أبنتي ولكن

البارت الخامس

أبنتي ولكن
بقلمي،،،
زهراء الشمري،،،
البارت الخامس،
انت لو شفت السواد الجوه عيني°°
ما مشيت
لو دريت شگالت الوادم عَلَي من فارگتني°°
چا بچيت
شگد گلتلك انه لو ما انت اضيع
وچي گلتلك هل عفتني
شگد بقيت مچلب بمگفاك حد ما °°
ضَل قميصك بين اديه وما ردتني
آنه ذنبي تعوّديت وانت ذنبك تَيَّهتني °°
.................. ..................
ملاك_اشتغل بغرفة حسن واسمع هلاهل وهوسه
بيت ام تحسين استغربت شعدهم
يجوز تحسين رجع للولايه
كملت شغلي وايه وملاذ وياي ما عافني ولا كأنما
بغداديات حالهن من حالي يشتغلن
طلعت للطرمه ويصير بوجهي مصطفى ابتسمت بوجهه يبيي ابتسامته تسحر
خرب لشت الخلفك على هل خلفه الجابوهه ودوهنو
گلبي بيهه
ظلينه واحد صافن بالثاني دخل حمزه انتبهلنه
حمزة _بصوت عالي ملاك بعد تعاي گابلي وگعدي
ثردي سوالف وياه
وانته الثاني داخل جوه مادگول البيت بي نسوان لو عدكم
سيح شلح واعبر
ملاك_اباوع على مصطفى حيل ظاج وعصب منه
وطلع بسرعه ماراد يسبب مشكله
وانته شكو اخوي ابوي تتحكم بيه وبعدين ماتستحي شايفني گاعده ومسولفه وياه لو مصاحبته شو انته ماتعرف تحجي
عفته وطبيت للمطبخ حيل ظجت منه هو يتعمد
لان يخافون هو وامه مصطفى يخطبني ويطير من اديهم زنگين ومايردون يفرطون بي
دزيتله رساله
حبيبي فدوه اروحلك لا تظوج
امسحهه بوجهي هذا ابن عمي مايعرف يحجي
ماجاوب على رسالتي ظليت احوس اريد بس اشوفه
بس ما حصلت فرصه
انترس الشارع زلم وهوسه دخل احمد
_اگلج خويه شو بيت ام تحسين يمهم نسوان وزلم ويهلهلون صاير شي واحد من الولد خطب
ملاك_والله ياخويه ما ادري باجر اروح واشوف شعدهم
التمو الزفافه واخذو سيارة مصطفى زورقوهه
اباوع على ابوي گاعد على الكرويته بالطرمه وجهه
اصفر وتعبان بس مبتسم رحتله اتقربت منه
بسته من اعگاله دنگت على ايده وبستهه افيش ياريحتك يابويه يروح كل التعب مني وعلي
ياعمود بيتنه
ابو حسن_الله يرضى عليج ابنيتي بويه ملاك
وانه شعدي غيركم بويه راح تجي البت مرة اخوج
بعد ابوج هاي خطيه راح تعوف اهلهه اول ايام صعبه عليهه ماتعرفنه ماتعرف اطباعنه
اريدج وياهه وياهه لاتخلينهه وحدهه علمود تتعود
بعد ابوج انه ادري بيج كحيله وما ينخاف عليج
ملاك_ابوي يسولف وما احس الا حمزه وابو وامه
السلام عليكم شلونك خويه
ام حمزه_روحي جيبي كراسي لعمج وابن عمج
ملاك_احجي بگلبي ياربي شگد اكره هاي المره عيييييييع شگد غثيثه تدللين رحت جبت كراسي
گعدو عفتهم ورحت للمطبخ
ام حمزه_ماتحجي ابو حمزه شبيك ساكت يحظي
گل لخوك شتريد منه
ابو حسن_گول خويه لايردك السانك
ابو حمزه_والله خويه حمزه هاوي بنيت عمه ويريد
ملاك تصير حلاله وانته تعرف بنيت العم لأبن العم
احسن ماتروح للغريب
ام حمزه_اي هي هم عايزه تروح للغريب جا شبي ابني يعادل عشر زلم ماتلگه احسن منه
ابو حسن_والله ياخويه شگلك خل اشوف البت
واخوتهه وانه اردلك خبر
حمزه_عمي بس انه اريد الموافقه منك شعليه بملاك واخوتهه
ابو حسن_لا بويه انه رايي ما اله قيمه اهم شي راي ملاك اشوفهه راضيه بيك لا
ملاك_اباوع عليهم نقاش حاد ثلاثتهم محاوطين ابوي وما ادري شيردون منه
رحنه للزفه جبنه العروس واجينه اجرو كوستر للنسوان فرونه بشارع العام شويه ورجعونه للبيت
بس مكان رحاب خالي متعوده على وجودهه وياي
رجعنه للبيت جابو طباخ سوه العشه
دخلنه العروس للغرفه وصبينه عشه للنسوان
خليت خالتي ام مصطفى والبنات وي ام العروس واختهه سفره وحدهم وام حمزه تغزر بيه
تريد تكتلني واني ولا جني اشوفهه مطيزتهه
تعشو وكملو سوينه طريق للعريس زفو اصدقائه وخواني يدفعون بي ويسوله حركات ما افتهمتهه ابد
مال مزوجين زفينه بصاية حيدر زفيناه بصاية حيدر
زفينه واخلصنه منه بعد عليوي الاصغر منه
ما اريد العشه زفوني ما اريد العشه زفوني
كلللللللللللللللللللللللللوش كلللللللللللللللللللللللللوش
اصوات الهلاهل وخواني فرحانين ومصطفى بينهم يرگص عبالك واحد منهم
اباوع عليهم وعيني دمعت گلتلهم الله يديم فرحتكم
دخل حسن والفرحه مرسومه على وجهه قفل الباب وراه وكلهه منتظره حسن يطلع والبشاره وياه
ساعتين ونص وطلع انطه العلامه لأبوي رفعهه
بعوجيته وهوس بيهه
فرحانين ومتونسين كفت الناس بيت عمي ابو حمزه
رجعو لبيتهم بقى بس حمزه وي الولد
والجيران كلمن راح لبيته بقو بس اهل مصطفى
وگرايبنه من الناصريه جاين
فرشتلهم بالأستقبال الزلم والمخزن قبل العرس نظفته وسويته غرفه فرشت للنسوان بيهه
طلعت اغسل الطارمه شديت الحجاب على شعري لفيته ليوره لان كاويه شعري بالأوتي وفاتحته
بديت اغسل الطارمه وما احس الا واحد يجرني من شعري ويشم بي
ابتسمت والتفتت حسبالي مصطفى
وانصدم بحمزه جريت شعري بعصبيه بصوت عالي
_انته ماتستحي شنو هاي الحركات مال شوارع
مو عيب عليك هسه اذا أگل لخواني عليك اخليهم يگطعوك طاح حظك اي والله
حمزه_انتي صدگ جاهل ولج غير بنيت عمي وبعد اسبوع تصيرين حلالي واخليج بحظني
ملاك_انته صدك ماتستحي بس ماينعتب عليك امك ياهي ولك تحلم تلوح اظفر من اظافيري
اتقرب عليه ولزمني من شعري جرني
_غصبن ما عليج وعلى اخوتج اخذج واكسر راسج
ملاك_گمت اصيح وهو يجر بشعري
خايب گلابك وشيگلابك هي هم عايزه اصير عد امك
من اعرف اظل طول عمري ابيت ابوي وما اخذك
طلعو اخوتي ومصطفى على اصواتنه
احمد منا ظايج وطالعه روحه على رحاب مايعرف اخباره اخذو منهه النقال
ويريد بس واحد يحجي وياه يطلع حرگة گلبه
احمد_ها شبيكم شبيج ملوكه ليش تصيحين
ملاك_خويه هذا ابن عمكم ماعنده شرف
جاي انظف الطارمه ويتحرش بيه
ومن رديته يگلي انتي الي غصبن عليج وعلى اخوتج
احمد_حميزه هم صار بجسمك ريش وگمت تعرف تسولف خايب عشره مثلك ميفرضون علينه شي هنا اسحلك سحل
ولك گو....... د سرسري هاي عرضك بدال ماتحافض عليهه تتحرش بيهه وتبجيهه
ابن القند........ ره والعباس اخو زينب اكسرك اذا توصل يمهه بعد وماعدنه مره خوش
مصطفى_حمزه ميصير منا ناس عيب وزحمه
حمزه_انته اخر واحد يحجي خوش رجال غريب
بس هو العتب مو عليك على ولد عمي اليحجون بالشرف ومدخليك بيتهم
احمد_انته الغريب ومصطفى مو غريب مصطفى خطب ملاك مني ورادني احجي وي ابوي
حمزه_والله انعل والدي اليوصل الهه انه ناهي عليهه
والا ابجيج دم واخليج لا انتي للسمه ولا انتي للگاع
اخليكم تبوسون القنادر
رضا_دمشي ايا قندره نبوس القنادر ابو صماخ
روح باوع لوجهك مصفح يريد ملاك هو ابو جيفه
ملاك_نصدمت من حجي احمد ومصطفى صفن من حجيه معقوله مصطفى خاطبني منهم
بس هو هم نصدم مثلي
راحو للدوانيه(الاستقبال) وانه رحت للغرفه بعد ما البنات خطيه محاوطاتني لان گمت ارجف حمزه نهى عليه والينهي عليهه ابن عمهه محد يگدر يخطبهه
بعد
رجعت للغرفه واني مصدومه ومقهوره ما اعرف اصرف
احمد_خويه مصطفى اعذرني حرجتك بس انه من عصبيتي هيج حجيت وهم احسك تميل لملاك بس تستحي تخاف ما ادري
مصطفى_خويه تريد الصدگ اختك اخت ارجال ومعدله وكل شاب يتمناهه وانه اليه الشرف اتقدملهه على سنة الله ورسوله بس خويه قبل كلشي دگل لعمي ابو حسن انه سني
احمد_خويه بس هذا الگوا.......... د نهى عليهه
واذا مارجع بالنهوى ميصير تزوج
خل ننتظر ونشوف
ابو حسن _بويه احمد هسه انتو سويتوهه جبيره لو مخليني انه اتفاهم وي اخوي هسه هذا ابن اخوي شيقنعه يرجع بالنهوه خل يصبح الصبح واروحلهم
واتفاهم وياهم
ملاك_صبح الصبح اجتني رساله من مصطفى هزاز بصدري دخلت للتواليت قريتهه
حبيبي اني خطبتج من احمد وكلفته يفتح الموظوع وي ابوج
بس اول يحلونهه وي ابن عمج لان ناهي عليج
وطمنيني لان بالي كله يمكم حياتي انتي
رديت علي
ان شاء الله تدلل ياروحي لايظل بالك
سويتلهم ريوك اتريگو وسلمت عليهم واشكرت منهم وراحو
العراريس بعدهم نايمين واحمد ماقبل يطلع للشغل باله يم رحاب وابوي راح لبيت عمي يحل السالفه
حظرت الريوگ للعرسان گعدو بالعشره الصبح اتريگو نظفت البيت ولبست عبايتي واريد اروح لبيت ام تحسين اشوف رحاب لان احمد يريد يموت عليه
كلش يحبهه وطبعه سكوتي ميشكي ويحجي
يكبت بداخله من اباوع علي احس بي شگد مشتاقلهه
وصلت لباب الحوش واطب علينه ام تحسين تهلهل
رجعت نزعت عبايتي
هله وكل الهله بخالتي ولو انه زعلانه عليجن انتي
ورحاب خليتني وحدي البارحه
كلللللللللللللللللللللللللوش كامت تهلهل وتذب جكليت ع حسن ومرته
انطتهم هديتهم وگعدنه بالدوانيه
ام تحسن_والله ياخاله لو تعرفين ظرفنه تعذرينه شتعرفين رحاب شگد تحبكم وماتگدر تعوفكم
ملاك_شصاير خاله ضل بالي
ام تحسين _والله خاله سالفه ماتسولف
هذا عمر تخبل الا يعرف الولد الجاب التلفون لرحاب ويكتله وهي ماقبلت تحجي خيرهه لو يلزمه
ويكتله لو يزوجهه
راح جاب عمامه وابن عمه وعقد الهه غصب عقد سيد وهسه حابسهه مثل الحيوان بالغرفه وانه
لا حول ولا قوه
ذاك عافني وهج من الديره وهذا ظال هو وعمامه يصولون ويجولون عليه وعلى هاي البت
ملاك_احمد گاعد على المرجوحه يسمع سوالفنه واسمع رگعت الباب مال الحوش فززتني
مااعرف عليمن انقهر وأواسيمن
احمد الي نكسر گلبه وتهشم ظلع من ظلوعه لو
رحاب الي راح يعيشوهه بسجن وتكون حبيسة حب
مامعروف مصيره بجيت نزلت دمعتي على اخوي لان ميستاهل
حبهه حب حقيقي وخاف عليهه حتى من روحه
من كل گلبه
فرحة اخوي حسن راحت من گلبي اختنگت على اخوي احمد
جاي احظر بالغده صارت ب١ونص اجه ابوي گوه
يمشي من بيت عمي تعبان حلگه يابس
احمد مارجع مانعرف وين راح من سمعو اخوتي برحاب طلعو يدورون علي لان يدرون بي شگد يحبهه
لگو گاعد يم الشط ويبجي عليهه ماقابل يرجع وياهم
صبيت غده وديت العرسان صينيتهم بغرفتهم واحنه گعدنه بالطارمه على الشميسه نتغده زوري وتمن احمر ودجاج ولبن وخظره وتمر وخبز حار وبصل اخظر
بدو يسولفون
ابو حسن_بويه سمعوني عدل
هذا حميزه معاند مو خوش ادمي مايرضه يفك النهوه يگول لو الي لو ماتصير الغيري وهاي امه
ام اللسان اكلتني وشربتني ماتخليهم يقتنهون
كلما اريد اهديهم واقنعهم تخلي على الجرح ملح وتهيجهم وانوب الزاد الطين بله سامعين بهذا الولد مصطفى خاطب ملاك من احمد وهو متخبل
علي_بويه مو بكيفهم انعل والديهم وعلي اطلع
اسحله بالشارع وانعل ابو اليطلع وراه هل خنيث
ابو حسن_بويه هي مو مال عنتكه وعصبيه واصياح
العصر اروح لرأيس الفخذ مال العشيره وهلبت الله يشوفولنه حل
ملاك_جنت ابجي على هم صارو همين همي وهم اخوي ورحاب
صار العصر راح ابوي واحمد ماكو مارجع
لليل رجع ابوي واحمد ماكو
مختنگه وظايجه العشيره صافه وي ابن عمي
للفجر واحمد ماكو اذن اذان الصبح دخل احمد عيونه دم حمر من البجي
ركضت علي شبگته مدري ابجي على حالي مدري على حاله
خويه كلشي قسمه ونصيب وهي مامقسومتلك
احمد_انتي شتحجين رحاب اوووووووف حتى بأسمهه اغلط
خويه ملاك شتحجين انه عيوني ماشافت غيرهه وگلبي ماحب
ولا راح يحب غيرهه
وهي قسمتي من اعرف انتظرهه العمر كله
من يموت رجلهه اخذهه هي الي وتبقى الي
عايش بروحهه واظل عايش بروحهه بس الموت يفرگني عنه
ملاك_بجيت من كل گلبي من كلامه حيل اثر بيه
واني شنو مصيري
ظليت بس رسائل وي مصطفى وره٣ايام راح حسن
للبصره وعلي للمحل ورضا هم خابره مصطفى راح للمذخر واحمد يطلع الصبح يرجع بنص الليل
مرة حسن بالمطبخ تغسل مواعين الصبح
طبيت للغرفه وخابرته
الو
الو
ملاك_شلونك حبيبي
مصطفى_هلو ياروح روحي بعد صماصيم گليبي
اني زين وبنيت گلبي شلونهه
ملاك_مشتاقتلك هواي وكلش وحيل
مصطفى _يمه اروح فدوه للكلش وللهواي وللحيل
اموت بسوالفج
شنو اخبار ابن عمج ماكو جديد
ملاك_ماكو بعده معند واني خايفه
اذا ما اصير الك اموت روحي وعلي
مصطفى _وانتي مخبله عاقله اعوفج من اعرف اخذج واشرد بيج خارج العراق بنيت گلبي انتي ما افرط بيج لو على گص رگبتي
ملاك_اووووووف والله من اشوف رحاب واحمد اخاف خاف مصيرنه مثلهم كل حب حقيقي
مايسهل امره بشلعان الگلب يالله
مصطفى_واني راضي ينشلع گلبي ينمرد يتهشم
طبه مرض المهم تصيرين مريتي وبحظيني
حبيبي لا تخافين اني وياج للنهايه ما اعوفج انتظرج طول عمري
ملاك_احبك وهذا المصبرني كلامك يقويني
بس هاي سالفة اشرد وياك لاتعيدهه بعد لان انه بنت عشاير ومستحيل انزل راس ابوي واخوتي
حتى لو جنت احبك
مصطفى _والله ياروحي من گد ما احبج افكر بأسوء الاحتمالات وفدوه اروحلج لااطولين عليه دائمآ
طمنيني عليج كلما تصير فرصه باجر اروح لبغداد انه ورضا خاف متحصليني لان ماكو شبكه مو تخافين
_ترحون وتجون بسلامه دربالك على رضا
بعد عيوني الله وياك
سديت التلفون ولگيت مرة حسن اخلاص بوجهي
اخلاص_ها ملوكه سمعتج تسولفين ويامن
ملاك_لا خيه انه طبعي من ارتب بالغرفه اسولف وي روحي مخبله حماتج هههههههه
اخلاص جانت فقيره خطيه بكلشي تصدگ
صدگت كملنه شغل وگعدنه على المرجوحه بالحديقه نسولف ونظحك وما احس الا باب الحوش
اندفع بقوه منو سهير وامهه
سهير_وينج بربوك ظاله تتمعشگين وتلعبين براحتج
ام حمزه_وينج ولج مليكه تاليهه وياج
ملاك_گمت على حيلي ومرت اخوي واگفه وراي
ياستار ياربي خير شكو شصاير شبيجن مدرعمات عليه واصواتجن شعلوهه شبيجن ياهو مات
ام حمزه_انتي السانج طويل يرادله گص ولج
ابني تمرض من وراج وانتي ظاله تتمظحكين
الا اكسر راسج
ملاك_والله انه ماگايلتله تمرض ونام بالفراش لو احبس روحك بالبيت مثل النسوان ولو يبقى اخر واحد ما اقبل بي لو اظل عانس
سهير_خوش اذا ما اخذناله وحده احسن منج وانتي تظلين معلگه محد يگلبج بسيطه مليكه انه الج
ملاك _يصرخن ويحجن واني گد السؤال اجاوبهن عصبن من برود اعصابي عافني وطلعن سرقيت الباب وراهن لان بس تندفع تنفتح بابنه
وره يوم الصبح جاي اكنس بالطارمه اندگ الباب ما گمت عبالي هنا رجعن لو شحنن اخوهن عليه وانه اعرف حمزه طايش
ماگمت اندك مره ثنين ثلاثه سمت صوت رضا
رضا_خايبين افتحو الباب
_رحت اركض فتحت الباب ولگيته بوجهي رضا
ومصطفى
رضا _ادخل بعد اخوك عشر دقايق بس الم ملابسي مال طلعه طب اگعد هنا على المرجوحه خويه ملوكه سوي جاي المصطفى
ملاك_هله وكل الهله بمصطفى من عيوني اخلاص تعاي سلمي على مصطفى طلعت اخلاص سلمت ورجعت لغرفتهه فقيره وتستحي حيل
رحت للمطيخ سويت جاي رضا طب يسبح
جبت الجاي لمصطفى نزلت الصينيه خله ايده على ايدي اتلمسهه حسيت سحب روحي من بين اظلوعي زاد الشوگ اله
مصطفى_ولج اشتاقيتلج وبعد گلبي مايتحمل
ملاك_وعلي انه اكثر منك شبيدي يبعد طوايف عمامي كلهم انه الشوگ ذابحني ولمست ايدك
تذوبني لو بيدي اشمر روحي عليك
گوه لازمه رويحتي
مصطفى_هو انه غير ذبت من لزمت ايدج
ملاك_بلل شفته سبل عيونه عليه عض شفته
ولج وحگ عليكم(يقصد علي) من اطخج گوه اسيطر على روحي
اريد بس اسحبج على صدري
مو رايدج بالحلال الله لاينطي ابن عمج حارمني
من حلالج وخالني اتحسر علي
اخلاص_ملاك ملاك تعاي اكلج
-اگلج حسن واصل لراس الشارع لا يجي ويشوفج اتسولفين وي الولد وتصير مشكله
ملاك_همزين گلتيلي جاذبحني لو شايفني
اخلاص_شعدج وياه
ملاك_ها ماعندي
طلع رضا اخذ غراضه وراحو لبغداد همه طلعو وحسن طب سلم وطب لغرفته مشتاق لمرته

مرن ٣اسابيع الوظع هادء وحمزه ماقبل يغير رأيه
رابع اسبوع العصر اندگ الباب طلعت فتحته رحاب
شبگتهه صار شهر لاشايفتهه ولا سامعه صوتهه
حظنتهه حيل ياربي شگد مشتاقتلج يبعد عيون اختج طبي طبي
شلون اجيتي عمر وين
رحاب_وله وراح عساه لا رجع راح للكوت لبيت عمي
اگلج ملاك وين احمد اريد اشوفه فدوه
ملاك_والله ياخيه احمد يبجي الصخر من يوم العقتي سيد وهو يطلع الصبح مايرجع للفجر يگعد
على الشط
صرخت رحاب بجت من كل گلبه
رحاب_ هذا الشط الي گلي احبج يمه وصدمني بعد ماجنه بس نتعارك انه وياه عشگته من كل گلبي
روحي متعلگه وي روحه وماترضى تنفل
انه لازم اشوفنه عبن لازم احجي وياه
ملاك_هسه اگل لحسن يخابره
خابره حسن وماصدگ اجه طاير........ يتبع