حيرام الغرام مكتملة ( بقلم : دينا فتحي )

الفصل الرابع

في بيت عم مختار

بعد مرور ثلاث ايام

كانت غرام تجلس في شقتها بين جيرانها وأهل منطقتها لكي يواسوها علي فقدان ابيها ......كانت في حالة عدم استيعاب دموعها علي وجهها وطوال الوقت صامت تمسك في يد أختها وهم الاثنان يبكون علي فقدان أبيهم حين جاءت عفاف والدة حيرام قائلة بحزن : كفاية يا بنات كدا حرام عليكم .....هو في مكان احسن

منار ببكاء وهي تنظر لها قائلة: احنا مكنش لينا غيره في الدنيا دي يا خالتي ......هو الوحيد اللي كان بيصبرنا علي موت امنا

عفاف وهي تحضنها قائلة ببكاء هي الأخري: وانا روحت فين بس يا بنتي......انا من النهاردة مكان أمكم وابوكم .....وكل اللي تحتاجه انا تحت امرك .....ثم نظرت إلي غرام قائلة بعشم : و انتي يا غرام اللي تحتاجي انا تحت امرك يا بنتي

غرام وهي تمسك دموعها قائلة: ربنا يخليكي يا خالتي

ياسمين وهي تطبطب علي ظهر غرام قائلة: غرام انتي لازم تكوني اقوي من كدا علشان منار دلوقتي ملهاش غيرك

غرام وهي تمسك في يد أختها وتاخذها في احضانها قائلة بحنان : وانا برضو مليش غيرها في الدنيا

عفاف وهي تطبطب علي ظهرهم هما الأثنين قائلة بحزن علي حالهم : ربنا يخليكم لبعض يا بنتي ومتتحرموش من بعض ابدا......يلا عايزين حاجة انا انزل دلوقتي علشان الوقت أتأخر.....وان شاء الله كل يوم ابقي اعدي عليكم علشان لو محتاجين حاجة

غرام : متغلبيش نفسك يا خالتي .....احنا كويسين الحمد الله

عفاف بعشم : يعني ايه مغلبش نفسي انتوا من النهاردة ملزومين مني......زيكم زي ياسمين بنتي كدا

منار بابتسامة حزينة : ربنا يخليكي يا خالتي

عفاف : طيب يلا قوموا ارتاحوا شوية .....والناس اهي مشيت واحنا هننزل دلوقتي .....وقفله الباب كويس عليكي انتي واختك .....ولا ابيت معاكي

غرام وهي تطبطب علي رجلها قائلة : قومي روحي يا خالتي انتي بقالك معنا تلات تيام .....وانا اخلي بالي مني ومن اختي ......متقلقيش علينا

عفاف وهي تقوم من جانبها هي وياسمين قائلة: طيب انا امشي .....محتاجين حاجة يا بنات

غرام ومنار : شكرا يا خالتي علي وقفتك معنا

نزلت عفاف وياسمين من شقة غرام وهم نازلين من علي السلم قابلوا حيرام وهو يصعد سألته عفاف قائلة بتعجب : رايح فين يا حيرام

حيرام ببساطة : طالع اطمن علي غرام يا امي

عفاف بنفي : لا يا بني مينفعش تطلع عندهم لوحدك .....من النهاردة البيت مبقاش فيه راجل.....احنا هنا في حارة ومش عايزين حد يجيب في سيرتهم دول برضو بنات .....وانت تعرف في الأصول