أبنتي ولكن

البارت السابع عشر

مساء الحب كيكاياتي الحلوات الراقيات لاتنسن تفاعلچن بالتعليقات والتصويت قدرو تعبي
اليوم البارت نار
بسم الله نبدي

أبنتي ولكن
بقلمي،،،
زهراء الشمري،،،،
البارت السابع عشر
يتعدن  ركض  مانعرف   المحصول
گصيرات  بفرح  بس  الأنين  يطول
تسيورة عزيز  الفرحة تگضي  بساع
والأيام  الغثيثه  بنص  گلبنه  تجول
أنام الليل ودعي  الفرج  باچر  كون
ويرد باچر يچمل حمل ظهري حمول.

           ......................     ......................
رحاب _من طلعت وشفت علي سابح بدمه
متت خوف اباوع على امي ادگ وتخرط بخدودهه
احمد شايل علي
اجه تحسين يركض چان گاعد بالركن مال راس الشارع
لزم عمر و وين اليوجعه كتله كتله بالتوثيه لحد ما
كسرله ايده هاي اول مره عمر يسكر وهاي اول مره
اشوف اخواني يضاربون
الحمد الله عدت سلامات وطلع مظروب علي
بچتفه
احمد_من سمعت صوت عمر بشارع يصيح ويفشر
طلعتله وصرنه نظارب بس هو چان ريحته تكتل من الشرب وگوه واگف طلع علي يفاككنه صار حاجوز
بيناتنه وعمر سحب سجينه وظرب علي بچتفه
هنا انه فقدت لو ماتحسين يجي چان السچينه
خليتهه ابلعومه
شلنه علي واخذناه انه وابوي للمستشفى خيطوله
الجرح حسيت بالذنب لان بسببي انظرب اخوي
صار عندي اصرار اكثر اخذ رحاب من عمر غصبن
ماعلي
رجعنه للبيت وثاني يوم طلعت اصفي غراض المحل
خليت علي نايم وطلعت من الصبح
هدى_ گعدت من الصبح متعلمه اگعد ساعه
ب٧الصبح علمود اسوي ثريد مال گبة مرگ صفره
لعمي كلش يحبهه من ايدي
كل يوميه اگعد علموده
خليت رضا بحظنه ورحت للمطبخ اسوي ريوگ واسمعه يسولف وي رضاوي
باوعتلهم مخلي رضا بدشداشته بحظنه مسويهه مثل المرجوحه ويهوسله
_ياصباح الچح ياصباح النح ياصباح رضيو
صباح العافيه اوليدي
هله برضو من باب الحوش تلگنه الغنم والهوش
هله برضو من باب الدار تلگنه الغنم والفار
_چان كلش حنين وگلبه طيب احبه حتى اكثر
من ابوي من گد ما مهتم بيه يحبني ويحب بزري
جبتله ريوگ گعد علاوي صبيتله سوب مال مرگ الكبه شربه واكله كبايه وصبيتلهم چاي وخابزتلهم
من الصبح
فرشت لعلاوي بالهول يم عمي شويه واجه حمزه
وابوي يشوفونه
گمت على شغلي نضفت البيت وغسلت هدوم
صارت بالعشره خليت جداريي على الطباخ
ويندگ الباب ومن يفتحه عمي ام تحسين وتحسين
اجو يعتذرون
ام تحسين_خويه انه خجلانه وكلش ما الي عين اباوع
بوجوهكم من عملة ابني السگط
الله ينتقم منه فشلني وياكم خويه ابو حسن تعرف
انه حرمه و وحدي ربيتهم ونكسر ظهري عليهم
بس هذا ربات عمامه ما أگدرله
وانه أگلك شتأمر انه و ولدي جدامك
ابوحسن_خويه افه عليج احنه اهل مو بس جيران
واذا على عمر انه ما اعتب على واحد مثله وهاي
جيتكم تسوه عندي عمر  انه اعرف هو مايطخ راس ويجي يعتذر بس انه اريد اگرص اذانه
الي يمك طلب بويه تحسين
_گول عمي تأمرني امر انته
_ما يأمر عليك ظالم
بويه اذا موافقين والبت موافقه عگب باجر اجيب سيد وعمامنه ونجي نعقد
_انته عمي تأمرني امر انته شتأمر انه برسم الخدمه
هداوي_چنت وره باب الهول اسمع حچيهم كلش
فرحت لان اريد تجي وياي وحده بالبيت
ركضت خابرت احمد
الو
الو
ها حموده وين انت
_ليش شكو صاير شي علاوي بي شي
_لا اريد ابشرك اجو بيت ام تحسين يشوفون علاوي ويعتذرون من عمي
وعمي اتفق وياهم عگب باجر تعقدون انته ورحاب
_لا بشرفچ صدگ تحچين
_اي والله هسه سمعتهم گلت خل افرحك
_چا خل اخابر رحاب افرحهه خطيه
رحاب_وره ساعه احمد دزلي رساله دگول
_حظري نفسچ بعد يومين تصيرين حلالي
_ماصدگته گلت هذا يجوز يريد ياخذ ثاره من عمر
وهيچ يحچي
شويه وتجي امي لگت عمر امدد راح صب ايده واجه
_ها يمه صبيته كله من وره عمايلك السوده
فشلتنه وي الوادم وفوگاهه ماعاجبك حتى مارضيت
تروح ويانه اطيح على ابو حسن و ولده
_اي مو ولد الباشا واروح اطيح عليهم
_چا ولد الباشا مو تذب حرگتك بالوادم كله منو وره
عمامك ولك اول تالي علمود مره تروح تسكر وتهد
على العالم
واسمعني زين عمير عگب باجر خطبة اختك
اذا سويتلك سالفه وخربت على اخيتك والله
ومال الله اطلع ابوك من گبره وانبشه نبش
_اي مو هي گوتره خطبتهه والله على گص رگبتي
المن معرسه تظل تربي ابنهه وتگعد وتنشب لو مفلفله على العرس
_طيح الله حظك يايمه وامداني على هل تربيه
ماعرفة اربيك هو انته واحد سگط شترجه منك
تريده تبقى خدامه باچر عگبه الك ولمرتك
_چان يباوعلي بحقد عبالك عدوته مو اخته دار
وجهه عليه وگال
_والله اذا ماخليتچ تبچين دم ما اطلع ابن ابوي
_ما اهتميت لحچيه لأن مأمنه هل مره امي وخواتي
وتحسين وياي مايگدر يخرب شي
طلع مارجع لليل سوتله امي عشه گلبهه ماينطيهه
يبقى بلا عشه وهو ولا چنه مسوي شي
لزمت تلفوني ودگيت على ملاك
الو
الو
هلا وغلا
_هله بيچ خيه شلونچ صايره تحچين بغدادي
غلا وهيچ
_هههههههه لا ولچ تعلمتهه من حمواتي شو حلوه بالحلگ تعاي ولچ شني هذا الخبر الحلو
_اي والله ياخيه غير عدت سلامات والله ستر
هنا انه چفصت ثاري ملاك ماگايليلهه على ضربة
علي بس على الخطوبه
_يا ولچ شنيه العدت سلامات
_ها موكو شي
_لا جذبين عليه اهلي بيهم شي
_ولچ لا شبيچ بس عمر واحمد تعاركو وعمر ضرب
علي وهل عجلو بخطبتنه عناد بعمر
ملاك_سديت التلفون من رحاب واتصلت على
هداوي
اعرفهه ماتچذب عليه اذا اسألهه
وسولفتلي السالفه شبعت قهر والليل كله مانايمه بالي يم اخوتي لان هذا عمر شراني ويحب الطلايب
چان مصطفى نايم من گعدنه الصبح گالي اوديچ
لأهلچ فؤحت حيل من كل گلبي
تغدينه ورحنه لأهلي ذبني ورجع مصطفى لان عنده
شغل مايگدر يبات عود باچر يجيب اهله ويجي
لخطوبة احمد
دخلت لبيتنه تلگتني هداوي وابوي هيبته وعگاله وعكازته الي من اشوفهن يردن روحي
عبالك صار سنه مو شهر مفارگتهم
ركضت لحظن ابوي شبگته وشميته وباسني من حنچي بوسته المتعوده عليهه
افييييييش ياريحة هلي يابويه اروح فدوه لريحتك
_يابعد عيون ابوچ من عمري على عمرچ بويه
والله البيت مايسوه بلياچ ولاتهون هديوه
مامقصره بنيت عمچ بس مچانچ فارغ يابويه
سلمت على هداوي واخوتي فرحو بجيتي خطيه
احتارو شيسون عليوان راح سوالي كباب شوي
واحمد جاب ببسي وحلويات
ظليت الليل كله العب وي رضاوي ابن علي
بعد گلب عمتك صاير شحلاتك تنحط بالگلب
اجه ثاني يوم گمت من الصبح وفدوه لهداوي ولا محسستهم بغيابي تگعد مثلي من السبعه لأبوي يحب الكبه تسويله ثريد وتخبزلهم وما مقصره
گمت وياهه ساعدتهه ونظفت وياهه صار هواي
مالازمه المكناسه حمواتي مايخلني
صار الظهر واحمد كلش فرحان راح للحلاق زين
شعره وعدل لحيته
سويتلهم غده من ايدي چانو يحبون البرياني من
ايدي على الدجاج صتلهم چاي هداوي
وره شويه اجه حمزه ومرته وعمي مرة عمي مارضت
تجي حزينه على بنتهه
وانه كيفت ما اجت لان ادري بيهه تذب حچي يغث
للعصر التمو عمامنه
ورحنه لبيت ام تحسين چانت رحاب لابسه فستان
وكاويه شعرهه چان قصير كاري
وخاله مكياج خفيف فرحانه ظحكتهه تارسه وجهه
چنت لازمه گلبي بأيدي اخاف من عمر ودگايگه
اعرف بي مو خوش ادمي ودگاته كلهه ناقصه مثله