=لو سمحت
_فتّح عيونه وشال الهاند فري_نعم؟!
=ممكن نبدل واقعد انا من ناحية الشباك!
حط الهاند فري وغمض عيونه، ومتكلمش
استفزنى جداً= ايه قلة الذوق دي!
فتح عيونه_ وانتِ لما قولتيلى يا أعمي دي مش قلة ذوق؟!
سكتّ دقيقه أفتكرت من شويه فيه واحد خَبط فيا وانا ماشيه بسُرعه خايفه القطر يفوتنى، وقولتله يا أعمي من غير ما ابص عليه، يعنى هو دا الاعمي اللى خبط فيا!
=يعنى كمان أعمي وقليل الزوق!
_وانتِ لسانك اطول منك
=انا مغلطش لما قولتلك يا أعمي عشان انت اللى خبطّ فيا مش انا، وكمان قليل الزوق لان انا كنت بكلمك بزوق واحترام وانت مردتش عليا.
غمض عيونه ورد بهدوء_انا مش هرد عليكى واعمل عقلي بعقلك
ايه الانسان المُستفز دا بجد منه لله عكرلى مزاجى، انا كنت عايزه اقعد ناحية الشباك، انا بحب أقعد ناحية شباك اي حاجه، بحب أشوف السما والبيوت والشجر والطريق وانا بفوت عليه بسُرعة العجل.
الطريق كان طويل جدا، انا مبعرفش انام في مكان فيه دوشه او صوت حاجه بتمشى، بس من التعب نمت مكملتش ساعه وصحيت مش عارفه انام بصيت في ساعه ونمت تانى وصحيت برضو مره تانيه بس المره التالته نمت حوالى ست ساعات من غير ارق ولا اني اصحى وانام، صحيت بس كانت دماغي مسنوده على كتف وايدي ماسكه ايد، وايدي التانيه ماسكه دراع، يارب مايكونش اللى في بالي لا، دا كتف المستفز وكمان ماسكه ايده، سبتها بسرعه وعدلت دماغي مكنتش عارفه اقول ايه بس كان نفسى اتوأد وقتها، بس هو كانت ملامحُه هاديه ونايم لحظى الحلو فاحمدت ربي انه نايم لان كنت هتكسف خالص لو كان صاحي، شويه وصحى وشويتين والقطر وصل المحطه نزلت ودورت على اقرب كافيه وقعدت فيه.
طلبت عصير مانجا وطلعت النوت بتاعتى وتليفون كنت بكتب خاطره من النوت وبنشرها على الاكونت بتاعي، ومشيت من الكافيه مروحه، بس دقيقه انا ناسيه حاجه! انا نسيت النوت بتاعتى يلهوي رجعت الكافيه وبصيت فى المكان اللى كنت قاعده فيه مش موجوده، لسه كنت هسال اي حد فالكافيه بس لَمحتها فـ ايد واحد برا الكافيه وماشى، خرجت بسرعه وانا بنادي=استنى لو سمحت دقيقه
بص عليا كان نفس الشخص بتاع القطر=انت تانى!
_شوفتى الصدف
اتكلمت وانا بمد ايدى=صدف منيله، هات النوت بتاعتى اللى فايدك
رفع ايده لفوق عشان مطولهاش_لا
=ايه اللى لا دي بتاعتى
_لو عيزاها تعالى بكره نفس الكافيه بعد بكره الساعه 9 الصبح عازمك على عصير مانجا.
مِشي قبل ماتكلم ولا اعترض وانا مستغرباه جدا، وبعدها بيومين الساعه 9 كنت في الكافيه رايحه عشان اخدها لاقيته مستنينى روحت وقفت قدامه=هات النوته بتاعتى لو سمحت
_مش فيه صباح الخير الاول! اقعدي الاول ياسمسم
=انت ايش عرفك ان دلع اسمى سمسم
_يمكن عشان اسمك مكتوب علي النوته من برا مثلا! اقعدي يلا
=قعدت هاتها بقى
_يابنتى انتِ مش طيقانى ليه! انا مش قولتلك عازمك على عصير مانجا فـ اشربيه بعدين امشى
=شكرا مش عايزه
ابتسم وهو بيرجع لورا_ماهو دا شرطى عشان تاخديها
اتكلمت بغيظ=طيب
الصمت دام للحظات قطعه هو_هُما الناس اللى بيتجوزوا دول علي اساس ايه بيتجوزو! الحب بس؟!
بصيت قدامي وانا برتب فى الكلام اللى هقوله= المفروض على اساس الامان
_الامان!
=ايوه الامان احلىٰ من الحب، الامان انك تبقى مِطمن لانك مع شخص بيحسسك بالامان فـ ترمى نفسك بتُقلك كله عليه وانت واثق انه هيستحملك، تعريّ نفسك قدامه وتقوله كل حاجه جواك وانت مطمن له وواثق انه هيفهمك حتي اكتر من نفسك، نظرته ليك امان، ايده امان، وجود ظله بس بيحسسك بالامان، وحُضنه اكتر مكان آمن ليك في العالم كله،
الامان بيجُر الحب من رجليه ويخليك تبنيلُه من الحب قصور.
كان بيسمعنى ومبتسم_اشربى العصير
مسكت الكوبايه وشربت= ممكن بقى تجيب النوته انت فرهدتنى
بصلى باستغراب ورافعلى حاجبه_فرهدتك! طيب ياستى اتفضلى النوته اهي
خدتها وكنت ماشيه_استنى انتى نسيتى حاجه كمان
=نسيت ايه؟!
_نسيتى تسألينى على اسمى
انا فعلا بنسى اسأل على الاسماء، بس انا مالى بأسمه اصلا
_احمد... اسمى احمد
مشيت وانا مستغرباه جدا كان مختلف، وكنت مستغربانى لان حاسه بحاجات كتير اولهم انى عايزه اشوفه تانى، عايزه احس الاحساس اللى كنت حساه وانا قاعده جنبه تانى وعلى طول.
شوفته كذا مره فالكافيه نفسه كنت بروح على امل انى اشوفه، وفعلا شوفته اكتر من مره وجه اتكلمنا عرفت انه متابعنى على الفيس من زمان وبقينا صحاب، لا مش صحاب هي علاقه مش لاقيه ليها مسميَ ظاهريا غير صُحاب بس احنا كنا شايفين بعض اكبر من كدا، حب! مش عارفه بس عايزه اكمل حياتى معاه حاسه شعور حلو وهو جنبى، شعور الامان، الشعور اللى لمسته في روحه اللى شبه روحى وكأنهم كانو روح واحده في يوم من الايام.
_القعده فالبلكونه في نص الليل حاجه اخر عظمه
=اه والله نفسى اجربها
_طب وايه المشكله!
=ماما مربيه بط فالبلكونه
ضحك وانا قلبى وقع منى مع ضحكته اللى سمعاها وانا بكلمه
_وايه يعنى روحى اقعدي معاهم ويزيدو بطه
=يجدع؟!
_اوماااال
_بتحبى البط؟!
=لا
_احسن
=اشمعنا؟!
_عشان مبحبوش لا هو ولا الفراخ ولا الارانب والا الوز
=اومال بتحب ايه
_حاجات كتير بس بحب جدا المكرونه بشاميل والبيتزا وانتِ
=وانا كمان برضو بحب المكرونه... ايه! انت قولت ايه اخر حاجه؟!
_بحبك انتِ، وعايز اكمل حياتى معاكى انتِ لان لاقيت الامان معاكى، الامان سَكن روحي وقلبى وانا من يوم مادخلتي حياتى، وانتِ الوحيده اللى معنديش مانع اني اظهرلها كل اللى جوايا لان متاكد انك هتفهمينى وهتطمنينى بنظره من عنيكي، وانتى برضو بتحبينى وبتحسى بالامان معايا من اول يوم شوفتينى فيه ساعة مانمتى اول ماحسيتى بالامان في قُربى، فاهتتجوزينى بما يرضى الله ولا اخطفك واتجوز بما لا يرضى الله؟!
وبس يا ياسو انا وبابا اتجوزنا واهو حاكيتلك اتعرفت عليه ازاى.
سمعت صوت الباب بيتفتح
=انت جيت يا احمد
كان باصصلى بقلق_اسماء انتِ كويسه!!
=اه ياحبيبى الحمدلله مالك فيه ايه
_اصل وكاله ناسا بيقولوا ان القمر اصطدم في جسم غريب فـ بسال اطمن عليكى
ضحكت=يولااا!!
_ياقلب الولا وعيون الولا وروحه
"لم يكُن أول لِقاء بل تلاقت أرواحنا من قبل
