحكت بخفه وكملت مشي عشان اصل لمُستشفى حنان القريبه من هنا شديد وصبيت المتبقي من تفكيري على الاحساس الحسيت بيه وانا بشوف زيـاد مع نـاديه ، بياتو حق انا اتضايقت ؟

_________________

( يـمنى )

زيـاد جانا وكان متأثر ، في الوهله الاولى اتأكدنا انو ما نجح ! ، طَلع جوالو وقال : البت دي ما كعبه ، غبيه بس وورطت مع ناس هي ما قدرهم فـ لازم نخارجها

كريـم رفع اكمام قميصو استعدادًا للشكله وقال : حبيتها وعجبتك ؟؟!

زيـاد رد : ياخ حب شنو اسكت واسمع

فتح التسجيل وسرعو للحظه اللي قالت نـاديه فيها : " اكيد بثق فيك وبحبك لكن الكلام دا ما يطلع ، المهم انا ومعـاذ شغالين مع ناس كدا حقين تهريب

زيـاد سألها : تهريب شنو ؟

نـاديه ردت بنبره ندم : بيهربو ممنوعات واسلحه وانا عارفه انو دا شي كعب وخطير لكني محتاجه قروش اسند بيها اخواني الايتام

زيـاد عَرج شويه من الخطه وقال : مهما كانت حاجتك دا ما مبرر للغلط

نـاديه بعبرَه قالت : عارفه بس اسوي شنو .. "

_________________

خـالد قاطعهم واشر ليهم على شاشه كاميرا المراقبه وقال بـ تدقيق : نـاديه ! ليه رجعت تاني بعد ما مشت ؟!

كلهم اتجهو للشاشه بصدمه مصحوبه بإستغراب

يـمنى بخوف : كأنها قاعده تكسر في جهاز انذار ... - قبل ما تتم كلامها جهاز انذار الحريق رن والناس جرو من المقهى بـ تدافع وزحمه ، كملت بخوف - الحريق !!

سابو مكان الكاميرات وكريـم مسك يـمنى عشانها كانت خايفه شديد ، رغم استغرابهم الا انهم متأكدين انو مافي حريق ! لمن نزلو كان المكان فِضى والناس زحو من المطعم مع بقاءهم في محيطه وما بقى فيه غير نـاديه اللي انصدمت لما شافتهم وقبل ما تنطق بشي قاطعتها مُداهمه طلال بحد ذاتو وحازم معاه وقفلو الباب بحديده وراهم !!

( المطعم ما بـ قزاز عاكس ، المطعم بـ حيطه يعني البرا ما بيشوفو الجوا ، ومع الزحمه وعدم التركيز من الناس طلال وحازم قدرو يدخلو بـ سهوله )
_________________

( زيـاد )

انغدرنا ! ، رفعت جوالي بخفه ورسلت لـ جـودي اللي لاحظت انها ما موجوده كلمه وحده بس قبل ما يقاطعني الراجل بـ كلامو

_________________

كان ماسك مسدسو وبيتمشى بخطوات ثابته : انتو الطلاب الختو راسهم براسي وعوقو شغلي ؟ وشلتو السكين كمان ! طيور جنه

زيـاد بهدوء وثبات قال : انت الطير جنه نحن رجال ولو ما رجال برضو ارجل منك

طلال عصب ورفع مسدسو على زيـاد بس واجهتو نـاديه وقالت بخوف وترجي : ما تسوي ليهم شي خليهم

طلال صرخ بعصبيه : اسكتي ، مافي زول حيمرق حي ، دي عواقب اللعب معاي

زيـاد كان بيفتش بـ انظارو عن حازم الاختفى فجأه

كريـم لما اتأكد انو طلال ناوي يضرب بالمسدس في اللحظه دي اتقدم بسرعه وسحب نـاديه ، يـمنى صرخت بـ خوف وقالت : انتبه !!

وسمعو صوت الرصاصه الكانت متوجهه للرأس مُباشره ...
_________________

[ عياده حـنان ] ( جـودي )

رفعت جوالي عشان اتصفح واستغربت لمـا شفت اشعار من زيـاد وكانت رساله مضمونها " الشرطه " ، الشرطه ؟؟ وقفت على حيلي وانا بستوعب ، اكيد حصل شي

قاطعني دخول حـنان ، قالت : يلا ارح..

ما تمت كلامها الا وانا طالعه بسرعه ورافعه جوالي ، اتصلت على الشرطه وانا عارفه تهاون الامن في السودان ، وعارفه انو الموضوع ما حيمشي الا لو مشيت براي قبل ما يجو ، كلمتهم بدون حتى ما اتأكد وقلت ليهم في جريمه قتل بسلاح وانا بتمنى انو كلامي يكون غلط بس قلت كدا عشان يتصرفو بـ جديه ووصفت ليهم المكان ، سرعان ما قفلت الخط جريت بـ اتجاه الكوفي ، ولما قربت لاحظت تجمهر الناس قدامو !! ، حسيت بنبضات قلبي وقفت ! ، معقوله الحكايه السردتها للشرطه حقيقيه ؟