حيرام الغرام مكتملة ( بقلم : دينا فتحي )

الفصل الخامس عشر

بعد مرور يومين

امام الورشة كان يجلس حيرام ومصطفي وخالد معنا يتحدثون في مواضيع مختلفة حين سأل حيرام خالد قائلا : مقولتليش يعني يا عم خالد الجواز عامل معاك ايه

خالد بكذب : الجواز دا مفيش احسن منه يا صاحبي

فابتسم له حيرام قائلا وهو يضربه علي كتفه : والبت ياسمين عاملة معاك ايه .....ثم اكمل بتوعد : اوعي تزعلها ياض والا عليا الحرام ادفنك مكانك لو عرفت بس انك دوستلها علي طرف

خالد بكذب أكثر : عيب عليك يا صاحبي دا اختك جو عيني وفوق راسي وفي الحتة الشمال كمان.....حتي اسألها قولها خالد حبيبك بيتعامل معاكي ازاي ( يخربيت امك يا شيخ هتولع من كتر الكذب 😂)

حيرام بغيرة : ما خلاص يا عم خالد لاحظ انها اختي.....ثم اكمل بجد : اهم حاجة خلي بالك منها بجد يا خالد مش عايز يكون كلام وخلاص انا مليش غيرها دي اختي الوحيدة

خالد بجد : حاضر يا حيرام

مصطفي بضيق : ما تبطلوا كلام بقا.....وحسوا ان في واحد اعزب قاعد في وسطيكم .....رعوا مشاعر امي شوية

حيرام بطريقة سوقية : وانت ايه اللي مقعدك في وسطينا يا شملول ......ما تغور ياض تشوف شغلك

مصطفي بطريقة طفولية مضحكة : لا مش ورايا شغل انا عايزة اقعد معاكم

حيرام بقرف : تاتك نيلة ما انت عيل هبل ......انا مش عارف يا ربي دا ازاي اخو المعلم حيرام رضوان

خالد بضحك : معلش يا حيرام دا زي اخوك برضو

مصطفي وهو ينظر الي حيرام قائلا برجاء : بقولك ايه يا حيرام......انا عايز اتجوز

حيرام باستغراب : لا إله إلا الله يا بني ما انت متجوز .....ولا عايز تجوز علي منار

مصطفي بضيق : يا عم اتجوز ايه واتنيل ايه هو أنا عارف اتجوزها علشان تقولي اتجوز غيرها

حيرام بضيق : اومال ايه عايز تجوز دي ......ما انت متنيل متجوز

مصطفي بتوضيح: يا حيرام عايز انا والبت نتلم في بيت واحد .....احسن من اللي احنا في دا

حيرام بخشونة : طيب يا خويا خلص شقتك الاول وبعد كدا تعال اتكلم

مصطفي بضيق : ما الشقة لسه مش هتخلص قبل شهرين .....والواحد مش قادر يصبر بصراحة

خالد وهو ينظر الي مصطفي قائلا بقرف : يلعن ابو المحن في الارض يا اخي .......متسترجل يا واد شوية واصبر هي هتروح منك فين

مصطفي بضيق : ليك حق تكلم براحتك ما انت لما قولت يا جواز اتجوزت اقل من شهر مش انا اللي قربت أعجز ومش عارف اتجوز

خالد بقرف : يخربيت ابو القر يا شيخ ....بدل يا مصطفي قر بدل ما اولع وانا قاعد قدامك

اخذ حيرام يضحك قائلا : والله يا بني من كتر قره نمت علي الكنبة يوم الدخلة